ᐊᑈᔅᑕᓇᒡ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᒋᔾ ᑎᔪᐱᓚᔅ ᒋ ᒥᓯᓇᐊᒪᑎᓐ᙮ ᓂᔅᑎᒻ ᒥᓯᓇᐃᑭᓐ ᑲ ᒥᓯᓇᐊᒪᒐᔭᓐ ᐊᑯᑕ ᑲ ᐎᑎᒪᓐ ᒥᓯᐛ ᑕᓐ ᑲ ᐃᑎᑦ ᒋᓴᔅ ᑭᔭ ᑕᓐ ᑲ ᐃᓯ ᒋᔅᑯᑎᒪᒐᑦ ᐅᔅᑭᒡ ᑲ ᒋᒋᐱᔨᑕᑦ ᐅᑦ ᐊᑐᔅᒐᐅᓐ ᐱᐃᒻ ᒪᒃ ᑲ ᐸᒋ ᐅᑎᓇᑭᓄᐅᑦ ᒋᒋᒋᓯᑯᒡ ᐃᔅ᙮

² ᐊᔅᒄ ᒪᒃ ᐊᑲ ᐅᒋ ᓂᑭᑕᐧᒃ ᐅᔭ ᐊᔅᒋᔪᐤ ᒋᓴᔅ ᑲ ᐸᔭᒋᓯᔨᒋ ᐊᒐᒂ ᐅᒋ ᒋ ᐛᑎᓱᒪᐤ ᐊᑈᔅᑕᓇ ᐊ ᐎᑎᒧᐛᑦ ᑕᓐ ᒐ ᐃᑎᔨᒋ᙮

³ ᐃᔅᐱ ᑲᒋ ᐃᓯ ᓂᓇᐧᑲᑕᔨᒧᑦ ᒋᓴᔅ ᒋᐱᔭᑎᑯᒡ ᑲ ᓂᐱᑦ ᒥᒐᑦ ᒋ ᓄᑯᓯᔅᑐᐛᐤ ᐊᓂᔭᔪᐛ ᐊᑈᔅᑕᓇ ᓇᐎᔪᐛ ᒋᓯᑲᐤ ᐃᔅᐱᔅ, ᐊ ᐎ ᒐᔅᑎᓇᑕᔨᑎᒥᐊᑦ ᑕᑈ ᒥᓐ ᑲᐤ ᐊ ᐱᒪᑎᓯᑦ, ᑭᔭ ᒋ ᐊᔨᒧᑎᒧᐛᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮

⁴ ᐃᔅᐱ ᒪᒃ ᑲ ᒪᒧᐎᒡ ᒋᓴᔅ ᒋ ᐃᑕᐤ ᐊᓂᔭᔪᐛ ᐊᑈᔅᑕᓇ, “ᐊᑲᐎᔾ ᓂᑭᑎᒥᒄ ᒋᕈᓯᓕᒻ᙮ ᐊᓱᐛᐸᑎᒺᐧᒄ ᐊᓂᔭᔪᐤ ᒥᔨᐛᐅᓂᔪᐤ ᓄᑕᐎᔾ ᒐᔅᑎᓇᔅ ᑲ ᐃᔅᒋᔄᑦ ᒐ ᒥᔨᑕᒄ, ᐊᐅᒄ ᐅ ᓴᔅ ᑲ ᐸᒋ ᐊᔨᒧᑎᒪᑎᑯᒡ᙮

⁵ ᐛᔅ ᒠᓐ ᒋ ᓯᑲᐃᑕᒐᐤ ᓂᐱᔪᐤ ᐊ ᐊᐱᒋᑕᑦ᙮ ᐊᑯ ᒪᒃ ᓴᔅ ᐎᐱᒡ ᒋᑭ ᓯᑲᐃᑕᑯᓇᐛᐤ ᑲ ᐸᔭᒋᓯᑦ ᐊᒐᐧᒄ᙮”

ᒋᓴᔅ ᒋᒋᒋᓯᑯᒡ ᑲ ᐃᓯ ᐅᑎᓇᑭᓄᐅᑦ Acts 1.6-14 (Easter-7 Year A)

⁶ ᐊᑯ ᒪᒃ ᒥᓐ ᐸᐃᒂᐤ ᐊ ᒪᒧᐎᒡ ᐊᓐᒡ ᐊᑈᔅᑕᓇᒡ ᒋ ᑯᒂᒋᒪᐅᒡ ᒋᓴᓴ ᐊ ᐃᑕᒡ, “ᐅᑎᐸᔨᒋᒐᐤ, ᓴᔅ ᐊ ᐅᑎᒋᐱᔪᐤ ᒐ ᒥᔨᑥᐤ ᒍᐤ ᐃᔪᒡ ᐎᔨᐛᐤ ᒥᓐ ᒐᒋ ᐱᒥᐱᔨᑥᓱᒡ ᒥᓯᐛ ᒐᒂᔪᐤ ᐊᓐᑕ ᐅᑦ ᐊᔅᒋᐛᒡ ?”

⁷ ᒋᓴᔅ ᒪᒃ ᒋ ᐃᑕᐤ, “ᓇᒪ ᒋᔨᐛᐤ ᒋᐸ ᐅᒋ ᓇᓂᑐ ᑭᒐᔅᒐᔨᑕᓇᐛᐤ ᑕᓐ ᒐ ᐃᔅᐱᔨᒡ ᐊᓐᑕ ᓂᔅᑕᒥᒡ᙮ ᐊᓂᔭᔪᐤ ᐊ ᑎᐸᔨᒋᒐᑦ ᓄᑕᐎᔾ ᓴᔅ ᒋ ᐎᔭᔨᑎᒻ ᑕᓐ ᒐ ᐃᔅᐱᔅ ᐅᑎᒋᐱᔨᒡ ᐅᔭ᙮

⁸ ᒋᑭ ᓴᑭᔅᒋᓇᔅᑲᑯᓇᐛᐤ ᓱᐧᑲᑎᓯᐅᓐ, ᐃᔅᐱ ᑲ ᐸᔭᒋᓯᑦ ᐊᒐᐧᒄ ᒋ ᐅᑎᑎᑕᒂ᙮ ᐊᑯ ᒪᒃ ᒐ ᐱᐸᒪᒋᒥᔭᒄ ᐊᓐᑕ ᒋᕈᓯᓕᒥᒡ, ᒥᓯᐛ ᒍᑎᔭ ᐊᔅᒋᒡ, ᓴᒪᕆᔭᐃᒡ ᑭᔭ ᒥᓯᐛ ᐊ ᐃᔅᐱᑎᔅᑭᒥᑲᒡ ᐊᔅᒋᔾ᙮”

⁹ ᐃᔅᐱ ᒋᓴᔅ ᐅᔭ ᑲ ᐃᑕᑦ ᐊᓂᔭᔪᐛ ᐊᑈᔅᑕᓇ ᒪᒂᒡ ᐊ ᑭᓄᐛᐱᒥᑯᑦ ᐃᔅᐱᒥᒡ ᒋ ᐃᓯ ᐅᐱᐱᔪᐤ᙮ ᑭᔅᑯᐅᓂᔎ ᒂ ᐊᑯᐛᐊᑯᑦ ᐊᑯ ᓇᒪ ᐅᒋ ᐛᐱᒥᑯᐤ᙮

¹⁰ ᒪᒂᒡ ᒪᒃ ᐊᓐᑕ ᐃᔅᐱᒥᒡ ᐊ ᐃᑕᐱᒡ ᐊ ᐎ ᑭᓄᐛᐱᒪᒡ ᐊ ᐊᑎ ᐅᐱᔨᒋ, ᓯᔅᒋᑯᒡ ᒋ ᐅᒋ ᐎᒋᑲᐳᔅᑕᑯᐅᒡ ᓂᓱ ᓇᐸᐛ ᐊ ᐛᐸᔅᐱᓱᔨᒋ᙮

¹¹ ᐊᑯ ᒂ ᐃᑎᑯᒡ, “ᒋᔨᐛᐤ ᓇᐸᑐᒄ ᑲᓕᓕᒡ ᑲ ᐅᒋᔭᒄ, ᒐᒂᓐ ᐛᒋ ᓂᐳᐅᔭᒄ ᐅᑕ, ᐃᔅᐱᒥᒡ ᐊ ᐃᑕᐱᔭᒄ ? ᐅ ᒋᓴᔅ ᑕᓐ ᑲ ᐃᓯ ᐸᒋ ᐅᑎᓇᑭᓄᐅᑦ ᒋᒋᒋᓯᑯᒡ ᐃᔅ, ᑲ ᐃᓯ ᐛᐱᒪᒄ ᐊ ᐃᑐᑕᑦ ᒋᒋᒋᓯᑯᒡ ᐊᐅᑯᓐ ᒧᔭᒻ ᒐ ᐃᓯᓇᑯᓯᑦ ᒥᓐ ᑎᑯᓯᒐ᙮”

ᒪᑎᔭᔅ ᑲ ᒥᔅᑯᑎᔅᑯᐛᑦ ᒍᑎᓴ

¹² ᐊᑯ ᐊᓐᒡ ᐊᑈᔅᑕᓇᒡ ᒂ ᔅᑐᑕᒡ ᐊᓐᑕ ᐊᓂᔭᔪᐤ ᐱᔅᑯᑎᓇᒡ ᐊᓕᐱᔅ ᑲ ᐃᓯᓂᐧᑲᑕᔨᒡ ᑲᐤ ᒂ ᒋᐛᒡ ᐊᓐᑕ ᒋᕈᓯᓕᒥᒡ᙮ ᓴᓯᑲᓐ ᐳᔅᑯᑎᐸᐃᑭᓇ ᐊᐱᒥᑕᓄᐅᒡ ᒋ ᐃᔅᐱᓯᓇᑯᓂᔨᒐ ᐅᔭ ᐃᑕᐅᓂᔪᐤ ᐊᓐᑕ ᑲ ᐅᒋ ᔅᑐᑕᒡ᙮

¹³ ᐃᔅᐱ ᒪᒃ ᑕᑯᓯᓂᒡ ᐊᓐᑕ ᒋᕈᓯᓕᒥᒡ ᒋ ᐱᒐᐅᒡ ᐊᓂᔭᔪᐤ ᒥᒋᐛᐱᔪᐤ ᒐ ᑕᒡ᙮ ᒋ ᑎᑯᓂᔪᐤ ᐊ ᐱᔅᒋᒐᔭᔨᒡ ᐃᔅᐱᒥᑎᑯᒡ ᐊᓂᔭᔪᐤ ᒥᒋᐛᐱᔪᐤ᙮ ᐊᑯᑕ ᑲ ᐃᓯ ᑯᔅᐸᑐᐛᒡ᙮ ᐊᐅᑯᓐᒡ ᐅᒡ ᑲ ᑕᒡ, ᐱᑕᕐ, ᒠᓐ, ᒋᒥᔅ, ᐊᓐᑎᕈ, ᐱᓕᑉ, ᑥᒥᔅ, ᐸᕐᑥᓚᒥᔪ, ᒪᑎᔪᐤ, ᒋᒥᔅ ᐊᓪᐱᔭᔅ ᐅᑯᓯᓴ, ᓴᐃᒥᓐ ᑲ ᐊᔭᒥᐊᐛᑎᓯᑦ ᑲ ᐃᓯᓂᐧᑲᑕᑭᓄᐅᑦ, ᑭᔭ ᒍᑎᔅ, ᒋᒥᔅ ᐅᑯᓯᓴ᙮

¹⁴ ᒥᓯᐛ ᒪᒃ ᒋ ᓇᐊᔨᑎᒧᒡ ᒧᔅ ᒐᒋ ᐸᐃᑯᒪᒧᐎᒡ ᐊ ᒪᒧᐤ ᐊᔭᒥᐊᒡ᙮ ᐊᑯᑕ ᑲᒋ ᑕᒡ ᑭᔭ ᐊᓐᒡ ᐃᔎᐅᒡ, ᑭᔭ ᒪᕆ ᒋᓴᔅ ᐅᑲᐎᔭ, ᑭᔭ ᒋᓴᔅ ᐎᐧᑲᓂᓴ ᑲ ᓇᐸᐎᔨᒋ᙮

Acts 1.15-17,21-26 (Easter-7 Year B)

¹⁵ ᐸᐃᒂᐤ ᒪᒃ ᐊ ᒪᒧᐎᒡ ᐊᓐᒡ ᑲ ᑕᑈᑕᒡ, ᐱᑕᕐ ᒋ ᐱᓯᑯᐤ ᐊᑯ ᒂ ᐃᔨᒪᐊᑦ ᐊᓂᔭᔪᐛ ᑲ ᐸᒋ ᒪᒧᐎᔨᒋ᙮ ᓴᓯᑲᓐ ᐸᐃᑯ ᒥᑕᓯᒥᑎᓄᐤ ᒥᓐ ᓂᓱᔪᐤ ᒋ ᑕᑎᓯᒐᓂᒋ᙮

¹⁶ ᐊᑯ ᒂ ᐃᑕᑦ, “ᓂᐧᑲᓂᓯᑐᒄ, ᐊᓐ ᑲ ᐃᓯ ᓂᑲᓐ ᐎᑕᒂᒡ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᔭᐃᑕᔾ ᒋ ᓂᑐᐛᔨᑕᑯᓐ ᒥᓯᐛ ᒐᒋ ᐃᔅᐱᔨᒡ᙮ ᐊᐅᒄ ᐅᔭ ᑲ ᐸᔭᒋᓯᑦ ᐊᒐᐧᒄ ᑲ ᐃᓯ ᒥᔭᑦ ᐊᓂᔭ ᑎᐱᑕ ᒐᒋ ᓂᑲᓐ ᐎᑎᒥᔨᒋ ᑕᓐ ᒐ ᐃᑎᔨᒂᓂ ᒍᑎᓴ᙮ ᐊᐅᒄ ᐅ ᒍᑎᔅ ᑲ ᐃᑐᑕᐊᑦ ᐊᓯᒪᑭᓂᓴ ᒋᓴᓴ ᐊ ᑕᔨᒋ ᒐᒋ ᒪᑯᓇᔨᒋ᙮

¹⁷ ᔅᒋ ᐎᒋ ᐊᑐᔅᒐᒥᑯᓄᐤ ᒍᑎᔅ, ᐛᔅ ᒋᓴᓴ ᒋ ᐅᑎᓂᑯᐤ ᑭᔭ ᐎᔾ ᐊᑈᔅᑕᓐ ᒐᒋ ᐃᑕᐱᑎᓯᑦ᙮”

¹⁸ (ᐊᓂᔭᔪᐤ ᒪᒃ ᑲ ᐃᓯ ᒥᒋᑐᑕᐧᒃ ᒍᑎᔅ ᒋ ᒋᓯᐧᑯᐛᑭᓄᐤ ᓱᓇᔭᔪᐤ᙮ ᐊᑯ ᒂ ᐅᑎᓇᐧᒃ ᓂᑕᐅᒋᑕᑭᓐ ᐊᔅᒋᔪᐤ᙮ ᐊᑯᑕ ᐅᑕ ᑲ ᓂᐱᑦ, ᒋ ᐳᑯᒐᓯᓄᐤ ᐊ ᐸᒋᓯᓂᑦ ᓇᔅᒡ ᐊᒋ ᑯᐃᑯᑎᓂᔨᒋ ᐅᑎᓯᔭ᙮

¹⁹ ᒥᓯᐛ ᒪᒃ ᐊᓐᑕ ᒋᕈᓯᓕᒥᒡ ᒋ ᒋᔅᒐᔨᑕᑭᓄᐅᔪᐤ ᑕᓐ ᑲ ᐃᔅᐱᔨᑦ ᒍᑎᔅ ᐊᑯ ᒥᐧᑯᐊᔅᒋᔾ ᒂ ᐊᑎ ᐃᓯᓂᐧᑲᑕᑭᓄᐎᒡ ᐊᓂᔭᔪᐤ ᓂᑕᐅᒋᑕᑭᓐ ᐊᔅᒋᔪᐤ ᐊᓐᑕ ᑲ ᒥᔅᑯᐛᑭᓄᐅᑦ᙮ ᐎᔨᐛᐤ ᒪᒃ ᐊ ᐃᓯ ᐃᔨᒥᒡ ᐊᑲᓕᑕᒪ ᒋ ᐃᓯᓂᐧᑲᑕᒧᒡ ᐅᔭ ᒥᐧᑯᐊᔅᒋᔪᐤ᙮)

²⁰ “ᐛᔅ ᐃᑎᔅᑕᔪᐤ ᐊᓐᑕ ᐊᓂᔭ ᑎᐱᑦ ᐅᓂᑭᒧᐅᓂᒡ, ᓇᒪ ᒋᑭ ᐅᒋ ᑕᓄᔪᐤ ᐊᓐᑕ ᑲᒋ ᑕᑦ, ᐊᑲᐎᔾ ᐊᐛᓐ ᒋᑭ ᐅᒋ ᐎᒍᐤ ᐊᓐᑕ᙮ ᐊᔪᐤ ᒪᒃ ᐃᑎᔅᑕᐤ, ᑯᑎᑲ ᐊᐛᔪᐛ ᒋᑭ ᒥᔅᑯᑎᔅᑲᑯᐤ ᐊᓂᔭᔪᐤ ᑲᒋ ᐃᑕᐱᑎᓯᑦ᙮”

Acts 1.15-17,21-26 (Easter-7 Year B)

²¹ ᒂ ᐊᑎ ᐃᔅᒋᔄᑦ ᒥᓐ ᐱᑕᕐ, “ᐊᑯ ᒪᒃ ᒋᐸ ᐎᔭᔨᒪᓄᐤ ᐸᐃᒄ ᐊᐛᓐ ᒐ ᐎᒋᐃᑕᐧᒄ ᐊ ᐛᐎᑎᒧᐛᐧᑯᒡ ᐃᔪᒡ ᐅᑎᐸᔨᒋᒐᐛ ᒋᓴᓴ ᒥᓐ ᐊᒋ ᐅᓂᔅᑲᔨᒋ᙮

²² ᐅ ᒪᒃ ᐊᐛᓐ ᒐ ᒥᔅᑯᑎᔅᑯᐛᑦ ᒍᑎᓴ ᐅᑕ ᐅ ᐊ ᐸᐃᑯᑕᐅᐱᑐᔭᐧᒄ ᒋᑭ ᐅᑎᓇᓄᐤ ᑭᔭ ᓴᔅ ᐊᓐᑕ ᐊᐛᓐ ᐊᒋ ᐅᒋ ᐎᒐᐅᑕᐧᒄ ᐅᔅᑭᒡ ᑲ ᒋᒋ ᐱᐸᐎᒐᐛᐧᒄ ᒋᓴᔅ᙮ ᑭᔭ ᐊᒋ ᐎᒐᐅᑕᐧᒄ ᐃᔅᐱ ᑲ ᓯᑲᐃᑕᑯᑦ ᒋᓴᔅ ᐊᓂᔭᔪᐛ ᒠᓇ, ᐱᐃᒻ ᒪᒃ ᒋᓴᔅ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ᙮” ᐊᔪᐅᒄ ᐅᔭ ᑲ ᐃᔅᒋᔄᑦ ᐱᑕᕐ᙮

²³ ᐊᑯ ᒪᒃ ᓂᓱ ᓇᐸᐛ ᑲ ᐎᐊᒡ᙮ ᐊᓐ ᐸᐃᒄ ᓇᐸᐤ ᒍᓯᑉ ᒋ ᐃᓯᓂᐧᑲᓱᐤ᙮ ᓇᓂᑯᑎᓂᔾ ᒐᔅᑕᔅ ᒪᒃ ᐸᕐᓴᐸᔅ ᒋ ᐃᓯᓂᐧᑲᑕᑭᓄᔨᒐ᙮ ᐊᑯ ᐊᓐ ᑯᑎᒃ ᓇᐸᐤ ᒪᑎᔭᔅ ᒋ ᐃᓯᓂᐧᑲᓱᐤ᙮

²⁴ ᐊᑯ ᑲ ᐊᔭᒥᐊᒡ ᐊ ᐃᔅᒋᔄᒡ, “ᐅᑎᐸᔨᒋᒐᐤ, ᒋ ᒋᔅᒐᔨᒪᐤ ᒥᓯᐛ ᐊᐛᓐ ᑕᓐ ᒋᒋᐛ ᐊ ᐃᑕᔨᑕᑯᓯᑦ᙮ ᐸᒋ ᐛᐸᑎᔨᓇᓐ ᑕᓐ ᐊᓐ ᐛᑎᓂᑦ ᐅᒡ ᓇᐸᐅᒡ ᐊ ᓂᓯᒡ,

²⁵ ᒐᒋ ᐅᑎᓇᐧᒃ ᐅᔭ ᐊᑐᔅᒐᐅᓂᔪᐤ ᐊᑈᔅᑕᓐ ᐊ ᐃᑕᐱᑎᓯᑦ, ᐊᓂᔭᔪᐤ ᒍᑎᔅ ᑲ ᓂᑭᑕᐧᒃ ᐃᔅᐱ ᑲ ᐃᑐᑕᑦ ᐊᓐᑕ ᐊᑲ ᐃᓯᓇᑯᓂᔨᒡ ᒐ ᐃᑐᑕᑯᐱᓇ᙮”

²⁶ ᐊᑯ ᒂ ᐎᔭᔨᒪᒡ ᐊᓂᔭᔪᐛ ᐊ ᓂᓯᔨᒋ ᓇᐸᐛ ᑕᓐ ᐊᓂᔭᔪᐛ ᐊᐅᒄ ᒐ ᐅᑎᓇᒡ, ᐊ ᐅᑎᓂᒺᒡ ᐅᑦ ᐃᓯᓂᐧᑲᓱᐅᓂᔪᐤ᙮ ᐊᓐ ᒪᒃ ᐊᐛᓐ ᑲ ᑕᐅᓂᑭᓄᐎᒡ ᐅᑦ ᐃᓯᓂᐧᑲᓱᐅᓐ ᐊᐅᒄ ᒪᑎᔭᔅ᙮ ᐊᐅᒄ ᒪᒃ ᐊᓐ ᑲ ᐅᑎᓇᑭᓄᐅᑦ ᐊᑈᔅᑕᓐ ᒐᒋ ᐃᑕᐱᑎᓯᑦ᙮ ᐊᑯ ᒪᒃ ᒥᓐ ᑲ ᓂᓱᓴᐳᒡ ᐊᓐᒡ ᐊᑈᔅᑕᓇᒡ᙮