Yọọn 15 - Ñwed Abasi Ke Ikọ Ibibio Ayo Mfịn

Eto fain ye mme ñkọk

¹ “Ami ndo ata eto fain, Ete mmi ado atọ inwañ.

² Anye akpịkke afịd ñkọk ke idem mmi ammiinwịmme mfịd, ado afịd ñkọk se inwịm mfịd anye atʌm adiọñ nọ anenekke anwịm uwak mfịd.

³ Ndufo emesana ke ntak ikọ a-ami ñketañña inọ ndufo.

⁴ Indʌñ miin ke idem, nte a-ami idʌññọ ndufo ke idem. Ñkọk ndomokeed ikemeke adinwịm mfịd ke idem amọ, ibọhọke anye ayịre ke fain. Ndufo ñko idiikanna inwịm mfịd ibọhọke endʌñ miin ke idem.

⁵ “Ami ndo eto fain, ndufo edo mme ñkọk. Awo akpedʌñ ke ami, ami ñnyʌñ ndʌñ ke anye, anye ayaanwịm uwak mfịd; ekpensio miin efep ndufo idiikanna inam ñkpọ bene keed.

⁶ Awo keed ake adodo a-mmiidʌññọ ke ami aba nte ñkọk e-ekpịkkeke nọ ana asaad, e-ekoonoke mme utọ ñkọk ado etop edọñ ke ikañ enyʌñ efọọmọ.

⁷ Ndufo ekpedʌñ ke ami ndin ikọ mmi isịne ndufo ke idem, ibịp se eyeyem ke eyainọ ndufo.

⁸ Ubọọñ Ete mmi ado ami, ete ndufo enwịm uwak mfịd, ke adiwọt idem ndufo nte mme mbed mmi.

⁹ “Nte Ete mmi ammaagha miin, kpa ntodo ke ami ima ndufo, ndin edʌñ ke ima mmi.

¹⁰ Ndufo ekpenịm ibed mmi, eyaedʌñ ke ima mmi, kpa naña ami nnịm ibed Ete mmi ñnyʌñ mba ke ima amọ.

¹¹ Mmetañ ami inọ ndufo ma idaara mmi aba ye ndufo, ñko nọ idaara ndufo anyʌñ ayọhọ.

¹² Ibed mmi ado ami: ima keed aken naña ami ima ndufo.

¹³ Awo ndomokeed inieeghe ima a-akponno akan anye ami anye aduọhọ uwem amọ ke ntak mme ufan amọ.

¹⁴ Ndufo edo mme ufan mmi ekpenam se mbo ndufo enam.

¹⁵ Ami ikoodo ndufo nditọufọk mmi aba sia ayịnufọk idiọọñọke ndubeghe eteufọk. Ado ami ikood ndufo mme ufan mmi, sia ami mmenam ndufo ediọọñọ afịd ñkpọ se ñkekpeeb nto Ete mmi.

¹⁶ Ndufo ikimmekke miin, ado ami ñkimek ndufo nte eka enyʌñ enwịm mfịd, mfịd a-adiikpeene, ndin Ete ayainọ se ebeeñe ke anyịñ mmi.

¹⁷ Ibed mmi ado: Ima keed aken.”

Ederimbod esua mme mbed

¹⁸ “Ederimbod akpisua ndufo idiọọñọ ibo ke ederimbod amaatoto insua miin.

¹⁹ Akpedo ndufo ekedo ake ederimbod, ederimbod akpaima ndufo nte ake amọ. Nte abaaha ntom, ndufo idooho ake ederimbod, ado ami mmimek ndufo nsio ke ederimbod. Ado anam ederimbod isua ndufo.

²⁰ Itoiyo ikọ ami ñketañña inọ ndufo: ‘Ayịnufọk ikponno ikan eteufọk.’ Adieke ammọ ekeñkọbọke miin, ammọ eyaikọbọ ndufo ñkọ. Adieke ammọ ekekpañña utọñ enọ ikọ mmi, ammọ eyaekpañ utọñ inọ ndufo ñko.

²¹ Ammọ ediinam ntom mme ndufo ke ntak anyịñ mmi sia ammọ idiọọñọke andikindọñ miin.

²² Akpedo ami ñkedieeghe nditañ nnọ ammọ, ammọ ikpinieeghe ubiom ikpe; ado idahami, ammọ inieeghe ntak ntreutọñ idiọọkñkpọ ammọ.

²³ Awo a-ansuaha miin asua Ete mmi ñko.

²⁴ Akpedo ami ñkenamma ke ufọọd ammọ se awo mfen mmiikinamma, ammọ ikpinieeghe ubiom ikpe. Ado naña aba ami, ammọ ekịt mme utịbe ñkpọ ami ado ammọ esʌk ensuasua miin ye Ete mmi.

²⁵ Ado ami ado adinam nọ se ekewet ke Ibed ammọ asu: ‘Ammọ ekensua miin ke unana ntak.’ ”

Utom Adisana Sịbidịd

²⁶ “Adọñ awo esịd amaadi, a-ami ndibọ Ete nnọ isọk ndufo, Sịbidịd akpanikọ a-atooho Ete, anye ayaatie ntiense ambaña miin.

²⁷ Ndufo ñko anaetie ntiense embaña miin sia ndufo emeba ye ami tọọñọ ke aditọọñọ.”