Utom 14 - Ñwed Abasi Ke Ikọ Ibibio Ayo Mfịn

Ke Aikonium

¹ Ke Aikonium Bọọd ye Banabas emaesaña keed ekaiya sinakọk mme Yuu naña esidak enam. Do ammọ emaekwọrọ ikọ ke usʌñ a-akenamma uwak mme Yuu ñkọrọ mbon Krik enịm Abasi ke akpanikọ.

² Ado mme Yuu e-ekediimaagha inịm ke akpanikọ emaetañ ikọ etịmede mme Yentaid mfen enyʌñ ebiad ammọ esịd ebaña mme ikọd Abasi ami.

³ Ke ntak ado, Bọọd ye Banabas emaekpeene do enyʌñ ekwọrọ Abọọñ uko-uko, ndin Abọọñ ñko amaasọọñọ etob mfọn amọ ke adinọ mme abọsịd adudu adinam mme utịbe ñkpọ ye utom idiọọñọ.

⁴ Ubakka amaaba ke ufọọd mbon Aikonium; usʌk eda ye mme Yuu, usʌk eda ye mme abọsịd.

⁵ Do ndin mme Yentaid ñkọrọ mme Yuu emaedioomo ye mme adaiwuod ammọ keed-e-keed aditʌkkọ mme abọsịd ñnyʌñ ntọọñ ammọ ke itiad.

⁶ Ado Bọọd ye Banabas emaekediọọñọ ebaña edioomo ami, ammọ emaefeeñe eka Distra ye Deebi ke mme abio Daikonia ye mme ñkanñkʌk idʌñ,

⁷ do ammọ emaeka iso ekwọrọ eti etob ubọọñ Abio Abasi.

Ke Distra ye Deebi

⁸ Ke Distra amaaba awodeen a-akedọñọke mbʌñọ tọọñọ ke emana, akenanam inyʌññọ isaña.

⁹ Anye amaakpañ utọñ akop naña Bọọd atañ ikọ. Bọọd amaawuuk anyen ase anye, anyʌñ akịt abo ke anye anie mbuọdidem se ekọk anye udọñọ,

¹⁰ ndin Bọọd amaabọñ ke akpọsọñ uyo abo, “Dakka da ke ukod mfo!” Ke ami, awo ado amaatamma ke anyọñ anyʌñ atọọñọ adisaña.

¹¹ Ke atu awo emaekekịt se Bọọd akenam, ammọ emaebọñ ñkpo ke usem Daikonia ebo ete, “Mme abasi esoiyo edi ke mbid awo!”

¹² Ammọ ekekood Banabas Seus, Bọọd ammọ ekood Emes, sia anye akedooho akwa atañ ikọ.

¹³ Aku Seus, i-itie ukpono amọ akesannake etək-etək akpọñ abio amaakoono ñyaara enañ ye ñkpataatad adi inuaatob, sia anye ye atu awo ekeyem adinam uwa nnọ Bọọd ye Banabas.

¹⁴ Ado ke ini abọsịd Banabas ye Bọọd ekekoppo ñkpọ ami, ammọ emaewai afọñidem ammọ enyʌñ efeeñe edọñọ atu awo, ebọñ ñkpo, ete:

¹⁵ “Mme ufan ñnyịn, nsinam ndufo enam ñkpọ ami? Ñnyịn ke idem ñnyịn inyʌñ idoñño mme awo nte ndufo. Ñnyịn idat eti etob isọk ndufo, ite yak ekappa ekpọñ mme ñkpọ ami mmiiwuọọñọke ñkpọ ndomokeed ebịne ndu-ndu Abasi, a-akenamma anyọñ ye isọñ ye inyañ ye afịd-afịd ñkpọ se iyọhọ ammọ ke esịd.

¹⁶ Ke esed, anye amaayaak afịd mme idịd enañña se ema.

¹⁷ Ado anye itreke adinọ idem amọ ikọ ntiense: Anye awọt mfọnido ke adinọ ndufo edịm ato ke anyọñ ye mme mfịd inwañ ke ini ammọ; anye inọ ndufo uwak ndidia, anyʌñ ayọhọ esịd ndufo ye idaara.”

¹⁸ Kpa ye ikọ ami, akesʌk asọsọñ aditre mme atu awo ami adinam uwa nnọ ammọ.

¹⁹ Ndin usʌk mme Yuu emaeto Antiọk ye Aikonium edikpuuño mbioawo esịd. Ammọ emaetọọñ Bọọd ke itiad enyʌñ edʌt anye eben esio ke abio, ekere ke anye akpa.

²⁰ Ado ke mme ikọd Abasi emaekedikanna anye ekʌk, anye amaadakka ada anyʌñ amaana adʌk abio. Ayo akesieere, anye ye Banabas emaeka Deebi.

Aditịmme ñka Antiọk ke Siria

²¹ Ammọ emaekwọrọ eti mbʌk ke abio ado enyʌñ enam uwak atu awo ekappa edo mme mbed enọ Abasi. Ndin ammọ emaetịmme eka Distra, Aikonium ye Antiọk,

²² esọọñọ mme ibed idem, enyʌñ edọñ ammọ esịd ete esọñ eda ke akpanikọ ye ke mbuọdidem. Ammọ emaebo mme ibed ete, “Ana ñnyịn iboiyo ke uwak ndutʌghọ nọ ikan idʌk abio ubọọñ Abasi.”

²³ Bọọd ye Banabas emaemek mme etubom enọ ufọkabasi keed-e-keed, ndin ke akam ye utreudia emaeben ammọ enọ Abọọñ a-ammọ ekenieehe idodanyen.

²⁴ Emaekesaña eboiyo Bisidia, ammọ emaekewuọ Bamfidia,

²⁵ ndin ammọ emaekwọrọ ikọ ke Beka, enyʌñ esuuho ekesịm Atadia.

²⁶ Tọọñọ ke Atadia ammọ emaesaña ke nsʌñikañ emaana ekesịm Antiọk, itie e-ekeyakka ammọ esịn ke ubọk mfọn Abasi ke utom a-ammọ ekenamma ema.

²⁷ Ke emaekebeghe do, ammọ emaekood afịd ufọkabasi ebon itie keed, enyʌñ etañ afịd mme ñkpọ se Abasi akedat ammọ anam, ye naña Abasi akekʌkkọ usʌñ mbuọdidem anọ mme Yentaid.

²⁸ Ammọ emaeba do ye mme mbed ekpeene.