Yọọn 7 - Ñwed Abasi Ke Ikọ Ibibio Ayo Mfịn

Yisọs aka Usọrọ Tabanakịd

¹ Ke ami amaakeboiyo, Yisọs amaanam isañ akanna Kadidi. Anye ikiyemme isaaña ke Yudia, sia mme adaidaha ke atu Yuu ekeyeeyem usʌñ adiwot anye.

² Nte Usọrọ Tabanakịd mme Yuu akpereke,

³ nditọeka Yisọs emaebo anye ate, “kpọñ Kadidi nyʌñ kaa Yudia, nọ mme mbed mfo e-ebaññake ke udo enyʌñ ekịt mme utom a-afo anamma;

⁴ awo ndomokeed a-ayemme ediọọñọ anye inamma ñkpọ ke ndịbe-ndịbe. Sia afo anamma mme ñkpọ ami akpena afo ayaara idem mfo anọ afịd ederimbod!”

⁵ Idem nditọeka amọ ikinịmme anye ke akpanikọ.

⁶ Yisọs abọọrọ ate, “Ini mmi ikemme dion, ado amaado ndufo, ini ake adodo ado eti ini inọ ndufo.

⁷ Ederimbod ikemeke adisua ndufo, ado ansua miin, sia mmenọ ikọ ntiense mbo ke usʌñ ammọ inenne.

⁸ Ndufo ika usọrọ ke idem ndufo. Ami mbooho ñka usọrọ ami, sia ini mmi ikemme dion.”

⁹ Ke anye amaaketañ ado ama, anye amaatịmme atie ke Kadidi.

¹⁰ Ado ke ini nditọeka amọ ideen emaekedaaña usọrọ ado, anye amaadidakka ñko aka ke ndedịbe, iyakka ammọ ediọọñọ.

¹¹ Ke usọrọ ado adaidaha ke atu mme Yuu ekesʌk eyem anye, enyʌñ ebịp, “Anye awo ado-o?”

¹² Emaetaañ uwak ikọ ebaña anye eti-eti ke atu awo. Ubaak awo ete, “Anye ado eti awo.” Ubaak ete, “Iyo-o, anye atịn mme awo usʌñ.”

¹³ Ado awo ndomokeed ikitañña ikọ ibaña anye añwa-añwa, mbaak mme ikpọawo mme Yuu.

Yisọs akpeeb ñkpọ ke usọrọ ado

¹⁴ Akedo enanam usọrọ esịm mbakka iba, mbemiso Yisọs awuọ aka aketọọñọ adikpeeb ñkpọ ke afe tembịd.

¹⁵ Idem amaakpa mme Yuu, ammọ enyʌñ ebo, “Anye akenam die anie utọ ifiọk ami ke ini anye mmiikibọọhọ ukpeebñkpọ?”

¹⁶ Yisọs abọọrọ ammọ ate: “Ukpeebñkpọ mmi intooho miin. Ato anye a-akendọññọ.

¹⁷ Awo ake adodo a-abeeñeke idem adinam uduak Abasi ayaadiọọñọ mme ukpeebñkpọ mmi ato Abasi, me ami ntañ ikọ idem mmi.

¹⁸ Awo amaatañ ikọ idem amọ, ayem ukpono anọ idem amọ, ado anye a-ayemme ukpono anọ awo a-akedọññọ anye, anye ado awo akpanikọ; inyʌññọ inie abiaaña ndomokeed.

¹⁹ Nte Moses ikinọọhọ ndufo ibed? Ado ndufo ndomokeed inịmme ibed ado! Ntak a-ndufo eyemme adinwot miin-e?”

²⁰ Atu awo ebọọrọ, “Afo amenie dimọn ke idem! Anie ayem aduwot?”

²¹ Yisọs amaabo ammọ ate, “Utịbe ñkpọ keed ke ñkenam ado afịd ndufo ekeba ke ñkpaidem.

²² Moses akibo ndufo enịm ayịn awodeen mboppo (idooho nte ke aketọọñọ ye Moses, ado aketọọñọ ye mme nsọbom), ndin ndufo enịm ayịn awodeen mboppo ke Sabad.

²³ Adieke ekemeke adinịm ayịn awodeen mboppo ke Sabad mbaak awo adibiad ibed Moses, ntak a-ndufo eyatta esịd ye ami naña nnam idem asọñ awo ke Sabad-a?

²⁴ Ndufo ikiibiire ikpe ikeene se ekịt ke anyen, yak ubiireikpe ndufo akeene se inen.”

Ubakka me Yisọs ado anie

²⁵ Idahado, usʌk mbon Yerusedem ekesʌk ebo, idooho awo e-eyemme adiwot ado ami?

²⁶ Ñkọ anye ado mi, asʌk atañ ikọ anwa-anwa, ndin awo inieeghe se etañ ye me enam anye! Nte ado akpanikọ ke ukara ebiire ebo ke anye ado Mesaya?

²⁷ Ado afịd ñnyịn imidiọọñọ nte anye ato, ado Mesaya amaadi, awo ndomokeed idiidiọọñọke nte anye ato.

²⁸ Ndin Yisọs, ke ini asʌkkọ akpeeb ñkpọ ke afe tembịd, amaabọñ ke akpọsọñ uyo ate: “Ih, emendiọọñọ miin, emenyʌñ ediọọñọ nte nto. Ado ami mbaaha mi ke adudu idem mmi, anye a-akendọññọ ado akpanikọ. Ndufo idiọọñọke anye,

²⁹ ado ami mmediọọñọ anye sia nnie uwem mmi nto ke anye, ñko ado anye akendọñ.”

³⁰ Ammọ emaeyem adimʌm anye idahado, ado sia ini amọ miikikemme, awo ndomokeed ikituuhọ anye.

³¹ Kpa ye ado, amaabañña uwak awo ke atu awo e-ekenịmme anye ke akpanikọ. Ammọ emaebo ete, “Mesaya amaadi, anye ayaanam idiọọñọ utịbe ñkpọ awak akan se awo ami anam?”

³² Ke ini mme Farisi emaekekop ke mme atu awo esʌk esuan utọ ikọ ami ebaña anye, mme ikpọ aku mme Farisi emaedọñ mme akpeme tembịd ete ekemʌm anye.

³³ Ndin Yisọs ate: “Ami mbiiba ye ndufo ke etək-etək ini, ndin ñyaatịmme mbịne anye a-akendọññọ.

³⁴ Ndufo eyaenyem ado idiiñkịtte; itie nte mba, ndufo idiikanna idi.”

³⁵ Anam mme Yuu ebịp idem ammọ ete, “Anye aduak ika uke nọ ñnyịn mmiidiikanna ikịt anye? Me anye adika mme asen idịd ibịne mbon ñnyịn ado emaekesuana ikidʌñ ke atu mme Krik nyʌñ ñkpeeb mbon Krik ñkpọ?

³⁶ Awuọọñọ so-o ke ini anye akebooho, ‘Ndufo eyaenyem ado idiiñkịtte, itie nte mba ndufo idiikanna idi?’ ”

³⁷ Ke akpatre ye ata ñkpon ñkan usen usọrọ ado, Yisọs amaada anyʌñatañ ke akpọsọñ uyo abo: “Adieke itọñ asatta awo, yak anye adi ambịne miin adinwọñ mmọọñ!

³⁸ Awo annịmme miin ke akpanikọ, nte ikọ Ñwed Abasi amaatatañ, idịm mmọọñ uwem ayaasakka ato esịd ammọ.”

³⁹ Anye aketañ ami abaña Sịbidịd a-mbon ekenịmme anye ke akpanikọ ekenaaha nte ebọ. Sia tutu akewuọ idahado awo ikinọọhọ awo ntekeed Sịbidịd dion, sia Yisọs ikidʌkkọ ubọọñ amọ dion.

⁴⁰ Ndusʌk mbon e-ekekpañña utọñ ekop se anye atañ emaebo ete, “Ke akpanikọ awo ami ado Brọfed.”

⁴¹ Ado ndusʌk ete, “Anye ado Mesaya.” Kpa ye ado ubaak awo emaebịp, “Nte Mesaya akeme ito Kadidi?

⁴² Nte ikọ Abasi ibooho ke Mesaya adiito ubon Defid anyʌñ ato abio Betrehem, idʌñ a-Defid akedʌññọ?”

⁴³ Ke ntodo, mme awo ikikanna inie ndukoppo ibaña anye.

⁴⁴ Ubaak awo ekpaekeyem imʌm anye, ado awo ndomokeed ikituuhọ anye.

Unana mbuọdidem mme ñkpisọñ Yuu

⁴⁵ Ke akpatre mme akpeme tembịd emaetịmme ebịne mme ikpọ aku ye mme Farisi e-ekekeboho ammọ ete, “Ntak a-ndufo mmiikimʌmmọ anye idi-e?”

⁴⁶ Mme akpeme tembịd emaebọọrọ ete, “Akenanam awo ntekeed itañña ikọ ke utọ usʌñ Ete ami atañña.”

⁴⁷ Mme Farisi ebọọrọ ate, “Awuọñọ anye anyʌñ itịn ndufo usʌñ ñko?

⁴⁸ Aba awo ke atu ukara mme Farisi e-enịmme anye ke akpanikọ?

⁴⁹ Iyo! Sʌk mme eboi atu awo e-emiidiọọñọke ñkpọ ndomokeed ibaña ibed, isuuñọ asịm ammọ.”

⁵⁰ Keed ke atu ammọ, Nikodimọs, kpa ukem awo a-amaakekaka ibịne Yisọs, amaabịp ammọ ate,

⁵¹ “Ibed ñnyịn ayak ñnyịn ibiire ikpe inọ awo ke ini ñnyịn mmiibemme iso ikpañ utọñ inọ awo ado, inyʌñ idiọọñọ se anye anam?”

⁵² Ke ami ammọ ebọọrọ ete, “Afo ñko anyʌñ ado awo Kadidi? Duuñọ ñkpọ ami ke idem mfo se: ndin ayaakịt abo ke brọfed isitooho Kadidi.” [Mme uwak ñwed emaekememịñ ye mme ntiense esed inieehe mme ufañ usʌkkeed tutu asịm edịb Yọn 7:53–8:11.]

⁵³ Afịd ammọ emaedaaña enyọñ.