ᒐᓂᓯᔅ 29 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒐᑭᑉ ᐊᕋᓐ ᑲ ᑎᑯᓯᐧᒃ 1 ᐊᑯ ᒐᑭᑉ ᐛᐱᓄᑕᒡ ᒂ ᐃᓯ ᔅᑐᑕᑦ ᐊᓐᑕ ᐅᑐᑕᒪ ᑲ ᐎᒋᔨᒋ᙮ 2 ᐸᐃᒂᐤ ᒐᓯᑲᔨᒡ ᒋ ᐅᑎᑐᒻ ᓂᑕᐅᒋᑕᑭᓂᔪᐤ ᒧᓇᐃᐸᓂᔪᐤ ᐊ ᑎᑯᓂᔨᒡ ᐊᓐᑕ ᑲ ᐃᑐᑕᐊᒡ ᒪᔭᑕᓂᓯᐅ-ᐃᔪᒡ ᐅᑦ ᐊᐛᓯᓯᒧᐛᐛ ᒐᒋ ᒥᓂᔨᒋ ᓂᐱᔪ᙮ ᓂᔅᑐᔨᒡ ᒋ ᑕᔪᐛ ᒪᔭᑕᓂᓴ ᑭᔭ ᐛᐱᑎᒂ ᐊᔽᓯᔨᒋ ᒥᒋᒪ ᒧᓇᐃᐸᓂᒡ᙮ ᐊ ᒥᒐᐱᓯᔨᒋ ᐊᓯᓂᔭ ᒋ ᒋᐸᐱᔪᐛ ᐊᓐᑕ ᒧᓇᐃᐸᓂᒡ᙮ 3 ᒋ ᐊᓯᓄᐛᓯᐅᒡ ᒪᔭᑕᓂᓯᐅ-ᐃᔪᒡ ᐸᑎᒪ ᒥᓯᐛ ᑲ ᒪᒧᐃᑐᔨᒋ ᐊᐛᓯᓴ᙮ ᐊᑯ ᒪᒧᐤ ᑲ ᐃᒐᓇᒡ ᐊᓯᓂᔭ ᐊᓐᑕ ᒧᓇᐃᐸᓂᒡ ᐅᒡ ᑭᔭ ᒪᓇᐊᒡ ᐅᑦ ᐊᐛᓯᓯᒧᐛᐛ᙮ ᐃᔅᐱ ᑲᒋ ᒥᓂᒡ ᒪᔭᑕᓂᓯᒡ, ᑲᐤ ᒋ ᒋᑈᐊᐅᒡ ᐊᓯᓂᔭ ᐊᓐᑕ ᒧᓇᐃᐸᓂᒡ᙮ 4 ᒋ ᓇᑕᐤ ᒐᑭᑉ ᒪᔭᑕᓂᓯᐅ-ᐃᔪᐛ ᑭᔭ ᑲ ᑯᒂᒋᒪᑦ, “ᓂᐧᑲᓂᓯᑐᒄ, ᑕᓐᑕ ᐛᒋᔭᒄ ?” ᒂ ᐃᑎᑯᑦ, “ᐦᐊᕋᓐ ᐃᑕᐅᓂᒡ ᓂ ᐅᒋᓇᓐ᙮” 5 ᐊᑯ ᒐᑭᑉ ᑲ ᑯᒂᒋᒪᑦ, “ᒪ ᒋᔅᒐᔨᒪᐛᐤ ᓚᐸᓐ, ᓇᐅᕐ ᐅᓯᒪ ?” “ᓂᐦᐃ, ᓂ ᒋᔅᒐᔨᒪᓇᓐ,” ᐃᑎᑯᐤ᙮ 6 ᐊᑯ ᒐᑭᑉ ᑲ ᑯᒂᒋᒪᑦ, “ᒥᔪᐱᔪᐤ ᐊ ?” ᒂ ᐎᑎᒪᑯᑦ, “ᒥᔪᐱᔪᐤ; ᑭᔭ ᐛᐱᒻ, ᐅᑕᓂᓴ ᕋᐃᒍᓚ ᐸᓱᐛᔪᐛ ᐅᒪᔭᑕᓂᓯᒪ᙮” 7 ᒐᑭᑉ ᐃᑕᐤ, “ᒐᒂᓐ ᐛᒋ ᒪᒧᓇᑯᒡ ᒪᔭᑕᓂᓯᒡ ? ᒥᒄ ᐅ ᐊᐱᑕᒋᓯᑲᐤ᙮ ᒋᐸ ᒥᔭᐛᐅᒡ ᓂᐱᔪᐤ ᐊᑯ ᑭᔭ ᑲᐤ ᒋᐸ ᐃᑐᑕᐛᐅᒡ ᓂᑕᐅᒋᑕᑭᓂᒡ ᒐᒋ ᒥᒋᒡ ᒥᔅᑯᓱᐛ᙮” 8 ᒥᒄ ᒋ ᐃᑎᑯᐤ, “ᓂᑭ ᐎ ᐊᓯᓄᐛᐊᓇᓐᒡ ᐸᑎᒪ ᒥᓯᐛ ᑎᑯᓯᓂᑥᐛ ᒪᔭᑕᓂᓯᐅ-ᐃᔪᒡ ᐊᓯᒡ ᐅᒪᔭᑕᓂᓯᒧᐛᐛ᙮ ᐊᑯ ᒪᒧᐤ ᒐᒋ ᐊᒋᐱᑎᒋᒡ ᐊᓯᓂᔾ ᑭᔭ ᒐ ᒥᔨᒋᒡ ᓂᐱᔪᐤ ᐊᐛᓯᓯᒡ᙮” 9 ᒐᑭᑉ ᐊᔅᒄ ᒪᒂᒡ ᒋ ᐃᔨᒪᐤ ᒪᔭᑕᓂᓯᐅ-ᐃᔪᐛ ᑕᑯᓯᓂᔨᒋ ᕋᐃᒍᓚ ᒧᓇᐃᐸᓂᒡ ᐊᓯᒡ ᒪᔭᑕᓂᓴ ᑭᔭ ᐛᐱᑎᒂ, ᐛᔅ ᒋ ᓇᑭᑐᐛᔨᒪᐤ ᐅᑕᐎᔭ ᐅᑦ ᐊᐛᓯᓯᒥᔪᐛ᙮ 10 ᐃᔅᐱ ᒐᑭᑉ ᐎᔭᐱᒪᑦ ᐎᐧᑲᓂᓴ ᕋᐃᒍᓚ ᑭᔭ ᒪᔭᑕᓂᓴ ᑭᔭ ᐛᐱᑎᒂ ᑲ ᑎᐸᔨᒪᔨᒋ ᐅᐧᑯᒥᓴ, ᒋ ᓇᑎᒻ ᒧᓇᐃᐸᓂᔪᐤ, ᒋ ᐃᒐᐱᑕᐤ ᐊᓯᓂᔭ ᑭᔭ ᒋ ᒥᓇᐃᒪᐤ ᐅᐧᑯᒥᓴ ᐅᒪᔭᑕᓂᓯᒥᔪᐛ᙮ 11 ᒐᑭᑉ ᒋ ᐅᒐᒪᐤ ᕋᐃᒍᓚ᙮ ᒋᒋᐛ ᒋ ᐊᒂᑕᔨᑎᒻ ᑲᒋ ᐅᑎᑕᑦ ᐅᑐᑕᒪ, ᒂ ᒪᑦ᙮ 12 ᒂ ᐃᑕᑦ ᕋᐃᒍᓚ, “ᓂᔾ ᐅ ᒍᑕᐎᔾ ᐎᐧᑲᓂᓴ, ᕋᐸᑲ ᐅᑯᓴ᙮” ᐃᔅᐱ ᐱᔭᑕᐧᒃ ᐅᔭ ᕋᐃᒍᓪ, ᒋ ᒋᐛᐸᑕᐤ ᑭᔭ ᐛᑎᒧᐛᑦ ᐅᑕᐎᔭ ᐊᓂᔭ ᓂᔭᒋᒧᐱᔨᒋ ᒐᑭᐸ, ᐎᐧᑲᓂᓴ ᐅᑯᓯᔪᐛ᙮ 13 ᐃᔅᐱ ᓚᐸᓐ ᐱᔭᑕᐧᒃ ᑕᑯᓯᓂᔨᒋ ᐅᑐᓯᒪ, ᒋ ᒋᒋᓇᐤ ᒐᒋ ᓂᒋᔅᑯᐛᑦ, ᒋ ᐛᐅᒋᓇᐤ ᑭᔭ ᒋ ᐅᒐᒪᐤ ᑭᔭ ᒂ ᐃᑐᑕᐊᑦ ᐎᒋᒡ᙮ ᐊᑯᑕ ᒐᑭᑉ ᐛᑎᒧᐛᑦ ᒥᓯᐛ ᒐᒂᓂᔪᐤ ᑲ ᐃᔅᐱᔨᒡ᙮ 14 ᑲᒋ ᓂᑐᑐᐛᑦ ᒐᑭᐸ, ᓚᐸᓐ ᒋ ᐃᑕᐤ, “ᓂᐦᐃ, ᒋᔾ ᑎᐱᔨᐛ ᓂᐧᑲᓂᔅ᙮” ᓚᐸᓐ ᒋ ᓂᑐᒪᐤ ᒐᑭᐸ ᒐᒋ ᑕᔨᒋ ᐊ ᑕᑦ᙮ ᒐᑭᑉ ᐸᐃᒄ ᐱᓯᒺ ᒋᑕᐛᐤ ᓚᐸᓇ ᐎᒋᔨᒡ᙮ ᓚᐸᓇ ᑲ ᐊᑐᔅᒐᔅᑐᐛᑦ ᒐᑭᑉ Genesis 29.15-28 (Proper-12 Year A) 15 ᓚᐸᓐ ᒂ ᐃᑕᑦ ᒐᑭᐸ, “ᑲ ᐃᔅᐱᔅ ᑎᑯᓯᓂᔨᓐ, ᒥᒐᑦ ᒐᒂᓐ ᔅᒋ ᐃᑐᑎᒧᐅᓐ ᒥᒄ ᓇᒪ ᒋ ᐅᒋ ᒋᓯᐧᑲᑎᓐ᙮ ᓇᒪ ᒥᔽᐤ ᐅ᙮ ᐊᑎᓱᐧᒄ ᒥᒋᒪ ᐎᐧᑲᓂᓯᑕᑐᔭᐧᒄ, ᒋᐸ ᒋᓯᐧᑲᑎᓐ ᒐᒂᓐ᙮ ᑕᓐ ᐊᔅᐱᔅ ᓂᑐᐛᔨᑎᒥᓐ ?” 16 ᒋᓂᓱᔎᐎᔪᐛ ᐅᑕᓂᓴ ᓚᐸᓐ᙮ ᓕᐊ ᒋ ᐃᓯᓂᐧᑲᓱᔪᐛ ᒐᓴᐃᔎᐎᔨᒋ ᑭᔭ ᕋᐃᒍᓪ ᐛᔅᑎᓂᒋᐅᔨᒋ᙮ 17 ᒋ ᒥᔽᓯᔪᐛ ᐅᔅᒋᓯᒂ ᓕᐊ, ᒥᒄ ᕋᐃᒍᓪ ᓇᔅᒡ ᒋ ᒥᔪᓇᑯᓱᐤ ᐎᔭᒡ ᑭᔭ ᐅᑕᔅᑎᒥᐧᑯᒡ᙮ 18 ᒐᑭᑉ ᒋ ᓴᒋᐊᐤ ᕋᐃᒍᓚ ᐊᑯ ᐊᑕᑦ ᓚᐸᓇ, “ᓂᔄᐅᑕᒡ ᑕᑐᐳᓇ ᒋᑭ ᐊᑐᔅᒐᔅᑕᑎᓐ ᓇᐃᒥᓇ ᒐᒋ ᐎᒋᒥᒄ ᒋᑕᓂᔅ ᕋᐃᒍᓪ᙮” 19 ᒋ ᓇᐃᑎᒻ ᓚᐸᓐ ᑭᔭ ᒋ ᐃᑕᐤ, “ᒋᒋᐛ ᓂ ᒥᔽᔨᑕᓐ ᒐᒋ ᒥᔨᑕᓐ ᓂᑕᓂᔅ ᐃᔅᐱᔅ ᒪᒃ ᑯᑎᒃ ᐊᐛᓐ᙮ ᐊᑯ ᒐ ᑕᔨᓐ ᐊ ᑕᔭᓐ ᑭᔭ ᒐ ᐊᑐᔅᒐᔅᑐᐎᔨᓐ ᐃᔅᐱᔅ ᓂᔄᐅᑕᒡ ᑕᑐᐳᓇ᙮” 20 ᐊᑯ ᓂᔄᐅᑕᒡ ᑕᑐᐳᓇ ᒋ ᐊᑐᔅᒐᐤ ᒐᑭᑉ ᒐᒋ ᐎᒋᒪᑦ ᕋᐃᒍᓚ, ᒥᒄ ᐛᐃᐱᔅᒋᔅ ᒋ ᐃᑕᔨᑎᒻ ᐛᔅ ᑲ ᐃᔅᐱ ᓴᒋᐊᑦ ᕋᐃᒍᓚ᙮ 21 ᐊᑯ ᒐᑭᑉ ᐊᑕᑦ ᓚᐸᓇ, “ᓴᔅ ᓂᔄᐅᑕᒡ ᑕᑐᐳᓇ ᔅᒋ ᐊᑐᔅᒐᔅᑕᑎᓐ; ᐊᑯ ᐸᒋ ᒥᔨᔾ ᒋᑕᓂᔅ ᒐᒋ ᐎᒋᒥᒃ᙮” 22 ᐊᑯ ᓚᐸᓐ ᓇᑐᒪᑦ ᒥᓯᐛ ᐛᔪᐛ ᐊᓐᑕ ᐅᑕᓇᒡ ᒐ ᓂᐳᒥᒋᓱᓇᓂᒐᑦ᙮ 23 ᒥᒄ ᐊᓂᔭ ᑕᐱᔅᑲᔨᒡ, ᓚᐸᓐ ᒋ ᐅᑎᓇᐤ ᐅᑕᓂᓴ ᓕᐊᔨᒋ ᑭᔭ ᐊ ᐃᑐᑐᐛᑦ ᒐᑭᐸ ᑭᔭ ᒐᑭᑉ ᒂ ᐎᐸᒪᑦ᙮ 24 ᓚᐸᓐ ᐃᔭᐱᒡ ᒋ ᐅᑎᓇᐤ ᐅᑯᐸᓇᔎᒪ ᓯᓪᐸ ᑭᔭ ᐅᑕᓂᓴ ᓕᐊᔨᒋ ᒋ ᒥᔭᐤ ᒐ ᐅᑯᐸᓇᔎᒥᔨᒋ᙮ 25 ᒥᓐ ᒐ ᒋᓴᐸᔭᔨᒡ ᒐᑭᑉ ᐛᓂᑦ ᒋ ᐛᐱᒪᐤ ᓕᐊᔨᒋ ᐛᐸᒥᑯᑦ᙮ ᒋ ᓂᑐᐛᐱᒪᐤ ᒐᑭᑉ ᓚᐸᓇ ᑭᔭ ᒋ ᐃᑕᐤ᙮ “ᓇᒪ ᓂ ᒥᔽᔨᑕᓐ ᑲ ᐃᑐᑎᒥᓐ᙮ ᓂᔄᐅᑕᒡ ᑕᑐᐳᓇ ᔅᒋ ᐊᑐᔅᒐᔅᑕᑎᓐ ᕋᐃᒍᓪ ᒐᒋ ᐎᒋᒥᒃ, ᒥᒄ ᓕᐊ ᔅᒋ ᒥᔨᓐ᙮ ᒐᒂᓐ ᐛᒋ ᐎᔭᓯᒥᔨᓐ ?” 26 ᒥᒄ ᓚᐸᓐ ᐃᑕᐤ, “ᓇᒪ ᒋ ᒥᔨᑎᓐ ᐛᔅᑎᓂᒋᔎᐅᑦ ᓂᑕᓂᔅ, ᐅᑕ ᓂᑦ ᐊᔅᒋᓇᒡ ᒐᓴᐃᔎᐎᔨᒋ ᐊᐛᓐ ᐅᑕᓂᓴ ᒋᑭ ᐎᓂᐳᐛᐤ ᐊᒺᔭ ᐛᔅᑎᓂᒋᔎᐅᔨᒋ᙮ 27 ᐊᓱᐛᐸᑕ ᐸᑎᒪ ᐃᔎᐱᒐ ᐅ ᐅᔅᒋᓂᐳ-ᒥᓇᔅᑕᑭᓐ᙮ ᐊᑯ ᒐ ᒥᔨᑕᓐ ᒐᒋ ᐎᒋᒥᑦ ᕋᐃᒍᓪ, ᒥᒄ ᓂᔄᐅᑕᒡ ᑕᑐᐳᓇ ᒥᓐ ᒋᑭ ᐎ ᐊᑐᔅᒐᔅᑐᐅᓐ᙮” 28 ᒋ ᓂᔅᑯᒧᐤ ᒐᑭᑉ ᑭᔭ ᐃᔅᐱ ᐊᔎᐱᔨᒡ ᐅᔅᒋᓂᐳ-ᒥᓇᔅᑕᑭᓂᔪᐤ, ᓚᐸᓐ ᒋ ᒥᔭᐤ ᒐᑭᐸ ᐅᑕᓂᓴ ᕋᐃᒍᓚ ᒐᒋ ᐎᒋᒪᔨᒋ᙮ 29 ᒋ ᑭᓄᐛᔨᒪᐤ ᓚᐸᓐ ᐃᔎᐤ ᐊᐱᒋᐊᑭᓇ ᐱᓚ ᑲ ᐃᓯᓂᐧᑲᓱᔨᒋ᙮ ᕋᐃᒍᓚ ᒋ ᒥᔭᐤ ᒐ ᐊᑐᔅᒐᔅᑕᑯᔨᒋ᙮ 30 ᒐᑭᑉ ᐃᔭᐱᒡ ᒋ ᐎᐸᒪᐤ ᕋᐃᒍᓚ ᑭᔭ ᐊᑎᑐᐤ ᒋ ᓴᒋᐊᐤ ᕋᐃᒍᓚ ᐃᔅᐱᔅ ᓕᐊᔨᒋ᙮ ᑲᒋ ᐎᒋᒪᑦ ᒐᑭᑉ ᕋᐃᒍᓚ, ᓂᔄᐅᑕᒡ ᑕᑐᐳᓇ ᒥᓐ ᒋ ᐊᑐᔅᒐᔅᑐᐛᐤ ᓚᐸᓇ᙮ ᒐᑭᑉ ᐎᐛ ᑭᔭ ᐅᑦ ᐊᐛᓯᒧᐛᐛ 31 ᐃᔅᐱ ᐎᔭᐱᒪᑦ ᐅᑎᐸᔨᒋᒐᐤ ᐊᑲ ᓴᒋᐊᑭᓄᔨᒋ ᓕᐊᔨᒋ, ᒋ ᐃᑐᑐᐛᐤ ᒐᒋ ᐊᓱᐛᐱᒪᐅᓯᔨᒋ᙮ ᒥᒄ ᕋᐃᒍᓪ ᓇᒪ ᐅᒋ ᐊᓱᐛᐱᒪᐅᓱᐤ᙮ 32 ᐊᑯ ᓕᐊ ᒋ ᐊᓱᐛᐱᒪᐅᓱᐤ ᑭᔭ ᒂ ᑕᔨᒋ ᐅᑯᓴ᙮ ᒂ ᐃᔅᒋᔄᑦ, “ᓂᒋ ᐛᐱᒥᒄ ᐅᑎᐸᔨᒋᒐᐤ ᐊᑲ ᐅᒋ ᒥᔽᔨᑎᒧᒡ ᑭᔭ ᓂᒋ ᒥᔨᒄ ᐅᑯᓯᒪᐛ᙮ ᐊᓄᒡ ᓂᑭ ᓴᒋᐃᒄ ᓂᐎᒋᒪᑭᓐ᙮” ᐊᑯ ᕈᐱᓐ ᒂ ᐃᓯᓂᐧᑲᑕᑦ ᐅᑯᓴ᙮ 33 ᒥᓐ ᒋ ᐊᓱᐛᐱᒪᐅᓱᐤ ᑭᔭ ᒂ ᑕᔨᒋ ᑯᑎᑲ ᐅᑯᓴ᙮ ᒂ ᐃᔅᒋᔄᑦ, “ᐅᑎᐸᔨᒋᒐᐤ ᐃᔭᐱᒡ ᓂᒋ ᒥᔨᒄ ᐅᔭ ᐅᑯᓯᒪᐛ, ᐛᔅ ᒋ ᐸᑎᒻ ᐊᑲ ᓴᒋᐃᑯᐅᐎᒡ᙮” ᐊᑯ ᓯᒥᐅᓐ ᒂ ᐃᓯᓂᐧᑲᑕᑦ ᐅᑯᓴ᙮ 34 ᒥᓐ ᐸᐃᒂᐤ ᒋ ᐊᓱᐛᐱᒪᐅᓱᐤ ᑭᔭ ᒋ ᑕᔪᐛ ᑯᑎᑲ ᐅᑯᓴ᙮ ᒂ ᐃᔅᒋᔄᑦ, “ᐊᓄᒡ ᓂᑭ ᓴᒋᐃᒄ ᓂᐎᒋᒪᑭᓐ ᐛᔅ ᓂᔅᑐ ᐅᑯᓯᒪᐛ ᓂᒋ ᒥᔭᐤ᙮” ᐊᑯ ᓕᐸᐃ ᒂ ᐃᓯᓂᐧᑲᑕᑦ ᐅᑯᓴ᙮ 35 ᓕᐊ ᒥᓐ ᐸᐃᒂᐤ ᒋ ᐛᐱᒪᐅᓱᐤ᙮ ᓇᐸᓴ ᐃᔭᐱᒡ ᒋ ᑕᔪᐛ ᑭᔭ ᒂ ᐃᔅᒋᔄᑦ, “ᐊᓄᒡ ᓂᑭ ᒪᒥᒋᒪᐤ ᐅᑎᐸᔨᒋᒐᐤ᙮” ᐊᑯ ᒍᑕ ᒋ ᐃᓯᓂᐧᑲᑕᐤ᙮ ᑲᒋ ᑕᔨᒋ ᒍᑕᔨᒋ, ᒂ ᐳᓂᐱᔨᒡ ᐊ ᐅᑦ ᐊᐛᓯᒥᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.