Utom 4 - Ñwed Abasi Ke Ikọ Ibibio Ayo Mfịn

Bita ye Yọọn ke esop Sanhedrin

¹ Ndin ke ini Bita ye Yọọn esʌkkọ etañ ikọ enọ mme awo, mme aku ye adaiso mme akpeme tembịd, ye mme Sadusi, emaesaña ekpere ammọ.

² Ukpeebñkpọ a-abañake adised ke ñkpa ke anyịñ Yisọs a-mme abọsịd ekekwọrọke amaafịna mme aku ye mme Sadusi.

³ Ado amaanam mme aku ye mme akpeme tembịd, ye mme Sadusi emaemʌm Bita ye Yọọn etop esịn ke ufọk ñkpakọb tutu asịm edem usen, sia akedooho ndubi.

⁴ Ado umiaañ mbon e-ekekoppo etob ado emaenịm ke akpanikọ, ado amaanam ndin ibad awo emaesịm ñkpọ nte tọsịn ition.

⁵ Edem usen, mme adaukara, mme mbọọñ, ye mme akpeeb ibed emaesoobo ke Yerusedem.

⁶ Anas ekamba aku, ye Kaifas, ye Yọọn ye Adeksanda, ye afịd mbon se ikito ufọk akwa aku emaebañña do ñko.

⁷ Ammọ emaeben Bita ye Yọọn edi ke iso ammọ enyʌñ etọọñọ adibịp ammọ mbịme: “Ke nso-o utọ adudu, ye ke anyịñ anie ke ndufo ekenam afịd ami?”

⁸ Ndin Bita, a-amaakeyọhọ ye Adisana Sịbidịd, amaabo ammọ ate: “Mme andikara abio ye mme mbọọñ ke Isred!

⁹ Adieke ibịppe ñnyịn mbịme mfịn ami ebaña eti utom i-ikinamma inọ awo mbʌñọ enyʌñ ebịp naña anye akesaña abọ nsọñidem,

¹⁰ afịd ndufo, ye afịd ufọk Isred, idiọọñọ ami: ite ke ato anyịñ Yisọs Krais ake Nasared, a-ndufo ekekọññọ ewot ke eto krọs, a-Abasi akenamma aset ke ñkpa, ke awo ami anie nsọñidem, a-adaaha mi ke iso ndufo.

¹¹ Yisọs ado “ ‘itiad a-ndufo mme abọbufọk ekesịnne, a-adikappake ado akpan itiad inuuk.’

¹² Adinyaaña ibaaha ke awo mfen ndomokeed, sia anyịñ ndomokeed mfen ibaaha ke idak ikpaanyọñ e-enọọhọ uduudawo, a-anaaha ñnyịn ibọ adinyaaña ito.”

¹³ Ke ini ammọ ekekịtte uko Bita ye Yọọn, enyʌñ ediọọñọ ke ammọ ikikaaha ñwed, ado ammọ ekedo mme ñkaña awo, idem amaakpa ammọ, ammọ enyʌñ ediọọñọ ke mme awo ami emaeba ye Yisọs.

¹⁴ Ndin sia ammọ emaekekịt awo a-akebọọhọ nsọñidem nte asʌk ada ye ammọ, uyo ikibaaha ammọ aba ke itọñ.

¹⁵ Ke ammọ emaekenọ uyo ete yak Bita ye Yọọn ekpọñ atu mbono esob Sanhidrin ekeba ke anwa, ammọ emaenie nneme ammọ-ammọ.

¹⁶ Ammọ emaebịp idem ammọ mbịme ete, “Nso-o ke ñnyịn ikpinam ye mbon ami? Afịd awo se idʌñ ke Yerusedem ediọọñọ ete ke ammọ enam ata ekamba utom idiọọñọ, ndin ñnyịn idiikanna ifaaña.

¹⁷ Ado mbaak itre ñkpọ ami adika iso nsuana nsịm afịd mme awo idem, ana ñnyịn ikpan ammọ ite yak ammọ keemaana etañ ikọ aba enọ awo keed ake adodo ke anyịñ ami.”

¹⁸ Ndin ammọ ekema, emaemaana ekood Bita ye Yọọn ebo edʌk edi esob, enyʌñ ewuuk ammọ ete keetañ ikọ, keenyʌñ ekpeeb ñkpọ ndomokeed ke anyịñ Yisọs.

¹⁹ Ado Bita ye Yọọn emaebọọrọ ammọ ebo ete, “Itʌm ibiire ke idem ndufo ise me afọn ke iso Abasi adikop uyo ndufo ñkan uyo Abasi.

²⁰ Sia ñnyịn idiikanna itre aditañ mbaña se ñnyịn ikikịt inyʌñ ikop.”

²¹ Ke emaekemaana idịkke ammọ uwem, emaesaana ammọ eyaak. Esob Ikpaisọñ mme Yuu ikikanna ibiire se ufen ekpenọ ammọ, sia adooho afịd awo ekesʌk etooro Abasi ke se ikittịppe.

²² Ñko awo a-akebọọhọ utịbe-utịbe ukọk udọñọ ami amaabọhọ isua aba ke emana.

Mme andinịm ke akpanikọ ebọñ akam

²³ Ke emaekesaana ammọ iyaak, Bita ye Yọọn emaenyọñ ebịne mbon ammọ (mme ikọd Abasi) enyʌñ eketañ enọ ammọ afịd se mme ikpọ aku ye mme mbọọñ ekebo ammọ.

²⁴ Ammọ emaekekop ado, afịd ammọ emaebenne uyo ini keed ebọñ akam enọ Abasi, ete: “Akwa Abọọñ, afo ado Abasi a-akebotto anyọñ ye isọñ ye inyañ ye afịd-afịd ñkpọ se iyọhọ ammọ ke esịd.

²⁵ Ato ke Adisana Sịbidịd afo amaatañ ikọ ke inua asañautom mfo, ete ñnyịn Defid, abo ate: “ ‘Nsinam yak mme idịd ekop ataaifiobesịd, mme awo enyʌñ eduak ikpu-ikpu ñkpọ ke esịd ammọ?

²⁶ Mme ndidem isọñ edaaña eda, ndin mme andikara eboho ammọ-ammọ enyʌñ enwana ye Krais, e-emaekeyet adan enịm.’

²⁷ Ado akpanikọ ke Herọd ye Bọntiọs Baided emaesoobo atọ keed ye mme Yentaid ye mbon Isred ke abio ami nọ ediana keed enwana ye adisana ayịn mfo Yisọs, a-afo akeyette adan anịm.

²⁸ Ammọ ekenam se adudu ye uduak mfo emaekebebiire enịm nọ atịppe.

²⁹ Ndin idahami, Abọọñ, se baña udịkke ammọ idịkkeke ñnyịn nyʌñ nọ mme asañautom mfo adudu aditañ ikọ mfo ke ata ayọhọ uko.

³⁰ Sio ubọk mfo nyan ke adikọk udọñọ, ye ke adinam mme ikpọ utom idiọọñọ ye mme utom utịbe ñkpọ ñkpaidem ke anyịñ adisana ayịn mfo, Yisọs.”

³¹ Ke ammọ emaekebọñ akam, itie ammọ eketieeghe amaanyeeñe, ndin afịd ammọ emaeyọhọ ye Adisana Sịbidịd, enyʌñ ekwọrọ ikọ Abasi uko-uko.

Mme andinịm ke akpanikọ edeeme inie ammọ

³² Afịd mme andinịm akpanikọ ekenie esịd keed ye akikere keed. Ndomo awo keed ikibooho ke se imọ inie akedo akpọ-akpọ inie imọ, ado afịd awo ekewaawana se ekenie.

³³ Ke ayọhọ adudu mme abọsịd emaeka iso ke aditie ntiense mbaña adised Abọọñ Yisọs ke ñkpa. Ndin umiañ mfọn Abasi amaakem ammọ udeme,

³⁴ anam awo uweene ntekeed ikibaaha ke atu ammọ. Adaña ibad awo se ikinieeñe isọñ ye mme ufọk emaenyaam, ekoono akʌk se ikido ekọmudua edi,

³⁵ edinịm mme abọsịd ke iso, ndin ekesideeme enọ awo keed-e-keed akeene mfịna awo ado.

³⁶ Yosef, awo Difaid a-aketooho Saiprọs, a-mme abọsịd ekebenne ekood Banabas (a-awuọọñọke “ayịn nsọọñọesịd”),

³⁷ amaanyam isọñ se anye akenie anyʌñ aben akʌk ado asọk mme abọsịd.