ᒠᓐ 19 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑈᓚᑦ ᒂ ᐱᔅᑎᓇᑦ ᒋᓴᓴ ᒐᒋ ᒋᔅᑕᔎᑕᑭᓄᐎᒋ ᒋᐱᔭᑎᑯᒡ 1 ᐊᑯ ᑈᓚᑦ ᒂ ᐃᑎᓱᐛᑕᑦ ᒋᓴᓴ ᒐᒋ ᔅᑐᑕᐊᑭᓄᔨᒋ ᑭᔭ ᒐᒋ ᐱᓯᔅᑕᐛᑭᓄᔨᒋ᙮ 2 ᐊᓐᒡ ᒪᒃ ᐊᓯᒪᑭᓂᓯᒡ ᒋ ᐅᓯᑕᐅᒡ ᐅᒋᒪᐤ ᐊᑯᓂᔎᐅᓂᔪᐤ ᑲ ᑲᓱᑕᐛᔨᒋ ᓂᐱᓯᔭᑎᒂ ᐊ ᐊᐱᒋᑕᒡ᙮ ᒂ ᐳᔅᑭᒧᑎᔭᒡ ᒋᓴᓴ ᐊᓂᔭ ᐊᑯᓂᔎᐅᓂᔪᐤ᙮ ᑭᔭ ᐊ ᒋᓏᑭᓂᔨᒡ ᐊᑯᐱᔪᐤ ᐊ ᒥᒂᑭᓂᔨᒡ ᒋ ᐳᔅᑭᒧᑎᔭᐅᒡ᙮ 3 ᒋ ᒪᔭᔨᒪᐅᒡ ᒧᔭᒻ ᐊ ᒪᒥᒋᒪᒡ ᐊ ᐃᑕᒡ, “ᐊᐅᒄ ᒋᔾ ᒍᐤ ᐃᔪᒡ ᐅᒋᓴᐅᒋᒪᒧᐛᐛ᙮” ᑭᔭ ᒋ ᐅᑕᒥᒂᐛᐅᒡ ᐅᑎᒋᐛᐛ ᐊ ᐊᐱᒋᑕᒡ᙮ 4 ᒥᓐ ᑲ ᐎᐎᑦ ᑈᓚᑦ ᒂ ᐃᑕᑦ ᐊᓂᔭ ᒍᐤ ᐃᔪᐛ, “ᒥᓐ ᒋᑭ ᐸᒋ ᐎᐎᑕᐊᑭᓄᐤ ᐅ ᓇᐸᐤ ᒐᒋ ᐛᐸᑎᒪᒄ ᐊᑲ ᒥᔅᑭᒧᒡ ᑕᓐ ᒐᒋ ᐃᓯ ᓂᓱᐅᓇᒋᒥᒃ᙮” 5 ᐊᑯ ᒋᓴᔅ ᑲ ᐸᒋ ᐎᐎᑦ ᐊᓐᑕ ᐊᓂᔭ ᒋᓴᐅᒋᒪᐅᒋᐛᐱᔪᐤ ᐊ ᒋᔅᑲᐧᒃ ᐊᓂᔭ ᐅᒋᒪᐤ ᐊᑯᓂᔎᐅᓂᔪᐤ ᑲ ᑲᓱᑕᐛᔨᒋ ᓂᐱᓯᔭᑎᑯᒡ ᑲ ᐅᒋ ᐅᓯᑕᑭᓄᔨᒡ ᑭᔭ ᐊᓂᔭ ᑲ ᒋᓏᑭᓂᔨᒡ ᐊᑯᐱᔪᐤ ᑲ ᒥᒂᑭᓂᔨᒡ ᐊ ᒋᔅᑲᐧᒃ᙮ ᐊᑯ ᑈᓚᑦ ᒂ ᐃᑕᑦ ᐊᓂᔭᔪᐛ ᒍᐤ ᐃᔪᐛ, “ᑭᓄᐛᐱᒪᐧᒄ ᒪ ᐅ ᓇᐸᐤ᙮” 6 ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᐃᔅᐱ ᐎᔭᐱᒪᒡ ᒋᓴᓴ, ᒋ ᑕᑈᐅᒡ ᐊ ᐃᔅᒋᔄᒡ, “ᒋᔅᑕᔎᑕᐧᒄ, ᒋᔅᑕᔎᑕᐧᒄ᙮” ᑈᓚᑦ ᒋ ᐃᑕᐤ, “ᒋᔨᐛᐤ ᒋᔅᑕᔎᑕᐧᒄ᙮ ᓇᒪ ᓂ ᒥᔅᑭᒺᓐ ᑕᓐ ᑲ ᐃᓯ ᒥᒋᑐᑎᒧᒂ᙮” 7 ᐊᑯ ᐊᓐᒡ ᒍᐤ ᐃᔪᒡ ᑲ ᐃᓯ ᐎᑎᒧᐛᒡ ᑈᓚᑕ ᐊ ᐃᑕᒡ, “ᓂ ᑭᓄᐛᔨᑕᓇᓐ ᐎᓱᐛᐅᓐ, ᐃᑎᔅᑕᐤ ᐊᓐᑕ ᓂᐎᓱᐛᐅᓇᒡ ᒐᒋ ᐃᑎᓱᐛᓄᐎᒡ ᒐᒋ ᓂᐸᐊᑭᓄᐅᑦ ᐊᓂᔭ ᐊᒋ ᐃᔅᒋᔄᑦ ᐎᔾ ᐊ ᐊᐎᑦ ᒋᓴᒪᓂᑐᐤ ᐅᑯᓴ᙮” 8 ᑈᓚᑦ ᒪᒃ ᑲ ᐸᑕᐧᒃ ᐅᔭ ᐊ ᐃᓇᓄᐎᒡ, ᐊᑐᐎᔅ ᒋ ᓴᒋᓱᐤ᙮ 9 ᐊᑯ ᒥᓐ ᑲᐤ ᒂ ᐱᒐᑦ ᐊᓐᑕ ᒋᓴᐅᒋᒪᐅᒋᐛᐱᒡ ᐊᑯ ᑲ ᑯᒂᒋᒪᑦ ᒋᓴᓴ, “ᑕᓐᑕ ᐛᒋᔨᓐ ?” ᓇᒪ ᐅᒋ ᒋᔅᑐᐤ ᒋᓴᔅ᙮ 10 ᐊᑯ ᑈᓚᑦ ᒂ ᐃᑕᑦ ᐊᓂᔭ ᒋᓴᓴ, “ᓇᒪᐎᔾ ᐊ ᒋ ᐎ ᐃᔨᒥᔨᓐ ? ᓇᒪᐎᔾ ᐊ ᒋ ᒋᔅᒐᔨᑕᓐ ᐊ ᐊᔭᔭᓐ ᑎᐸᔨᒋᒐᐅᓐ ᒐᒋ ᐃᑎᓱᐛᔭᓐ ᒐᒋ ᐱᔅᑎᓂᑯᔨᓐ ᒪᒃ ᒐᒋ ᒋᔅᑕᔎᑎᑯᐅᔨᓐ ?” 11 ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᒥᒄ ᒐᓱᐛᑦ ᒋᓴᒪᓂᑐᐤ ᐊᒋ ᒥᔨᔅᒃ ᐊᓂᔭ ᒐᒋ ᐃᑐᐅᑦ ᐊᐅᑯᓐ ᐛᒋ ᑎᒂᒡ ᐊᓐ ᒐᒋ ᐃᑎᔨᓐ᙮ ᐊᓐ ᒪᒃ ᐊᐛᓐ ᒋᔾ ᐊ ᑕᔨᓐ ᑲ ᐃᓯ ᐱᔅᑎᓱᐛᓯᑦ ᐊᐅᒄ ᐊᑐᐎᔅ ᒥᒋᑐᑕᐧᒃ᙮” 12 ᐅᔭ ᒪᒃ ᑲ ᐃᔅᒋᔄᔨᒋ ᒋᓴᓴ, ᑈᓚᑦ ᒋ ᐎ ᐱᔅᑕᓇᐤ᙮ ᐊᑯ ᒥᒄ ᐊᓐᒡ ᒍᐤ ᐃᔪᒡ ᒂ ᑕᑈᒡ ᐊ ᐃᔅᒋᔄᒡ, “ᐸᒋᔅᑎᓇᒂ ᒋᓴᔅ ᓇᒪ ᒋᐎᒐᐛᑭᓂᑐᐛᐛᐤ ᒋᓴᐅᒋᒪᐤ ᓯᓴᕐ᙮ ᐛᔅ ᐊᐛᓐ ᑲ ᒋᓴᐅᒋᒪᐅᐃᓱᑦ ᓇᒪ ᓂᓇᐃᑐᐛᐤ ᓯᓴᕋ᙮” 13 ᐃᔅᐱ ᒪᒃ ᑈᓚᑦ ᐱᔭᑕᐧᒃ ᐊᓂᔭ ᑲ ᐃᔅᒋᔄᔨᒋ ᐊᓂᔭ ᒍᐤ ᐃᔪᐛ ᐎᐎᑎᒥᒡ ᒋ ᐃᑐᑕᐊᐤ ᐊᓂᔭ ᒋᓴᓴ ᐊᑯ ᑲ ᐛᐛᔨᐱᑦ ᐊᓐᑕ ᑎᐸᔅᑯᓂᒐᓱᐤ ᑕᑎᐳᐛᑭᓂᒡ, ᐊᓐᑕ ᐊ ᐊᓯᓂᐧᑲᓄᐎᔨᒡ ᐊᒋ ᐊᔅᑕᔨᒡ᙮ ᐃᑉᕈᐤ ᐊ ᐃᓯ ᐃᔨᒥᓇᓄᐅᒡ ᑲᐸᑕ ᐃᓯᓂᐧᑲᑕᑭᓄᐤ ᐊᓐᑕ ᐊᓂᔭ ᑲ ᐊᓯᓂᐧᑲᓄᐎᔨᒡ᙮ 14 ᒪᒂᒡ ᒪᒃ ᐊᓐ ᐊ ᒋᓯᑲᒡ ᐎᒪᔅᑲᒐᐅ-ᒥᑯᓴᐅᓐ ᐊ ᐊᔭᔅᑯᔅᑕᑭᓄᐅᒡ ᒋ ᐃᓯ ᒋᓯᑲᐤ᙮ ᒐᑲᑦ ᒪᒃ ᒋ ᐊᐱᑕᒋᓯᑲᔪᐤ ᑈᓚᑦ ᑲ ᐃᑕᑦ ᐊᓂᔭ ᒍᐤ ᐃᔪᐛ, “ᑭᓄᐛᐱᒪᐧᒄ ᒪᒃ ᐅ ᒋᒋᓴᐅᒋᒪᒧᐛᐤ᙮” 15 ᒋ ᐃᓯ ᑕᑈᐅᒡ ᒪᒃ ᐊᓐᒡ ᒍᐤ ᐃᔪᒡ, “ᓂᐸᐊᐧᒄ, ᓂᐸᐊᐧᒄ, ᒋᔅᑕᔎᑕᐧᒄ,” ᐊ ᐃᔅᒋᔄᒡ᙮ ᐊᑯ ᑈᓚᑦ ᒂ ᐃᑕᑦ, “ᒋ ᓂᑐᐛᔨᒥᓇᐛᐤ ᐊ ᒐᒋ ᐱᔅᑎᓂᒃ ᒋᒋᓴᐅᒋᒪᒧᐛᐤ ᒐᒋ ᒋᔅᑕᔎᑕᑭᓄᐅᑦ ?” ᐊᑯ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᒋ ᐃᓯ ᐎᑎᒪᑯᐤ ᑈᓚᑦ ᐊ ᐃᑎᑯᑦ, “ᒥᒄ ᓯᓴᕐ ᓂ ᐅᒋᓴᐅᒋᒪᒥᓇᓐ ᓇᒪ ᑯᑎᒃ ᐊᐛᓐ᙮” 16 ᐊᑯ ᑈᓚᑦ ᒂ ᐱᔅᑎᓇᑦ ᒋᓴᓴ ᐊᓐᑕ ᐊᓂᔭ ᐊᓯᒪᑭᓂᓴ ᐊ ᑕᔨᒋ ᒐᒋ ᒋᔅᑕᔎᑕᒡ ᒋᐱᔭᑎᑯᒡ᙮ ᐊᑯ ᒂ ᔅᑐᑕᐊᒡ᙮ ᒋᓴᔅ ᑲ ᒋᔅᑕᔎᑕᑭᓄᐅᑦ ᒋᐱᔭᑎᑯᒡ ᒪᑎᔪᐤ 27.32-44 ; ᒪᕐᒃ 15.21-32 ; ᓗᒃ 23.26-43 17 ᒂ ᔅᑐᑕᐊᒡ ᐊᓂᔭ ᒋᓴᓴ ᐊ ᐱᒧᑕᐊᔨᒋ ᐅᒋᐱᔭᑎᑯᒥᔪᐛ ᐊᓐᑕ ᒂ ᐃᑐᑕᐊᒡ “ᒋᐱᔅᑎᒂᓐ ᑲ ᑎᒂᒡ” ᑲ ᐃᓯᓂᐧᑲᑕᔨᒡ᙮ ᐅ ᒪᒃ “ᒋᐱᔅᑎᒂᓐ ᑲ ᑎᒂᒡ” ᑲ ᐃᓯᓂᐧᑲᑕᒡ, ᐃᑉᕈᐤ ᐊ ᐃᓯ ᐃᔨᒥᓇᓄᐅᒡ “ᑯᓪᑯᑕ” ᐃᓇᓄᐤ᙮ 18 ᐊᑯᑕ ᒪᒃ ᐊᓐᑕ ᑲ ᒋᔅᑕᔎᑕᒡ ᑭᔭ ᓂᓱ ᓇᐸᐛ ᒋ ᒋᔅᑕᔎᑕᑭᓄᐅᔪᐛ ᑲ ᒋᒥᔭᑭᓄᔨᒋ ᐃᑐᐤ ᐊᓐᑕ ᐊ ᑕᑦ᙮ 19 ᐊᑯ ᑈᓚᑦ ᒂ ᒥᓯᓇᐊᐧᒃ ᒥᓯᓇᐃᑭᓂᔪᐤ ᒐᒋ ᒋᑭᒧᑕᑭᓄᐎᒡ ᐊᓐᑕ ᐃᔅᐱᒥᒡ ᒋᓴᓴ ᐅᒋᐱᔭᑎᑯᒥᔨᒡ ᐊ ᐃᑎᔅᑕᔨᒡ, “ᒋᓴᔅ ᓇᓴᕆᑎᒡ ᑲ ᐅᒋᑦ ᐊᐅᑯᐤ ᐅᔭ ᒍᐤ ᐃᔪᒡ ᐅᒋᓴᐅᒋᒪᒧᐛᐛ᙮” 20 ᒥᒐᑦ ᒍᐤ ᐃᔪᒡ ᒋ ᐸᒋ ᐃᔨᒥᑕᐅᒡ ᐊᓂᔭ ᒥᓯᓇᐃᑭᓂᔪᐤ ᐛᔅ ᓇᒪ ᐅᒋ ᔭᐅᓇᑯᓂᔪᐤ ᐊᓂᔭ ᐅᑕᓇᔪᐤ ᐊᓐᑕ ᑲ ᑕᒡ᙮ ᓂᔅᑐᔨᒡ ᒪᒃ ᐃᔨᒧᐅᓇ ᒋ ᐃᓯ ᒥᓯᓇᐃᒐᓄᐃᔪᐤ ᐊᓂᔭ ᒥᓯᓇᐃᑭᓂᔪᐤ ᐃᑉᕈᐤ ᐊ ᐃᓯ ᐃᔨᒥᓇᓄᐅᒡ, ᓚᑎᓐ ᑭᔭ ᑯᕆᒃ᙮ 21 ᐊᑯ ᐊᓐᒡ ᒍᐤ ᐃᔪᒡ ᐊᓂᔭᔪᐛ ᑲ ᓂᑲᓂᐱᔨᒋ ᐅᑦ ᐊᔭᒥᐊᐅᒋᒪᒧᐛᐛ ᒋ ᐃᑕᐅᒡ ᐊᓂᔭ ᑈᓚᑕ, “ᓇᒪ ᒋᐸ ᐅᒋ ᐃᑎᔅᑕᓐ ᐊᓐ ᒍᐤ ᐅᒋᓴᐅᒋᒪᒧᐛᐛ ᑲ ᐃᑎᔅᑕᔨᓐ᙮” ᐊᑎᔅᑕ ᐊᓐ ᐃᔭᐱᒡ ᒐᒋ ᐃᑎᔅᑕᒡ, “ᒋ ᐃᔅᒋᔄᐤ, ᓂᔾ ᒍᐤ ᐃᔪᒡ ᐅᒋᓴᐅᒋᒪᒧᐛᐛ᙮” 22 ᑈᓚᑦ ᒋ ᐃᑕᐤ, “ᑕᓐ ᑲ ᐃᑎᔅᑕᔭᓐ ᐊᐅᑯᓐ ᒐ ᐃᑎᔅᑕᒡ᙮” 23 ᐃᔅᐱ ᑲ ᒋᔅᑕᔎᑕᒡ ᒋᐱᔭᑎᑯᒡ ᐊᓐᒡ ᐊᓯᒪᑭᓂᓯᒡ ᐊᓂᔭ ᒋᓴᓴ ᐊᑯ ᐊᓂᔭ ᐅᑦ ᐊᐱᒋᑕᐅᓂᔪᐛ ᑲ ᒪᒪᑎᓂᒪᑐᒡ ᐊ ᓇᐅᒡ ᐸᐸᐃᒄ ᒋ ᐊᔭᐅᒡ ᐸᐃᒄ ᒐᒂᔪᐤ᙮ ᐊᓂᔭ ᒪᒃ ᐊᑯᐱᔪᐤ ᐅᔅᒡ ᑲᒋ ᒋᔅᑭᒥᔨᒋ ᐊ ᓴᔭᑭᓂᔨᒡ ᒋ ᐃᓯᓇᑯᓂᔪᐤ ᓇᒪ ᐅᒋ ᑎᑯᓂᔪᐤ ᐊᓐᑕ ᒐᒋ ᐱᒥᒂᑕᑭᓄᐎᒡ᙮ 24 ᒋ ᐃᑎᑐᒡ ᒪᒃ ᐊᓐᒡ ᐊᓯᒪᑭᓂᓯᒡ, “ᐊᑯᔅ ᐊᑲ ᐅᒋ ᐱᑯᓯᒧᐛᑕᐤ ᐅᔭ ᐅᑦ ᐊᑯᑉ᙮ ᑯᒂᒋᐃᑐᑕᐤ ᐛᐱᓂᒐᑕᐤ ᐊᐛᓐ ᒐ ᑲᓂᔪᒂ ᐊᓂᔭ ᐊᑯᐱᔪᐤ᙮” ᐅᔭ ᒪᒃ ᑲ ᐃᑎᒡ ᐊᑯᑕ ᑲ ᑎᐱᔨᒡ ᑕᓐ ᑲ ᐃᑎᓯᓇᐃᑭᓄᐃᑯᐱᓇ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋ ᒪᒪᑎᓂᒪᑐᐅᒡ ᓂᑦ ᐊᐱᒋᑕᐅᓇ ᑭᔭ ᒋ ᑕᐛᒐᓄᐤ ᓂᑦ ᐊᑯᑉ᙮ 25 ᒋᓴᔅ ᒪᒃ ᐅᑲᐎᐊ ᒥᒋᒪ ᒋ ᓂᐳᐅᔪᐛ ᐊᓐᑕ ᒋᓴᓴ ᐅᒋᐱᔭᑎᑯᒥᔨᒡ ᑭᔭ ᐅᑲᐎᐊ ᐎᐧᑲᓂᓯᔪᐛ ᐊᑯᑕ ᑲ ᓂᐳᔨᒋ ᑭᔭ ᒪᕆ, ᑲᓗᐸᔅ ᐎᐛ ᑭᔭ ᒪᕆ ᒪᒃᑕᓕᓐ᙮ 26 ᒋᓴᔅ ᒋ ᐛᐱᒪᐤ ᐊᓂᔭ ᐅᑲᐎᔭ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᑲ ᓴᒋᐊᑦ ᐊ ᓂᐳᔨᒋ ᐊᓐᑕ, ᐊᑯ ᒂ ᐃᑕᑦ ᐊᓂᔭ ᐅᑲᐎᔭ, “ᐊᐅᑯᐤ ᒋᑯᔅ᙮” 27 ᐊᑯ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ ᑲ ᓴᒋᐊᑦ, “ᐊᐅᑯᐤ ᒋᑲᐎᔾ᙮” ᐊᓐ ᒪᒃ ᒋᔅᒋᓄᐊᒧᐛᑭᓐ ᐊᑯᑕ ᑲ ᐅᒋ ᒋᒋ ᑭᓄᐛᔨᒪᑦ ᒋᓴᓴ ᐅᑲᐎᔪᐛ ᐊᓐᑕ ᐎᒋᒡ᙮ ᒋᓴᔅ ᑲ ᓂᐱᑦ ᒪᑎᔪᐤ 27.45-56 ; ᒪᕐᒃ 15.33-41 ; ᓗᒃ 23.44-49 28 ᐸᑎᒪ ᒪᒃ ᒋᓴᔅ ᒋ ᒋᔅᒐᔨᑎᒻ ᓴᔅ ᒥᓯᐛ ᒐᒂᔪᐤ ᐊᒋ ᒋᔅᑕᐱᔨᒡ ᐊᑯ ᒂ ᐃᔅᒋᔄᑦ, “ᓂᐎ ᒥᓐ᙮” ᐊᐅᑯᐤ ᐅᔭ ᑲ ᐃᔅᒋᔄᑦ ᒐᒋ ᑎᐱᐱᔨᒡ ᑕᓐ ᑲ ᐃᓯ ᓂᑲᓐ ᐎᑕᑭᓄᐎᒡ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᒡ ᒐ ᐃᔅᒋᔄᑯᐱᓇ᙮ 29 ᒋ ᑎᑯᓐ ᒪᒃ ᐊᓐᑕ ᐎᔭᑭᓐ ᐊ ᓴᑭᔅᒋᓇᐸᒡ ᐊ ᐎᓯᑲᐧᑭᒥᒡ ᓱᒥᓇᐳᔾ, ᐊᑯᑕ ᐊᓐᑕ ᑲ ᐊᑯᑕᒡ ᐅᐱᓂᓯᔪᐤ ᑲ ᒪᑯᐱᑕᑭᓄᐎᒡ ᒥᔅᑎᑯᒡ ᐊᑯ ᐊᓐᑕ ᐅᑐᓂᔨᒡ ᑲ ᐃᓯ ᐃᑕᔅᑯᓂᒧᐛᒡ᙮ 30 ᐃᔅᐱ ᒋᓴᔅ ᑲ ᒥᓐᑦ ᐊᑯ ᒂ ᐃᔅᒋᔄᑦ, “ᓴᔅ ᒋᔅᑕᐱᔪᐤ᙮” ᐊᑯ ᒂ ᐊᑎ ᓂᔭᒥᔎᔨᑦ ᒂ ᐊᑎ ᐳᓂᐱᒪᑎᓯᑦ᙮ ᐅᔅᐱᑲᒡ ᑲ ᑕᐧᑭᒪᑭᓄᐅᑦ ᒋᓴᔅ 31 ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᓇᒪ ᐅᒋ ᓂᑐᐛᔨᒪᐅᒡ ᐊᓂᔭᔪᐛ ᐊ ᓂᔅᑎᔨᒋ ᑲ ᒋᔅᑕᔎᑕᑭᓄᔨᒋ ᓇᐸᐛ ᐊᔅᒄ ᒐᒋ ᐃᑎᑯᒋᓂᔨᒋ ᐛᐸᓂᔨᒐ ᐛᔅ ᐊᐅᒄ ᐊᓂᔭ ᒐ ᒋᓴᐊᔭᒥᐊᐅᒋᓯᑲᔨᒡ, ᐊᑯ ᒂ ᐃᑕᒡ ᑈᓚᑕ ᒐᒋ ᐃᑎᓱᐛᔨᒋ ᒐᒋ ᓇᑥᑲᑕᐛᑭᓄᔨᒋ ᐊᓂᔭᔪᐛ ᓇᐸᐛ, ᑭᔭ ᒐᒋ ᓂᑎᓂᑲᓄᔨᒋ ᐎᔪᐛᐛ ᒐᒋ ᓇᐅᔅᑕᑭᓄᔨᒋ᙮ 32 ᐊᑯ ᐊᓐᒡ ᐊᓯᒪᑭᓂᓯᒡ ᑲ ᓇᑥᑲᑕᐛᒡ ᐊᓂᔭ ᓂᓱ ᓇᐸᐛ ᑲ ᒋᔅᑕᔎᑕᑭᓄᔨᒋ ᒋᓴᓴ ᑭᔭ ᑲ ᒋᔅᑕᔎᑕᑭᓄᔨᒋ᙮ 33 ᒋᓴᔅ ᒪᒃ ᐎᔾ ᓴᔅ ᒋ ᐳᓂᐱᒪᑎᓯᐤ ᐃᔅᐱ ᐛᑎᑕᒡ ᐊᓐᒡ ᐊᓯᒪᑭᓂᓯᒡ ᓇᒪ ᒪᒃ ᐅᒋ ᓇᑥᑲᑕᐛᐅᒡ᙮ 34 ᐸᐃᒄ ᒪᒃ ᐊᓐ ᐊᓯᒪᑭᓂᔅ ᒋ ᑕᐧᑭᒪᐤ ᐊᓂᔭ ᒋᓴᓴ ᐊᓐᑕ ᐅᔅᐱᑲᔨᒡ᙮ ᑎᐛᒡ ᒂ ᐅᒋ ᐎᐎᑯᔨᒡ ᐅᒥᐧᑯᔪᐤ ᑭᔭ ᓂᐱᔪᐤ ᐊᓐᑕ ᐅᒡ᙮ 35 ᐊᓐ ᐊᐛᓐ ᑎᐱᔨᐛ ᐅᔅᒋᓯᑯᒡ ᐊᒋ ᐅᒋ ᐛᐸᑕᐧᒃ ᐅᔭ ᑯᐃᔅᒄ ᐎᑎᒻ ᑕᓐ ᑲ ᐃᔅᐱᔨᒡ ᒐᒋ ᑕᑈᑎᒪᒄ ᑭᔭ ᒋᔨᐛᐤ ᐃᔨᒥᑕᔭᒂ᙮ ᒋᔅᒐᔨᑎᒻ ᐊ ᑕᑈᑦ ᑕᓐ ᐊ ᐃᓯ ᐎᑕᐧᒃ᙮ 36 ᒋ ᐃᔅᐱᔪᐤ ᐅ ᒐᒋ ᑎᐱᐱᔨᒡ ᑕᓐ ᑲ ᐃᓯ ᓂᑲᓐ ᐎᑕᑭᓄᑯᐱᓇ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᔅᐱᔨᒡ, ᐃᑎᔅᑕᐤ, ᓇᒪ ᐛᐛᒡ ᐸᐃᒄ ᐅᒋ ᓇᑥᐃᑭᓄᐎᔪᐤ ᐎᔾ ᐅᔅᑭᓇ᙮ 37 ᑭᔭ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋᑭ ᑭᓄᐛᐱᒪᐅᒡ ᐊᓂᔭ ᑲ ᑕᐧᑭᒪᒡ᙮ ᒋᓴᔅ ᐎᔪᐤ ᑲ ᓇᐃᐧᑲᑭᓄᐎᒡ ᒪᑎᔪᐤ 27.57-61 ; ᒪᕐᒃ 15.42-47 ; ᓗᒃ 23.50-56 38 ᐸᑎᒪ ᒪᒃ ᒍᓯᑉ, ᐊᕆᒪᑎᔭᒡ ᑲ ᐅᒋᑦ ᓇᐸᐤ ᒋ ᓂᑐᐛᔨᑎᒧᐛᐤ ᑈᓚᑕ ᒋᓴᓴ ᐎᔭᔪᐤ ᒐᒋ ᓇᐅᔅᑕᐛᑦ᙮ ᒍᓯᑉ ᒪᒃ ᒋᒧᑦ ᒋ ᑕᑈᔭᔨᒪᐤ ᒋᓴᓴ ᐛᔅ ᒋ ᑯᔅᑕᐤ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ᙮ ᒋ ᓂᔅᑯᒧᐤ ᒪᒃ ᑈᓚᑦ ᑕᓐ ᑲ ᐃᓯ ᓂᑐᐛᔨᑎᒥᔨᒋ ᒍᓯᐸ᙮ ᐊᑯ ᒪᒃ ᒍᓯᑉ ᒂ ᐅᑎᓂᒺᑦ ᒋᓴᓴ ᐎᔭᔪᐤ ᒂ ᔅᑐᑕᐛᑦ᙮ 39 ᓂᑯᑎᒪᓴ ᒪᒃ ᒋ ᐎᒐᐅᑯᐤ᙮ ᐊᐅᒄ ᓂᑯᑎᒪᔅ ᐊ ᑎᐱᔅᑲᔨᒡ ᒪᐅᒡ ᓂᔅᑎᒻ ᑲ ᐸᒋ ᓇᑕᑦ ᒋᓴᓴ᙮ ᒋ ᐊᔭᐤ ᒪᒃ ᑐᒥᓂᑭᓂᔪᐤ ᓂᐱᓯᔭ ᑐᒥᓂᑭᓂᔪᐤ ᑲᐎᒋᒪᑯᓯᔨᒡ ᑭᔭ ᐊᓗ ᑲ ᐃᓯᓂᐧᑲᑕᔨᒋ ᐊᒋ ᐅᒋ ᐅᓯᑕᑭᓄᔨᒋ᙮ ᓴᓯᑲᓐ ᐸᐃᑯ ᒥᑕᓯᒥᑎᓄᐤ ᑎᐸᐸᑲᐃᑭᓇ ᒋ ᐃᔅᐱᑎᓂᑯᓂᔪᐤ ᐅᔭ ᑐᒥᓂᑭᓂᔪᐤ᙮ 40 ᐊᐅᑯᓐᒡ ᐅᒡ ᓂᓱ ᓇᐸᐅᒡ ᓂᑯᑎᒪᔅ ᑭᔭ ᒍᓯᑉ ᒂ ᐅᑎᓂᒺᒡ ᒋᓴᓴ ᐎᔭᔪᐤ ᒂ ᑎᑎᐸᔭᒋᓂᒺᒡ ᐱᒍᐎᔭᓂᒡ ᑭᔭ ᒋ ᐎᒋᒪᑯᑕᐛᐅᒡ ᐛᔅ ᐊᐅᑯᓐ ᑲᒋ ᐃᑎᒡ ᒍᐤ ᐃᔪᒡ᙮ 41 ᐊᓐᑕ ᑲ ᒋᔅᑕᔎᑕᑭᓄᐅᑦ ᒋᓴᔅ ᒋ ᑎᑯᓐ ᓂᑕᐅᒋᑕᑭᓐ ᐊᔅᒋᔾ ᑭᔭ ᒋ ᑎᑯᓐ ᐊᓐᑕ ᐊᑲ ᓂᑕ ᐅᒋ ᐊᐱᑎᒡ ᒋᐱᐃᒋᐛᑉ᙮ 42 ᐊᓂᔭ ᒪᒃ ᐊᒋ ᐃᓯ ᒋᓯᑲᔨᒡ, ᐊ ᐊᔭᔅᑯᐎᔅᑕᑭᓄᐎᒡ ᐎᒪᔅᑲᒐᐅ-ᒥᑯᓴᐅᓂᔪᐤ, ᑭᔭ ᐊ ᐸᓱᓇᑯᓂᔨᒡ ᐊᓂᔭ ᒋᐱᐃᒋᐛᐱᔪᐤ, ᐊᑯᑕ ᐊᓐᑕ ᑲ ᐊᔅᑕᐛᒡ ᒋᓴᓴ ᐎᔭᔪᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.