2 ᑕᓴᓗᓂᔭᓇ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

2 Thessalonians 1.1-4,11-12 (Proper-26 Year C)

¹ ᓂᔭᓐ ᑈᓪ, ᓴᓂᔅ, ᑭᔭ ᑎᒧᑎ, ᒋᔨᐛᐤ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᑕᓴᓗᓇᐃᑲ ᐊ ᑕᔭᒄ ᒋᓴᒪᓂᑐᐤ ᐅᑕᐎᒪᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭ ᑲ ᑎᐱᔨᐛᐅᓯᑐᑕᑕᒄ ᒋ ᒥᓯᓇᐊᒪᑎᓇᓐ᙮

² ᒋᓴᒪᓂᑐᐤ ᐅᑕᐎᒪᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭ ᒋᑭ ᒋᓴᐛᑐᑕᑯᐛᐤ ᑭᔭ ᒋᑭ ᒥᔨᑯᐛᐤ ᒋᔭᒪᔨᑎᒧᐅᓂᔪᐤ᙮

ᑈᓪ ᑲ ᐃᓯ ᓂᓇᔅᑯᒧᑦ ᑭᔭ ᑲ ᐃᓯ ᓯᒋᒧᐛᑦ

³ ᓂᐧᑲᓂᓯᑐᒄ, ᐃᑕᔨᑕᑯᓐ ᒧᔅ ᒐᒋ ᓂᓇᔅᑯᒥᒋᒡ ᒋᓴᒪᓂᑐᐤ ᒋᔨᐛᐤ ᐅᒋ ᐛᔅ ᐊᑐᐎᔅ ᒋᑦ ᐊᑎ ᑕᑈᐅᒐᔨᒪᐛᐤ ᙭ ᑭᔭ ᐊᔭᔅᒃ ᐊᑐᐎᔅ ᒋ ᓴᒋᐃᑐᓇᐛᐤ᙮

⁴ ᐊᐅᒄ ᒪᒃ ᐅ ᐛᒋ ᒪᒥᔽᔨᑎᒥᔨᔭᒡ ᑭᔭ ᐊᔨᒧᒥᑕᒡ ᐊᓐᑕ ᑯᑎᑭᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊ ᑕᒡ᙮ ᓂ ᒪᒥᒋᔨᓱᓇᓐ ᐊ ᐊᔨᒧᑎᒪᒡ ᐊᑲ ᐳᓂᔭᒄ ᑭᔭ ᐊᔅᒄ ᐃᔭᐱᒡ ᐊ ᑕᑈᐅᒐᔨᒪᒄ ᙭ ᐊᑎ ᐃᔅᐱᔅ ᓂᓇᐧᑲᑕᔨᒧᐃᑯᐅᔭᒄ ᑭᔭ ᐊᔅᐱᔅ ᐊᔨᒥᐅᔭᒄ᙮

ᑎᐸᔅᑯᓂᒐᐅᓐ ᙭ ᑎᑯᓯᒐ

⁵ ᐊᑯᑕ ᒪᒃ ᐅᑕ ᒐ ᐅᒋ ᒋᔅᒐᔨᑎᒪᒄ ᑕᓐ ᐊᔅᐱᔅ ᑯᐃᔅᒄ ᐃᑎᑦ ᒋᓴᒪᓂᑐᐤ ᐊ ᑎᐸᔅᑯᓂᒐᑦ᙮ ᐊᓐ ᒪᒃ ᑕᓐ ᐊ ᐃᔅᐱᔭᒄ ᒋᑭ ᒋᔅᑕᔨᑕᑯᓯᓇᐛᐤ ᒐᒋ ᐎᒋᐃᐛᔭᒄ ᐊᓐᑕ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ᙮

⁶ ᒋᓴᒪᓂᑐᐤ ᑯᐃᔅᒄ ᐃᑐᐤ᙮ ᒋᑭ ᐃᑐᑐᐛᐤ ᒐᒋ ᓂᓇᐧᑲᑕᔨᒧᔨᒋ ᐊᓂᔭ ᐊᐛᔪᐛ ᑲ ᓂᓇᐧᑲᑕᔨᒧᐃᑕᑯ᙮

⁷ ᐊᑯ ᒋᔨᐛᐤ ᑲ ᓂᓇᐧᑲᑕᔨᒧᔭᒄ ᒋᑭ ᐃᑐᑕᑯᐛᐤ ᒋᓴᒪᓂᑐᐤ ᒐᒋ ᐳᓂ ᓂᓇᐧᑲᑕᔨᒺᒄ ᑭᔭ ᓂᔭᓐ ᐊᐅᑯᓐ ᒐ ᐃᓯ ᐎᒋᐃᑯᐅᔭᒡ᙮ ᐃᔅᐱ ᐸᒋ ᓄᑯᓯᒐ ᐅᑎᐸᔨᒋᒐᐤ ᒋᓴᔅ ᐊᓐᑕ ᒋᒋᒋᓯᑯᒡ ᐅᒡ ᐊ ᐸᒋ ᐎᒐᐛᑦ ᐅᑦ ᐊᓐᒋᓂᒪ ᑲ ᓱᐧᑲᑎᓯᔨᒋ ᐊᑯᑕ ᒐ ᐃᑐᑕᐧᒃ ᐅᔭ᙮

⁸ ᐃᔅᑯᑕᔪᐤ ᐊ ᐛᔭᑕᐱᔨᒡ ᒋᑭ ᐊᐱᒋᑕᐤ ᐛᐛᓯᐊᒐ ᐊᓂᔭ ᐊᑲ ᒋᔅᒐᔨᒪᔨᒋ ᒋᓴᒪᓂᑐᐛ ᑭᔭ ᐊᓂᔭᔪᐛ ᐊᑲ ᓂᓇᐊᔨᑎᒥᔨᒋ ᒥᔽᒋᒧᐅᓂᔪᐤ ᐊᓐᑕ ᐃᔭᔨᒧᒪᑭᓄᔨᒋ ᐅᑎᐸᔨᒋᒐᐛ ᒋᓴᓴ᙮

⁹ ᒋᑭ ᐛᐛᓯᐊᑭᓄᐅᒡ ᑲᒋᒡ ᒐᒋ ᓂᓱᐅᓇᑎᓯᒡ᙮ ᒋᑭ ᐃᒐᓇᑭᓄᐎᒡ ᐅᑎᐸᔨᒋᒐᐛ ᐊ ᑕᔨᒋ ᐅᒋ ᑭᔭ ᓇᒪ ᓂᑕ ᒋᑭ ᐅᒋ ᐛᐸᑎᒧᒡ ᑕᓐ ᐊᔅᐱᔅ ᓱᒐᔨᑕᑯᓂᔨᒡ ᐅᒥᔅᑯᓯᐅᓂᔪᐤ᙮

¹⁰ ᒋᑭ ᐛᐛᓯᐊᐤ ᐅᑎᐸᔨᒋᒐᐤ ᐅᔭ ᐊᓂᔭ ᐊ ᒋᓯᑲᔨᒡ ᑎᑯᓯᒐ ᒐᒋ ᒋᔅᑕᔨᑕᑯᐃᑯᑦ ᑲ ᑕᑈᑎᒥᔨᒋ ᑭᔭ ᒐᒋ ᒋᔅᑕᔨᒥᑯᑦ ᒥᓯᐛ ᐊᓂᔭ ᐊᐛᔪᐛ ᑲ ᑕᑈᔭᔨᒥᑯᑦ᙮ ᐊᑯᑕ ᒪᒃ ᒐ ᐎᒋᐃᐛᔭᒄ ᑭᔭ ᒋᔨᐛᐤ ᒋᔅᑕᔨᑕᑯᐊᑭᓄᒐ ᐅᑎᐸᔨᒋᒐᐤ ᐛᔅ ᔅᒋ ᑕᑈᑕᓇᐛᐤ ᐊᓐ ᒥᔽᒋᒧᐅᓐ ᑲ ᐎᑎᒪᑕᒡ᙮

2 Thessalonians 1.1-4,11-12 (Proper-26 Year C)

¹¹ ᐊᐅᒄ ᒪᒃ ᐅ ᐛᒋ ᒧᔅ ᐊᔭᒥᐊᔅᑎᒪᑕᒡ᙮ ᓂ ᓂᑐᑎᒧᐛᓇᓐ ᒋᓴᒪᓂᑐᐤ ᒐᒋ ᒋᔅᑕᔨᑕᑯᓯᔭᒄ ᒐᒋ ᐃᓯ ᐱᒪᑎᓯᔭᒄ ᐊᓂᔭ ᑕᓐ ᑲ ᐃᓯ ᓂᑐᐛᔨᒥᑕᒄ ᒐᒋ ᐃᓯ ᐱᒪᑎᓯᐛᒄ᙮ ᓂ ᓂᑐᑎᒧᐛᓇᓐ ᒐᒋ ᒥᔨᑕᒄ ᓱᐧᑲᑎᓯᐅᓂᔪᐤ ᒐᒋ ᐃᑐᑎᒪᒄ ᒥᓯᐛ ᐊ ᐃᓯ ᐱᑯᓴᔨᒥᑯᐅᔭᒄ ᒐᒋ ᐃᓯ ᒥᔪᑐᑎᒪᒄ᙮ ᑭᔭ ᒐᒋ ᐎᒋᐃᑕᒄ ᒐᒋ ᒋᔅᑕᐛᒄ ᐊᓂᔭᔪᐛ ᒐᒂᔪᐛ ᑲ ᐃᑐᑎᒪᒄ ᐊ ᑕᑈᑎᒪᒄ᙮

¹² ᐊᑯᑕ ᐅ ᒐ ᐅᒋ ᒋᔅᑕᔨᑕᑯᑕᐛᒄ ᒋᑎᐸᔨᒋᒐᓯᒥᓄᐤ ᒋᓴᔅ ᐅᑦ ᐃᓯᓂᐧᑲᓱᐅᓐ ᑭᔭ ᒋᔨᐛᐤ ᒪᒃ ᒋᑭ ᒋᔅᑕᔨᑕᑯᐃᑯᐛᐤ᙮ ᐊᐅᒄ ᒐ ᐃᑐᑕᑯᐅᔭᒄ ᐊᔅᐱᔅ ᓱᐛᔨᑕᑯᓯᒡ ᒋᒋᓴᒪᓂᑐᒥᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭᙮