Yọọn 21 - Ñwed Abasi Ke Ikọ Ibibio Ayo Mfịn

Yisọs ye utịbe umʌm iyak

¹ Mme ñkpọ ami emaekeboiyo, Yisọs amaatịmme awọt mbed amọ idem ke mben inyañ Kadidi; ndin naña anye akewọt idem akedo ntom:

² Saimọn Bita, Tọmọs (e-ekesikoodo Didimọs), mme Natanied ayịn Kena ke Kadidi, mme nditọ Sebidi, ye mbed amọ iba mfen, ekeba ke itie keed.

³ Saimọn Bita amaabo ammọ ate, “Ñyaaka ñkekọ iyak.” Ammọ ete anye, “Ñnyịn iyaukeene ika.” Ammọ emaedaaña ekedọñọ ubom, ado ke afịd akoneyo ado ammọ ikimʌmmọ iyak ndomokeed.

⁴ Ke ayo amaakesiere, ammọ emaekịt Yisọs naña ada do ke esʌk, ado mbed ado ikidiọọñọke ibo ke Yisọs ke ado.

⁵ Yisọs amaabịp ammọ, “Mme ufan mmi, ndufo imʌmmọ iyak ndomokeed?” Ammọ ebọọrọ, “Iyo-o.”

⁶ Anye amaabo ammọ ate, “Iduọọk iyịre ke ubọk nnasia ubom ke eyaemʌm iyak.” Ammọ ekeduọọk iyịre naña Yisọs aketemme, emaemʌm ata uwak iyak tutu ammọ ikikanna itap iyịre isịn ke ubom.

⁷ Ami akenam nọ mbed a-Yisọs akemaaha abo Bita, “Abọọñ ke ado!” Saimọn Bita akekop naña anye abo, “Abọọñ ke ado,” anye amaatap afọñ afʌk idem (sia anye amaakpọk afọñ akebet ke isịn), atamma adʌk mmọọñ.

⁸ Mbed mbon ñko emaewat ke ubom, edʌt iyịre iyak ebịne, sia ammọ ikinyọọñọ usʌñ ikpọñ esʌk, akedo ñkpọ nte yaad ikie adiwuọ abod.

⁹ Ammọ ekedibeghe ke isọñ, emaekịt ikañ ukañ naña aduek, iyak mme uyo enyʌñ edoro do.

¹⁰ Ndin Yisọs amaabo ammọ, “Iben usʌk iyak a-ndufo esʌkkọ emʌm idi.”

¹¹ Saimọn Bita amaatịmme akedʌk ubom, adʌt iyịre ye iyak adi abod. Ke ammọ ebatta, emaekịt ikpọ-ikpọ iyak ikie ye aba ye duob ye ita, ado iyịre ikikịppeke.

¹² Yisọs amaakood ammọ ate, “Idi ididia ndidia ubakusen.” Mbed amọ ndomokeed ikideehede ibịp anye, “Afo ado anie awo?” Sia emaenekke ediọọñọ ke Abọọñ ke akedo.

¹³ Yisọs amaadi, adiben uyo anọ ammọ, anyʌñ anam ukem ntodo mme iyak.

¹⁴ Ami akedo ayọhọ ukpa ita a-Yisọs akewọttọ mbed amọ idem tọọñọ nte ekenam anye aset ke ñkpa.

Yisọs anọ Bita ayọhọ itie amọ

¹⁵ Ke ammọ emaekedia ñkpọ ema, Yisọs amaabịp Saimọn Bita ate: “Saimọn, ayịn Yọọn, nte afo amemma miin akan afịd mbon ami?” Bita ate anye, “Ih Abọọñ, afo amediọọñọ ke ami mmuma fiin.” Yisọs ate anye, “Bọọk mme edọñ mmi!”

¹⁶ Yisọs amaatịmme abo, “Saimọn, ayịn Yọọn, nte afo amemma miin.” Anye amaabọọrọ, “Ih Abọọñ, afo amediọọñọ ke mmuma fiin.” Yisọs ate anye, “Kpeme mme edọñ mmi.”

¹⁷ Anye atịmme abịp ayọhọ ukpa ita ate, “Saimọn, ayịn Yọọn, nte afo amemma miin?” Bita amaatọhọ sia Yisọs akebịp anye mbịme ami ayọhọ akañ ita ate, “Nte afo amemma miin?” Anye ndin amaabo Yisọs ate, “Abọọñ, afo amediọọñọ ukeed-ukeed ñkpọ; afo amediọọñọ ke ami mmuma fiin.” Yisọs ate anye, “Bọọk edọñ mmi.

¹⁸ Ke ataa akpanikọ ke ami ntañ unọọ, idaha a-afo akedooho akparawa, afo akesibọbọ mbọbọ idem mfo anyʌñ asaña aka itie nte afo ama; ado naña afo umausọñ uduusunyanyan ubọk, ndin awo mfen usịn afọn, anyʌñ uben fiin aka itie nte afo uduumaaha.”

¹⁹ Yisọs aketañ ami adiwọt utọ ñkpa a-Bita adidat inọ Abasi ubọọñ. Akema, Yisọs amaabo anye ate anye, “Ñkeene miin!”

²⁰ Bita akewọññọ iso, akịt mbed a-Yisọs akemaaha naña akeene ammọ. (Mbed ami ado anye a-akenyʌkkọke abere Yisọs ke ini akpatre ndidia ndubi, anyʌñ abịp Yisọs mbịme abo, “Abọọñ, anie ado awo a-aduutap fiin?”)

²¹ Bita akekịt anye, amaabịp Yisọs abo ate: “Abọọñ, ake amọ adiiba die?”

²² Yisọs ate anye, “Adieke adooho uduak mmi adibo anye adu uwem tutu ami ntịmme ndi, ado ubeghe die fiin? Ana afo añkeene miin.”

²³ Ibọọrọ ami akenam mbʌk asuana ke atu mme andinịm ke akpanikọ, ebo ke mbed ado idiikpaaha ñkpa. Ado Yisọs ikibooho ke mbed ado idiikpaaha ñkpa. Ado anye akebo, “Adieke ami mbooho anye adu uwem tutu ami ntịmme ndi, ado ubeghe die fiin?”

²⁴ Mbed ami ado anye a-atieeghe ntiense abaña mme ñkpọ ami, a-akenyʌññọ awet mme ñkpọ ami anịm. Ñnyịn imidiọọñọ ke se anye akewet ado akpanikọ.

²⁵ Yisọs amaanam mme uwak ñkpọ mfen ñko. Ekpebiiwewet afịd mme ñkpọ ado idọñ ke ñwed, ñkere mbo ke idem ederimbod ami ikpidọñọke mme ñwed se ekpewet.