Matiu 7 - Ñwed Abasi Ke Ikọ Ibibio Ayo Mfịn

Adibiom awo ikpe

¹ “Kuubiom awo ikpe, mmiidooho ntodo eyaubiom fiin ikpe ñko.

² Sia naña afo abiom awo ikpe, ntodo ke eduubiom fiin ikpe, ñko se adodo ndufo edomoke enọ awo, kpa ado ke ediidomo inọ ndufo.

³ “Ntak afo akịtte ñnyịn-ñnyịn nded ke anyen ayịneka mfo ado ukịtte eka isua nded u-usịneke fiin ke anyen-e?

⁴ Akeme die ibo ayịneka mfo, ‘Yak usio etək ñnyịn-ñnyịn nded u-usịneke ke anyen’ ke ini adooho ata ekamba nded mmọ usịne fiin ke anyen?

⁵ Afo awo ndubịk, bem iso sio ekandịk nded ke anyen mfo ndin ayaakanakịt mfọn-mfọn etək nded se isịne ke anyen ayịneka mfo.

⁶ “Kuunọ ewa se ido adisana ñkpọ: kuutop mme ñkpọuto mfo unọ edi. Adieke anamma ntodo, ammọ ekeme adifiik ke ukod ammọ eboiyo ndin ekanna eda uwai fiin mbai-mbai.

Bịp, yem, kọñ

⁷ “Bịp ke eyaunọ; yem ke ayaakịt; kọñ usʌñ ke eyaebeere unọ,

⁸ Sia awo keed ake adodo a-abịppe ayaabọ; andiyem akịt; andikọñ usʌñ, eyaebeere enọ anye.

⁹ “Aba awo ndomokeed ke atu ndufo a-akpenọọhọ ayịn amọ itiad ke ini anye abịppe uyo?

¹⁰ Me akpaanọ anye udʌkikọd ke ini akebịppe iyak?

¹¹ Adieke ndufo ndin edooho mme ndiọi awo ediọọñọke naña enọ nditọ ndufo nti ñkpọ, die ndin ke Ete ndufo ke anyọñ mmiidiinọọhọ mbio e-ebịppe anye nti ñkpọ.

¹² Ke ukeed ñkpọ nam nọ mbio mfen naña afo akpema ammọ enam unọ fiin, sia anye ami ado ata akpa Ibed Moses ye se mme Brọfed ekekpeeb.

Mfafaha ye ntatara usʌñ

¹³ “Isaña iboiyo ke mfafaha usʌñ. Sia usʌñ a-akaaha nsi-nsi ikañ nsobo akpon anyʌñ atara.

¹⁴ Ado usʌñ uwem afafaha, ndin ibad-ibad awo ikpọọñ ekịt anye.

Nti ye mme brọfed abiaaña

¹⁵ “Itịñ anyen ise mme brọfed abiaaña. Ammọ edi nte edọñ ado ke esịd ammọ edoñño afai ekpe.

¹⁶ Eyaediọọñọ ammọ eto mfịd ammọ. Nte ekeme adikịppe ntọm nto eto ñkukịm ke ikọd? Me fik nto tistịd?

¹⁷ Ke ntodo afịd-afịd nti eto enwịm nti mfịd, ado idiọọk eto anwịm idiọọk mfịd.

¹⁸ Eti eto ikemeke inwịm idiọọk mfịd, nko idiọọk eto ikemeke inwịm eti mfịd.

¹⁹ Eto keed ake adodo a-ammiinwịmme eti mfịd, ekpịkke esio enyʌñ etop esịn ke ikañ.

²⁰ Ke ntom, ndufo eyaediọọñọ mme eto ekeene mfịd ammọ.

Nti ye mme ndiọi mbed

²¹ “Idooho afịd awo eñkoodo miin, ‘Abọọñ, Abọọñ’ ediidʌk abio ubọọñ Abasi, ado sʌk mme andinam uduak Ete mmi a-abaaha ke anyọñ.

²² Uwak awo eyaembo ke usen ado, ‘Abọọñ, Abọọñ, nte ñnyịn ikidakka itañ se idiitịppe ke anyịñ mfo, ibịn ndiọi sịbidịd isiooño mme awo ke idem ke anyịñ mfo, inyʌñ inam utịbe ñkpọ?’

²³ Ndin ami nyaadọkkọ ammọ ke iso ammọ nte: ‘Akenaanam ami idiọọñọke ndufo, indakka ke iso, ndufo mme anañña ndiọiñkpọ.’

Mbio ifiọk ye mme ndisịme abọbufọk

²⁴ “Ndin afịd awo e-ekoppo ikọ mmi enyʌñ enam, ammọ ebit awo ifiọk a-akebọppọ ufọk amọ ke anyọñ itiad.

²⁵ Akem edịm adidep, mme idịm ediyọọhọ etọ anye, ayobio ñko adinyeeñe anye, ado anye iduọọhọ, sia idakisọñ amọ akedo itiad.

²⁶ Ado awo ake adodo a-akoppo ikọ mmi ami, ado inamma, atie nte ndisịme awo a-akebọppọ ufọk ke utatan.

²⁷ Edịm adidep atọ anye, mme idịm eyọọhọ editọ anye, ñko ayobio anyeeñe anye, ndin anye aduọ asuana.”

²⁸ Yisọs amaaketañ ikọ ami ima, idem amaakpa mme atu awo ato ke se anye aketañ,

²⁹ sia anye akekpeeb ammọ nte awo a-anieeghe adudu, idooho nte mme andikpeeb ibed ammọ.