ᒠᓐ 21 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᓄᑯᓯᔅᑐᐛᑦ ᓂᔄᐅᑕᒡ ᐅᒋᔅᒋᓄᐊᒧᐛᑭᓇ John 21.1-19 (Easter-3 Year C)

¹ ᐸᑎᒪ ᒪᒃ ᐊᑯ ᒥᓐ ᒋᓴᔅ ᑲ ᓄᑯᓯᔅᑐᐛᑦ ᐅᒋᔅᒋᓄᐊᒧᐛᑭᓇ ᐊᓐᑕ ᐊᓂᔭ ᓴᑲᐃᑭᓂᔪᐤ ᑕᐃᐱᕆᔭᔅ ᑲ ᐃᓯᓂᐧᑲᑕᔨᒡ᙮ ᒪᐅᑕ ᒪᒃ ᑲ ᐃᓯ ᓄᑯᓯᔅᑐᐛᑦ᙮

² ᒪᒧᐤ ᒋ ᑕᐅᒡ ᐅᒡ ᒥᓯᐛ, ᓴᐃᒥᓐ ᐱᑕᕐ, ᑥᒥᔅ, ᐊᓐ ᑲ ᓂᓯᒡ ᑲ ᐃᓯᓂᐧᑲᑕᑭᓄᐅᑦ, ᓇᑕᓂᔭᓪ, ᐊᓐ ᑲᐃᓇᒡ ᑲ ᐅᒋᑦ ᐊᓐᑕ ᑲᓕᓕ ᐊᔅᒋᒡ ᑲ ᑎᑯᓂᔨᒡ, ᑭᔭ ᐊᓂᔭ ᓂᓱ ᓴᐱᑎ ᐅᑯᓴ ᑭᔭ ᓂᓱ ᑯᑎᑭᒡ ᒋᔅᒋᓄᐊᒧᐛᑭᓐᒡ᙮

³ ᐊᑯ ᓴᐃᒥᓐ ᐱᑕᕐ ᒂ ᐃᑕᑦ ᐊᓂᔭ ᒋᔅᒋᓄᐊᒧᐛᑭᓐᒡ “ᓂᑭ ᓂᑐᓂᒪᓴᓐ᙮” ᒂ ᐃᑎᑯᑦ, “ᒋᑭ ᐎᒐᐅᑎᓇᓐ᙮” ᒂ ᐳᓯᒡ᙮ ᐃᔅᑭᓐ ᑎᐱᔅᑲᐛ ᒪᒃ ᒋ ᑕᐅᒡ ᐊᑲ ᐅᒋ ᐱᑕᐅᔭᒡ᙮

⁴ ᐃᔅᐱ ᒪᒃ ᐊ ᐊᑎ ᐸᑕᐱᓂᔨᒡ, ᒋᓴᔅ ᒋ ᓂᐳᐅᐤ ᐊᓐᑕ ᓯᓱᒡ, ᒥᒄ ᓇᒪ ᐅᒋ ᒋᔅᒐᔨᒪᐅᒡ ᐊᓐᒡ ᒋᔅᒋᓄᐊᒧᐛᑭᓐᒡ ᒋᓴᓴ ᐊᓂᔭᔪᐛ᙮

⁵ ᒋ ᐃᑎᑯᐅᒡ ᒪᒃ, “ᐊᔅᒄ ᐊ ᓇᒪ ᒋ ᐱᑕᐅᔭᓇᐛᐤ ?” “ᓇᒪ,” ᒋ ᐃᑕᐅᒡ᙮

⁶ ᐊᑯ ᒂ ᐃᑕᑦ, “ᒋᑭ ᐱᑕᐅᔭᓇᐛᐤ ᐊᓐᑕ ᒋᒥᔪᓂᐛᒡ ᐃᑕᒐ ᐃᓯ ᐱᑭᔅᑐᐛᐊᒂ ᐊᓐ ᒋᑦ ᐊᐃᐱᐛᐤ᙮” ᑭᑈ ᑲ ᐱᑭᔅᑐᐛᐛᒡ ᐊᓂᔭ ᐅᑦ ᐊᐃᐱᐛᐛ᙮ ᓇᒪ ᐅᒋ ᓱᐱᑕᐅᒡ ᐊᓂᔭᔪᐛ ᐅᑦ ᐊᐃᐱᐛᐤ ᐃᔅᐱ ᐛᒋᐱᑕᒡ ᐊ ᐃᔅᐱᔅ ᒋ ᒥᒐᑎᔨᒋ ᐅᓂᒪᓯᒧᐛᐛ᙮

⁷ ᐊᓂᔭᔪᐛ ᒪᒃ ᒋᔅᒋᓄᐊᒧᐛᑭᓐ ᒋᓴᔅ ᑲ ᓴᒋᐊᑦ, ᒋ ᐃᑕᐤ ᐊᓂᔭ ᐱᑕᕋ, “ᐅᑎᐸᔨᒋᒐᐤ ᐊᓐ᙮” ᐃᔅᐱ ᒪᒃ ᓴᐃᒥᓐ ᐱᑕᕐ ᐱᔭᑕᐧᒃ ᐅᑎᐸᔨᒋᒐᐛ ᐊ ᐊᐎᔨᒋ ᐊᓂᔭᔪᐛ ᒋ ᐳᔅᑎᔅᑭᒻ ᐅᑦ ᐊᑯᑉ ᐊᓂᔭ ᑲ ᒥᓇᐧᒃ ᒐ ᐊᑐᔅᒐᑦ, ᐊᑯ ᑲ ᐱᑭᔅᑐᐛᒂᔅᑯᑎᑦ᙮

⁸ ᐊᑯ ᐊᓐᒡ ᑯᑎᑭᒡ ᒋᔅᒋᓄᐊᒧᐛᑭᓐᒡ ᑲ ᐸᒋ ᓇᑎᑭᒪᐱᔨᒡ, ᐊ ᐅᑕᐸᒡ ᐊᓂᔭ ᐅᑦ ᐊᐃᐱᐛᐛ ᐊ ᓴᑭᔅᒋᓇᔨᒋ ᓂᒪᓴ᙮ ᓇᒪ ᒪᒃ ᓇᔅᒡ ᑕᐅᒡ ᐅᒋ ᐃᑕᐅᒡ, ᓴᓯᑲᓐ ᓂᔅᑐ ᒥᑕᓯᒥᑎᓄᐤ ᒥᓯᑦ ᒋ ᐃᔅᐱᓯᓇᑯᓂᔨᒐ ᐊᓐᑕ ᐅᒋ ᓯᓱᒡ᙮

⁹ ᐃᔅᐱ ᒪᒃ ᑲ ᑭᐸᒡ ᒋ ᐛᐸᑎᒧᒡ ᐃᔅᑯᑕᔪᐤ ᓂᒪᓴ ᐊ ᑎᑭᔄᑭᓄᔨᒋ ᐊᓐᑕ ᑭᔭ ᐸᒂᓯᑭᓇ᙮

¹⁰ ᐊᑯ ᒋᓴᓴ ᒂ ᐃᑎᑯᒡ, “ᐸᓱᐛᐧᑯᒡ ᐊᓐᒡ ᐱᔅᒐ ᓂᒪᓯᒡ ᑲ ᐱᑕᐅᔭᔭᒄ᙮”

¹¹ ᐊᑯ ᓴᐃᒥᓐ ᐱᑕᕐ ᒂ ᐊᒂᓯᐱᑕᑦ ᐊᓂᔭ ᐊᐃᐱᔭ᙮ ᓴᓯᑲᓐ ᐸᐃᑯ ᒥᑕᓯᒥᑎᓄᐤ ᒥᓐ ᐱᑕᑕᒡ ᑕᑐᔪᐤ ᐊᓱ ᓂᔅᑐ ᒋ ᑕᑎᓯᒐᓂᐃ ᐊᓂᔭᔪᐛ ᓂᒪᓴ᙮ ᐊᑎ ᒪᒃ ᐊᓂᔭ ᐊᒋ ᐃᔅᐱᔅ ᓴᑭᔅᒋᓇᔨᒋ ᓂᒪᓴ ᓇᒪ ᐃᔭᐱᒡ ᐅᒋ ᐱᑯᐱᔪᐛ ᐊᓂᔭ ᐅᑦ ᐊᐃᐱᐛᐛ᙮

¹² ᐊᑯ ᑲ ᐃᑎᑯᒡ ᒋᓴᓴ, “ᐊᔅᑎᒧᒄ, ᐸᒋ ᒥᒋᓱᒄ᙮” ᓇᒪ ᒪᒃ ᐛᐛᒡ ᐸᐃᒄ ᐊᓐᒡ ᒋᔅᒋᓄᐊᒧᐛᑭᓐᒡ ᐅᒋ ᐎ ᐃᑕᐅᒡ, “ᐊᐛᓐ ᒋᔾ ?” ᐛᔅ ᒋ ᒋᔅᒐᔨᒪᐅᒡ ᐅᑎᐸᔨᒋᒐᐛ ᐊᓂᔭᔪᐛ᙮

¹³ ᒋᓴᔅ ᒪᒃ ᒋ ᓇᑕᐤ, ᒂ ᐅᑎᓇᑦ ᐊᓂᔭ ᐸᒂᓯᑭᓇ ᐊᑯ ᒂ ᒪᒪᑎᓂᒧᐛᑦ, ᑭᔭ ᐊᓂᔭ ᓂᒪᓴ ᐊᐅᑯᓐ ᑲ ᐃᑐᑐᐛᑦ᙮

¹⁴ ᐊᐅᒄ ᒪᒃ ᐅᔭ ᓂᔍᐤ ᑲ ᓄᑯᓯᔅᑐᐛᑦ ᒋᓴᔅ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᑲ ᐃᔅᐱᔅ ᐅᓂᔅᑲᑦ ᓂᐳᐅᓂᒡ ᐅᒡ᙮

ᒋᓴᔅ ᑭᔭ ᐱᑕᕐ

¹⁵ ᐃᔅᐱ ᒪᒃ ᑲᒋ ᐃᓯ ᒥᒋᓱᒡ, ᒋᓴᔅ ᒋ ᐃᑕᐤ ᓴᐃᒥᓐ ᐱᑕᕋ, “ᓴᐃᒥᓐ, ᒋᔾ ᑲ ᐅᑯᓯᑐᑕᔅᒃ ᒠᓐ, ᐅᔅᑕ ᐊ ᓂᔾ ᒋ ᓴᒋᐃᓐ ᐃᔅᐱᔅ ᐅᒡ ?” ᐊᑯ ᓴᐃᒥᓐ ᐱᑕᕐ ᒂ ᐃᓯ ᐎᑎᒧᐛᑦ, “ᓂᐦᐃ, ᐅᑎᐸᔨᒋᒐᐤ, ᒋ ᒋᔅᒐᔨᑕᓐ ᐊ ᓴᒋᐃᑕᓐ᙮” ᒋᓴᔅ ᒪᒃ ᒋ ᐃᑕᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮”

¹⁶ ᓂᔄᐤ ᒪᒃ ᒥᓐ ᒋᓴᔅ ᒋ ᐃᑕᐤ ᐊᓂᔭ ᓴᐃᒥᓐ ᐱᑕᕋ, “ᓴᐃᒥᓐ, ᒠᓐ ᑲ ᐅᑯᓯᑐᑕᔅᒃ, ᒋ ᓴᒋᐃᓐ ᐊ ?” ᐊᑯ ᑲ ᐃᓯ ᐎᑎᒧᐛᑦ, “ᓂᐦᐃ, ᐅᑎᐸᔨᒋᒐᐤ, ᒋ ᒋᔅᒐᔨᑕᓐ ᐊ ᓴᒋᐃᑎᓐ᙮” ᒋᓴᔅ ᒪᒃ ᒋ ᐃᑕᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮”

¹⁷ ᓂᔍᐤ ᒪᒃ ᒥᓐ ᒋᓴᔅ ᒋ ᐃᑕᐤ, “ᓴᐃᒥᓐ, ᒠᓐ ᑲ ᐅᑯᓯᑐᑕᔅᒃ, ᒋ ᓴᒋᐃᓐ ᐊ ?” ᐊᑯ ᐱᑕᕐ ᓇᔅᒡ ᑲ ᒥᒐᔨᑕᐧᒃ ᐛᔅ ᐊᑯ ᓂᔍᐤ ᑲ ᑯᒂᒋᒥᑯᑦ ᒋᓴᓴ ᐊ ᐃᑎᑯᑦ, “ᒋ ᓴᒋᐃᓐ ᐊ ?” ᐊᑯ ᑲ ᐃᑕᑦ, “ᐅᑎᐸᔨᒋᒐᐤ, ᒥᓯᐛ ᒐᒂᓐ ᒋ ᒋᔅᒐᔨᑕᓐ, ᒋ ᒋᔅᒐᔨᑕᓐ ᐊ ᓴᒋᐃᑕᓐ᙮” ᒋᓴᓴ ᒪᒃ ᒋ ᐃᑎᑯᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮

¹⁸ ᑯᐃᔅᒄ ᒋ ᐎᑎᒪᑎᓐ, ᐊᔅᒄ ᐊᒋ ᐅᔅᒋᓂᒋᓱᐎᓐ ᒥᒄ ᑕᓐ ᐛ ᐊᐃᑎᔨᓐ ᔅᒋ ᐃᑎᓐ ᑭᔭ ᒥᒄ ᑕᓐᑕ ᐛ ᐃᑐᑕᔨᓐ ᐊᑯᑕ ᑲ ᐃᑐᑕᔨᓐ᙮ ᐃᔅᐱ ᒪᒃ ᒋᓴᐃᔪᔨᓇ, ᓱᐅᓂᔅᒐᔨᓇ ᒪᒃ ᒋᑭ ᒪᑯᐱᑕᑭᓄᐛ ᔅᑎᒋᔭ ᐊᑯ ᒐ ᐃᑐᑕᐃᑯᔨᓐ ᐊᓐᑕ ᐊᑲ ᐎ ᐃᑐᑕᔨᓐ᙮”

¹⁹ ᐅᔭ ᒪᒃ ᒋᓴᔅ ᑲ ᐃᔅᒋᔄᑦ ᒋ ᓂᑐᐛᔨᒪᐤ ᒐᒋ ᒋᔅᒐᔨᑎᒥᔨᒋ ᑕᓐᑕ ᒐ ᐃᓯ ᓂᐱᔨᒋ ᒐᒋ ᐅᒋ ᒋᔅᑕᔨᒪᑭᓄᔨᒋ ᒋᓴᒪᓂᑐᐛ᙮ ᐊᑯ ᒋᓴᔅ ᐊᑕᑦ, “ᐸᒋ ᐱᐸᐎᒐᐎ᙮”

ᒋᓴᔅ ᑭᔭ ᐊᓐ ᑯᑎᒃ ᒋᔅᒋᓄᐊᒧᐛᑭᓐ

²⁰ ᐱᑕᕐ ᒋ ᒂᔅᒋᑲᐳᐤ ᒂ ᐛᐱᒪᑦ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ, ᐊᓂᔭ ᒋᓴᓴ ᑲ ᓴᒋᐊᔨᒋ᙮ ᐊᐅᑯᓐ ᐊᓂᔭ ᑲ ᐊᔅᐱᒋᓯᒧᔨᒋ ᒋᓴᓴ ᐊ ᑕᔨᒋ ᒪᒂᒡ ᑲ ᒥᒋᓱᒡ ᑭᔭ ᑲ ᐃᓯ ᑯᒂᒋᒪᑦ, “ᐅᑎᐸᔨᒋᒐᐤ, ᐊᐛᓐ ᒐ ᐎᔭᓯᐱᔅᑎᓂᔅᒃ ?”

²¹ ᐃᔅᐱ ᐎᔭᐱᒪᑦ ᐱᑕᕐ ᐅᔭ ᓇᐸᐛ ᒋ ᑯᒂᒋᒪᐤ ᒋᓴᓴ, “ᐅᑎᐸᔨᒋᒐᐤ, ᐅ ᒪᒃ ᐎᔾ ᓇᐸᐤ ?”

²² ᒋᓴᓴ ᒋ ᐃᑎᑯᐤ, “ᓂᑐᐛᔨᒥᑲ ᒐᒋ ᐱᒪᑎᓯᑦ ᐸᑐᔅ ᒥᓐ ᑎᑯᓯᓄᒐ, ᑕᓐ ᒪᒃ ᒐ ᐃᑎᔨᓐ ᒋᔾ ? ᐸᒋ ᓇᓴᐎ ᒋᔾ᙮”

²³ ᐊᑯ ᒂ ᒥᓯᑕᐱᔨᒡ ᑎᐸᒋᒧᐅᓐ ᐊᓐᑕ ᒥᓯᑕ ᐎᐧᑲᓂᓯᒪᐅᒡ ᐊ ᑕᒡ ᐊᓂᔭ ᒐ ᐊᑲ ᐅᒋ ᓂᐱᑦ ᐅ ᒋᔅᒋᓄᐊᒧᐛᑭᓐ᙮ ᒥᒄ ᒪᒃ ᓇᒪ ᐅᒋ ᐃᔅᒋᔄᑯᐱᓇ ᒋᓴᔅ ᒐ ᐊᑲ ᐅᒋ ᓂᐱᔨᒋ᙮ ᒋ ᐃᑕᐤ, “ᓇᑐᐛᔨᒪᐅᑕ ᐊᔅᒄ ᒐᒋ ᐱᒪᑎᓯᑦ ᑎᑯᓯᓄᒐ, ᑕᓐ ᒪᒃ ᒐ ᐃᑎᔨᓐ ᒋᔾ ?”

²⁴ ᐊᐅᑯᓐ ᐅ ᒋᔅᒋᓄᐊᒧᐛᑭᓐ ᑲ ᑎᐸᑕᐧᒃ ᐅᔭ ᒐᒂᔪᐛ, ᑭᔭ ᑲ ᒥᓯᓇᐊᐧᒃ ᐅᔭ ᒐᒂᔪᐛ᙮ ᒋ ᒋᔅᒐᔨᒪᓄᐤ ᒪᒃ ᐊ ᑕᑈᒥᑭᓂᔨᒡ ᒥᓯᐛ ᑕᓐ ᑲ ᐃᓯ ᐎᑕᐧᒃ᙮

ᐊ ᐊᑎ ᒋᓯᐱᔨᒡ ᐅ ᒥᔽᒋᒧᐅᓐ

²⁵ ᒥᒐᓂᔪᐤ ᒪᒃ ᐃᔭᐱᒡ ᑯᑎᒃ ᒐᒂᔪᐤ ᒋᓴᔅ ᐊᒋ ᐃᑐᑕᐧᒃ᙮ ᒥᓯᐛ ᐸᐸᐃᒄ ᐛᐎᑕᑭᓄᐅᒋ ᒐᒂᔪᐛ ᑕᓐ ᑲ ᐃᑎᑦ, ᓇᒪ ᒋᐸ ᐅᒋ ᑕᐱᔅᑕᐛ ᐅᑕ ᐊᔅᒋᒡ ᐅᓯᑕᑭᓄᐅᒋ ᒥᓯᓇᐃᑭᓇ᙮