ᐊᒃᓱᑕᔅ 25 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒐ ᐱᔅᑎᓂᒐᓄᐅᒡ ᒐᒋ ᐅᓯᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ 1 ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 2 “ᒐ ᐎᑎᒧᐅᑥᐤ ᒥᓯᐛ ᐃᔪᒡ ᒐ ᐎ ᒥᔨᒡ ᒥᔨᐛᐅᓇ, ᐎ ᒥᔨᑥᐛ ᒥᔨᐛᐅᓇ, ᒋᔾ ᒐ ᐅᑎᓂᒧᑦ᙮ 3 ᐊᐅᑯᔪᐛ ᐅᔭ ᒐᒂᔪᐛ ᒐ ᐅᑎᓂᒥᓐ: ᐎᔄᐅᓱᓇᔭᐱᔅᔎ, ᓱᓇᔭᐱᔅᔎ ᑭᔭ ᐎᔄᐛᐱᔎ; 4 ᑲ ᐱᔅᑭᓂᓯᑦ, ᑲ ᐱᒋᒥᓇᑯᓯᑦ ᑭᔭ ᑲ ᒥᐧᑯᓯᑦ ᐊᓯᑭᓂᔭᐱᔾ; ᐊ ᒥᔽᓯᒡ ᐱᒍᐎᔭᓐ; ᒥᔅᑐᓯᔅ ᐅᐱᐎᔭ ᒐ ᐅᒋ ᐅᓯᑕᑭᓄᐅᒡ ᐱᒍᐎᔭᓐ; 5 ᓇᐸ ᒪᔭᑕᓂᓱᔭᓐ ᐊ ᒋᓯᓇᑭᓄᐅᑦ; ᐊ ᒥᔽᒡ ᐱᓴᑭᓐ; ᐊᑲᓯᔭ ᒥᔅᑎᒄ; 6 ᐊᓕᑉ ᐱᒥᔾ ᒐᒋ ᓯᔅᑲᐛᑭᓄᐅᒡ ᐛᔅᑕᓂᐱᒪᑭᓐᒡ; ᓂᐱᓯᔭ ᑲ ᐎᒋᒪᑯᓯᔨᒋ ᒐᒋ ᒪᒧᐱᑕᑭᓄᐅᒋ ᐊᓐᑕ ᐊᓕᑉ ᐱᒥᒡ ᒐᒋ ᑐᒥᓇᑭᓄᐅᒡ ᐊᔭᒥᐊᐅᒋᒪᐅᒡ ᑭᔭ ᐊᓐᑕ ᑲ ᒥᔪᒪᒂᒡ ᐎᒋᒪᓯᑭᓂᒡ; 7 ᑲ ᓱᓇᔭᐎᒋ ᐊᓯᓂᔭ ᐅᓂᒃᔅ ᐊᓯᓂᐧᑲᑕᒋ ᑭᔭ ᑯᑎᒂ ᑲ ᓱᓇᔭᐅᒋ ᐊᓯᓂᔭ, ᒐᒋ ᒋᑭᒧᑕᑭᓂᔨᒋ ᐊᓐᑕ ᐊᔅᐱᒋᑯᓇᐅᓂᒡ ᑭᔭ ᐱᑕᓱᐅᓂᒡ ᐊᔭᒥᐊᐅᒋᒪᐤ ᐅᑦ ᐊᐱᒋᑕᐅᓂᒡ᙮ 8 ᑭᔭ ᓂ ᓂᑐᐛᔨᑎᒧᐛᐅᒡ ᒐᒋ ᐅᓯᑎᒧᐅᒡ ᐸᔭᒋ-ᐱᒍᐎᔭᓂᒋᐛᐱᔪᐤ, ᐊᓐᑕ ᒐ ᐎᒋᒥᒂᐤ ᓂᑦ ᐃᔨᒥᒡ᙮ 9 ᐸᐃᑯᑕᐤ ᒋᑭ ᐎ ᐃᓯᓇᑯᑕᐅᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᐊᓂᔭ ᒐᒂᔪᐛ ᒐ ᐊᐱᑎᓂᔨᒋ ᐊᓐᑕ ᐱᑎᑭᒥᒡ ᒧᔭᒻ ᒐ ᐃᓯ ᐛᐸᑎᔨᑕᓐ᙮” ᐸᔭᒋ-ᒥᐅᑦ 10 “ᒐ ᐎᑎᒧᐅᑥᐤ ᒐᒋ ᐅᓯᑕᒡ ᐸᔭᒋ-ᒥᐅᑎᔪᐤ ᐊᑲᓯᔭ ᒥᔅᑎᒂ ᐅᒡ ᓇᐎᔪᐤ ᐊᓱ ᐱᑕᑕᒡ ᒥᒋᒋᓐ ᐊ ᐃᓯ ᒋᓏᔨᒡ, ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊ ᐃᔅᐱᔅ ᐃᔨᑭᔅᑲᔨᒡ, ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊ ᐃᓯ ᐃᔅᐸᔨᒡ᙮ 11 ᐎᔄᐅᓱᓇᔭᐤ ᒋᑭ ᐎᔎᔭᒋᓂᒧᒡ ᐱᑎᑭᒥᒡ ᑭᔭ ᐎᐎᑎᒥᒡ ᑭᔭ ᐊᓐᑕ ᐛᔅᑲᔭᔎᔨᑭᓐᒡ ᒋᐸᐃᑭᓂᒡ᙮ 12 ᓇᐤ ᐊ ᐎᔄᐅᓱᓇᔭᐎᒋ ᐛᐎᔭᐱᔎ ᒋᑭ ᐅᓴᐅᒡ ᑭᔭ ᒋᑭ ᒋᑭᒺᐊᒡ ᐸᐸᐃᒄ ᐊᓐᑕ ᐊ ᒋᒐᔭᒡ ᒥᐅᑎᒡ᙮ 13 ᒋᑭ ᐅᓴᐅᒡ ᐃᔭᐱᒡ ᒥᔅᑎᑯᐧᑲᓇ ᐊᑲᓯᔭ ᒥᔅᑎᒂ ᐅᒡ ᑭᔭ ᐎᔄᐅᓱᓇᔭᔪᐤ ᒋᑭ ᐎᔎᔭᒋᓇᐅᒡ᙮ 14 ᒋᑭ ᐱᑕᔅᑯᓄᐅᒡ ᒥᔅᑎᑯᐧᑲᓇ ᐊᓐᑕ ᐛᐎᔭᐱᔅᑯᒡ, ᐊᐅᑯᓐ ᒐ ᐅᒋ ᐱᒥᑕᐧᑯᓂᑭᓄᐅᒡ ᐸᔭᒋ-ᒥᐅᑦ᙮ 15 ᒐ ᐊᑲ ᓂᑕ ᐎ ᒥᓇᑯᒡ ᐊᓐᒡ ᒥᔅᑎᑯᐧᑲᓐᒡ ᐛᐎᔭᐱᔅᑯᒡ ᐅᒡ᙮ 16 ᒋ ᒥᔨᑕᓇ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᐊᓐᑕ ᒐ ᒥᓯᓇᐊᒪᓐ ᓂᐎᓱᐛᐅᓇ, ᐊᑯᑕ ᐊᓐᑕ ᒐ ᐱᑕᐊᒥᓐ᙮ 17 ᒐ ᐎᑎᒧᐅᑥᐤ ᒐᒋ ᐅᓯᑕᒡ ᒋᐸᐃᑭᓂᔪᐤ ᐎᔄᐅᓱᓇᔭᔪᐤ ᐅᒡ᙮ ᐊᑯᑕ ᐊᓐᑕ ᒐ ᐛᐸᔨᑎᒧᐅᒂᐤ ᐃᔪᒡ ᐅᒥᒋᑐᑎᒧᐅᓄᐛᐛ᙮ ᓇᐎᔪᐤ ᐊᓱ ᐱᑕᑕᒡ ᒥᒋᒋᓐ ᒋᑭ ᐃᔅᐱᔅ ᒋᓄᑕᐅᒡ ᑭᔭ ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᒋᑭ ᐃᔅᐱᔅ ᐃᔨᑭᔅᒋᑕᐅᒡ᙮ 18 ᒋᑭ ᐅᓴᐅᒡ ᐃᔭᐱᒡ ᓂᓱ ᐊᐛᓯᓴ ᐊ ᐅᑎᑎᑭᓄᐎᒋ ᐎᔄᐅᓱᓇᔭᔪᐤ ᐅᒡ᙮ 19 ᐸᐃᒄ ᐅᒡ ᐊ ᓂᓯᒡ ᐊᐛᓯᓯᒡ ᐊ ᐅᑎᑎᑭᓄᐅᒡ ᒋᑭ ᒋᑭᒺᐅᒡ ᐊᓐᑕ ᐊ ᐃᔎᔭᔨᒡ ᒥᐅᑎᒡ, ᒥᒄ ᐊᓐ ᐎᔄᐅᓱᓇᔭᐤ ᐊᐛᓯᓯᒡ ᐊ ᐅᑎᑎᑭᓄᐅᒡ ᑲ ᐅᒋ ᐅᓯᐊᑭᓄᐅᒡ ᒋᑭ ᐎ ᐊᓂᔅᑯᑎᓐ ᐊᓐᑕ ᐎᔄᐅᓱᓇᔭᒡ ᒋᐸᐃᑭᓐ ᑲ ᐅᒋ ᐅᓯᑕᑭᓄᐅᒡ᙮ 20 ᒐ ᐎᑎᒧᐅᑥᐤ ᒐ ᐎ ᑕᔅᑲᑐᐎᔨᒋ ᐊᐛᓯᓴ ᐊ ᐅᑎᑎᑭᓄᐎᒋ ᑭᔭ ᒐ ᒥᓯᑕᔅᑕᒡ ᐅᑎᑎᐧᑯᓇ ᒋᐸᐃᑭᓂᒡ᙮ 21 ᒐ ᐱᑕᐊᒥᓐ ᐊᓐᑕ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᒐ ᒥᔨᑕᓐ ᐊᑯ ᐎᔄᐅᓱᓇᔭᐱᔅᒃ ᒋᐸᐃᑭᓐ ᒐ ᒋᐸᐊᒥᓐ ᐊᓐ ᐸᔭᒋ-ᒥᐅᑦ᙮ 22 ᐊᑯᑕ ᐊᓐᑕ ᒐ ᐃᒥᔨᑕᓐ ᑕᑕᐅᒡ ᐊᐛᓯᓯᒡ ᐊ ᐅᑎᑎᑭᓄᐅᒡ ᑭᔭ ᒐ ᐎᑎᒪᑕᓐ ᒐᒂᔪᐤ ᒐ ᑐᑕᒡ ᑭᔭ ᒐ ᐊᑲ ᑐᑕᒡ ᓂᑦ ᐃᔨᒥᒡ᙮” ᒥᒋᓱᐛᑭᓇᑎᒄ 23 “ᒐ ᐎᑎᒧᐅᑥᐤ ᒐᒋ ᐅᓯᑕᒡ ᒥᒋᓱᐛᑭᓇᑎᑯᔪᐤ ᐊᑲᓯᔭ ᒥᔅᑎᒂ ᐅᒡ, ᓂᔅᑐᐎᔪᐤ ᐊᓱ ᐊᓱᑕᒡ ᒥᒋᒋᓐ ᐊᔅᐱᔅ ᒋᓏᔨᒡ ᑭᔭ ᔭᓇᐤ ᑕᑐᓴᑉ ᒥᒋᒋᓐ ᐊᔅᐱᔅ ᐃᔨᑭᔅᑲᔨᒡ, ᑭᔭ ᓂᓱᐎᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊᔅᐱᔅ ᐃᔅᐸᔨᒡ᙮ 24 ᐎᔄᐅᓱᓇᔭᔪᐤ ᒋᑭ ᐎᔎᔭᒋᓂᒧᒡ ᑭᔭ ᑲ ᐎᔄᐅᓱᓇᔭᐅᔨᒋ ᐛᔅᑲᔅᑲᐃᑭᓇ ᒥᓯᐛ ᐊᓐᑕ ᐛᔅᑲ ᒋᑭ ᒋᑯᒺᐅᒡ᙮ 25 ᒋᑭ ᒋᑭᒺᐅᒡ ᐃᔭᐱᒡ ᐛᔅᑲᔅᑲᐃᑭᓇ ᓂᔅᑐ ᒥᒋᒋᓐ ᐊ ᐃᔅᐱᔅ ᐃᔨᑭᔅᒋᔨᒋ ᐊᓐᑕ ᐛᔅᑲ ᒋᒡ ᒥᒋᓱᐛᑭᓇᑎᑯᒡ, ᑭᔭ ᑲ ᐎᔄᐅᓱᓇᔭᐅᔨᒋ ᐛᔅᑲᔅᑲᐃᑭᓇ ᒐᒋ ᒋᑭᒺᐊᒡ ᐛᔅᑲ ᒋᒡ ᒥᔅᑎᑯᒡ᙮ 26 ᒋᑭ ᐅᓴᐅᒡ ᓇᐤ ᐊ ᐎᔄᐅᓱᓇᔭᐅᔨᒋ ᐛᐎᔭᐱᔎ ᑭᔭ ᒋᑭ ᒋᑭᒺᐅᒡ ᐊᓐᑕ ᐊ ᒋᒐᔭᔨᒡ ᒥᒋᓱᐛᑭᓇᑎᑯᒡ ᒥᒋᒪ ᐊ ᐅᔅᑲᑐᐎᔨᒡ 27 ᒥᒋᒪ ᒋᒡ ᒋᑭ ᒋᑭᒺᐅᒡ ᐛᐎᔭᐱᔎ ᒥᒋᓱᐛᑭᓇᑎᑯᒡ᙮ 28 ᒋᑭ ᐅᓴᐅᒡ ᓂᓱ ᒥᔅᑎᐧᑯᑲᓇ ᐊᑲᓯᔭ ᒥᔅᑎᒂ ᐅᒡ ᑭᔭ ᐎᔄᐅᓱᓇᔭᔪᐤ ᒋᑭ ᐎᔎᔭᒋᓇᐅᒡ᙮ ᐊᐅᑯᓐᒡ ᒥᔅᑎᐧᑯᑲᓐᒡ ᒐᒋ ᐅᒋ ᑕᐧᑯᓂᑭᓄᐅᒡ ᒐᒋ ᐱᐸᒧᑕᑭᓄᐅᒡ ᒥᒋᓱᐛᑭᓇᑎᒄ᙮ 29 ᒐ ᐎᑎᒧᐅᑥᐤ ᐃᔭᐱᒡ ᒐᒋ ᐅᓯᑕᒡ ᐊᑐᔅᐳᐛᑭᓇ ᑭᔭ ᒥᓂᒂᑭᓇ ᑭᔭ ᐎᔭᑭᓇ ᒐ ᐊᐱᒋᑕᑯᓄᐅᒋ ᐃᔅᐱ ᐊᔭᒥᐊᐅᒋᒪᐤ ᐱᔅᑎᓂᒧᐅᒐ ᓱᒥᓇᐳᔪᐤ᙮ ᒥᓯᐛ ᐅᔭ ᐎᔄᐅᓱᓇᔭᐱᔅᑯᒡ ᒋᑭ ᐅᒋ ᐅᓯᑕᑭᓄᐅᐛ᙮ 30 ᑕᐧᑯᒡ ᒥᒋᓱᐛᑭᓇᑎᑯᒡ ᐊᓐᑕ ᓂᑲᓐ ᐃᑕᒐ ᐊᔅᑕᒡ ᐸᔭᒋ-ᒥᐅᑦ, ᓇᓂᑎᒻ ᒋᑭ ᐎ ᑕᐤ ᐊᓐᑕ ᐸᔭᒋ-ᐸᒂᓯᑭᓐ ᑲ ᐱᔅᑎᓂᒐᒡ ᐊᔭᒥᐊᐅᒋᒪᐅᒡ᙮” ᑲ ᐸᔭᐧᑲᒡ ᐛᔅᑕᓂᐱᒪᑭᓇᑎᒄ 31 “ᒐ ᐎᑎᒧᐅᑥᐤ ᒐᒋ ᐅᓯᑕᒡ ᐛᔅᑕᓂᐱᒪᑭᓇᑎᑯᔪᐤ ᐎᔄᐅᓱᓇᔭᐤ ᐅᒡ᙮ ᐊ ᓄᑎᒪᔨᒡ ᐛᔅᑕᓂᐱᒪᑭᓇᑎᑯᔪᐤ, ᐊᓯᒡ ᐊᒪᒪᑕᐅᓇᑯᑕᑭᓄᐅᒋ ᐛᐱᑯᓇ ᐊ ᐅᑎᑕᒪᐃᑭᓄᐅᒡ ᐊ ᐸᐃᒂᑲᒡ ᐎᔄᐅᓱᓇᔭᐱᔅᒄ ᐅᒡ᙮ 32 ᓂᔅᑐ ᓯᑕᐧᑯᓐᒡ ᒋᑭ ᐎ ᑕᐅᒡ ᐊᔨᑐᐤ ᐊᓐᑕ ᐛᔅᑕᓂᐱᒪᑭᓇᔅᑯᒡ᙮ ᒪᒧᐤ ᐊᓱᑕᒡ ᒋᐸ ᐃᑕᑎᓱᐅᒡ ᐊᓐᒡ ᓯᑕᐧᑯᓐᒡ᙮ 33 ᓂᔅᑐ ᐛᐱᑯᓐᒡ ᒋᑭ ᐎ ᒋᑭᒧᐅᒡ ᐊᓐᑕ ᐸᐃᒄ ᓯᑕᐧᑯᓂᒡ᙮ 34 ᐊᓐᑕ ᑕᑕᐅᒡ ᐛᔅᑕᓂᐱᒪᑭᓇᑎᑯᒡ ᒋᑭ ᐛᓴᐛᐅᒡ ᓇᐤ ᐱᑲᓐᒡ ᐛᐱᑯᓐᒡ᙮ 35 ᐸᐃᒃ ᐛᐱᑯᓐ ᒋᑭ ᐎ ᒋᑭᒧᐤ ᐊᓇᒡ ᐊ ᓂᓯᒡ ᓯᑕᐧᑯᓂᒡ᙮ 36 ᒥᓯᐛ ᐊᓐ ᐛᔅᑕᓂᐱᒪᑭᓇᑎᒄ ᐊᓯᒡ ᓯᑕᐧᑯᓐᒡ ᑭᔭ ᐛᐱᑯᓇ ᐊ ᓄᑎᒪᒡ ᐎᔄᐅᓱᓇᔭᐤ ᐅᒡ ᒋᑭ ᐅᒋ ᐅᓯᑕᑭᓄᐛ᙮ 37 ᒋᑭ ᐅᓯᐊᐅᒡ ᓂᔄᐅᑕᒡ ᐛᔅᑕᓂᐱᒪᑭᓇ ᑭᔭ ᒋᑭ ᐃᓯᓇᒂᐅᒡ ᓂᑲᓐ ᐃᑕᒐ ᒐᒋ ᐛᔅᑕᔨᒡ ᐛᔅᑕᓂᐱᒪᑭᓇᔅᑯᒡ᙮ 38 ᑭᔭ ᐊᓂᔭ ᐊ ᐃᑕᐱᑎᒋ ᐎᔭᑭᓇ ᑭᔭ ᑎᑯᐧᑯᒪᓇ ᒐᒋ ᐃᓯᓇᑯᑕᑭᓄᐅᒋ ᐎᔄᐅᓱᓇᔭᐤ ᐅᒡ (ᐊᔅᑐᐛᔨᑭᓇᔅᒄ ᑭᔭ ᓯᔅᑲᐃᑭᓇᔅᒄ ᐊ ᐸᐃᒂᒡ)᙮ 39 ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᑕᑐᐤ ᑎᐸᐸᑲᐃᑭᓐ ᒋᑭ ᐃᔅᐱᔅ ᐊᐱᑎᓯᐤ ᐎᔄᐅᓱᓇᔭᐤ ᐊ ᐅᓯᑕᑭᓄᐅᒡ ᐛᔅᑕᓂᐱᒪᑭᓇᑎᒄ ᑭᔭ ᒥᓯᐛ ᒐᒂᓐ᙮ 40 ᔭᐃᑕᔾ ᒋᑭ ᐃᓯᓇᑯᑕᐅᒡ ᒥᓯᐛ ᒐᒂᓇ ᒧᔭᒻ ᑲ ᐃᓯ ᐛᐸᑎᔨᑕᓐ ᐊᓐᑕ ᐱᔅᑯᑎᓇᒡ ᑲ ᑕᔭᐧᒄ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.