Matiu 9 - Ñwed Abasi Ke Ikọ Ibibio Ayo Mfịn

Yisọs afeen anọ anyʌñ akọk awo akpaubeñ udọñọ

¹ Yisọs amaasọiyọ adʌk ubom akanna akewuọ idʌñ ammọ.

² Mme awo emaeben awo udọñọ akpaubeñ a-akenaaha ke aya esọk anye. Ke Yisọs amaakekịt mbuọdidem ammọ, anye amaabo awo akpaubeñ ado ate, “Ayịn, sọọñ esịd, sia efeen mme ndiọiñkpọ mfo.”

³ Ubaak mme akpeeb ibed ekekop ami, ammọ ebo ke esịd ammọ ete, “Awo ami a-asappa Abasi.”

⁴ Yisọs akediọọñọ akikere ammọ, anye abo, “Ntaha ndufo enieeñeke utọ ndiọi akikere ami ke esịd ndufo-o?

⁵ Ake-e imem ikan, adibo ‘Efeen mme ndudue mfo’ me adibo, ‘Dakka da saña’?

⁶ Ado nọ ndufo ediọọñọ ke Ayịn Awo anie unen ke iso isọñ adifeen ndudue.” Ndin anye abo awo akpaubeñ ate, “Dakka da, ben aya mfo nyọñ ufọk.”

⁷ Ndin awo ado adakka ada anyọñ ufọk.

⁸ Ke ini atu awo ekịtte ñkpọ ami, ekamba ndịk amaamʌm ammọ, ammọ enyʌñ etooro Abasi, a-akenọọhọ mme awo utọ adudu ado.

Ikood Matiu

⁹ Ke Yisọs akekpọñ do anye amaakịt awo e-ekoodo Matiu nte atie ke itie atayad ubọ taksi. Yisọs abo anye ate, “Ñkeene miin.” Ndin Matiu adakka ada akeene anye.

¹⁰ Ke ini Yisọs akesʌkkọ adia ndidia ndubi ke ufọk Matiu, umiañ mme abọ taksi ye mme ndiọi awo emaedi enyʌñ edidia ndidia ye anye ye mme mbed amọ.

¹¹ Ke ini mme Farisi ekịtte ami, ammọ ebịp mme mbed Yisọs ebo, “Ntaha eteufọk ndufo asidiaaha ndidia ye mbon ubọ taksi ye mme ndiọi awo-o?”

¹² Ke adikop ami, Yisọs abọọrọ, “Idooho mbon nsọñidem esiyem abiaibọk, ado mme adọñọ udọñọ.

¹³ Ikaa ikikpeeb se ami awuọọñọ: ‘Ami nyem mbọm, idooho uwa.’ Sia ñkedi ikood mme anam ndiọi, idooho mme nti awo.”

Ebịp Yisọs ebaña utreudia

¹⁴ Ndin mme mbed Yọọn edibịp anye ete, “Nso-o ido ntak a-ñnyịn ye mme Farisi isitreke udia, ado mme mbed mfo itreke?”

¹⁵ Yisọs amaabọọrọ ammọ ate, “Nte nditọ ebendọ ekeme itie abiọñ ke ini ebendọ asʌkkọ aba ye ammọ? Ado ini ayaadi e-ediiben ebendọ ikpọñ ammọ, do ndin ammọ eyaetre udia.

¹⁶ “Awo isibenne ufa afọñ ikịm idian ke akaan afọñ mbaak itie ado adiwakka adiọọk akan akpa.

¹⁷ Ñko awo isibenne akaan ikịm idọñ ufa ukọd, mbaak adudu ufa ukọt adiduad ikịm nọ ukọd aduọkkọ. Ufa ikịm ikpọọñ ke ana ekama esịn ufa ukọd nọ ikịm ye ukọd ekpeene.”

Yisọs anam ayịn abọikpa aset anyʌñ akọk awonwaan udọñọ uwuọ iyiib

¹⁸ Ke ini anye asʌkkọ atañ ikọ anọ ammọ, keed ke atu mme ikpọ akamautom itie ubọñ akam adi, adinyuuk iwuod ke iso amọ abo, “Ayịn abọikpa mmi asʌk akpa idahami, ado di didot anye ubọk, ndin anye ayaadu uwem.”

¹⁹ Yisọs amaadakka ada ye mme mbed amọ ekeene anye.

²⁰ Ke ukem ini ado, awonwaan keed amaakedọñọ udọñọ uwuọ iyiib isua duob ye iba asaña akpere Yisọs ke edem anyʌñ atuuk mben afọñidem amọ.

²¹ Sia anye akekere, “Mkpekan ntuuk afọñidem amọ, idem ayaansọñ.”

²² Yisọs amaakanna iso ase anye, anyʌñ abo anye, “Sọñ idem, mbuọdidem mfo anam idem usọñ.” Kpa ke ukem ini ado idem amaasọñ mma ado.

²³ Ke Yisọs amaakewuọ ufọk ekamba adaukara itie ubọñ akam ami, anyʌñ akịt mme afịd adʌk ye mme atu awo naña enam uyom,

²⁴ anye amaabo, “Iwuọọñọ mi, etək abọikpa ami ikpaahakpa, anye adadaiya.” Ndin ammọ emaesaha anye.

²⁵ Ado ke mbon awo emaekewuọọñọ anwa, anye amaadʌk esịd ufọk akebenne etək abọikpa ado ke ubọk, ndin anye adakka ada.

²⁶ Do ndin mbʌk ami amaatara ayọhọ afịd esịd idʌñ.

Yisọs akọk mme nnan ye imuum

²⁷ Nte Yisọs akesʌkkọ asaña ke usʌñ, mme ideen iba e-ekedoññoke nnan esaña ebọọñ ekeene anye ete, “Itua ñnyịn mbọm, Yisọs Ayịn Defid.”

²⁸ Ndin ke Yisọs amaakewuọ ufọk ado, mme nnan iba ami emaekeene anye, ndin anye abo ammọ, “Ndufo emenịm ke ami mmekeme inam ñkpọ ami?” Ammọ emaebọọrọ, “Abọọñ, iminịm.”

²⁹ Do ndin anye atuuk ammọ anyen, abo “Yak asu inọ ndufo nte mbuọdidem ndufo adooho,”

³⁰ ndin ammọ emaetịmme ekịt ñkpọ. Ado Yisọs amaanekke akpan ammọ, “Ikiiyak awo nte keed adiọọñọ abaña ami.”

³¹ Ado ammọ emaekedaaña, emaesaaña ebʌk ebaña anye ke afịd ñkanñkʌk abio.

³² Ammọ ekesʌk edadakka, emaeben awodeen ñkpọnsọb keed a-akedooho imuum esọk Yisọs.

³³ Ndin anye amaakebịne ndiọi sịbidịd ado isịññe, imuum ado amaatañ ikọ. Idem amaakpa mme awo, ammọ enyʌñ ebo, “Kpaanam akpa ikịtte utọ ñkpọ ami ke Isred ado ami.”

³⁴ Ado mme Farisi ekebo, “Anye akama adudu mme etubom ndiọi sịbidịd abịn mme ndiọi adudu ami asiooño.”

Mme anam utom iwakka

³⁵ Yisọs amaasaña isañ aka ke afịd-afịd mme abio ye mme idʌñ, akpeeb ñkpọ nti mbʌk abio ubọọñ ke mme itie ubọñ akam anyʌñ akọk mme nsio-nsio udọñọ.

³⁶ Ke anye akịtte umiañ atu awo, mbọm anam anye, sia ammọ emaeduọọk idodanyen, nte mme edọñ e-ediinieeghe andikpeme.

³⁷ Ndin anye abo mme mbed amọ ate, “Idọk anekke akpon, ado mme andidọk iwakka.

³⁸ Ibeeñe ndin Abọọñ idọk nọ anọ mbon utom nọ edi idọk amọ.”