Yemsi 3 - Ñwed Abasi Ke Ikọ Ibibio Ayo Mfịn

Adikpeme edeme

¹ Idooho uwak ndufo ekpena edat idem nte mme andikpeeb, mme andinịm Abasi ke akpanikọ, sia ndufo emediọọñọ ke eyaekpe ikpe ñnyịn mme andikpeeb ke akpọsọñ usʌñ.

² Afịd ñnyịn imiduọ ke uwak usʌñ. Adieke awo ndomokeed ake adodo mmiinamma ndudue ke se anye atañ anye ado awo afọnnọ ama, a-akemekke adinie mfadidem.

³ Ke ini ñnyịn imaidọñ ntək ukwak ke inua enañ mbakara adinam ammọ ekop uyo ñnyịn, ñnyịn imikeme adiwọññọ afịd enañ naña ñnyịn ima.

⁴ Dat nsʌñikañ ñko nte uwọd-ñkpọ. Akpesʌk ado naña ammọ ekponno ndin enyʌñ ewat ammọ ke mme akpọsọñ afịm, ewat ammọ ke ata etək ubọkubom, itie adohodo ake andiwad ayemme anye aka.

⁵ Ntodo ñko edeme ado etək-etək ke idem, ado anye anam ekamba ñwọkinua. Kere naña edat etək ebəkikañ esịn akwa ikañ ke akwa akai

⁶ Edeme ñko ado ikañ, ederimbod idiọọkñkpọ ke atu mme ndido idem. Anye abiad afịd idem awo, asịn ke afịd usʌñ uwem naña anye asaña, ndin anye ñko atañ ikañ ake itie nsi-nsi ufen asịn idem amọ.

⁷ Afịd uduod unam, inuen, unam ake anyọnọyọọn, afịd unam se Abasi abot esịneke ke mmọọñ ebañña usʌk-usʌk, awo anyʌñ anam ammọ ebañña usʌk-usʌk.

⁸ Ado awo ba keed ikemmeke adinam edeme aba usʌk-usʌk. Anye ado idiọọkñkpọ ammiinieeghe nduọkadudu, ayọhọ mme ata akpọsọñ ibọk ñkpa.

⁹ Ñnyịn idat edeme itooro Abọọñ ye Ete ñnyịn, inyʌñ idat anye ñko isueñ mme awo, e-enamma ke mbiet Abasi.

¹⁰ Ato kpa ke inua ado ke itooro awuọ mme nsueñ. Mme nditọete mmi, ikpinaaha ado ntodo.

¹¹ Me nsasana mmọọñ ye mmọọñ inʌñ ekeme ediwuọñọ ke idịm keed?

¹² Mme nditọete mmi, nte eto fik akeme inwịm ọdif, me eto sokoro akeme inwịm fik? Ntodo ñko, idịm mmọọñ inʌñ ikemeke adisio adisana mmọọñ.

Utọ ifiọk iba

¹³ Anie awo inie ifiọk, ñkpọ anyʌñ anwaña anye ke atu ndufo? Yak anye awọd ami ke eti uwem amọ, ke adinam ñkpọ ke nsuukidem a-atooho ke ifiọk.

¹⁴ Ado adieke afo esịnne ndod-ndod usua mme uyem ñkpọ ikpọọñ ke adudu, ye udọñ ikpọ ñkpọ ke esịd ndufo, ikiinam inua ibaña anye, ikiinyʌñ isịn akpanikọ.

¹⁵ Uto “Ifiọk” ado itooho anyọñ isọiyọ idi, ado ado ake isọñ idooho ake Sịbidịd, ado ake dimọn.

¹⁶ Sia itie ake ufịb ye udọñ adidia ñkpọ ikpọọñ abaaha, do ke afo uduukịt ndutịmme ye mme akpaimọ idiọọk edu uwem.

¹⁷ Ado ifiọk a-atooho abio ubọọñ Abasi isịneke ndek ke akpa itie; ndin ama emem, anie akikere, asuuk idem, ayọhọ mme mbọm ye nti mfịd, idaaha ñkañ keed ndin anana abiaaña ñko.

¹⁸ Mme anam emem e-etọọhọ ñkpasịp ke emem edọk idọk mfịd edinen uwem.