2 ᒠᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᔾ ᐸᐃᒄ ᑲ ᓂᑲᓂᔅᑯᐛᑦ ᐅᒪᒧᐊᔭᒥᐊᐛ ᒋ ᒥᓯᓇᐊᒪᑎᓐ ᒋᔾ ᑲ ᐃᑕᔨᒥᑯᔨᓐ ᐅᒋᒪᔎᐤ ᑭᔭ ᒋᑦ ᐊᐛᓯᒥᒡ ᓂ ᒥᓯᓇᐊᒧᐛᐅᒡ᙮ ᐊᐅᒄ ᒋᔨᐛᐤ ᑕᑈ ᑲ ᓴᒋᐃᑎᑯᒡ᙮ ᓇᒪ ᒪᒃ ᒥᒄ ᓂᔾ ᒋᓴᒋᐃᑎᓇᐛᐤ᙮ ᒥᓯᐛ ᑭᔭ ᐊᓐᒡ ᑲ ᒋᔅᒐᔨᑕᒡ ᑕᑈᐅᓂᔪᐤ ᒋᓴᒋᐃᑯᐛᐅᒡ᙮ 2 ᐛᔅ ᒋ ᑭᓄᐛᔨᑕᓇᓄᐤ ᑭᔭ ᒋ ᓂᓇᐃᑕᓇᓄᐤ ᑕᑈᐅᓐ ᒋᑕᐃᓇᒡ ᑭᔭ ᐊᑯᑕ ᒧᔅ ᑲᒋᒡ ᒐ ᑎᒂᒡ᙮ 3 ᒋᓴᒪᓂᑐᐤ ᐅᑕᐎᒪᐤ ᑭᔭ ᒋᓴᔅ ᙭ ᐊᓂᔭᔪᐛ ᐅᑕᐎᒪᐤ ᐅᑯᓴ ᒋᑭ ᒋᓴᐛᑐᑕᑭᓄᐅᒡ, ᒋᑭ ᒋᔅᑎᒪᒐᔨᒥᑯᓄᐅᒡ ᑭᔭ ᒋᑭ ᒥᔨᑯᓄᐅᒡ ᒋᔭᒪᔨᑎᒧᐅᓂᔪᐤ᙮ ᑕᑈ ᐊᐅᑯᓐ ᒐ ᐃᓯ ᐊᔭᔭᐧᒄ ᐊ ᒋᔅᒐᔨᑎᒪᐧᒄ ᑕᑈᐅᓐ ᑭᔭ ᓴᒋᐃᐛᐅᓐ᙮ ᑕᑈᐅᓐ ᑭᔭ ᓴᒋᐃᐛᐅᓐ ᐊ ᐊᔨᒧᑕᑭᓄᐅᒡ 4 ᓇᔅᒡ ᑕᑈ ᓂᒋ ᒧᒋᒐᔨᑕᓐ ᐃᔅᐱ ᒐᔅᒐᔨᑎᒪᓐ ᐱᔅᒐ ᒋᑦ ᐊᐛᓯᒥᒡ ᑕᑈᐅᓂᒡ ᐊ ᐃᓯ ᐱᒪᑎᓯᒡ ᒧᔭᒻ ᐊᓂᔭ ᑲ ᐃᑎᓱᒥᑕᐧᒄ ᐅᑕᐎᒪᐤ ᒐᒋ ᐃᓯ ᐱᒪᑎᓯᐛᐧᒄ᙮ 5 ᐊᓄᒡ ᒪᒃ ᒋ ᓂᑐᑎᒪᑎᓐ ᒋᔾ ᐅᒋᒪᔎᐤ ᒐᒋ ᓴᒋᐃᑐᔭᐧᒄ᙮ ᓇᒪ ᒋ ᒥᓯᓇᐊᒪᑎᓇᐛᐤ ᐊ ᐎᑎᒪᑎᑯᒡ ᐊ ᐅᔅᑲᒡ ᐃᑎᓱᐛᐅᓐ, ᒧᔅ ᔅᒋ ᐃᑎᑯᓇᓄᐤ ᒐᒋ ᓴᒋᐃᑐᔭᐧᒄ ᐃᔅᐱ ᑲ ᐸᑎᒪᐧᒄ ᒥᔽᒋᒧᐅᓐ᙮ 6 ᒪᐅ ᒪᒃ ᓴᒋᐃᐛᐅᓐ, ᒐᒋ ᐃᑐᑎᒪᐧᒄ ᑕᓐ ᐊ ᐃᑎᓱᒥᑕᐧᒄ ᒋᓴᒪᓂᑐᐤ᙮ ᐊᐅᒄ ᒪᒃ ᐅ ᐃᑎᓱᐛᐅᓐ ᑲ ᒥᔨᑯᐅᔭᐧᒄ ᒪᐅᒡ ᓂᔅᑎᒻ ᑲ ᐸᑎᒪᐧᒄ ᒥᔽᒋᒧᐅᓐ, ᒐᒋ ᐃᓯ ᐱᒪᑎᓯᔭᐧᒄ ᑕᓐ ᐊ ᐃᓯ ᐱᒪᑎᓯᒡ ᐊᓐᒡ ᑲ ᓴᒋᐊᒡ ᒋᓴᒪᓂᑐᐛ ᑭᔭ ᐎᐧᑲᓂᓱᐛᐛ᙮ ᐊᓐᒡ ᑲ ᐛᐧᑲᑕᒡ ᙭ᑕ 7 ᒥᒐᑦ ᑲ ᐎᔭᓯᐃᐛᒡ ᓴᔅ ᐱᐸᒪᒋᒧᐅᒡ ᐅᑕ ᐊᔅᒋᒡ ᐊ ᐊᓏᑕᒡ ᑕᑈ ᐊᒋ ᑎᑯᓯᓂᔨᒋ ᒋᓴᓴ ᒧᒡ ᓇᐸᐛ ᐊᒋ ᐃᑕᔨᑕᑯᓯᔨᒋ᙮ ᐅᔭ ᒪᒃ ᐊ ᐃᑕᔨᑕᑯᓯᑦ ᐊᐛᓐ, ᐊᐅᒄ ᐅ ᑲ ᓱᒐᔨᒧᑐᑐᐛᑦ ᙭ᑕ ᑭᔭ ᒧᔅ ᑲ ᐎᔭᓯᐃᐛᑦ᙮ 8 ᐃᔭᒂᒥᒄ ᒪᒃ ᒐ ᐊᑲ ᒋ ᐅᓂᑕᔭᒄ ᐊᓐ ᑎᐸᐊᒪᑯᓯᐅᓐ ᑲ ᐊᑐᔅᒐᔅᑎᒪᒄ ᒐᒋ ᐊᔭᔭᒄ, ᑕᑈ ᒐᒋ ᒥᔅᑭᒪᒄ ᒥᓯᐛ ᑕᓐ ᐊ ᐃᓯ ᐊᔭᔅᑯᔅᑎᒪᑕᒄ ᒋᓴᒪᓂᑐᐤ᙮ 9 ᐊᓐ ᐊᐛᓐ ᐊᔪᐛᒃ ᑲ ᐃᓯ ᒋᔅᑯᑎᒪᒐᑦ ᑕᓐ ᐊ ᐃᓯ ᒋᔅᑯᑎᒪᒐᔨᒋ ᙭ᑕ ᑭᔭ ᐊᑲ ᓂᓇᐃᑐᐛᑦ ᑕᓐ ᑲ ᐃᓯ ᒋᔅᑯᑎᒪᒐᔨᒋ, ᓇᒪ ᐊᔭᐛᐤ ᒋᓴᒪᓂᑐᐛ᙮ ᐊᑯ ᐊᓐ ᐊᐛᓐ ᒧᔅ ᐃᔭᒂ ᑲ ᓂᓇᑭᑐᐛᔨᑕᐧᒃ ᑕᓐ ᐊ ᐃᓯ ᒋᔅᑯᑎᒪᒐᔨᒋ ᙭ᑕ, ᑕᐱᔅᑯᓐ ᐅᑕᐎᒪᐤ ᑭᔭ ᐅᑯᓯᓯᒪᐤ ᐎᒐᐛᐤ᙮ 10 ᓂᑐᐛᐱᒥᔅᒐ ᒪᒃ ᐊᐛᓐ ᐊᑲ ᒋᔅᑯᑎᒪᒐᑦ ᑕᓐ ᐊ ᐃᓯ ᒋᔅᑯᑎᒪᒐᔨᒋ ᙭ᑕ, ᐊᑲᐎᔾ ᐱᑎᑲᐃ ᒋᒋᒡ᙮ ᐊᑲᐎᔾ ᐛᐛᒡ ᒋᑭ ᐅᒋ ᐛᒋᔭᒪᐤ᙮ 11 ᐛᔅ ᐊᓐ ᐊᐛᓐ ᑲ ᐛᒋᔭᒪᑦ ᐊᓂᔭᔪᐛ ᓂᑎᒥᒄ ᑲ ᐃᓯ ᒋᔅᑯᑎᒪᒐᔨᒋ, ᐎᒋᐊᐤ ᐊ ᒥᒋᑐᑎᒥᔨᒋ᙮ ᒪᔅᑕᔾ ᐊ ᐊᑎ ᐃᔅᒋᔄᑦ ᒠᓐ 12 ᐊᑎ ᐊᔅᒄ ᒥᔅᑎ ᐊ ᑎᒂᒡ ᑕᓐ ᐛ ᐃᑎᑎᑯᒡ, ᓇᒪ ᓂ ᐎ ᒥᓯᓇᐊᓐ ᑕᓐ ᐛ ᐃᔅᒋᔄᔭᓐ᙮ ᐃᔭᐱᒡ ᓂ ᐱᑯᓴᔨᑕᓐ ᒐᒋ ᒧᐱᔅᑕᑎᑯᒡ ᐛᒋᒡ ᒐᒋ ᐃᔨᒥᐃᑐᔭᐧᒄ ᑭᔭ ᑕᑈ ᒐ ᒥᔽᔨᑎᒪᐧᒄ᙮ 13 ᐅᑦ ᐊᐛᓯᒪ ᐊᓐ ᒋᐧᑲᓂᓱᐛᐤ ᒋᓴᒪᓂᑐᐛ ᑲ ᐅᑎᓂᑯᒡ ᒋ ᐛᒋᔭᒥᑯᐛᐅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.