Yemsi 4 - Ñwed Abasi Ke Ikọ Ibibio Ayo Mfịn

Esuuk idem ndufo inọ Abasi

¹ Nso-o ñkpọ isịn mme anwan ye utọk ami ke otu ndufo? Nte ammọ itooho mme udọñ ndufo enwanake ke idem ndufo?

² Ndufo eyem ñkpọ ado inieeghe. Ndufo ewot awo enyʌñ e-esịn anyen, ado ikanna inie se eyem. Ndufo e-etọhọ enyʌñ enwana anwan. Ndufo inieeghe, sia ndufo ibịppe Abasi.

³ Ke ini ndufo ebịppe, ndufo ibọọhọ, sia ndufo ebịp mme idiọọk ntak, nọ ebiad se ndufo enie ke udọñ abʌkidem ndufo.

⁴ Ndufo mme esịn efịbe, ado nte ndufo idiọọñọke ke ufan mme ederimbod ado usua ke ñkañ Abasi?

⁵ Nte ndufo ekere ke ikọ Abasi atañ ke unana ntak abo ke Sịbidịd a-anye anamma adʌñ ke idem ñnyịn a-afịp ufịp akpọsọñ?

⁶ Ado anye inọ ñnyịn uwak mfọn. Ado ado ntak ikọ Abasi abooho: “Abasi abiọọñọ mme mbon ntañidem ado anọ mbon e-esuuk idem mfọn.”

⁷ Isuuk idem ndufo ndin inọ Abasi. Ibiọọñọ andidiọọk, ndin anye ayaafeghe ikpọọñ ndufo.

⁸ Esaña ekpere Abasi ndin anye ayaasaña ikpere ndufo. Eyie ubọk ndufo, ndufo mme anam idiọọk, ndin enam esịd ndufo asana, ndufo mme enie esịd iba.

⁹ Etua, efʌhọ, enyʌñ etie ikpo. Ekpəghọ imam ndufo esịn ke mfʌhọ.

¹⁰ Isuuk idem ndufo ke iso Abọọñ, ndin anye ayaibenne ndufo ke anyọñ.

¹¹ Nditọete, ikiibiad keed aken anyịñ. Awo keed ake adodo a-atañña ikọ abaña ayịnete amọ me abiom anye ikpe, anye abiad ibed ikọ anyʌñ akpe ibed. Ke ini afo akpeeghe ikpe, afo unịmme ibed ado, afo aditie ke ubiire ikpe.

¹² Anọ ibed ye Andikpe ikpe keed kpọd aba, adooho anye a-akemeke adinyaaña ñnyʌñ nsobo. Ado afo ado anie adibieere ikpe nnọọ mbọhọidʌñ mfo?

Adinam inua mbaña ñkpọñ

¹³ Idahami, ikpañ utọñ, ndufo e-ebooho, “Mfịn ami mme ñkpọñ ñnyịn iyaikaa abio ami me ako, ikitie isuakeed ke udo, inam ndubeghe inyʌñ inwana akʌk.”

¹⁴ Ntaha, ndufo idiọọñọke se idiitịppe ñkpọñ. Nso-o ido uwem mfo? Afo ado ntəkube a-awuọọhọ ke etək ini, ndin asop.

¹⁵ Utu ke ado, akpena afo akap abo, “Akpedo uduak Abọọñ, ñnyịn iyaidu uwem ndin iyainam ami me ako.”

¹⁶ Daña aba ami, ndufo enam inua enyʌñ ewọk ñwọọk. Afịd nnaminua ado ado idiọọkñkpọ.

¹⁷ Awo keed ndin ake adodo a-adiọọñọke eti ñkpọ a-anye akpenamma, ndin anye inamma, anam idiọọkñkpọ.