Utom 27 - Ñwed Abasi Ke Ikọ Ibibio Ayo Mfịn

Bọọd adakka Rum ke nsʌñikañ

¹ Ke emaekenyịmme ibo yak ñnyịn isaña ke mmọọñ ika Itadi, emaekpọñ Bọọd ye mbon ñkpakọb mfen enọ Yudiọs, awo sentudiọn keed ke atu mbon se ikisikpeme Adidem Akọstọs.

² Nnyịn imaidʌk nsʌñikañ ke Adramitium a-akenaaha aboiyo ke mme esʌk ke Esia. Nnyịn ikisaña ye Aristakus, awo Kris a-aketooho Masidonia ke Tesadonika.

³ Imaikiiwuọ Sidọn ke ayọhọ usen iba, ndin Yudiọs amaanekke afọn ido ye Bọọd ayak anye awuọ akese mme ufan amọ nọ enọ anye se ayem.

⁴ Imaito do imaama ikiwuọ akpa, iwat ke mben ñkpere ñkañ Saiprọs a-akefọnnọ sia ayobio amaafịna ñnyịn.

⁵ Ke ñnyịn imaikiwat iboiyo akpa akpọññọ mben esʌk Sidisia ye Bamfidia, imaikibeghe ke Mira, a-abaaha ke abio Disia.

⁶ Do ke sentudiọn ami akisịn ñnyịn ke nsʌñikañ Adeksandra a-akekaagha Itadi.

⁷ Nnyịn ikikanna iwat inyọọñ usʌñ ke ata umiañ usen, amaisọñ ñnyịn idem adiwuọ Nidọs sia ayobio mmiikiyakka ñnyịn ibeghe ke udo naña ikisaña, imaiwat ikiwuọ ñkañ Kret a-akefọnnọ, a-adaaha ke nsak iso Sadmọn.

⁸ Nnyịn imainwana adiwat ke mben esʌk tutu ikiwuọ itie e-ekoodo Fe Hafịn, a-akpereke abio Dasi.

⁹ Ini amaanekke aka anyan, ñko uwad akedido ñkpọ afanekọñ sia akedo ini utreudia amaakeboiyo. Ndin Bọọd amaanọ ammọ item abo,

¹⁰ “Mme ete, mmekịt ke isañ ñnyịn ayaaba ke afanekọñ, ayaanyʌñ adat ekamba nsobo anọ nsʌñikañ, ye mbiomo ye mme uwem ñnyịn ñko.”

¹¹ Ado sentudiọn akekpañ utọñ anọ se etubom ye anie nsʌñikañ eketañ, idooho se Bọọd aketañ.

¹² Sia mben esʌk ado mmiikifọnnọ se eba ke ini akpọsọñ ekarika, umiañ awo ekebo emaana ewat eka iso tutu ekesịm esʌk ake Foniks a-adooho se eba ke ini akpọsọñ ekarika. Foniks akedo itie mbeghe ke Kret, a-akedaaha ke usuuk usobutịn ye anyọñ usobutịn.

Ayobio

¹³ Ke ini ifure-ifure afịm usuuk atọọñọke adifịme, ammọ emaekere ke ado ata eti ini adika isañ, ndin edʌt añkọ esịn, ewat esio, eka ñkañ esʌk Kret.

¹⁴ Ikikpeeneke, ata ekandịk ayobio e-ekekoodo Anyọñ-anyọñ Usakka Utịn amaato isu-mmọọñ adi.

¹⁵ Ke ayobio ami amaakedisoobo nsʌñikañ, adisọñ ubọk akan nsʌñikañ, imaisaana iyaak inọ ayobio iben ñnyịn aweeñe. Imaiwat ifrọ ke edem unaisọñ.

¹⁶ Daña iboiyoke ikisịm ñkan etək isu-mmọọñ a-afọnnọ a-akereke Kauda, ñnyịn ikiikanna adimʌm ubom uwem nsʌñikañ ñkama.

¹⁷ Ndiin ammọ emaedʌt anye esịn ke nsʌñikañ enyʌñ edat idʌk ebọp ekanna nsʌñikañ nọ asọñ. Sia idem amaakenyeñ ammọ ete iyaisịp ke utatan mben inyañ Saitis, ammọ emaeyaak añkọ esịn ke mmọọñ nọ ayobio awat anye nsʌñikañ naña ama.

¹⁸ Naña ayobio ado asʌkkọ anekke itịm ñnyịn ke idem, ammọ mme awat nsʌñikañ emaetọọñọ itoomo mbiomo ndọñ ke mmọọñ ke ayọhọ usen iba.

¹⁹ Ke ayọhọ usen ita, ammọ emaetop udʌk umʌm nsʌñikañ ke ubọk esịn ke mmọọñ.

²⁰ Ke umiañ usen, awo ikikanna ikịt utịn me ntantaafiọñ ado ayobio akesʌk akaiso afịme, ñnyịn imaiduọọk idodanyen uwem.

²¹ Ke mme awo emaeketie anyan ini idiaaha ndidia, Bọọd amaadakka ada ke iso ammọ anyʌñ abo: “Akpekena ndufo ekop item mmi a-ñkebooho ke ndufo isio uwat ikpọñ Kret, ndin afịd nsobo ye unọmọ ami ikpisịmme ndufo.

²² Ado idahami, ibo ndufo isọñ idem, sia awo ndufo ndomokeed idiikpaaha, nsʌñikañ ikpọọñ adibiara.

²³ Ke akoneyo ñkpọñ a-akefrọke enyere Abasi a-nnieeghe miin, a-ami ñnyʌñọ nnam ñkpọ nnọ amaabiọññọ ke ñkañ mmi,

²⁴ anyʌñ abo, ‘Bọọd, kuufeghe ndịk. Ana afo ada ikpe ke iso Sisa; Abasi ke mfọn amọ anyʌñ akop ebeeñe mfo, anyaaña afịd awo e-ewatta ye afo.’

²⁵ Ke ntodo, isọñ idem sia mmenịm Abasi ke ayaasu kpa naña anye akendọkkọ.

²⁶ Ado nsʌñikañ ñnyịn ayaasịp ke isu-mmọọñ keed.”

Nsʌñikañ asịp

²⁷ Ke ufuọdiba akoneyo ayọhọ usen duob ye inaañ, nte ayobio akesʌkkọ iben ñnyịn aka iso ye edem ke Akpa Adriatik, mme awad nsʌñikañ ekekere ke imiwuọ unaisọñ.

²⁸ Ammọ emaedomo enyʌñ ekịt ke mmọọñ aketəñọ ikpad ikie ye edịb. Etək ini akeboiyo, ammọ emaemaana edomo enyʌñ ekịt ke mmọọñ aketəñọ ikpad anaañ ye duob.

²⁹ Ato ke ufeghe ndịk nsʌñikañ adikituagha ke itiad, ammọ emaesuuk añkọ inaañ eto ke edem nsʌñikañ, enyʌñ ebọñ akam ebo ayo anwaña.

³⁰ Ubaak mme awad nsʌñikañ emaedioomo adifeeñe ñkpọñ nsʌñikañ ndin emaesuuk ubom uwem esịn ke mmọọñ nte esuuk añkọ.

³¹ Ado Bọọd amaabo sentudiọn ye mme mbon ekọñ ate, “Ibọhọke mme awo ami esọñ esịne ke nsʌñikañ, awo idiikanna inyaaña ndufo.”

³² Ndin mbon ekọñ ado emaekpịkke mme udʌk e-ekemʌmmọ ubom ekama nọ ubom afụụm ke anyọñ mmọọñ.

³³ Ayo akekpere adisieere, Bọọd amaakpeiye afịd ammọ ate edia ndidia, “Usen duob ye inaañ ado ami ndufo idiaaha ñkpọ ndomokeed, enyʌñ eba ke akpọsọñ ayeeme-nsia.

³⁴ Ami ibeeñe ndufo mbo edia ñkpọ, ana edia ñkpọ ma edu uwem. Ided iwuod ndufo ntekeed idiitakka.”

³⁵ Bọọd aketañ ami ama, anye amaabenne uyo anyʌñ anọ Abasi ekọọm ke iso afịd ammọ. Ndin amaabuuñ anyʌñ atọọñọ adita.

³⁶ Ammọ emaedọñ idem ammọ esịd, etọọñọ idia ndidia.

³⁷ Afịd ñnyịn se ikiisịne ikiba ke nsʌñikañ ikido ikie iba ye ata mme duob ye itiokeed.

³⁸ Ammọ emaekedia naña ammọ ekeyeyem, emaetoomo mme abakpa e-ekesʌhọke edọñ ke inyañ na nsʌñikañ ayakka.

³⁹ Ke ini ayo asieereke, ammọ ikidiọọñọke ukañ adooho isọñ, ado emaekịt adịk a-akenieehe esʌk utatan a-ammọ ekebiereke ebo ekpekan, yak enam nsʌñikañ asịp ke ndo.

⁴⁰ Ammọ emaekpịkke mme añkọ esioño eyaak edọñ ke inyañ, enyʌñ etaad mme udʌk e-ekemʌmmọ mme eba nsañikañ ekama, edịppe afada iso ewuuk enyʌñ ewat eka ukañ esʌk.

⁴¹ Ado ukod mmọọñ amaaben nsʌñikañ aketọ ke ekamba utatan ndin anye asịp. Mme akparaubom emaewʌghọ ke esịd ntan, ikanna iwuọ aba, ndin edem ubom amaabʌññọ ato naña inua akpa akesʌk aka iso atọ nsʌñikañ.

⁴² Mbon ekọñ emaedioomo adiwood mbon ñkpakọb e-ekedọñọke ke nsʌñikañ mbaak ammọ ediwọk mmọọñ efeeñe.

⁴³ Ado awo sentudiọn ikiyemme ñkpọ anam Bọọd ndin anye ikiyakka ammọ enam uduak ami. Anye amaanọ uyo ate mbon se inọ ewọk iwọk eto etamma, ewọk ekewuọ abod.

⁴⁴ Mme mbio ako ekena ekama mme adukpọk mme ñwai ubom esaña ekewuọ abod. Ke ntodo, afịd awo emaekewuọ abod ye uwem.