ᒐᓂᓯᔅ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐅᔅᑭᒡ ᑲ ᐃᓯᓇᒂᒡ ᑭᔭ ᐅᔅᑭᒡ ᑲ ᐃᔅᐱᔨᒡ Genesis 1.1-2.4 (Trinity Year A) Genesis 1.1-5 (Epiphany-1 Year B)

¹ ᓂᔅᑎᒻ ᒋᓴᒪᓂᑐᐤ ᒋ ᐅᓯᑕᐤ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮

² ᓇᔅᒡ ᒋ ᐱᓯᒂᐤ ᐊᔅᒋᔾ ᑭᔭ ᓇᒪ ᒐᒂᓐ ᐅᒋ ᐃᓯᓇᑯᓐ, ᓂᐱᔾ ᒥᒄ ᒋ ᑎᑯᓐ ᑭᔭ ᓇᔅᒡ ᒋ ᐅᑲᔅᑕᔭᐤ᙮ ᒋᓴᒪᓂᑐᐤ ᐅᑦ ᐊᒐᒂ ᒋ ᑕᔪᐛ᙮

³ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒐᒋ ᒋᐧᑲᔭᔅᑐᐛᒡ ᐛᔅᑕᐅᓐ !” ᒂ ᒋᐧᑲᔭᔅᑐᐛᒡ ᐛᔅᑕᐅᓐ᙮

⁴ ᒋᓴᒪᓂᑐᐤ ᒋ ᒋᑕᐸᑎᒻ ᐛᔅᑕᐅᓂᔪᐤ ᐊᒋ ᒥᔽᔨᒡ, ᑭᔭ ᒋ ᑎᐸᓂᒻ ᐛᔅᑕᐅᓂᔪᐤ ᑭᔭ ᐊ ᐅᑲᔅᑕᔭᔨᒡ᙮

⁵ ᒋᓴᒪᓂᑐᐤ ᒋ ᐃᓯᓂᐧᑲᑎᒻ ᐛᔅᑕᐅᓂᔪᐤ, “ᒋᓯᑲᐤ,” ᑭᔭ ᒋ ᐃᓯᓂᐧᑲᑎᒻ ᐊ ᐅᑲᔅᑕᔭᔨᒡ, “ᑎᐱᔅᑲᐤ᙮” ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔅᑎᒻ ᐊ ᒋᓯᑲᒡ᙮

⁶ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒋᓯᑯᔭᓐ ᒐᒋ ᐸᒋ ᒧᔅᒋᐱᔨᒡ ᐊᓐᑕ ᓂᐱᒡ ᒐᒋ ᑎᐸᓇᑭᓄᐅᒡ ᐃᔅᐱᒥᒡ ᓂᐱᔾ ᑭᔭ ᓂᑕᒡ ᓂᐱᔾ᙮”

⁷ ᐊᐅᑯᓐ ᒂ ᐃᓯᓇᑯᓂᔨᒡ᙮ ᒋᓴᒪᓂᑐᐤ ᒂ ᐅᓯᐊᑦ ᒋᓯᑯᔭᓇ,

⁸ ᑭᔭ “ᒋᓯᒄ” ᒂ ᐃᓯᓂᐧᑲᑕᐧᒄ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔄᐤ ᐊ ᒋᓯᑲᒡ᙮

⁹ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᓂᐱᔾ ᓯᐸ ᒋᓯᑯᒡ ᒐᒋ ᒪᒧᐱᔨᒡ, ᐊᑯ ᒐᒋ ᑎᒂᒡ ᐊ ᐸᒂᔅᑭᒥᑲᒡ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮

¹⁰ “ᐊᔅᒋᔾ” ᒋ ᐃᓯᓂᐧᑲᑎᒻ ᒋᓴᒪᓂᑐᐤ ᐊ ᐸᒂᔅᑭᒥᑲᔨᒡ, ᑭᔭ “ᐎᓂᐸᒄ” ᒋ ᐃᓯᓂᐧᑲᑎᒻ ᓂᐱᔪᐤ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮

¹¹ ᐊᑯ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒐᒋ ᓂᑕᐅᒋᒋ ᒥᓯᐛ ᑕᑐᐎᒡ ᐊ ᐃᓯᓇᒂᒋ ᓂᑕᐅᒋᑕᑭᓇ, ᐊᓂᔭ ᓇᑕᐅᒋᑕᒥᑲᒋ ᐸᒂᓯᑭᓂᒥᓇ ᑭᔭ ᐊᓂᔭ ᓇᑕᐅᒋᑕᒥᑲᒋ ᒥᓂᓴ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮

¹² ᒥᓯᐛ ᑕᑐᐎᒡ ᐊ ᐃᓯᓇᒂᒋ ᓂᑕᐅᒋᑕᑭᓇ ᒋ ᓂᑕᐅᒋᓇ ᐅᑕ ᐊᔅᒋᒡ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ ᑭᔭ ᒋ ᒥᔽᔪᐤ᙮

¹³ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔍᐤ ᐊ ᒋᓯᑲᒡ᙮

¹⁴ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᐛᔅᑕᐅᓇ ᐊᓐᑕ ᒋᓯᑯᒡ ᒐ ᑎᐸᓇᐱᔨᒡ ᐊ ᒋᓯᑲᒡ ᑭᔭ ᐊ ᑎᐱᔅᑲᒡ ᒐᒋ ᒋᔅᒐᔨᑕᒂᒋ ᒋᓯᒂ ᑭᔭ ᐱᐳᓇ᙮

¹⁵ ᓂᑐᐛᔨᑕᓐ ᒐᒋ ᐛᔅᑕᒋ ᐊᓐᑕ ᐊᔅᒋᒡ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮

¹⁶ ᒪᒃ ᒋᓴᒪᓂᑐᐤ ᒋ ᐅᓯᐊᐤ ᒋᓯᑲᐤ ᐱᓯᒺ ᑭᔭ ᑎᐱᔅᑲᐤ ᐱᓯᒺ᙮ ᒋ ᐅᓯᐊᐤ ᒋᓯᑲᐤ ᐱᓯᒺ, ᐊᑎᑐᐤ ᒥᓯᑐᐤ ᐃᔅᐱᔅ ᑎᐱᔅᑲᐤ ᐱᓯᒺ, ᒐᒋ ᐛᔅᑐᐛᑦ ᒐᓯᑲᔨᒋ, ᒋ ᐅᓯᐊᐤ ᐃᔭᐱᒡ ᑎᐱᔅᑲᐤ ᐱᓯᒺ᙮ ᐊᑎᑐᐤ ᐊᐱᓯᓯᓱᐤ ᐃᔅᐱᔅ ᒋᓯᑲᐤ ᐱᓯᒺ, ᒐᒋ ᐛᔅᑐᐛᑦ ᑕᐱᔅᑲᔨᒋ᙮ ᐅᒐᑭᑕᒂ ᐃᔭᐱᒡ ᒋ ᐅᓯᐊᐤ᙮

¹⁷ ᐊᑯ ᒋᓴᒪᓂᑐᐤ ᒂ ᑎᔭᑦ ᐅᔭ ᐛᔅᑕᐅᓇ ᐊᓐᑕ ᒋᓯᑯᒡ ᒐᒋ ᒋᐧᑲᔭᔅᑕᔨᒡ ᐊᔅᒋᔪᐤ᙮

¹⁸ ᒋ ᐃᑐᑐᐛᐤ ᒋᓯᑲᐤ ᐱᓯᒺ ᒐ ᒋᐧᑲᔭᔅᑐᐛᔨᒋ ᒐᓯᑲᔨᒋ ᑭᔭ ᑎᐱᔅᑲᐤ ᐱᓯᒺ ᒐ ᒋᐧᑲᔭᔅᑐᐛᔨᒋ ᑕᐱᔅᑲᔨᒋ ᑭᔭ ᒐᒋ ᑎᐸᓇᑭᓄᐅᒡ ᐛᔅᑕᐅᓐ ᑭᔭ ᐅᑲᔅᑕᔭᐅᓐ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮

¹⁹ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓇᐛᐤ ᐊ ᒋᓯᑲᒡ᙮

²⁰ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᐎᓂᐸᑯᒡ ᒐᒋ ᓴᑭᔅᒋᓇᒡ ᐱᒪᑎᓯᐤ ᐊᐛᓯᓯᒡ, ᓂᑐᐛᔨᒪᐅᒡ ᑭᔭ ᐱᔭᓱᐅᒡ ᒐᒋ ᐱᐸᒥᔭᒡ ᐊᓐᑕ ᒋᓯᑯᒡ᙮”

²¹ ᒋᓴᒪᓂᑐᐤ ᒋ ᐅᓯᐊᐤ ᐊ ᒥᓯᑎᔨᒋ ᐊᐛᓯᓴ ᒐ ᑕᔨᒋ ᐊᓐᑕ ᓂᐱᒡ, ᓂᒪᓴ ᒋ ᐅᓯᐊᐤ ᑭᔭ ᒥᓯᐛ ᑕᑐᐎᒡ ᐊ ᐃᓯᓇᑯᓂᔨᒡ ᒐᒂᔪᐤ ᒐᒋ ᑎᑯᓂᔨᒡ ᐊᓐᑕ ᓂᐱᒡ, ᒋ ᐅᓯᐊᐤ ᐃᔭᐱᒡ ᒥᓯᐛ ᑕᑐᐎᒡ ᐊᓯᓇᑯᓯᔨᒋ ᐱᔭᓱᐛ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮

²² ᐊᑯ ᒋᓴᒪᓂᑐᐤ ᒂ ᒥᔭᑦ ᐱᒪᑎᓯᐤ ᐊᐛᓯᓴ ᐅᓱᐛᔨᒋᒐᐅᓐ, ᒂ ᐃᑕᑦ ᐎᓂᐸᑯᒡ ᐊᐛᓯᓴ ᒐᒋ ᑕᔨᒋ ᐊᓐᑕ ᒥᓯᐛ ᐊᔅᐱᓴᔨᒡ ᐎᓂᐸᑯᔪᐤ ᑭᔭ ᐱᔭᓱᐛ ᒐᒋ ᑕᔨᒋ ᐊᓐᑕ ᒥᓯᐛ ᐊᔅᐱᑎᔅᑭᒥᑲᔨᒡ ᐊᔅᒋᒡ᙮

²³ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᐱᑕᑕᒡ ᑕᑥᐤ ᐊ ᒋᓯᑲᒡ᙮

²⁴ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᒪᐅᒡ ᒥᓯᐛ ᑕᑐᐎᒡ ᐊ ᐃᓯᓇᑯᓯᒡ ᐊᐛᓯᓯᒡ ᒐᒋ ᑕᒡ ᐅᑕ ᐊᔅᒋᒡ᙮” ᑭᔭ ᐊᐅᑯᓐ ᒂ ᐃᔅᐱᔨᒡ᙮

²⁵ ᒋᓴᒪᓂᑐᐤ ᒥᓯᐛ ᒋ ᐅᓯᐊᐤ ᐊᐛᓯᓴ᙮ ᐊᑯ ᑲ ᒋᑕᐸᑕᐧᒃ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮

²⁶ ᒋᓴᒪᓂᑐᐤ ᒂ ᐃᔅᒋᔄᑦ, “ᐊᓄᒡ ᐃᔪᒡ ᒋᑭ ᐅᓴᓄᐅᒡ, ᑭᔭ ᒧᔭᒻ ᐊᓯᓇᑯᓱᐛᐧᒄ ᒋᑭ ᐃᓯᓇᑯᓱᐅᒡ᙮ ᒋᑭ ᒥᔭᓄᐅᒡ ᒐᒋ ᑎᐸᔨᒪᒡ ᓂᒪᓴ, ᐱᔭᓱᐛ, ᑭᔭ ᒥᓯᐛ ᐊᐛᓯᓴ᙮”

²⁷ ᐊᑯ ᒋᓴᒪᓂᑐᐤ ᒂ ᐅᓯᐊᑦ ᓇᐸᐛ ᑭᔭ ᐃᔎᐛ ᒐᒋ ᐃᓯᓇᑯᓯᔨᒋ ᒧᔭᒻ ᐎᔾ ᐊᓯᓇᑯᔅᑦ᙮

²⁸ ᒋᓴᒪᓂᑐᐤ ᒋ ᒥᔭᐤ ᐅᓱᐛᔨᒋᒐᐅᓐ ᑭᔭ ᒂ ᐃᑕᑦ, “ᒐ ᒥᒐᑥᐊᑯᒡ ᐊᐛᓯᒡ, ᒐᒋ ᒥᒐᑎᑦ ᐃᔪᐤ ᐅᑕ ᐊᔅᐱᑎᔅᑭᒥᑲᒡ ᐊᔅᒋᒡ ᑭᔭ ᒋᔨᐛᐤ ᒐ ᑭᓄᐛᔨᑎᒪᒄ᙮ ᒋᔨᐛᐤ ᒋᑭ ᐅᒋᒪᐅᓇᐛᐤ ᐊᓐᒡ ᓂᒪᓯᒡ ᐊᓐᑕ ᓂᐱᒡ, ᐱᔭᓱᐅᒡ ᐊᓐᑕ ᒋᓯᑯᒡ ᑭᔭ ᒥᓯᐛ ᐊᐛᓯᓯᒡ ᐅᑕ ᐊᔅᒋᒡ᙮

²⁹ ᐛᐸᑎᒧᒄ, ᒋ ᒥᔨᑎᓇᐛᐤ ᓂᑕᐅᒋᑕᑭᓐ ᒥᓯᐛ ᐅᑕ ᐊᔅᒋᒡ, ᑭᔭ ᒥᓯᐛ ᑕᑐᐤ ᒥᔅᑎᑯᒡ ᑲ ᓂᑕᐅᒋᑕᑦ ᒥᓂᓴ ᒐ ᐅᒥᒋᒥᔭᒄ,

³⁰ ᑭᔭ ᓂᒋ ᒥᔭᐅᒡ ᐊᐛᓯᓯᒡ ᑭᔭ ᐱᔭᓱᐅᒡ ᒥᓯᐛ ᒥᔅᑯᓱᐛ ᑭᔭ ᓂᑕᐅᒋᑕᑭᓇ ᒐ ᐅᒥᒋᒥᑕᒡ᙮” ᐊᐅᑯᓐ ᑲ ᐃᔅᐱᔨᒡ᙮

³¹ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᒥᓯᐛ ᓇᔅᒡ ᒋ ᒥᔽᓯᔪᐤ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᐊᓱᑕᒡ ᑕᑥᐤ ᐊ ᒋᓯᑲᒡ᙮