Utom 23 - Ñwed Abasi Ke Ikọ Ibibio Ayo Mfịn

¹ Bọọd adịppe iso amaase mbon esob Sanhidrin abo ate, “Nditọete mmi, ami mmenam iso utom mmi nnọ Abasi ke eti esịd tutu usen mfịn ami.”

² Anye aketañ ntodo, akwa aku Ananayas awaanọ uyo abo mbon e-ekedaagha ekpere Bọọd emia anye inua.

³ Bọọd amaabo anye ate, “Abasi ayaaumia fiin, afo a-adooho a-adooho udedeppe idibene! Afo atie do adikpe ikpe innọ miin ke ido ibed, ado afo abiad ibed ke adinọ uyo abo yak emmia miin!”

⁴ Mbon se ikida ikpere Bọọd eme ebo, “Afo anam die asọñ akwa aku Abasi anyen?”

⁵ Bọọd amaabọọrọ ate, “Nditọeka, ñkiidiọọñọke ke anye ado akwa aku, sia e-ewet ebe: ‘Ikiitañ idiọọk ikọ ibaaña andikara ndufo.’ ”

⁶ Ke Bọọd amaakediọọñọ ke usʌk ammọ edo Sadusi usʌk edo Farisi, anye amaakood mbon esob Sanhidrin ke akpọsọñ uyo abo, “Nditọete, ami ndo Farisi, ndo ataa ayeayịn Farisi ñko. Ami nda ke ikpe sia mmenie idodanyen ke adiset ke ñkpa.”

⁷ Ke anye amaaketañ ami ikọ amaasakka ke atu mme Farisi ye mme Sadusi ndin mbono amaabakka iba.

⁸ (Mme Sadusi ebo ke adised ke ñkpa ibaaha, nko ke mme enyere ye mme sịbidịd ibaaha, ado mme Farisi enịm afịd mme ñkpọ ami ke akpanikọ.)

⁹ Akwa ntịme amaasakka, ndin usʌk mme akpeeb ñwed ibed e-edoññoke mme Farisi emaedaaña eda enyʌñ efaaña ke akpọsọñ uyo ete, “Nnyịn ikịtte idiọọk ñkpọ ke awo ami. Ida ise ise, akpedo sịbidịd me enyere atañ ikọ anọ anye?”

¹⁰ Utọk amaakpon eti-eti, ndin adaiwuod ekọñ akop ndịk ke ammọ eyaesai Bọọd mbai-mbai. Anye amaanọ uyo abo mbon ekọñ eka ekeben anye ke adudu eka ekesịn ke badịk ekọñ.

¹¹ Ke akoneyo ayọhọ usen iba, Abọọñ amaada akpere Bọọd anyʌñ abo, “Sọñọ esịd! Daña nte afo amaaketie ntiense ambaña miin ke Yerusedem, ntodo ke afo uduutie ntiense ke Rum.”

Edioomo Adiwot Bọọd

¹² Ke ayo amaakesiere mme Yuu emaedʌk edioomo enyʌñ eta unwọñọ ete mmimọ idiidiaaha ndidia inyʌññọ inwọñ mmọọñ tutu mmimọ iwot Bọọd.

¹³ Emaewak ikan ideen aba e-ekesịneke ke edioomo ami.

¹⁴ Ammọ emaeka ekebeeñe ikpọ aku ye mme etubom ebo, “Nnyịn imidat ekandịk unwọñọ ite ke ñnyịn idiidiaagha ndidia inyʌññọ inwọñ mmọọñ tutu ñnyịn iwot Bọọd.

¹⁵ Do ndin, ndufo ye mme esob Sanhidrin iwet ñwed inọ etubom ekọñ edat anye edi iso ndufo nọ atie nte eyem ibọ anye ata afịd akpanikọ ke abaña ikpe amọ. Nnyịn imibeeñe idem adiwot anye mbemiso anye adiwuọ mi.”

¹⁶ Ado ke ayịn awodeen ayịneka awonwaan Bọọd amaakekop edioomo ami, anye amaaka badịk mbon ekọñ akedọkkọ Bọọd.

¹⁷ Ndin Bọọd amaakood keed ke atu mme sentudiọn abo ate, “Ben akparawa ami kaa ke iso etubom ekọñ, anye anie ñkpọ aditañ nnọ anye.”

¹⁸ Anye amaaben anye aka iso etubom ekọñ. Awo sentudiọn anyʌñ akebo ete, “Bọọd, awo ñkpakọb, akedọñ eñkood, ndin abo yak mben akparawa ami usọk sia anye anie se ayem aditañ unọ.”

¹⁹ Etubom ekọñ amaamʌm akparawa ami ke ubọk, adat anye asịkke aka mbeñ keed akebịp abo, “Nso-o ke afo abiitañ innọ miin?”

²⁰ Anye amaabo ate, “Mme Yuu edioomo adubo fiin ate yak afo aben Bọọd adi ke iso esob Sanhidrin ñkpọñ nọ aba nte ke aba ata akpanikọ ammọ eyemme adikop nto Bọọd.

²¹ Kuuyịmme unọ ammọ sia adooho ekan awo aba ke atu ammọ esʌkkọ edịbbe ebet ke usʌñ adimʌm anye. Ammọ eta unwọọñọ ebo ke mmimọ idiidiaaha ndidia inyʌñọ inwọñ mmọọñ tutu mmimọ iwot anye ammọ ebeeñe idem idaha ami, esʌk ebet afo adinyịmme ebeeñe ammọ.”

²² Etubom ekọñ amaanọ anye anyọñ, anyʌñ adʌt anye utọñ ate, “Kuutañ unọ awo ndomokeed se afo atañ annọ miin.”

Esio Bọọd enọ aka Siseria

²³ Ndin etubom ekọñ amaakood sentudiọn iba anyʌñ anọ uyo ate, “Isioño mbon ekọñ ikie iba, ye mbon ekọñ e-ewatta enañ mbakara ata ye duob ñkọrọ mme atob idañ ikie iba eka Siseria akoneyo ami ke ñkanika usʌkkeed.

²⁴ Nọ mme enañ mbakara nọ aben Bọọd dek-dek, ikiiyak ñkpọ anam anye, ikinọ Fediks adaiwuod ukara.”

²⁵ Anye amaawet deta ntom:

²⁶ Ato Kradius Disias, Enọ esọk ata ekamba adaiwuod ukara, Fediks: Mmukọọm-o.

²⁷ Mme Yuu ekemʌm awo ami ndin eyem iwot anye, ado ami ye mbon ekọñ imainyaaña anye sia mmaakediọọñọ ke anye ado amanaisọñ awo Rum.

²⁸ Mmaayem idiọọñọ sinam ammọ edot anye uyo, ndin mmaanọ anye aka iso esob Sanhidrin ammọ.

²⁹ Ñkekop ke ndoduyo amọ akeabaña iko ibed ammọ, ado ubiomo ikpe amọ idooho se ekpewowot me adisesịn anye ke ñkpakọb.

³⁰ Ke mmaakekop idiọọk ndibbe edioomo ndusʌk ammọ enamma a-abañake uwem awo ami, mmenọ anye usọk fiin ini keed. Mmebo mbon e-edotto anye uyo nko yak ammọ editañ iko ammọ ke abaña anye ke iso mfo.

³¹ Ndin mbon ekọñ, ke adinam uyo ami, emaeben Bọọd ke akoneyo ekesịm Antipatis.

³² Edem usen ammọ emaaebo mbon ekọñ enañ mbakara edat Bọọd eka, ndin ammọ etịmme enyọñọ badịk ekọñ.

³³ Ke mbio ekọñ enañ mbakara emaekesịm Siseria, ammọ emaenọ adaiwuod ukara deta enyʌñ eyaak Bọọd esịn anye ke ubọk.

³⁴ Adaiwuod ukara amaakood deta ndin abịp Bọọd utịd abio a-anye aketooho. Ke anye adidiọọñọ ke anye ato Sidisia,

³⁵ anye amaabo, “Ame ñyaakop ikpe mfo ke ini mbon u-udotto fiin uyo emaedisịm mi.” Ndin anye amaanọ uyo ate enịm Bọọd ke idak ukpeme ke akwere ufọk Herọd.