Utom 26 - Ñwed Abasi Ke Ikọ Ibibio Ayo Mfịn

¹ Ndin Adidem Akripa amaabo Bọọd ate, “Mmunọ ufañ aditañ ñkpọ mbaña idem mfo.” Bọọd amaasio ubọk anyan ndin atọọñọ adikañ idem amọ ate,

² Adidem Akripa, nkere ke ami mmenie ataa mfọniso adida ke iso mfo mfịn ami ke adifaaña mbaña afịd ndood uyo a-mme Yuu endotto miin,

³ akpan-akpan ke ntak a-afo anekkeke adiọọñọ eduuwem ye ndufaaña mme Yuu. Ke ntodo, mmubeeñe mbo yak afo anie ime akpañ utọñ annọ.

⁴ “Afịd mme Yuu ediọọñọ usʌñ naña ami ndʌñ ye ammọ tọọñọ ke uyịn mmi, ke ntọọñọ uwem mmi ke idịd ñnyịn ye ke Yerusedem.

⁵ Ammọ endiọọñọ akpeene, enyʌñ ekeme iditañ, adieke ekpemaaha, abo ke mmaakeene ñka a-anieehe mfara ke idem akan ke edu ukpono Abasi ñnyịn, ami ñkedu uwem nte awo Farisi.

⁶ Idahami, akeene ntak idodanyen a-ami nnieehe ke se Abasi amaakeñwọñọ anọ mme eteete ñnyịn ke ami nda ke ikpe mfịn ami.

⁷ Ami ado enwọñọ e-esiin duob ye iba ñnyịn enieehe idodanyen adibọ naña ammọ ekpono Abasi ke eti esịd uweeme ye akoneyo. O Adidem, ato ke idodanyen ami ke mme Yuu endot miin ikọ.

⁸ Ntak awo ke atu ndufo akpekereke ke idooho akpanikọ ke Abasi anam awo aset ke ñkpa-a?

⁹ “Ami ñko mmaabiere nte ke akpena nnam afịd se akpena enam adibiọọñọ anyịñ Yisọs, awo Nasared.

¹⁰ Ami ado se ami ñkenam ke Yerusedem. Ke adudu mme ikpọ aku mmaamụụm uwak ndisana ikọt Abasi ndọọñ ke ufọk ñkpakọb ndin ke ini ekebiereke ñkpa enọ ammọ, ami mmaanyịmme mbo ewood.

¹¹ Uwak ini, mmaasaña ke mme sinakọk adinọ ammọ ufen, ñnyʌñ ñyem usʌñ naña ammọ ekpesappa Yisọs. Ato akpọsọñ usua añkenieehe mbaña ammọ, mmaakọbọ ammọ tutu ñkewuọ mme asen abio.

¹² “Ke usʌñ isañ mmi keed, ñkeka Damaskọs ke adudu ye uyo mme ikpọ aku.

¹³ Ke ufọọd uweemeayo, O Adidem, ke nsʌkkọ nsaña ke usʌñ, mmaakịt unwana a-atooho anyọñ, amaayama akan utịn añkanna miin ye mme nsaña mmi akʌk.

¹⁴ Afịd ñnyịn imaiduọññọ ke isọñ, ndin mmaakop uyo a-akembooho miin ke usem Arameik ate, ‘Sọọd, Sọọd, ntak afo añkọbọke miin-e? Asọsọñ afo aditịgha eto nsọọbọ ñkukịm.’

¹⁵ “Ndin mmaabịp nte, ‘Afo ado anie, Abọọñ?’ “Abọọñ amaabọọrọ ate, ‘Ami ndo Yisọs a-afo akọbọke.

¹⁶ Idahami, dakka da ke ukod mfo. Uwọt fiin idem adumek fiin nte asañautom ye ntiense ke se afo akịt ambaña miin ye se ami nduuwọt fiin.

¹⁷ Ñyaunyaaña fiin nsio ke ubọk ikọt ndufo ye ke ubọk mme Yentaid. Mbuudọñ fiin abịne ammọ,

¹⁸ aketat ammọ anyen anyʌñ anam ammọ ekappa ekpọñ akịm ebịne unwana, ekpọñ adudu Setan, ebịne Abasi, nọ ammọ ebọ adifeen ke mme idiọọkñkpọ ye itie ke atu mbon e-emaenam esana ato ke mbuọdidem ke ami.’

¹⁹ “Ke ntak ami, Adidem Akripa, ñkesọññọ iwuod ke ntak ñkukịd a-atooho abio ubọọñ Abasi.

²⁰ Akpa, tọọñọ ye mbon e-ebaaha ke Damaskọs ye ke Yerusedem ye ke afịd Yudia, ye mme Yentaid ñko, ñkekwọrọ mbo ammọ ekappa esịd ekeene Abasi enyʌñ ewọt ebo ke mmimọ imikappa esịd ato ke adinam ammọ.

²¹ Ke ntak ami ke mme Yuu ekemmʌm miin ke akwere tembịd eyem adinwot.

²² Ado mmenie unwam Abasi tutu asịm mfịn ami; ke ntodo ami mmeda mi aditañ ke esịd akpanikọ nnọ etək-etək ye ekandịk ukem-ukem. Ntañña ñkpọ ndomokeed ñwuọ ñkpọñ se Moses ye mme brọfed emaeketañ ke ayaatịppe,

²³ ke Mesaya ayaabọ ufen, ndin nte akpa awo a-adiiset ke ñkpa, ayaadat unwana asọk mbon ammọ ye mme Yentaid.”

²⁴ Naña Bọọd asʌkkọ atañ ikọ adifaaña idem amọ, Festus amaabọñ ñkpo ate, “Amedamma Bọọd! Akpọsọñ ifiọk ukpeeb mfo anam nọ adamma.”

²⁵ Bọọd amaabọọrọ ate, “Ami ndammake, ata eti adaiwuod ukara Festọs. Se ntañ ado akpanikọ anyʌñ asaña ke eti akikere.

²⁶ Adidem ameghe ye mme ñkpọ ami, ndin mmekeme itañ ikọ nnọ anye uko-uko. Mmenịm mbo ke ibaaha ñkpọ ami ndomokeed afeppe anye ke anyen sia ibaaha se ekenam ndịbe-ndịbe.

²⁷ Adidem Akripa, nte afo amenịm mme brọfed ke akpanikọ? Mmediọọñọ ke amenịm.”

²⁸ Ndin Akripa amaabịp Bọọd abo, “Akere abo ke utọ etək ini ntom ke akpaakan añkappa esịd nọ ndo awo Krais?”

²⁹ Bọọd amaabọọrọ anye ate, “Me etək me anyan ini, ami mbọñ akam nte Abasi akpekap anam, idooho afo ikpọọñ, ado mme afịd-afịd mbon e-ekpañña utọñ ennọ miin mfịn ami, ekappa eba nte ami ke mmiibọhọke ke ñkpakọb ami.”

³⁰ Adidem, adaiwuod ukara, Benis ye mbon e-eketieehe ye ammọ emaedaaña eda.

³¹ Ammọ emaekpọñ ubeed ado ndin ke ini ammọ enemeke emọ-emọ, ammọ emaebo ete, “Awo ami inamma ñkpọ ndomokeed a-adotto ñkpa me ñkpakọb.”

³² Ndin Akripa amaabo Festus ate, “Ekpaekesaana awo ami eyaak akpedo anye ikisiooho ikpe ika iso Sisa.”