2 ᑯᕆᓐᑎᔭᓇ 7 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑈᓪ ᑲ ᐃᓯ ᒥᔽᔨᑎᒥᐃᑯᑦ ᐊᓂᔭᔪᐛ ᐃᔪᐛ ᑯᕆᓐᑦ ᐊ ᑕᔨᒋ 1 ᓂᐎᒐᐛᑭᓂᑎᒄ, ᒥᓯᐛ ᑕᓐ ᑲ ᐃᔅᒋᔄᑦ ᒋᓴᒪᓂᑐᐤ ᒐᔅᑎᓇᔅ ᒐ ᐃᑐᑎᒪᑕᐧᒄ ᑕᑈ ᒋᑭ ᐃᑐᑎᒻ᙮ ᐸᔭᒋᐃᓱᑕᐤ ᒪᒃ ᐊᑲ ᓇᔅᒡ ᒐᒋ ᑎᒂᒡ ᒥᒋᑥᐅᓐ ᒋᔪᓇᒡ ᑭᔭ ᒋᑦ ᐊᒐᐧᑯᓇᒡ᙮ ᐛᔅ ᐊᑯᑕ ᐊ ᓄᑯᑕᔭᐧᒄ ᐊ ᓇᓂᒋᔅᑐᐛᐧᒄ ᒋᓴᒪᓂᑐᐤ ᓇᔅᒡ ᐊ ᐱᔅᑕᔨᒥᓱᔭᐧᒄ ᒐᒋ ᐊᑐᔅᑯᐛᐧᒄ᙮ 2 ᐊᑲᐎᔾ ᐃᒐᓂᓇᓐ᙮ ᑕᐸ ᓂ ᐅᒋ ᐅᓂᑐᑐᐛᓇᓐ ᐊᐛᓐ᙮ ᓇᒪ ᓂ ᐅᒋ ᓂᓱᐅᓇᒋᐊᓇᓐ ᐊᐛᓐ ᑭᔭ ᓇᒪ ᓂ ᐅᒋ ᐎᔭᓯᐊᓇᓐ ᐊᐛᓐ᙮ 3 ᓇᒪᐎᔾ ᐎ ᐊ ᐎ ᓂᓱᐅᓇᒋᒥᑎᑯᒡ ᐛᒋ ᐃᑎᑎᑯᒡ ᐅ᙮ ᓴᔅ ᔅᒋ ᐎᑎᒪᑎᓇᐛᐤ ᐊ ᓴᒋᐃᑕᒡ ᓂᑕᐃᓇᒡ ᒐ ᐃᔅᐱᔅ ᐱᒪᑎᓯᔭᒡ ᑭᔭ ᐊᑎ ᐳᓂᐱᒪᑎᓯᔭᒐ᙮ 4 ᒥᔅᑎ ᒋᑕᑈᐅᒐᔨᒥᑎᓇᐛᐤ᙮ ᑭᔭ ᓇᔅᒡ ᑕᑈ ᒋ ᒪᒥᒋᐃᓇᐛᐤ᙮ ᓇᔅᒡ ᑕᑈ ᓂ ᒥᔽᔨᒧᐃᑯᐅᓐ ᐊ ᒋᔅᒋᓯᑐᑕᑎᑯᒡ᙮ ᐊᑎ ᐊ ᐊᔨᒥᐅᔭᒡ ᐃᔭᐱᒡ ᓇᔅᒡ ᓂ ᒥᔽᔨᑕᓐ᙮ ᑕᐃᑕᓴ ᑲ ᐅᑎᑎᑯᑦ ᑈᓪ 5 ᐛᔅ ᐃᔅᐱ ᑲ ᑎᑯᓯᓂᔭᒡ, ᐊᓐᑕ ᐊᓐ ᒪᓯᑐᓂᔭ ᐊ ᐃᓯᓂᐧᑲᑕᒡ ᐊᔅᒋᔾ ᓂᔅᑎᒻ ᑲ ᑕᔭᒡ ᓇᒪ ᐛᐛᒡ ᓂ ᐅᒋ ᐊᔅᑕᔭᔅᑯᓯᓇᓐ᙮ ᓇᔅᒡ ᑕᑈ ᓂᓇᐧᑯᐤ ᒋ ᐃᓯ ᐛᐅᔅᑕᐱᔪᐤ᙮ ᒋ ᑕᐅᒡ ᐊᓐᒡ ᐊ ᒥᒋᐱᔨᒥᒡ᙮ ᓂᒋ ᐎ ᓴᒋᓯᓇᓐ ᒪᒃ᙮ 6 ᒋᓴᒪᓂᑐᐤ ᑲ ᐛᐎᒋᐊᑦ ᐊᐛᔪᐛ ᐊ ᓂᑕᔨᑎᒥᔨᒋ ᓂᒋ ᒥᔽᔨᒧᐃᑯᐅᓇᓐ ᑲ ᐸᒋ ᐃᑎᓴᐛᑦ ᓂᐎᒐᐛᑭᓇᓇ ᑕᐃᑕᓴ᙮ 7 ᓇᒪ ᒪᒃ ᒥᒄ ᐊᓐᑕ ᓂ ᐅᒋ ᒥᔽᔨᑎᒥᐃᑯᐅᓇᓐ᙮ ᑲ ᐸᑎᒪᒡ ᑭᔭ ᑕᓐ ᑲ ᐃᓯ ᐛᐎᒋᐊᒄ ᑕᐃᑕᔅ ᐊᐅᒄ ᐅ ᑭᔭ ᑲ ᒥᔽᔨᒧᐃᑯᐅᔭᒡ᙮ ᓂᒋ ᐎᑎᒪᑯᐅᓇᓐ ᓇᔅᒡ ᑕᑈ ᐊ ᐎ ᐛᐱᒥᔭᒡ ᑭᔭ ᑕᓐ ᑲ ᐃᓯ ᒥᑕᒋᔨᐛᔨᑎᒪᒄ᙮ ᒋ ᐊᔨᒧᑎᒻ ᑭᔭ ᑕᓐ ᑲ ᐃᓯ ᒪᒥᑐᓇᔨᒥᔭᒄ᙮ ᐊᑯ ᒪᒃ ᐊᑐᐎᔅ ᑲ ᒥᔽᔨᑎᒪᓐ᙮ 8 ᓇᔅᒡ ᑕᑈ ᔅᒋ ᒥᓯᒪᔨᑎᒥᐃᑯᓇᐛᒐ ᐊᓐ ᑲ ᒥᓯᓇᐊᒪᑎᑯᒡ᙮ ᓇᒪ ᒪᒃ ᓇᔅᒡ ᓂ ᒥᑕᒋᔨᐛᓯᓐ ᐊᓐ ᑕᓐ ᑲ ᐃᑎᓯᓇᐊᒪᑎᑯᒡ᙮ ᓂᔅᑎᒻ ᑭᑈ ᒋ ᑎᑯᓐ ᐊ ᒥᒐᔨᑎᒪᓐ᙮ ᐊᑐᐎᔅ ᒪᒃ ᒥᒄ ᐛᐃᐱᔅᒋᔅ ᔅᒋ ᒥᓯᒪᔨᑕᓇᐛᐤ᙮ 9 ᐊᓄᒡ ᒪᒃ ᐊᑯ ᒪᔽᔨᑎᒪᓐ᙮ ᐊᑎ ᐊᒋ ᑎᒂᒡ ᐊ ᒥᓯᒪᔨᑎᒪᒄ ᔅᒋ ᐃᑐᑕᑯᓇᐛᐤ ᐅ ᒥᓯᒪᔨᑎᒧᐅᓐ ᑕᑈ ᒐᒋ ᒥᑕᒋᔨᐛᔨᑎᒪᒄ ᒋᒥᒋᑐᑎᒧᐅᓄᐛᐛ ᑭᔭ ᒐᒋ ᒂᔅᑲᑎᓯᔭᒄ᙮ ᐛᔅ ᒋᓴᒪᓂᑐᐤ ᔅᒋ ᒥᔨᑯᐛᐤ ᐊᓂᔭ ᒥᓯᒪᔨᑎᒧᐅᓂᔪᐤ ᑭᔭ ᐊᓂᔭ ᒥᑕᒋᔨᐛᔨᑎᒧᐅᓂᔪᐤ᙮ ᓇᒪ ᒪᒃ ᒋ ᐅᒋ ᐊᐧᑯᐃᑯᓇᐛᐤ ᐊᓐ ᑲ ᐃᓯ ᒥᓯᓇᐊᒪᑎᑯᒡ᙮ 10 ᐛᔅ ᒧᔭᒻ ᐊ ᐃᑐᑕᑕᐧᒄ ᒋᓴᒪᓂᑐᐤ ᒐᒋ ᒥᓯᒪᔨᑎᒥᐃᑯᔭᐧᒄ ᒋᒥᒋᑐᑎᒧᐅᓄᐛ ᐊᑯᑕ ᐛᒋ ᒂᔅᒋᓂᑭᓄᐅᒋ ᒋᑕᐃᓄᐛ ᑭᔭ ᐊ ᐊᑎ ᐱᒪᒋᐅᔭᐧᒄ, ᓇᒪ ᒪᒃ ᑕᐤ ᐊᐛᓐ ᒐᒋ ᒥᑕᒋᔨᐛᔨᑕᐧᒃ ᐊᒋ ᐱᒪᒋᐊᑭᓄᐅᑦ᙮ ᐊᔅᒋᔪᐤ ᒥᓯᒪᔨᑎᒧᐅᓐ ᒪᒃ ᓂᐳᐅᓂᒡ ᐃᑐᑕᐃᐛᒥᑭᓐ᙮ 11 ᒋᔨᐛᐤ ᒪᒃ ᐎ ᒋ ᓇᐊᔨᑎᒥᐃᑯᐤ ᒋᓴᒪᓂᑐᐤ ᑕᓐ ᑲ ᐃᓯ ᒥᑕᒋᔨᐛᔨᑎᒪᒄ᙮ ᒋ ᐛᐸᑕᓇᐛᐤ ᑭᔭ ᑕᓐ ᐊ ᐃᓯ ᐎᒋᐃᑯᔭᒄ᙮ ᐊᑐᐎᔅ ᓱᒃ ᒋᑦ ᐃᑕᔨᑕᓇᐛᐤ᙮ ᐊᑐᐎᔅ ᓱᒃ ᒋ ᐎ ᐛᐸᑎᔨᐛᓇᐛᐤ ᑕᓐ ᐊ ᐃᓯ ᒥᔪᑐᑎᒪᒄ᙮ ᒋ ᐃᑐᑕᑯᓇᐛᐤ ᒐᒋ ᒥᒐᔨᑎᒪᒄ ᐊ ᒥᒋᑐᑕᑭᓄᐅᒡ ᑭᔭ ᒐᒋ ᒋᔄᓯᔅᑎᒪᒄ ᒥᒋᑐᑎᒧᐅᓐ᙮ ᒋ ᒋᔅᒐᔨᑕᓇᐛᐤ ᒐᒋ ᐛᐛᓯᐊᑭᓄᐅᑦ ᐊᓐ ᑲ ᒥᒋᑐᑕᐧᒃ ᑭᔭ ᒐᒋ ᑯᐃᔅᑯᓇᑭᓄᐅᑦ᙮ ᑕᑈ ᔅᒋ ᐛᐸᑎᔨᐛᓇᐛᐤ ᑯᐃᔅᒄ ᐊ ᐃᑎᔭᒄ᙮ 12 ᓇᒪᐎᔾ ᐊᓐ ᐊᐛᓐ ᑲ ᒥᒋᑐᑕᐧᒃ ᒪᒃ ᐊᓂᔭᔪᐛ ᐊᐛᔪᐛ ᑲ ᐅᓂᑐᑕᑯᑦ ᐛᒋ ᒥᓯᓇᐊᒪᑎᑯᒡ᙮ ᔅᒋ ᒥᓯᓇᐊᒪᑎᓇᐛᐤ ᒐᒋ ᐛᐸᑎᔨᑕᒄ ᒋᓴᒪᓂᑐᐤ ᑕᓐ ᐊᔅᐱᔅ ᐊᐱᑕᔨᒥᔭᒡ᙮ 13 ᒥᔅᑎ ᒪᒃ ᓂ ᒥᔽᔨᒧᐃᑯᐅᓇᓐ ᐊ ᒋᔅᒐᔨᑎᒪᒡ ᐅ᙮ ᐊᑐᐎᔅ ᒪᒃ ᓂᒋ ᒥᔽᔨᑕᓇᓐ ᐊ ᐛᐱᒥᒋᒡ ᓂᐎᒐᐛᑭᓇᓐ ᑕᐃᑕᔅ ᐊ ᒥᔽᔨᑕᐧᒃ᙮ ᒋ ᒥᔽᔨᑎᒻ ᑕᓐ ᑲ ᐃᓯ ᒥᔪᐧᑯᐛᒄ ᑭᔭ ᓇᒪ ᐅᒋ ᐊᔨᒪᔨᑎᒻ᙮ 14 ᓂᑲᓐ ᓂᒋ ᐎᑎᒧᐛᐤ ᑕᓐ ᐊ ᐃᓯ ᒪᒥᔽᔨᑎᒥᔨᔭᒡ᙮ ᓂᒋ ᑕᑈᑕᑯᑕᓇᑯᐱᓐ ᒪᒃ ᐊᓂᔭ ᑕᓐ ᑲ ᐃᓯ ᐎᑎᒧᐅᒋᒡ᙮ ᒧᔅ ᓂᒋ ᑕᑈᓇᓐ ᑕᓐ ᑲ ᐃᓯ ᐎᑎᒪᑕᒡ ᑭᔭ ᓂᒋ ᑕᑈᓇᓐ ᑕᓐ ᑲ ᐃᑕᒋᒧᔅᑐᐅᒋᒡ ᑕᐃᑕᔅ᙮ 15 ᐊᑯ ᒪᒃ ᐊᑐᐎᔅ ᐊ ᐊᑎ ᓴᒋᐃᑕᒄ ᑕᐃᑕᔅ ᐊ ᒋᔅᒋᓯᑦ ᑕᓐ ᑲ ᐃᓯ ᐃᔭᒂ ᓂᑐᑐᐛᒄ ᑭᔭ ᐊᒋ ᓂᓇᐃᑐᐛᒄ ᑭᔭ ᑕᓐ ᑲ ᐃᓯ ᒥᔪᐧᑯᐛᒄ ᐃᔭᒂ ᐊ ᐃᑕᔨᒪᒄ᙮ 16 ᓂ ᒥᔽᔨᑕᓐ ᒪᒃ ᑕᑈ ᒐᒋ ᑕᑈᐅᒐᔨᒥᑎᑯᒡ ᒐᒋ ᐃᑐᑎᒪᒄ ᒥᓯᐛ ᑕᓐ ᐊ ᐃᑎᓱᒥᑎᑯᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.