Matiu 4 - Ñwed Abasi Ke Ikọ Ibibio Ayo Mfịn

Edomo Yisọs ke akpautatan

¹ Akem Sịbidịd adiben Yisọs aka ke akpautatan nọ setan adomo anye idomo.

² Ke anye amaakeba ke utreudia ke usen aba ye akonayo aba, mbiọñ amaadọñ anye.

³ Ndin andidomo adibịne anye ate, “Adieke afo adooho Ayịn Abasi bo mme itiad ami ekappa uyo.”

⁴ Yisọs abọọrọ ate, “Emaewet ete, ‘Idiidooho uyo ikpọọñ ke awo adidat idu uwem, ado adu ato afịd ikọ a-atooho Abasi inua.’ ”

⁵ Ndin setan aben anye aka adisana abio anyʌñ anam anye ada ke itie se ikoñ ikan ke tembịd,

⁶ anyʌñ abo anye, “Adieke Afo adooho Ayịn Abasi, tamma duọ ke isọñ. Sia ewet ebo: “ ‘Abasi ayaanọ mme enyere amọ usọk fiin, ndin ammọ eyauben fiin ke ubọk ammọ, mbaak afo udutuak ukod mfo ke itiad.’ ”

⁷ Yisọs abọọrọ anye ate, “Enyʌñ ewet ñko ete, ‘Kuudomo Abọọñ Abasi mfo.’ ”

⁸ Setan amaana aben anye aka ata ñkoñ-ñkoñ abod anyʌñ awọt anye afịd-afịd abio mme ndidem ke afịd ederimbod ye akwa uyai ammọ.

⁹ Anye anyʌñ abo Yisọs ate, “Afịd ami, nyaakappa unọ, adieke atọọñọke edọñ anyʌñ amkpono miin.”

¹⁰ Yisọs abọọrọ anye ate, “Dakka ñkpọñ miin Setan! Sia ewet ete: ‘Kpono Abọọñ Abasi mfo nyʌñ nam ñkpọ nọ anye ikpọọñ-ikpọọñ.’ ”

¹¹ Akem setan akpọñ anye ndin mme enyere emaedi edise ñkpọ ebaña anye.

Yisọs atọọñọ adikwọrọ ikọ

¹² Ke ini Yisọs akoppo ate ke esịn Yọọn ke ufọk ñkpakọb, anye atịmme anyọñ Kadidi.

¹³ Anye ikidʌññọ ke Nasared, ado akappa akedʌñ ke Kapanọm, abio keed a-akpereke ibiok Kadidi ke ubeñ Sebudọn mme Naftadi.

¹⁴ Ke ntom se brọfed Aisaya aketañ amaasu:

¹⁵ “Isọñ Sebudọn ye isọñ Naftadi, ke usʌñ e-esañake eka akpa mmọọñ ke edem inyañ Yọdan, Kadidi mme Yentaid.

¹⁶ Mme awo e-edʌññọ ke akịm eyaakịt akwa unwana. Mbio se idʌñ ke isọñ akịm ñkpa, unwana ayamma anọ ammọ.”

¹⁷ Tọọñọ ke ini ado Yisọs atọọñọ akwọrọ ate, “Ikappa esịd sia abio ubọọñ Abasi akpere.”

Yisọs akood mme akpa mbed amọ

¹⁸ Naña Yisọs akeasañake ke mben Akpa Inyañ Kadidi, anye amaakịt nditọeka iba, Saimọn e-ekoodo Bita, ye ayịneka amọ Andru. Ammọ ekeduọk iyịre ammọ ke ibiok, sia ammọ ekedo mme akọiyak.

¹⁹ Ndin anye abo ammọ ate, “Iñkeene miin, ndin ami nyainam ndufo edo mme akọawo.”

²⁰ Ini keed ammọ ekpọñ iyịre ammọ enyʌñ ekeene anye.

²¹ Ke anye amaakekpọñ do, anye akịt nditọeka iba mfen, Yemsi, ayịn Sebidi, ye ayịneka amọ, Yọọn. Ammọ ekeba ye ete ammọ ke ubom, esʌk ediọñ iyịre. Ndin Yisọs akood ammọ.

²² Ini keed ammọ ñkọ ekpọñ ubom ye ete ammọ ekeene anye.

Yisọs akọk mbon udọñọ

²³ Do ndin Yisọs amaasaña ke afịd Kadidi akpeeb ñkpọ ke mme itie ubọñ akam, akwọrọ eti etob abio ubọọñ Abasi, anyʌñ akọk mme nsio-nsio udọñọ ye una nsọñidem mme awo do.

²⁴ Etob amọ amaasuana ke afịd Siria ndin mme awo emaekoono afịd mbon e-ekedọñọke nsio-nsio udọñọ, akpọsọñ mbiak idem, udọñọ idaad, nsʌkkọ ye akpaubeñ esọk anye, anye anyʌñ akọk ammọ.

²⁵ Mme ekamba atu awo e-eketooho Kadidi, Dekapodis, Yerusedem, Yudia ye edem inyañ Yọdan emaekeene anye.