Yemsi 2 - Ñwed Abasi Ke Ikọ Ibibio Ayo Mfịn

Ekpan adusad

¹ Nditọete mmi, nte mbon enịmme Abasi ke akpanikọ enieeghe mbuọdidem ke akpakịp mfọn Abọọñ Yisọs Krais ekiinam adusad.

² Ndusʌk ini awo a-asịneke ñkpannuun kood mme uyaiya-uyaiya afọñ adʌk adi itie mbono ndufo, ndin uwueene awo mme ntaha-ntaha afọñ ñko adʌk adi.

³ Adieke ndufo ewọttọ ekamba ukpono enọ awo a-asịneke uyaiya afọñ enyʌñ ebo, “Se eti itie mfo mi,” ado ebo uwueene awo, “Afo da do,” me “Tie ke isọñ ami ke mben ukod mmi,”

⁴ nte ndufo isịnne adusad ke atu idem ndufo ndin enyʌñ akpeikpe ke ukwañ akikere?

⁵ Ikpañ utọñ, mme ndima nditọete: Nte Abasi imekke mbon edoññoke uweene ke anyen ederimbod nọ edido imọ ke mbuọdidem enyʌñ edinie abio ubọọñ a-anye akenwọñọke anọ mbon e-emaaha anye?

⁶ Ado ndufo ememiom mme uwueene. Idooho mme imọ awo itʌk ndufo? Idooho ammọ iben ndufo ekaiya ikpe ke esob?

⁷ Idooho ammọ edoñño mme andibiad anyịñ ubọọñ i-inieeghe ndufo.

⁸ Adieke ndufo etʌmmọ enịm ibed ubọọñ e-ekịtte ke ikọ Abasi, “Ma mbọhọidʌñ mfo nte idem mfo,” afo anam se ido adinen.

⁹ Ado adieke ndufo ewọttọ adusad, ndufo enam idiọọkñkpọ ndin enyʌñ ebiom ndufo ikpe nte mme abiad ibed.

¹⁰ Sia awo adohodo ake anịmme afịd ibed ndin akpu ke keed aduọ ke ubiom ikpe adibiad afịd ammọ.

¹¹ Sia andikibo, “Kuusịn efịbe,” anyʌñ abo, “Kuuwot awo.” Adieke afo mmuusịnne efịbe ado awọt awo afo ado abiad ibed.

¹² Etañ ikọ enyʌñ enam ñkpọ nte mbon e-ediida ke iso ikpe a-asiooho awo ke ufʌn.

¹³ Sia eyaewot ubiire ikpe ke unana mbọm enọ awo ammiikinieeghe mbọm. Mbọm akan ubiire ikpe!

Mbuọdidem ye adinam

¹⁴ Nso ido ufọn, nditọete mmi, adieke awo abooho ke iminie mbuọdidem ado inieeghe adinam ñkpọ ndomokeed? Nte utọ mbuọdidem ado a-akeme inyaaña ammọ?

¹⁵ Kere ise mme nte ayịnete awodeen me awonwaan a-mmiinieeghe afọñ se asịne me ndidia se adia afịd usen.

¹⁶ Adieke keed ke atu ndufo abooho anye, “Tʌm saña ke emem, sọñ idem; nam idem mfo afiop, ndin dia ñkpọ eti-eti,” ado inamma ñkpọ ndomokeed ibaña mme unana ake ikpọkidem ammọ, ado aba nso-o ufọn?

¹⁷ Ke ukem usʌñ ami, mbuọdidem ke idem amọ, adieke mmiisañake mme adinam, a-akpa.

¹⁸ Ado awo ayaabo, “Afo amenie mbuọdidem; ami mmenie utom.” Ñwọt miin mbuọdidem mfo ammiinieeghe utom, ndin ami ñyauwọt fiin mbuọdidem mmi ato ke se ami nnam.

¹⁹ Afo amenịm abo ke Abasi keed aba. Afọn! Ukem-ukem ado ñko ndiọi sịbidịd enịm ado ndin ekpaaña nsa.

²⁰ Afo ndisịme awo, ayem idiọọñọ a-awọttọ ke mbuọdidem a-ammiinieeghe utom ado ikpu-ikpu?

²¹ Nte awo ikikereke ibo ke ete ñnyịn Ebraham amaanen ke se anye akenam ke ini anye akekaaha iwa ayịn amọ Aisik ke itie uwa?

²² Ndufo emekịt ebo ke mbuọdidem amọ ye mme adinam amọ ekesaña ukem-ukem, ndin mbuọdidem amọ amaayọhọ ke se anye akenam.

²³ Ndin se ekewet ke ñwed Abasi akekem, a-abooho, “Ebraham amaanịm Abasi ke akpanikọ, ekebatta enọ anye nte adinenido,” enyʌñ ekood anye ufan Abasi.

²⁴ Ndufo emekịt ke awo anen ato ke se anye anam, itooho ke mbuọdidem ikpọọñ.

²⁵ Ke ukem usʌñ ado, nte awo ikikereke ibo ke kpa Rehab awonwaan akpara amaanen ntodo ke se anye akenam ke ini a-anye akenọọhọ mme isʌñutom ado itie ena ndin asio ammọ unyọñ ke usʌñ mfen.

²⁶ Kpa naña abʌkidem a-ananake sịbidịd akpa, ntodo ñko ke mbuọdidem a-miisañake mme utom akpa.