Utom 16 - Ñwed Abasi Ke Ikọ Ibibio Ayo Mfịn

Timoti akeene Bọọd ye Saidas

¹ Bọọd amaadisịm Deebi ndin ato do nko aka Distra, itie mbed keed a-akekereke Timoti akedʌññọ, e-eka amọ akedooho awo Yuu anyʌñ anịm Yisọs ke akpanikọ, ado ete amọ akedo awo Krik.

² Mme nditọete e-enịmme ke akpanikọ ke Distra ye Aikonium emaetañ nti ñkpọ ebaña Timoti.

³ Bọọd amaayem anye asaña ye imọ aka isañ, anam anye anịm anye mboppo ke ntak mme Yuu e-ekedʌññọ ke ñkañ udo, emaediọọñọ ete amọ nte ado Krik.

⁴ Nte ammọ esañake ke abio ke abio, ammọ emaetañ se mme abọsịd ye mme etubom ke esop Yerusedem ekebiere enọ mme awo ete enam.

⁵ Ntodo ke mme ufọkabasi emaekọt ke mbuọdidem ndin mme ufa atu awo enyʌñ edʌk edi ke usen ke usen.

Bọọd akịt ñkukịd abaña awo Masidonia

⁶ Bọọd ye nsaña amọ emaesaña ke afịd ñkanñkʌk Frikia ye Kadesia, kpa naña Adisana Sịbidịd aketemme ammọ abo kekwọrọ ikọ ke idak ukara Esia ke ini ado diin.

⁷ Ke ammọ emaekeediwuọ adaña abio Misia, ammọ emaedomo adidʌk Bitinia ado Sịbidịd Yisọs ikiyakka.

⁸ Ke ntodo, ammọ emaeboiyo ekpoñ Misia, eka Troas.

⁹ Ke akoneyo Bọọd amaakịt ñkukịd nte awo a-atooho Masidonia ada anyʌñ akpeiye anye ate, “Kanna di Masidonia nyʌñ dinwam ñnyịn.”

¹⁰ Ke Bọọd amaakekịt ñkukịd ami, ñnyịn imaibeeñe idem ini keed adisio uwad ñka Masidonia, inịm ke akpanikọ ibo ke Abasi ikood abo ikikwọrọ eti mbʌk inọ ammọ.

Didia akappa esịd ke Fidipai

¹¹ Ñnyịn imaidʌk nsʌñikañ tọọñọ ke Troas iwat nnen-nnen ikiwuọ Samotras, ndin ke ayo amaakesieere, ikisịm Niapodis.

¹² Tọọñọ do ñnyịn imaisaña ika Fidipai, awuọiso abio ke Masidonia a-Rom akekarake. Nnyịn imaiba do ke umiañ usen.

¹³ Ke usen Sabad ñnyin, imaikpọñ abio ika mben inyañ, itie a-ñnyịn ikikereke ibo ke iyaikịt itie ubọñ akam. Nnyịn imaisụụk itie do, itọọñọ aditañ ikọ ye ibaan e-ekebonoke do.

¹⁴ Keed ke atu mbon e-ekekpañña utọñ inọ akedo awonwaan keed a-akekereke Didia, anyam iduod-iduod afọñ ubọọñ a-atooho abio Tiatira. Anye akedo akpono ata Abasi. Abọọñ amaatuuk anye esịd anam anye akop etob Bọọd.

¹⁵ Ke anye ye mbon ufọk amọ emaekena uduọkmmọọñ, anye amaakood ñnyịn ufọk abo ate, “Adieke ndufo endatta miin nte andinịm Abọọñ ke akpanikọ idi idiba ke ufọk mmi.” Anye amaikappa ñnyịn esịd anam nọ ikeene anye.

Bọọd ye Saidas ke ñkpakọb

¹⁶ Usen keed, idaha nnyịn isʌkkọ ika itie ubọñ akam, ñnyịn imaisoobo ifʌn abọikpa keed a-akenieeghe sịbidịd a-anye akekamake ikịt ñkukịd baña ini iso. Anye amaadat ado akọ uwak akʌk anọ mbon se ikinie anye ke aditañ se idiitịppe ke ini iso.

¹⁷ Abọikpa ami amaakeene Bọọd ye ñnyịn ke edem, abọọñ ñkpo abo, “Mbon ami edo nditọutom Abasi Andikoñ Ñkan, e-etañña ñkpọ ebaña usʌñ adinyaaña ino ndufo.”

¹⁸ Anye amaaka iso anam ntom ke mme uwak usen. Ke akpatre, ñkpọ ami amaafịna Bọọd tutu anye akanna ada aduat sịbidịd ado, ate, “Ke anyịñ Yisọs Krais mmuwuuk fiin mbo awuọ anye ke idem!” Kpa idaha-idaha ado sịbidịd ado amaakpọñ anye.

¹⁹ Mme andinie ifʌn abọikpa ami emaekekịt ke usʌñ unwana akʌk ammọ atre, ammọ emaemʌm Bọọd ye Saidas edʌt ammọ ekesịm anwa udua ke iso mme ikpọawo ke abio.

²⁰ Ammọ emaedat ammọ eka iso mme ayaraiwad, ete, “Ibon ami edoñño mme Yuu, ndin ammọ esịn ntịme ke abio,

²¹ ke adikpeeb ido eduuwem a-ammiisañake ke ibed ñnyịn mbon Rum adinam me adinyịmme.”

²² Mme atu awo e-ekedaaha emaekeene eyem Bọọd ye Saidas ikọ, ndin mme ayaraiwad emaenọ uyo ete esioño ammọ afọñ enyʌñ emia ammọ ke ikpa ukwak.

²³ Ke emaekenekke emia ammọ ema, emaetop ammọ edọñ ke ñkpakọb, enyʌñ ebo andikpeme mbio ñkpakọb enekke ekpeme ammọ.

²⁴ Ke adibọ iwuuk ami, andikpeme mbio ñkpakọb amaadọn ammọ ke ata esịd ubeed ke ufọk ñkpakọb anyʌñ abọp ukod ammọ adian ke ikpọ ukpid eto.

²⁵ Ke nkpọ nte ufọọd akoneyo Bọọd ye Saidas emaebọñ akam enyʌñ ekwọ ikwọ enọ Abasi, ndin mme mbio ñkpakọb mfen ekesʌk ekpañ utọñ enọ ammọ.

²⁶ Ke unana idodanyen unyekisọñ amaatịppe, anyeeọe afịd itiad idakisọñ ufọk ñkpakọb. Afit mme usʌñ ufọk ñkpakọb amaakuuñọ ini keed, ñkpọnọ afịd mbio ñkpakọb enyʌñ ekpọhọ.

²⁷ Andikpeme mbio ñkpakọb amaademme, ndin ke anye amaakekịt usʌñ ufọk ñkpakọb nte ana inwañ, anye amaasio eduatamọ, ayem adiwot idem amọ, sia anye akekere ke mbio ñkpakọb efeeñe.

²⁸ Ado Bọọd amaasio ñkpo abo ate, “Kuunọ idem fo unọmọ! Afịd ñnyịn mmọ mi!”

²⁹ Akpeme ñkpakọb amaabo eben mme utuenikañ edi, ndin anye amaasọsọp afeghe ke ñnyeñidem adʌk akeduọ ke iso Bọọd ye Saidas.

³⁰ Anye amaasioño ammọ adi anyʌñ abịp abo, “Mme ete, nso-o ke nnie adinam nọ nnie adinyaaña?”

³¹ Ammọ emaebọọrọ ete, “Nịm Abọọñ Yisọs ke akpanikọ, ndin eyaunyaaña fiin, afo ye afịd ufọk mfo.”

³² Ammọ emaekwọrọ ikọ Abasi enọ anye ye afịd mbio mfen e-ekebaaha ke ufọk amọ.

³³ Ke awa ado ke akoneyo andikpeme ñkpakọb amaaben ammọ anyʌñ ayeed mme unan ammọ; ndin idaha-idaha ado anye ye afịd ufọk amọ emaebọ uduọkmmọọñ.

³⁴ Akpeme ñkpakọb amaaben ammọ aka ufọk amọ anyʌñ anọ ammọ ndidia; anye ye amaeyọghọ ye idaraesịd anye sia amaekedinịm Abasi ke akpanikọ, anye ye afịd ufọk amọ.

³⁵ Ke ayo amaakesieere, mme ayaraiwad emaedọñ ekamba mbon ukọb awo utom enọ andikpeme ñkpakọb, ete: “Saana ibon ado yaak.”

³⁶ Andikpeme ñkpakọb amaadọkkọ Bọọd, “Mme ayaraiwad enọ uyo ete esaana afo ye Saidas eyaak. Ke ntodo ndufo emekeme adiinyọñ. Inyọñọ ke emem.”

³⁷ Ado Bọọd amaabo mme ekamba mbio utom ate: “Ammọ ekimia ñnyịn anwa-anwa ikpeeghe ikpe, akpesʌk ado ñnyịn idooho amanaisọñ nditọ Rum, enyʌñ etop ñnyịn esịn ke ñkpakọb. Idahami ammọ eyem adisio ñnyịn ndịbe-ndịbe? Iyo-o! Yak ammọ edi ke idem ammọ enyʌñ edisaña ye ñnyịn ewuọ.”

³⁸ Mme ekamba mbio utom emaetañ ntom enọ mme ayaraiwad, ndin ammọ emaekekop ke Bọọd ye Saidas edoñño amanaisọñ mbon Rum, idem amaanyeñ ammọ.

³⁹ Ammọ emaedikpeiye ammọ enyʌñ edisaña ye ammọ ewuọ ke ñkpakọb, ekpeiye Bọọd ye Saidas ete ekpọñ abio.

⁴⁰ Ke Bọọd ye Saidas emaekewuọñọ ñkpakọb, ammọ emaeka ufọk Didia. Do ke ammọ ekesoobo ye mme ikọd Abasi enyʌñ ekwọrọ ikọ nsọọñukod enọ ammọ. Ndin ammọ emaekpọñ do.