ᐃᑉᕈᐛ 9 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑕᓐ ᑲ ᐃᓯ ᐊᔭᒥᐊᔅᑐᐛᑭᓄᐅᑦ ᒋᓴᒪᓂᑐᐤ ᐊᓂᔭ ᓂᔅᑎᒻ ᓂᔅᑯᒧᐅ ᒥᓯᓇᐃᑭᓂᔪᐤ ᐅᒋ 1 ᐊᓐ ᓂᔅᑎᒻ ᓂᔅᑯᒧᐅ ᒥᓯᓇᐃᑭᓐ ᑲ ᐅᓯᑕᑭᓄᐅᒡ ᐊᑯᑕ ᑲ ᐎᑎᒧᐛᑭᓄᐎᒡ ᐊᐛᓐᒋ ᑕᓐ ᐊᓐ ᒐ ᐃᑎᒡ ᐊ ᐊᔭᒥᐊᔅᑐᐛᒡ ᒋᓴᒪᓂᑐᐛ᙮ ᒋ ᓂᑐᐛᔨᑕᑯᓐ ᒐᒋ ᑎᒂᒡ ᒥᒋᐛᑉ ᐅᑕ ᐊᔅᒋᒡ ᐊᓐᑕ ᒐ ᐊᔭᒥᐊᔅᑐᐛᒡ ᒋᓴᒪᓂᑐᐛ᙮ 2 ᐅ ᒪᒃ ᒥᒋᐛᑉ ᒋ ᓂᓯᓇ ᐊᓐᑕ ᐊ ᐱᔅᒋᒐᔭᒋ᙮ ᐸᐃᒄ ᐊᓐ ᐊ ᐱᔅᒋᒐᔭᒡ ᑲ ᐸᔭᒋᓯᒥᑲᒡ ᒋ ᐃᓯᓂᐧᑲᑕᐤ᙮ ᐅ ᒪᒃ ᑲᐱᔅᒋᒐᔭᒡ ᑲ ᐸᔭᒋᓯᒥᑲᒡ ᑲ ᐃᓯᓂᐧᑲᑕᒡ ᒋ ᑎᑯᓐ ᐊᓐᑕ ᐛᔅᑕᓂᐱᒪᑭᓇᑎᒄ ᑭᔭ ᐊᓐ ᒥᒋᓱᐛᑭᓇᑎᒄ ᐊᓐᑕ ᑲ ᐊᐱᑦ ᐊᓐ ᐸᒂᓯᑭᓐ ᒋᓴᒪᓂᑐᐤ ᐊ ᑕᑦ ᑲᒋ ᐃᓯ ᐱᔅᑎᓇᑭᓄᐅᑦ᙮ 3 ᐊᓐ ᒪᒃ ᒥᓐ ᑲ ᐅᒋ ᑎᒂᒡ ᐊ ᐱᔅᒋᒐᔭᒡ ᐊᑯᐛᑲᐃᑭᓐ ᒋ ᐃᑕᑭᒧᐤ ᐊᓐᑕ ᒐᒋ ᐱᐧᑲᓇᔨᑕᒂᒡ ᐊᓐᑕ ᐊᓐ ᓂᔅᑎᒻ ᑲᐱᔅᒋᒐᔭᒡ᙮ ᐊᑯ ᐅ ᑯᑎᒡ ᑲᐱᔅᒋᒐᔭᒡ ᒪᐅᒡ ᑲ ᐸᔭᒋᓯᒥᑲᒡ ᒋ ᐃᓯᓂᐧᑲᑕᑭᓄᐤ᙮ 4 ᐊᑯᑕ ᐊᓐᑕ ᑲ ᑎᒂᒡ ᑲ ᐎᔄᐅᓱᓇᔭᐱᔅᑯᐅᒡ ᐱᔅᑎᓂᒐᐅᓇᐱᔅᒄ ᐊᓐᑕ ᑲᒋ ᐃᔎᓯᑭᓄᐅᒋ ᑲᐎᒋᒪᑯᓯᔨᒋ᙮ ᑭᔭ ᒋ ᑎᑯᓐ ᐊᓐᑕ ᒥᔅᑎᑯᒥᐅᑦ ᐱᓯᒄ ᐎᔄᐅᓱᓇᔭᐱᔅᒄ ᐊᒋ ᐃᓯᓇᒂᒡ ᐊᓐᑕ ᐛᔅᑲ ᑭᔭ ᐊᓐᑕ ᐱᒡ ᐊᐅᑯᓐ ᑲ ᐃᓯᓇᒂᒡ᙮ ᐊᑯᑕ ᑲ ᐱᒋᑎᒡ ᑭᔭ ᐊᓐ ᐳᑎᔾ ᑲ ᐎᔄᐅᓱᓇᔭᐱᔅᑯᐅᒡ ᐊᓐᑕ ᑲ ᐱᒋᓯᐧᒃ ᐊᓐ ᐸᒂᓯᑭᓐ ᒪᓇ ᑲ ᐃᓯᓂᐧᑲᑕᑭᓄᐅᑦ᙮ ᑭᔭ ᐊᓂᔭ ᐊᕋᓐ ᐅᓯᔅᑲᐅᓇᑎᒄ ᑲ ᓂᐱᓯᔪᓂᔨᒡ ᐊᑯᑕ ᑲ ᐱᒋᑎᓂᔨᒡ ᑭᔭ ᐊᓐᒡ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᐊᓐᑕ ᑲ ᒥᓯᓇᐃᑭᓄᐅᒋ ᐊᓂᔭ ᐸᐃᑯᔪᐤ ᐃᑎᓱᐛᐅᓇ ᐊᑯᑕ ᑲ ᐱᒋᑎᒋ᙮ 5 ᑎᐱᔅᑯᒡ ᐊᓐ ᒥᔅᑎᑯᒥᐅᑦ ᐃᑐᐤ ᒪᒃ ᐊᓐᑕ ᐊ ᐃᔎᒡ ᐊᓐ ᒥᔅᑎᑯᒥᐅᑦ, ᒋ ᑕᐅᒡ ᐊᓐᒋᓐᒡ ᐃᔨᐧᑲᓂᒡ ᐊᒋ ᐃᓯᐊᑭᓄᐎᒡ, ᓇᔅᒡ ᐊᒋ ᒥᔪᓇᑯᐊᑭᓄᐛᒂᓂᒋ᙮ ᐅᑎᑎᑭᓄᐛᐛ ᓇᔅᒡ ᒋ ᐊᑯᐛᑯᒋᓂᔪᐛ ᐊᓐᑕ ᐊ ᐊᑯᓇᐸᑕᑭᓄᐅᒡ ᐊᓐ ᒥᔅᑎᑯᒥᐅᑦ᙮ ᐊᓐ ᒪᒃ ᐊᑯᓇᐸᒋᑭᓐ ᐊᐳᐅᓐ ᐊᓐᑕ ᐛᒋ ᐛᐸᔨᑎᒧᐛᑦ ᒋᓴᒪᓂᑐᐤ ᐊᐛᔪᐛ ᐅᒥᒋᑥᐅᓂᔪᐤ ᒋ ᐃᓯᓂᐧᑲᑕᑭᓄᐤ᙮ ᐊᑐᐎᔅ ᒋᐸ ᒋ ᐊᔨᒧᑎᒪᑎᓇᐛᐤ ᐅᔭ ᒐᒂᔪᐛ ᒥᒄ ᒪᒃ ᓇᒪ ᒋᑭ ᐅᒋ ᐎᒋᐃᐛᐱᔪᐤ ᐊᑎ ᐊᔨᒧᑎᒪᓇ ᐊᓄᒡ᙮ 6 ᐃᔅᐱ ᑲᒋ ᐃᓯ ᐛᐛᓯᑕᑭᓄᐅᒋ ᐊᓂᔭ ᓂᓱ ᑲᐱᔅᒋᒐᔭᒋ, ᐊᐅᒄ ᐅ ᑲᒋ ᐃᑎᓇᓄᐅᒡ ᐊᓐᑕ ᒥᒋᐛᐱᒡ᙮ ᐊᓐᒡ ᐊᔭᒥᐊᐅᒋᒪᐅᒡ ᒥᒄ ᐛ ᐃᔅᐱᔅ ᐱᒐᒡ ᐊᓂᔭ ᓂᔅᑎᒻ ᑲᐱᔅᒋᒐᔭᔨᒡ ᒋ ᐃᔅᐱᔅ ᐱᒐᐅᒡ ᐃᔅᐱ ᐊ ᐃᑐᑕᒡ ᐅᑦ ᐊᑐᔅᒐᐅᓄᐛᐤ᙮ 7 ᐊᑯ ᐊᓐ ᒥᓐ ᑲ ᑎᒂᒡ ᑲᐱᔅᒋᒐᔭᒡ ᒥᒄ ᐊᓐ ᒋᓴᐊᔭᒥᐊᐅᒋᒪᐤ ᒋ ᐱᒐᐤ ᒪᓐ ᐊᓐᑕ ᐸᐃᒂᐤ ᐸᐃᒄ ᐱᐳᓇ᙮ ᒥᒄ ᒪᒃ ᐎᔾ ᐊ ᐸᐃᑯᓯᑦ ᒋ ᐱᒐᐤ ᐊᓐᑕ ᑭᔭ ᐊᓄᒡ ᐊᒋ ᓂᐸᐊᑭᓄᔨᒋ ᐊᐛᓯᓴ ᐅᒥᐧᑯᔪᐤ ᒋ ᐱᑎᑭᑕᐤ ᐊᓐᑕ ᐃᔅᐱ ᐊ ᐱᒐᑦ᙮ ᐊᐅᒄ ᒪᒃ ᐅᔭ ᒥᐧᑯᔪᐤ ᐊᓐᑕ ᒋᓴᒪᓂᑐᐛ ᐊ ᑕᔨᒋ ᑲᒋ ᐃᓯ ᐱᔅᑎᓂᒧᐛᑦ ᐛᔅ ᑭᔭ ᐎᔾ ᐊᓐ ᐊᔭᒥᐊᐅᒋᒪᐤ ᒋ ᒥᒋᑐᑎᒻ ᑭᔭ ᐊᓐᒡ ᐃᔪᒡ ᒋ ᒥᒋᑐᑎᒧᒡ ᒪᓐ ᐊᑲ ᒋᔅᒐᔨᑕᒡ᙮ 8 ᐊᐅᒄ ᒪᒃ ᐅᔭ ᐊ ᐃᓯ ᒋᔅᑯᑎᒪᑯᔭᐧᒄ ᑲ ᐸᔭᒋᓯᑦ ᐊᒐᐧᒄ ᐅᔭ ᐅᒡ᙮ ᐊᓐ ᐊᔅᒄ ᒪᒂᒡ ᐊ ᑎᒂᒡ ᐊᓐ ᓂᔅᑎᒻ ᑲᐱᔅᒋᒐᔭᒡ ᓇᒪ ᐊᐛᓐ ᒋᑭ ᒋ ᐱᒐᐤ ᐊᓐᑕ ᐊᓂᔭ ᒪᐅᒡ ᑲ ᐸᔭᒋᓯᒥᑭᓂᔨᒡ ᑲ ᐃᓯᓂᐧᑲᑕᔨᒡ ᐊ ᐱᔅᒋᒐᔭᔨᒡ᙮ 9 ᑎᑯᓐ ᒪᒃ ᐊ ᐃᓯ ᐃᔨᒥᐃᑯᔭᐧᒄ ᐅ ᐊᓄᒡ ᒐᓯᑲᒡ᙮ ᐊᓐ ᐊᒋ ᐅᓯᑕᑭᓄᐅᒡ ᐊᓐ ᐊᔭᒥᐊᐤ ᒥᒋᐛᑉ ᐱᑎᑭᒥᒡ ᐊᑯᑕ ᐛᒋ ᒋᔅᒐᔨᑎᒪᐧᒄ ᐊᑲ ᐊᐛᓐ ᐅᑎᔅᑯᐤ ᒐᒋ ᓇᑕᑦ ᒋᓴᒪᓂᑐᐛ᙮ ᐊᔅᒄ ᒪᒃ ᐊᓄᒡ ᐊᐅᑯᓐ ᐊ ᐃᓯᓇᒂᒡ, ᐊᓂᔭᔪᐛ ᒥᑐᔅᑕᐊᒪᒐᐅᓇ ᑭᔭ ᐱᔅᑎᓂᒐᐅᓇ ᓇᒪ ᒋᑭ ᒋ ᐃᑐᑕᑯᐤ ᐊᐛᓐ ᓇᔅᒡ ᒐᒋ ᐃᑕᔨᑎᒥᐃᑯᑦ ᑕᑈ ᓇᔅᒡ ᐊᒋ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ᙮ 10 ᐅ ᐊ ᐃᑎᓇᓄᐅᒡ ᐊ ᒥᔨᐛᓄᒋ ᒥᔨᐛᐅᓇ ᑭᔭ ᒥᑐᔅᑕᐊᒪᒐᐅᓇ ᐊᑯᓐ ᐊᑎᔅᑕᒡ ᓂᔅᑯᒧᐅ ᒥᓯᓇᐃᑭᓂᒡ ᒐᒋ ᐃᑎᓇᓄᐅᒡ᙮ ᒥᒄ ᐎᑎᒧᐛᑭᓄᐎᒡ ᐊᓐᑕ ᐊᐛᓐᒋ ᒐᒂᔪᐤ ᒐᒋ ᒥᒋᒡ ᑭᔭ ᒐᒂᔪᐤ ᒐᒋ ᒥᓂᒡ ᑭᔭ ᑕᓐ ᒐ ᐃᓯ ᓂᓇᐧᑯᐤ ᐃᑎᒡ ᐊᓐᑕ ᒐᒋ ᐅᒋ ᐃᓯᓇᑯᓯᒡ ᐊ ᐸᔭᒋᓯᒡ᙮ ᐅᔭ ᒐᒂᔪᐛ ᓇᒪ ᒋ ᐎᒋᐃᑯᓇᓄᐤ ᒐᒋ ᒋᔅᒐᔨᑎᒪᐧᒄ ᑕᑈ ᒐᒋ ᐛᐸᔨᑎᒪᑯᐛᒂ᙮ ᐊᐅᒄ ᐅᔭ ᒪᒂᒡ ᒐ ᐎᒋᐃᑯᔭᐧᒄ ᒐ ᐃᔅᐱᔅ ᐊᑲ ᐅᑎᒋᐱᔨᒡ ᐊᓐᑕ ᒐ ᐃᑐᑕᑕᐧᒄ ᒋᓴᒪᓂᑐᐤ ᓇᔅᒡ ᒐᒋ ᑯᐃᔅᑯᓇᑯᐃᑕᐧᒄ ᐊ ᐅᔅᑲᔨᒡ ᓂᔅᑯᒧᐅᓂᔪᐤ ᐅᒡ᙮ ᒋᓴᔅ ᑲ ᐱᔅᑎᓇᐧᒃ ᐅᐱᒪᑎᓯᐅᓐ Hebrews 9.11-14 (Proper-26 Year B) 11 ᐊᑯ ᒪᒃ ᙭ ᓴᔅ ᐊᒋ ᑎᑯᓯᐧᒃ ᒐ ᐅᒋᓴᐊᔭᒥᐊᐅᒋᒪᒥᔭᐧᒄ ᐊᑯ ᐎᔾ ᒪᔪ ᓱᐛᔨᒥᑕᐧᒄ᙮ ᒋ ᐱᒐᐤ ᐎᔾ ᐊᓂᔭ ᐊᔭᒥᐊᐤ ᒥᒋᐛᐱᔪᐤ ᐊᓂᔭ ᐊᑲ ᐅᑕ ᐊᔅᒋᒡ ᐅᒋᒥᑭᓂᔨᒡ᙮ ᓇᒪ ᓇᐸᐛ ᐅᒋ ᐅᓯᑕᔪᐛ ᐅᔭ ᒥᒋᐛᐱᔪᐤ᙮ ᐊᔪᐅᒄ ᐅᔭ ᒪᐅᒡ ᑲ ᒋᔅᑕᔨᑕᑯᓂᔨᒡ ᐃᔅᐱᔅ ᐊᓂᔭ ᑲᒋ ᐊᐱᑎᓂᔨᒡ ᐅᑕ ᐊᔅᒋᒡ᙮ 12 ᒋᓴᔅ ᙭ ᒥᒄ ᐸᐃᒂᐤ ᒋ ᐱᒐᐤ ᐊᓂᔭ ᒪᐅᒡ ᑲ ᐸᔭᒋᓯᒥᑭᓂᔨᒡ ᒥᒋᐛᐱᔪᐤ ᐊᓐᑕ ᒋᒋᒋᓯᑯᒡ ᐊ ᑎᑯᓂᔨᒡ᙮ ᐎᔾ ᑎᐱᔨᐛ ᐅᒥᐧᒄ ᐊᒋ ᐱᔅᑎᓇᐧᒃ ᐊᑯᑕ ᑲ ᐅᒋ ᒥᔪᐱᔨᒡ ᒐᒋ ᐱᒐᑦ ᐊᓐᑕ, ᓇᒪ ᐎ ᐊᐛᓯᓴ ᐅᒥᐧᑯᔪᐤ ᐅᒋ ᐊᐱᒋᑕᐛᐤ᙮ ᐊᒋ ᐱᔅᑎᓂᓱᑦ ᒐᒋ ᓂᐸᐊᑭᓄᐅᑦ, ᐎᔾ ᐅᒥᐧᒄ ᐊᒋ ᓯᒋᓂᑭᓄᐎᒡ, ᐊᑯᑕ ᓇᔅᒡ ᑲ ᐅᒋ ᑎᐸᐊᐧᒃ ᒥᓯᐛ ᒋᒥᒋᑥᐅᓄᐛ ᑲᒋᒡ ᒐᒋ ᐛᐸᔨᑎᒪᑯᐅᔭᐧᒄ᙮ 13 ᐊᓐᑕ ᒧᓱᔅ ᐅᐎᓱᐛᐅᓂᒡ ᒋ ᐃᑎᔅᑕᐤ ᒐ ᐊᑲ ᒋ ᐊᔭᒥᐊᔅᑐᐛᒡ ᒋᓴᒪᓂᑐᐛ ᐊᓐᒡ ᐊᑲ ᐸᔭᒋᓯᒡ ᐊᔭᒥᐊᐅᓂᒡ ᐃᔅ᙮ ᐊ ᐸᔭᒋᓯᒡ ᒋ ᐃᓯ ᑭᓄᐛᐱᒪᑭᓄᐎᒡ ᐃᔅᐱ ᑲ ᐱᒋᑯᓂᑭᓄᐎᒡ ᒪᔭᑕᓂᓴ ᑭᔭ ᓇᐸ ᒥᔅᑐᓴ ᐅᒥᐧᑯᔪᐤ ᐊᓐᑕ ᐊ ᑕᒡ᙮ ᑭᔭ ᐊᓂᔭ ᐃᔎᔅᒐᔪᐤ ᐊᒋ ᐃᔎᔄᑭᓄᔨᒋ ᐅᔅᒋ ᓄᓴ ᒥᔅᑐᓴ ᒋ ᐅᓯᔄᐛᓂᑭᓄᐅᔪᐤ ᐊᓐᑕ ᐊ ᑕᒡ᙮ 14 ᒧᔭᒻ ᒪᒃ ᐊᐛᓯᔅ ᐅᒥᐧᒄ ᐊ ᐸᔭᒋᑕᒐᒥᑭᓂᔨᒡ ᒪᒥᑐᓇᔨᑎᒧᒄ ᑕᓐ ᐊᔅᐱᔅ ᐊᑐᐎᔅ ᒐᒋ ᐃᓯ ᐎᒋᐃᑯᐛᐧᒄ ᙭ ᐅᒥᐧᒄ᙮ ᒋ ᐱᒪᑎᓯᐤ ᐅᑕ ᐊᔅᒋᒡ ᐊᑲ ᐛᐛᒡ ᐅᒋ ᒥᒋᑐᑕᐧᒃ᙮ ᑲ ᐸᔭᒋᓯᔨᒋ ᐊᒐᒂ ᑲᒋᒡ ᐊ ᑕᔨᒋ ᒋ ᐎᒋᐃᑯᐤ ᐃᔅᐱ ᑲ ᐱᔅᑕᔨᒥᑎᓱᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐅᒥᐧᒄ ᐊᐅᒄ ᒐ ᐸᔭᒋᐃᑯᐛᐧᒄ᙮ ᓇᒪ ᐎ ᐊᓂᔭᔪᐛ ᐊᑲ ᐅᔭᔅ ᐃᑕᐱᑎᓂᔨᒋ ᒐᒂᔪᐛ ᑲᒋ ᐃᑐᑎᒪᐧᒄ ᒋᑭ ᐅᒋ ᐱᒪᒋᐃᑯᓇᓄᐤ᙮ ᐊᑯ ᒪᒃ ᑲᒋᒡ ᒐᒋ ᐊᑐᔅᑯᐛᐧᒄ ᒋᓴᒪᓂᑐᐤ᙮ 15 ᐊᑯ ᒪᒃ ᐎᔾ ᑎᐱᔨᐛ ᐅᒥᐧᑯᒡ ᐅᒡ ᒋᓴᔅ ᒋ ᐅᓯᑕᐤ ᐊ ᐅᔅᑲᔨᒡ ᓂᔅᑯᒧᐅᓂᔪᐤ᙮ ᐊᑯ ᒪᒃ ᐊᓐᒡ ᒋᓴᒪᓂᑐᐛ ᑲ ᑕᑈᑎᑯᒡ ᒐᒋ ᐅᑦ ᐃᔨᒥᑐᑕᑯᒡ ᑲᒋᒡ ᒐ ᐊᔭᒡ ᐊᓂᔭ ᑕᓐ ᑲ ᐃᔅᒋᔄᔨᒋ ᒋᓴᒪᓂᑐᐛ ᒐᔅᑎᓇᔅ ᒐ ᒥᔨᑯᒡ᙮ ᒋᓴᓴ ᐅᓂᐳᐅᓂᔨᒡ ᐅᒡ ᐊᑯᑕ ᐊ ᑎᒂᒡ ᒐᒋ ᐛᐸᔨᑎᒧᐛᑭᓄᐎᒡ ᐊᐛᓐᒋ ᐅᒥᒋᑥᐅᓄᐛᐛ ᐊᓂᔭ ᑕᓐ ᑲ ᐃᓯ ᒥᒋᑐᑕᒡ ᐊᔅᒄ ᐊᒋ ᐊᐱᑎᓂᔨᒡ ᐛᔅᑭᒡ ᓂᔅᑯᒧᐅᓂᔪᐤ᙮ 16 ᐊᓐ ᒪᒃ ᓂᔅᑯᒧᐅᓐ ᒧᔭᒻ ᑕᓐ ᐊ ᐃᓯᓇᑯᓂᔨᒡ ᒥᓯᓇᐃᑭᓂᔪᐤ ᐊᐛᓐ ᐊᒋ ᐅᓯᑕᑦ ᐊ ᐎᑕᐧᒃ ᑕᓐ ᒐ ᐃᓯ ᓂᑭᑎᒧᐛᑦ ᐊᐛᔪᐛ ᐃᔅᐱ ᓂᐱᒐ, ᐊᐅᑯᓐ ᑕᐱᔅᑯᓐ ᐊ ᐃᓯᓇᒂᒡ ᐊᓐ ᓂᔅᑯᒧᐅᓐ᙮ ᒋ ᒋᔅᒐᔨᑕᓇᐛᒐ ᐊᓂᔭ ᒥᓯᓇᐃᑭᓂᔪᐤ ᐊ ᐅᓯᑕᑦ ᐊᐛᓐ ᐸᑐᔅ ᐊᑲ ᐸᒪᑎᓯᒋ ᐊᑯᑕ ᐃᔭᒄ ᐃᔭᐱᑎᓂᔨᒡ ᐊᓂᔭ ᑕᓐ ᑲ ᐃᑎᔅᑕᑦ᙮ 17 ᐊᔅᒄ ᒪᒃ ᒪᒂᒡ ᐊ ᐱᒪᑎᓯᑦ ᐊᓐ ᐊᐛᓐ ᓇᒪ ᒋ ᐊᐱᑎᓂᔪᐤ ᐊᓂᔭ ᑕᓐ ᑲ ᐃᑎᔅᑕᑦ ᐊᓐᑕ ᒥᓯᓇᐃᑭᓂᒡ᙮ ᒥᒄ ᐃᔅᐱ ᐊᑲ ᐱᒪᑎᓯᒋ ᐊᑯ ᐃᔭᒄ ᐊ ᐃᑐᑕᑭᓄᐎᒡ ᐊᓂᔭ ᑕᓐ ᑲ ᐃᑎᔅᑕᑦ ᐊ ᐃᓯ ᓂᑐᐛᔨᑕᐧᒃ ᒐᒋ ᐃᑐᑕᑭᓄᔨᒋ ᐅᑦ ᐊᐱᒋᑕᐅᓇ᙮ 18 ᐊᐅᑯᓐ ᑕᐱᔅᑯᓐ ᐊᓐ ᐛᔅᑭᒡ ᓂᔅᑯᒧᐅᓐ ᐊᓂᔭ ᒋᓴᒪᓂᑐᐤ ᑲ ᐅᓯᑎᒧᐛᑦ ᐅᑦ ᐃᔨᒪ, ᐸᑐᔅ ᒥᐧᒄ ᐊᒋ ᐱᒋᑯᓇᑭᓄᐅᒡ ᐊᑯ ᐃᔭᒄ ᑲ ᐃᓯᓇᒂᒡ ᐊ ᐊᐱᑎᒡ᙮ 19 ᒋ ᒋᔅᒋᓯᑐᐛᐛᐤ ᐊ ᐊᓂᔭ ᒧᓱᔅ ? ᐃᔅᐱ ᒥᓯᐛ ᐊᓂᔭ ᐎᓱᐛᐅᓇ ᑲ ᐃᔨᒥᑐᐛᑦ ᐅᑦ ᐃᔨᒪ, ᐊᑯ ᒂ ᐅᑎᓂᒺᑦ ᐊ ᐅᔅᒋᐱᒪᑎᓯᔨᒋ ᒥᔅᑐᓯᓴ ᐅᒥᐧᑯᔪᐤ, ᒂ ᒪᒧᐱᔨᑕᑦ ᓂᐱᔪᐤ ᐊᓐᑕ ᒥᐧᑯᒡ ᑭᔭ ᑲ ᐊᒂᐱᐧᑲᑕᐧᒃ ᐊ ᒥᒂᓯᔨᒡ ᒪᔭᑕᓂᓴ ᐅᐱᐎᔪᐤ, ᒂ ᐊᑯᑕᑦ ᐊᓐᑕ ᒥᐧᑯᒡ ᐊᑯ ᒂ ᐱᒋᑕᐱᔨᑕᑦ ᐊᓐᑕ ᐃᔅ ᐊᓂᔭᔪᐛ ᐎᓱᐛᐅᒥᓯᓇᐃᑭᓇ ᐊ ᑎᑯᓂᔨᒋ ᑭᔭ ᐊᓐᑕ ᐃᔪᐛ ᐊ ᑕᔨᒋ᙮ 20 ᐅᔭ ᒪᒃ ᐊᒋ ᐃᑎᑦ, ᒋ ᐃᑕᐤ ᐊᓂᔭ ᐃᔪᐛ, “ᐊᑯᑕ ᐅᑕ ᒥᐧᑯᒡ ᐛᒋ ᓄᒂᒡ ᐊ ᐊᐱᑎᓂᔨᒡ ᒋᓴᒪᓂᑐᐤ ᐅᓂᔅᑯᒧᐅᓐ ᑲ ᐅᓯᑎᒧᐛᑦ ᐅᑦ ᐃᔨᒪ᙮ ᒋᑦ ᐃᑎᑯᐛᐤ ᒐᒋ ᓂᓇᐃᑎᒺᒄ᙮” 21 ᒧᓱᔅ ᑭᔭ ᐊᐅᑯᓐ ᐊᓐ ᑲ ᐃᑎᑦ᙮ ᒋ ᐱᒋᑕᐱᔨᑕᐤ ᒥᐧᑯᔪᐤ ᐊᓐᑕ ᐃᔅ ᐊᔭᒥᐊᐤ ᒥᒋᐛᐱᒡ, ᑭᔭ ᒥᓯᐛ ᑕᓐ ᑲ ᐃᓯ ᑎᑯᓂᔨᒡ ᐱᑎᑭᒥᒡ ᐊ ᐊᔭᒥᐊᔅᑐᐛᑭᓄᔨᒋ ᒋᓴᒪᓂᑐᐛ ᐊ ᐃᑕᐱᑎᓂᔨᒡ᙮ 22 ᐊᓐ ᐎᓱᐛᐅᓐ ᑲ ᐊᐱᑎᒡ ᐊ ᐊᔭᒥᐊᔅᑐᐛᑭᓄᐅᑦ ᒋᓴᒪᓂᑐᐤ, ᐃᑎᔅᑕᐤ ᒥᓯᐛ ᒐᒂᓐ ᒐᒋ ᐸᔭᒋᑕᑭᓄᐅᒡ ᒥᐧᒄ ᐊ ᐊᐱᑎᒡ ᐊᐅᑯᓐ ᒪᒃ ᑲ ᐃᑐᑕᑭᓄᐅᒋ ᒥᓯᐛ ᒐᒂᔪᐛ ᐱᑎᑭᒥᒡ ᐊᓐᑕ ᒥᒋᐛᐱᒡ ᑲ ᑎᒂᒋ, ᒋ ᐱᒋᑕᐱᔨᑕᑭᓄᐤ ᒥᐧᒄ ᐊᓐᑕ ᐊ ᐊᑎ ᑎᒂᒋ ᐊᓂᔭ ᒐᒂᔪᐛ ᒋᓴᒪᓂᑐᐤ ᐊ ᑕᑦ ᐊ ᐃᓯ ᐊᐱᑎᒋ᙮ ᐛᔅ ᐸᑐᔅ ᒥᐧᒄ ᑲ ᐅᒋᑯᐅᒡ ᐊᑯ ᐃᔭᒄ ᒐ ᑎᒂᒡ ᐛᐸᔨᑎᒪᒐᐅᓐ᙮ ᒋᓴᔅ ᐊᐅᒄ ᐊ ᐃᒐᓇᐧᒃ ᒥᒋᑥᐅᓂᔪᐤ 23 ᒋ ᓂᑐᐛᔨᑕᑯᓐ ᐅ ᒐᒋ ᐃᑎᓇᓄᐅᒡ ᒐᒋ ᐸᔭᐧᑲᒋ ᒥᓯᐛ ᐅᔭ ᒐᒂᔪᐛ᙮ ᐅ ᐊ ᐃᑎᓇᓄᐅᒡ ᒥᒄ ᐎ ᓄᑯᑕᑭᓄᐤ ᑕᓐ ᐊ ᐃᑕᔨᑕᒂᒋ ᐊᓂᔭ ᒋᒋᐛ ᒐᒂᔪᐛ ᐊᓐᑕ ᒋᒋᒋᓯᑯᒡ ᐊ ᑎᒂᒋ᙮ ᒐᔅᑎᓇᔅ ᒪᒃ ᐅᔅᑕ ᐊ ᒥᔽᒋ ᒥᑐᔅᑕᐊᒪᒐᐅᓇ ᓂᑐᐛᔨᑕᑯᓇ ᐛᔅ ᐊᑐᐎᔅ ᒋᒋᐛ ᐃᑕᔨᑕᑯᓇ ᐊᓂᔭᔪᐛ ᒐᒂᔪᐛ ᐊᓐᑕ ᒋᒋᒋᓯᑯᒡ ᐊ ᑎᒂᒋ᙮ Hebrews 9.24-28 (Proper-27 Year B) 24 ᐛᔅ ᙭ ᒋ ᐱᒐᐤ ᐊᓂᔭ ᒪᐅᒡ ᑲ ᒋᔅᑕᔨᑕᑯᓂᔨᒡ ᐊᔭᒥᐊᐤ ᒥᒋᐛᐱᔪᐤ ᐊᓐᑕ ᒋᒋᒋᓯᑯᒡ ᐊ ᑎᑯᓂᔨᒡ, ᐊᓂᔭ ᐊᑲ ᓇᐸᐛ ᐅᒋ ᐅᓯᑕᔨᒋ᙮ ᐅ ᒥᒋᐛᑉ ᐅᑕ ᐊᔅᒋᒡ ᑲ ᑎᒂᒡ ᓂᔅᐱᑐᒧᒥᑭᓐ ᐊ ᐃᓯᓇᒂᒡ ᐊᓐ ᒥᒋᐛᑉ ᒋᒋᒋᓯᑯᒡ ᐊ ᑎᒂᒡ᙮ ᒋᓴᔅ ᒪᒃ ᐊᓐᑕ ᒋᒋᒋᓯᑯᒡ ᐛᒋᒡ ᒋ ᐱᒐᐤ, ᐊᓐᑕ ᒧᔅ ᐊ ᐊᔭᒥᐊᔅᑎᒪᑕᐧᒄ ᒋᓴᒪᓂᑐᐛ ᐊ ᑕᔨᒋ᙮ 25 ᐊᓐ ᒋᓴᐊᔭᒥᐊᐅᒋᒪᐤ ᑲᒋ ᐱᒐᑦ ᐊᓐᑕ ᑲ ᐸᔭᐧᑭᓂᔨᒡ ᐸᐃᒂᐤ ᐸᐃᒄ ᐱᐳᓇ ᒧᔅ ᒋ ᒥᑐᔅᑕᐊᒪᐤ ᐊᐛᓯᓴ ᐊᓯᑯᒻ ᐱᐳᓇ, ᐊᐅᒄ ᐅᔭ ᑲᒋ ᐃᑎᑦ ᒐᒋ ᐅᒋ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ᙮ ᒥᒄ ᒪᒃ ᐸᐃᒂᐤ ᙭ ᐎᔾ ᑎᐱᔨᐛ ᐅᐱᒪᑎᓯᐅᓐ ᒋ ᐱᔅᑎᓂᒻ᙮ 26 ᐛᔅ ᒧᔭᒻ ᒪᒃ ᐸᐃᒂᐤ ᐊᒋ ᐱᔅᑕᔨᒥᑎᓱᑦ ᓇᒪ ᐅᒋ ᓂᑐᐛᔨᑕᑯᓂᔪᐤ ᒧᓯᓇᐤ ᒐᒋ ᐱᔅᑎᓂᓱᑦ ᒐᒋ ᓂᓇᐧᑲᒋᐊᑭᓄᐅᑦ᙮ ᒋ ᓂᑐᐛᔨᑕᑯᓂᑯᐱᓇ ᒪᒃ ᐅᔭ ᒐᒋ ᐃᑎᑦ ᒧᓯᓇᐤ ᐊᐅᑯᓐ ᒋᐸ ᐸᒋ ᐃᑐᐤ ᑲ ᐃᔅᐱᔅ ᑎᒂᒡ ᐅ ᐊᔅᒋᔾ᙮ ᐃᔅᐱ ᒪᒃ ᐛᑎᒋᐱᔨᒋ ᐅᔭ ᐊ ᐸᒋ ᒋᓯᑲᒋ ᐸᐃᒂᐤ ᒥᒄ ᒋ ᐱᔅᑎᓂᒻ ᐅᐱᒪᑎᓯᐅᓐ ᒐᒋ ᐅᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮ 27 ᓂᑐᐛᔨᑕᑯᓐ ᒥᓯᐛ ᐊᐛᓐ ᐸᐃᒂᐤ ᒐᒋ ᓂᐱᑦ ᑭᔭ ᒐ ᑎᐸᔅᑯᓇᑭᓄᐅᑦ᙮ 28 ᑭᔭ ᐎᔾ ᒪᒃ ᙭ ᒥᒄ ᐸᐃᒂ ᒋ ᐱᔅᑎᓂᒻ ᐅᐱᒪᑎᓯᐅᓐ ᐊᓐᑕ ᒐᒋ ᐅᒋ ᑎᑯᓂᔨᒡ ᒥᓯᐛ ᐊᐛᓐ ᒐᒋ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ᙮ ᒥᒄ ᒪᒃ ᒥᓐ ᒋᑭ ᑎᑯᓯᓄᐤ, ᓇᒪ ᐎ ᒐᒋ ᓇᐃᐱᔨᑕᑦ ᐊᓐᑕ ᒐᒋ ᐅᒋ ᐛᐸᔨᑎᒪᒐᓄᔨᒋ ᒥᒋᑥᐅᓇ, ᒋᑭ ᑎᑯᓯᓄᐤ ᒥᒄ ᒐᒋ ᐱᒪᒋᐊᑦ ᐊᓂᔭᔪᐛ ᐊᐛᔪᐛ ᑲ ᐊᓱᐛᐱᒥᑯᑦ ᒐ ᐃᔅᐱᔅ ᑎᑯᓯᐧᒃ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.