ᐊᑈᔅᑕᓇᒡ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑲ ᒋᐱᒧᑕᑦ ᓇᐸᐤ ᑲ ᒥᓏᒋᑭᓄᐅᑦ

¹ ᐸᐃᒂᐤ ᐱᑕᕐ ᑭᔭ ᒠᓐ ᒋ ᐃᑐᑕᐅᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᓂᔅᑐ ᑎᐸᐃᑭᓐ ᐊ ᐃᔅᐱᔨᒋ ᐊᒋ ᐃᓯ ᐊᐱᑕᒋᓯᑲᔨᒡ, ᐊᓐᑕ ᐊ ᐅᑎᒋᐱᔨᒡ ᑲᒋ ᐊᔭᒥᐊᓄᐎᒡ᙮

² ᓇᔅᒡ ᒋ ᒥᓯᑐᐤ ᐊᓐ ᔅᑐᐧᑭᓐ ᐊᓐᑕ ᐊ ᐅᒋ ᐱᑐᒐᓄᒡ ᐊᓐ ᒋᓴᐊᔭᒥᐊᐅᒋᐛᑉ ᑲ ᒥᔽᓯᒡ ᒋᐱᔎᐤ ᒋ ᐃᓯᓂᐧᑲᑕᑭᓄᐤ, ᐊᑯᑕ ᑲ ᐊᐱᑦ ᓇᐸᐤ ᐊᑲ ᐅᒋ ᓂᑕᐅᑕᑦ᙮ ᐊᓯᑯᒻ ᒋᓯᑲᐛ ᐊᒋ ᐃᑐᑕᐊᑭᓄᐅᑦ ᐊᓐᑕ, ᒐᒋ ᓂᑐᑎᒧᐛᑦ ᐊᐛᔪᐤ ᓱᓇᔭᔪᐤ ᐊᓐᑕ ᐊᔭᒥᐊᐅᒋᐛᐱᒡ ᐊ ᐃᑐᑕᔨᒋ᙮

³ ᐃᔅᐱ ᒪᒃ ᐊᓐ ᓇᐸᐤ ᐎᔭᐱᒪᑦ ᐊᓂᔭᔪᐛ ᐱᑕᕋ ᑭᔭ ᒠᓇ ᒐ ᐊᑎ ᐱᒐᔨᒋ ᐊᓂᔭᔪᐛ ᒋᓴᐊᔭᒥᐊᐅᒋᐛᐱᔪᐤ ᒋ ᓂᑐᐛᔨᑎᒧᐛᐤ ᓱᓇᔭᔪᐤ᙮

⁴ ᑯᐃᔅᒄ ᒪᒃ ᒋ ᑭᓄᐛᐱᒪᐅᒡ ᐊᓂᔭᔪᐛ ᓇᐸᐛ, ᐊᑯ ᐱᑕᕐ ᒂ ᐃᑕᑦ, “ᐸᒋ ᑭᓄᐛᐱᒥᓇᓐ ᒪ᙮”

⁵ ᐊᑯ ᒂ ᑭᓄᐛᐱᒥᑯᒡ ᐊᓂᔭᔪᐛ ᓇᐸᐛ, ᐊ ᐱᑯᓴᔨᒥᑯᒡ ᒐᒂᔪᐤ ᒐᒋ ᒥᔭᒡ᙮

⁶ ᐊᑯ ᐱᑕᕐ ᒂ ᐃᑕᑦ, “ᓇᒪ ᓇᔅᒡ ᓂ ᑭᓄᐛᔨᑕᓐ ᓱᓇᔭᐤ ᒐᒋ ᒥᔨᑕᓐ, ᒥᒄ ᒪᒃ ᒋᑭ ᐎᒋᐃᑎᓐ ᒐᒋ ᒥᓏᑎᓯᔨᓐ᙮ ᐅᑦ ᐃᓯᓂᐧᑲᓱᐅᓂᒡ ᐅᒡ ᒋᓴᔅ ᙭ ᓇᓴᕆᑎᒡ ᑲ ᐅᒋᑦ, ᐱᓯᑯ ᒐ ᐱᒧᑕᔨᓐ᙮”

⁷ ᐊᑯ ᐱᑕᕐ ᑲ ᐅᑎᓂᒺᑦ ᐊᓂᔭᔪᐤ ᐅᒥᔪᓂᑎᒋᔪᐤ ᒂ ᐎᒋᐊᑦ ᐊ ᐱᓯᑯᔨᒋ᙮ ᑎᐛᒡ ᒪᒃ ᐊᓐ ᓇᐸᐤ, ᐅᓯᑕ ᑭᔭ ᐛᐧᑯᓇ ᒋ ᐅᒋ ᓴᐱᒥᑭᓂᔪᐛ᙮

⁸ ᒋ ᐱᓯᑯᓯᐱᑕᐤ ᒪᒃ, ᒂ ᓂᐳᐅᑦ, ᒂ ᐊᑎ ᐱᐸᒧᑕᑦ᙮ ᒂ ᐎᒐᐛᑦ ᐊᓂᔭᔪᐛ ᐱᑕᕋ ᑭᔭ ᒠᓇ ᐊ ᐱᒐᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᐊ ᐱᒧᑕᑦ, ᐊ ᒂᔎᔅᑯᑎᑦ, ᐊ ᒪᒥᒋᒪᑦ ᒋᓴᒪᓂᑐᐛ᙮

⁹ ᒥᓯᐛ ᒪᒃ ᐊᐛᔪᐤ ᐊᓐᑕ ᑲ ᑕᔨᒋ ᒋ ᐛᐱᒥᑯᐤ ᐊ ᐱᒧᑕᑦ ᑭᔭ ᐊ ᒪᒥᒋᒪᑦ ᒋᓴᒪᓂᑐᐛ᙮

¹⁰ ᒋ ᓂᔅᑐᓄᐛᐅᒡ ᒪᒃ ᐊᐅᒄ ᐊᓂᔭᔪᐛ ᐊᐎᔨᒋ ᓇᐸᐛ ᑲᒋ ᐊᐱᔨᒋ ᐊ ᐱᑯᓴᔨᒧᔨᒋ ᐊᓐᑕ ᑲ ᒥᔽᓯᔨᒡ ᒋᐱᔎᐤ ᑲ ᐃᓯᓂᐧᑲᑕᔨᒡ᙮ ᒥᓯᐛ ᒪᒃ ᒋ ᑯᔅᑯᐱᔪᒡ ᑭᔭ ᒋ ᒥᔅᑲᑕᔨᑎᒧᒡ ᑕᓐ ᑲ ᐃᔅᐱᔨᒡ᙮

ᑕᓐ ᑲ ᐃᓯ ᐎᑕᐧᒃ ᐱᑕᕐ ᐊᓐᑕ ᒋᓴᐊᔭᒥᐊᐅᒋᐛᐱᒡ

¹¹ ᐊᓐ ᒪᒃ ᓇᐸᐤ ᐊᑲ ᐅᒋ ᓂᑕᐅᑕᑦ ᒋ ᒪᒪᒋᑯᓇᐤ ᐊᓂᔭᔪᐛ ᐱᑕᕋ ᑭᔭ ᒠᓇ, ᐊᑯ ᒥᓯᐛ ᐊᐛᓐᒋ ᑲ ᐃᔅᐸᔨᑐᒡ ᐊᓐᑕ ᐊ ᓂᐳᔨᒋ ᐊᓐᑕ ᓴᓚᒥᓐ ᐅᒋᐱᔎᒻ ᑲ ᐃᓯᓂᐧᑲᑕᔨᒡ, ᒥᓯᐛ ᓇᔅᒡ ᒋ ᑯᔅᑯᓴᐱᒧᐅᒡ᙮

Acts 3.12-19 (Easter-3 Year B)

¹² ᐃᔅᐱ ᒪᒃ ᐱᑕᕐ ᐛᔭᐱᒪᑦ ᐊᓂᔭᔪᐛ ᐃᔪᐛ, ᒋ ᐃᑕᐤ, “ᒋᔨᐛᐤ ᐃᔅᕋᐃᓕᒡ ᑲ ᐅᒋᔭᒄ, ᒐᒂᓐ ᐛᒋ ᓇᔅᒡ ᑯᔅᑯᓴᐱᒧᔭᒄ ᐅ, ᑭᔭ ᒐᒂᓐ ᓇᔅᒡ ᐛᒡ ᒥᔅᑲᓯᓄᐅᔭᒡ ? ᒋᑦ ᐃᑕᔨᑕᓇᐛᐤ ᐊ ᓂᔭᓐ ᑎᐱᔨᐛ ᓂᒥᔅᑯᓯᐅᓇᒡ ᒪᒃ ᓂᑦ ᐊᔭᒥᐊᐛᑎᓯᐅᓇᒡ ᐛᒋ ᐱᒧᑕᑦ ᐅ ᓇᐸᐤ ?

¹³ ᐊᓂᔭᔪᐛ ᒋᓴᒪᓂᑐᐛ ᑲ ᐊᑐᔅᑯᐛᒡ ᐊᓂᔭᐧᑲ, ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ ᑭᔭ ᐅᑕᒡ ᒍᑕᐎᓄᒡ ᒋᔅᑕᔨᑕᑯᐊᐤ ᐊᓂᔭᔪᐛ ᐅᑦ ᐊᐱᒋᐊᑭᓇ, ᐊᐅᒄ ᐅᔭ ᒋᓴᓴ᙮ ᒋᔨᐛᐤ ᒪᒃ ᔅᒋ ᐃᑐᑐᐛᐛᐤ ᒐᒋ ᐱᔅᑎᓇᑭᓄᐅᑦ ᐊᓐᑕ ᕈᒻ ᒋᓴᐅᒋᒪᐤ ᐊ ᑕᔨᒋ᙮ ᐊᒋ ᐊᑐᐛᔨᒪᒄ ᐅᑎᔅᑯᐤ ᑈᓚᑕ ᐊ ᑕᔨᒋ, ᐊᑎ ᐃᔅᐱᔅ ᑈᓚᑦ ᑲ ᐎ ᐱᔅᑎᓇᑦ᙮

¹⁴ ᐃᔭᐱᒡ ᒋᔨᐛᐤ ᔅᒋ ᐊᑐᐛᔨᒪᐛᐤ ᐊᓐ ᑲ ᐸᔭᒋᓯᑦ ᑭᔭ ᑲ ᑯᐃᔅᑯᑕᑎᓯᑦ ᑭᔭ ᐊᒋ ᐃᔅᒋᔄᔭᒄ ᑲ ᓂᐸᐃᐛᑦ ᓇᐸᐤ ᐃᔭᐱᒡ ᒐᒋ ᐱᔅᑎᓂᒪᑯᐅᔭᒄ᙮

¹⁵ ᑭᔭ ᔅᒋ ᐃᑐᑐᐛᐛᐤ ᒋᓴᔅ ᒐᒋ ᓂᐸᐊᑭᓄᐅᑦ ᐊᓐ ᑲ ᒥᔭᑦ ᐊᐛᔪᐤ ᐱᒪᑎᓯᐅᓂᔪᐤ᙮ ᒥᒄ ᒪᒃ ᒋᓴᒪᓂᑐᐤ ᒋ ᐃᑐᑐᐛᐤ ᒥᓐ ᑲᐤ ᒐᒋ ᐱᒪᑎᓯᔨᒋ᙮ ᐛᔅ ᓂᒋ ᐛᐱᒥᓇᓐ ᒥᓐ ᑲᐤ ᑲ ᐅᓂᔅᑲᑦ ᒋᓴᔅ᙮ ᓂ ᒋᔅᒐᔨᑕᓇᓐ ᒪᒃ ᐊ ᑕᑈᒥᑲᒡ ᐅ᙮

¹⁶ ᐊᓂᔭᔪᐤ ᐊ ᓱᒐᔨᑕᑯᓂᔨᒡ ᒋᓴᔅ ᐅᑦ ᐃᓯᓂᐧᑲᓱᐅᓐ ᐊᐅᒄ ᐅᔭ ᐛᒋ ᒥᓏᑎᓯᑦ ᐅ ᓇᐸᐤ᙮ ᔅᒋ ᒋᔅᒐᔨᒪᐛᐤ ᑭᔭ ᔅᒋ ᐛᐱᒪᐛᐤ ᑕᓐ ᑲ ᐃᓯᓇᑯᓯᑦ᙮ ᔅᒋ ᐛᐱᒪᐛᐤ ᒪᒃ ᐊᓐᑕ ᐅᑎᔅᑯᐤ ᐊ ᑕᔭᒄ ᑲ ᒥᓏᒋᐊᑭᓄᐅᑦ ᐊᓂᔭᔪᐤ ᐊ ᑕᑈᔭᔨᒪᑦ ᒋᓴᓴ ᐅᒡ᙮”

¹⁷ “ᐊᑯ ᒪᒃ ᓂᐧᑲᓂᓯᑐᒄ, ᓂ ᒋᔅᒐᔨᑕᓐ ᒋᔨᐛᐤ ᑭᔭ ᐊᓐᒡ ᑲ ᓂᑲᓂᔅᑲᑕᑯᒡ ᐊᑲ ᐅᒋ ᒋᔅᒐᔨᑎᒪᒄ ᑕᓐ ᐊᓐ ᐊ ᐃᑎᔭᒄ ᐊᓂᔭᔪᐤ ᑲ ᐃᑐᑐᐛᒄ ᒋᓴᔅ᙮

¹⁸ ᒋᓴᒪᓂᑐᐤ ᒋ ᒥᔭᐤ ᐊᓂᔭᔪᐛ ᐅᒋᔅᒋᐛᐃᒐᓱᐛ ᒐᒋ ᓂᑲᓐ ᐎᑎᒥᔨᒋ ᒐ ᐛᐎᓯᒐᔨᑎᒥᔨᒋ ᙭ᑕ ᐊᓂᔭᔪᐛ ᑲ ᐅᑎᓇᑦ᙮ ᒋᓴᒪᓂᑐᐤ ᒪᒃ ᒋ ᑎᐱᐱᔨᑕᐤ ᐅᔭ᙮

¹⁹ ᒂᔅᑲᑎᓯᒄ, ᒥᑕᒋᔨᐛᔨᑎᒧᒄ ᑕᓐ ᑲ ᐃᓯ ᒥᒋᑐᑎᒪᒄ᙮ ᓇᑎᐧᒄ ᒋᓴᒪᓂᑐᐤ ᒐᒋ ᐛᐸᔨᑎᒪᑕᒄ ᒋᒥᒋᑥᐅᓄᐛᐛ᙮ ᐊᑯ ᒪᒃ ᐅᑎᐸᔨᒋᒐᐤ ᒐ ᐃᑐᑕᑕᒄ ᒥᓐ ᒐᒋ ᓯᑭᒪᒋᐅᔭᒄ ᒋᑦ ᐊᒐᐧᑯᐛᒡ᙮

²⁰ ᑭᔭ ᒋᑭ ᐸᒋ ᐃᑎᓴᐛᐤ ᒋᓴᔅ ᙭ᑕ, ᐊᓂᔭᔪᐛ ᓴᔅ ᑲ ᐅᑎᓇᑦ ᒐ ᐃᑎᓴᐊᒪᑕᒄ᙮

²¹ ᐊᑯᑕ ᒪᒃ ᐊᓐᑕ ᒋᒋᒋᓯᑯᒡ ᒐ ᑕᑦ ᐸᑐᔅ ᒥᓯᐛ ᒐᒂᔪᐤ ᐅᔅᒋᑕᑭᓄᔨᒐ ᐊᓂᔭᔪᐤ ᑕᓐ ᑲ ᐃᓯ ᓂᑲᓐ ᐎᑕᒡ ᒐ ᐃᔅᐱᔨᒡ ᐊᓂᔭᐧᑲ ᐛᔅᑭᒡ ᑲ ᐸᔭᒋᓯᒡ ᐅᒋᔅᒋᐛᐃᒐᓱᒡ᙮

²² ᐛᔅ ᐊᓂᔭ ᒧᓱᔅ ᒋ ᐃᔅᒋᔄᐤ ᐛᔅᑭᒡ ᐊ ᐊᔨᒧᒪᑦ ᒋᓴᓴ, ᒋᓴᒪᓂᑐᐤ, ᒋᑭ ᐊᐱᒋᐊᐤ ᐊᐛᔪᐛ ᐊᓐᑕ ᓂᑲᓄᒡ ᒐ ᒋᔅᒋᐛᐃᒐᔨᒋ, ᒧᔭᒻ ᓂᔾ ᐊ ᐃᓯ ᐊᐱᒋᐃᑦ ᐊ ᒋᔅᒋᐛᐃᒐᔭᓐ᙮ ᐊᓐᑕ ᒋᔨᐛᐤ ᐊ ᐃᑎᔅᑲᓇᓯᔭᒄ, ᐊᑯᑕ ᒐ ᐅᒋᔨᒋ᙮ ᒋᑭ ᓂᑐᑐᐛᐛᐤ ᑭᔭ ᒋᑭ ᓂᓇᐃᑐᐛᐛᐤ ᑕᓐ ᒐ ᐃᑎᑕᒄ᙮

²³ ᐊᓐ ᒪᒃ ᐊᐛᓐ ᒐ ᐊᑲ ᓂᑐᑐᐛᒂ ᐅᔭ ᒐ ᐅᒋᔅᒋᐛᐃᒐᓱᔨᒋ, ᒋᑭ ᐃᒐᓇᑭᓄᐤ ᐊᓐᑕ ᐅᒋ ᒋᓴᒪᓂᑐᐛ ᐅᑦ ᐃᔨᒥᔪᐛ ᐊ ᑕᔨᒋ, ᐊᑯ ᒪᒃ ᒐ ᓂᓱᐅᓇᒋᐊᑭᓄᐅᑦ᙮” ᐊᐅᒄ ᐅᔭ ᑲ ᐎᑕᐧᒃ ᐱᑕᕐ ᐊᒋ ᐃᔅᒋᔄᔨᒂᓂ ᐊᓂᔭ ᒧᓱᓴ᙮ ᐊᑯ ᒥᓐ ᒂ ᐊᑎ ᐃᔅᒋᔄᑦ ᐱᑕᕐ,

²⁴ “ᓴᒻᔪᐃᓪ ᐊᑯ ᒪᒃ ᐊᓐᒡ ᑯᑎᑭᒡ ᐅᒋᔅᒋᐛᐃᒐᓱᒡ ᒋ ᓂᑲᓐ ᐎᑎᒧᒡ ᐅᔭ ᑕᓐ ᒐ ᐃᔅᐱᔨᒋ ᐊᓄᒡ ᒐᓯᑲᒋ᙮

²⁵ ᒋᑦ ᐊᓂᔅᒐ ᐎᐧᑲᓂᓯᓇᐛᐤ ᐊᓂᔭᐧᑲ ᐅᒋᔅᒋᐛᐃᒐᓱᒡ, ᐊᓂᔭᔪᐤ ᒪᒃ ᓂᔅᑯᒧᐅᓂᔪᐤ ᑕᓐ ᑲ ᐃᓯ ᒥᔨᑯᒡ ᒋᓴᒪᓂᑐᐛ ᑭᔭ ᒋᔨᐛᐤ ᐊᓐᑕ ᒋᑦ ᐊᔅᑎᓯᓇᓱᓇᐛᐤ᙮ ᐛᔅ ᒋᓴᒪᓂᑐᐤ ᒋ ᐃᑕᐤ ᐊᓂᔭ ᐊᑉᕋᐊᒪ, ᐊᓐᑕ ᓂᔅᑕᒥᒡ ᒋᑦ ᐊᐛᓯᒥᒡ ᓂᑭ ᐅᒋ ᐅᑎᓇᐤ ᐸᐃᒄ ᐊᐛᓐ ᐊᓐᑕ ᐅᒋ ᒐᒋ ᐅᒋ ᓱᐛᔨᒥᒂᐤ ᒥᓯᐛ ᐊᐛᓐᒋ ᐅᑕ ᐊᔅᒋᒡ᙮

²⁶ ᒋ ᐅᑎᓇᐤ ᒪᒃ ᒋᓴᒪᓂᑐᐤ ᐅᔭ ᐅᑦ ᐊᐱᒋᐊᑭᓇ ᒋᔨᐛᐤ ᒪᐅᒡ ᓂᔅᑎᒻ ᒐᒋ ᐃᑎᓴᐊᒪᑕᒄ᙮ ᒋᑭ ᓱᐛᔨᒥᑯᐛᐤ ᐊ ᐃᑐᑕᑯᐅᔭᒄ ᒥᓯᐛ ᐊ ᑎᓯᔭᒄ ᒐᒋ ᓂᑭᑎᒪᒄ ᒋᒥᒐᑎᓯᐅᓄᐛᐛ᙮”