Yọọn 14 - Ñwed Abasi Ke Ikọ Ibibio Ayo Mfịn

Yisọs adọñ mbed amọ esịd

¹ “Ikiiyak esịd ndufo atịmede. Ndufo emenịm Abasi ke akpanikọ; innịm miin ñko ke akpanikọ.

² Ke ufọk Ete mmi umiañ ubeed ebañña; miikpidooho ntodo, ami ñkpaakidọkkọ ndufo.

³ Ami ñka adikitʌm itie inọ-ọ ndufo, ami ñyaatịmme ndi ndiben ndufo nnọ idem mmi, nọ ndufo eba mme Ami ke itie nte ami mba.

⁴ Ndufo emediọọñọ usʌñ itie a-ami ñkaaha.”

Yisọs ado usʌñ adika mbịne Ete

⁵ Tọmọs amaabo anye ate, “Abọọñ, ñnyịn idiọọñọke nte afo aka, ndin ñnyịn idiinam die idiọọñọ usʌñ ami?”

⁶ Ndin Yisọs amaabọọrọ: “Ami ndo usʌñ, mme akpanikọ mme uwem. Awo ndomokeed idieghe ibịne Ete ibọhọke anto miin.

⁷ Adieke ndufo endiọọñọke miin, eyaediọọñọ Ete mmi ñko. Tọọñọ ke idahami ndufo emediọọñọ anye enyʌñ ekịt anye.”

⁸ Fidib amaabo, “Abọọñ, iwọt ñnyịn Ete, ndin ñnyịn iyaiyʌkkọ.”

⁹ Yisọs amaabo ate, “Nte ami mmekeme iba ye ndufo afịd anyan ini ami, Fidib, ndin afo usʌkkọ undiọọñọ miin? Awo ake adodo añkịtte miin akịd Ete, ndin ndufo ekeme die adibo, ‘Iwọt ñnyịn Ete’?

¹⁰ Nte ndufo inịmme ke ami mba ke Ete, Ete aba ñko ke ami? Se ami ntañ inọ ndufo intooho miin. Ado Ete a-andʌññọ miin ke idem anam utom amọ.

¹¹ Innịm miin ke akpanikọ, ami mmaibo ke mba ke Ete, Ete aba ñko ke ami, mmiidooho ntodo inịm ito ke mme ikpọ utịbe ñkpọ a-ndufo ekiide.

¹² Ke ata akpanikọ ami ntañ inọ ndufo, awo ake adodo annịmme miin ke akpanikọ ayaanam mme ukem utom a-ami nnamma mi, ayaanyʌñ ananam akan ami, sia ami ñka mbịne Ete.

¹³ Se idodo a-ndufo ebeeñeke ke anyịñ mmi ñyaanam, ma Ete abọ itooro ato ke Ayịn.

¹⁴ Adieke ndufo ebeeñeke ñkpọ ake adodo ke anyịñ mmi, ami ñyaanam.”

Yisọs anwọñọ adinọ Adisana Sịbidịd

¹⁵ “Akpedo ndufo ememma miin, inịm mme ibed mmi.

¹⁶ Ami ñyaabeeñe Ete, ndin anye ayainọ ndufo idọñesịd mfen adiba mme ndufo ke nsi-nsi,

¹⁷ Sịbidịd akpanikọ. Ederimbod idiiyemme anye sia ammọ idiọọñọke inyʌññọ ikịt anye. Ado ndufo emediọọñọ anye, sia anye adʌñ ke idem ndufo, anye adiiba ye ndufo ñko.

¹⁸ Ami ndiikpọññọ ndufo nte nditọ akpa; ami ñyaadi ibịne ndufo.

¹⁹ Ke etək ini, ederimbod idiiñkịtte miin aba, ado ndufo eyaeñkịt. Sia ami mmedu uwem ndin ndufo ñko eyaedu uwem.

²⁰ Ke usen ado ndufo eyaediọọñọ ke ami mba ke Ete, kpa naña ndufo eba ke ami, ami ñko mba ke ndufo.

²¹ Awo ake adodo a-abọọhọ mme ibed mmi anyʌñ anịm ammọ, anye ado ado andimma miin. Awo a-amaaha miin, Ete mmi ayaama anye, ndin ami ñyaama anye ñnyʌñ ñyaara idem mmi nnọ anye.”

²² Akem Yudas, (idooho Yudas Iskariọd) abo anye, “Abọọñ, nso-o ido yak afo aduak adiwọt ñnyịn idem mfo ado uwọttọ ederimbod?”

²³ Yisọs amaabọọrọ ate, “Awo a-amaaha miin ayaanam ukpeeb ñkpo mmi, ndin Ete mmi ayaama anye ndin ñnyịn iyaidi ibịne anye inyʌñ idʌñ mme anye.

²⁴ Awo a-mmiimmaaha miin idiinịmme uyo mmi. Ikọ a-ndufo ekoppo mi idooho ake mmi; ado ikọ e-Ete a-akendọññọ miin.

²⁵ “Ami mmetañ mme ñkpọ ami inọ ndufo ke ini nsʌkkọ mba mi mme ndufo;

²⁶ Ado Idọñesịd, Adisana Sịbidịd, e-Ete adidọñ ke anyịñ mmi ayaikpeeb ndufo afịd ñkpọ anyʌñ itoiyo ndufo afịd se ami ntañ inọ ndufo.

²⁷ Emem ke ami ñkpọñ inọ ndufo; emem mmi ke ami inọ ndufo. Ami inọọhọ ndufo naña ederimbod inọọ. Ikiiyak esịd ndufo etịmede, ikiinyʌñ inyeñ idem.

²⁸ “Ndufo emekop nte ami mbo: ‘Ami ñyaikpọñ, ñyaanyʌñ ntịmme ndi.’ Akpedo ndufo emaemma miin, esịd akpainem ndufo ke ñka mbịne Ete, sia Ete akpon añkan miin.

²⁹ Ami mmidọkkọ ndufo idahami, mbemiso ñkpọ ami adat itie, ndin amaatịppe ndufo eyaennịm ke akpanikọ.

³⁰ Ami ndiitañña uwak ikọ ye ndufo ñkan ado aba sia idiọọk adidem ederimbod ami asʌk adi. Anye inieeghe adudu ke idem mmi,

³¹ ado anye adi ma ederimbod ediọọñọ ebo ke ami mmema Ete ñnyʌñ nnam se Ete mmi andọñ ami nnam. “Ndufo idi ndin, yak ñnyịn ika.”