Maak 6 - Ñwed Abasi Ke Ikọ Ibibio Ayo Mfịn

Brọfed a-ammiineeghe ukpono

¹ Yisọs amaakpọñ itie ado aka idʌñ amọ ye mme mbed amọ.

² Akekem ke usen Sabad, anye atọọñọ adikpeeb ñkpọ ke sinakọk, ndin idem amaakpa uwak awo se ikikop ukpeebñkpọ amọ, ammọ enyʌñ ebịp ete, “Ke mmọ-ọ ke awo ami akedat afịd ukpeeb ami ato? Nso-o utọ ifiọk ido e-enọọhọ anye mi? Nso-o ido utọ mme nwuọnda utịbe ñkpọ anye anamma mi?

³ Idooho kabinta ado ami? Idooho ayịn Mmeri ado ami, ayịneka Yemsi, Yosef, Yudas ye Saimọn? Nditọeka amọ ibaan ibaaha mi ye ñnyịn?” Ndin ammọ emaeyat esịd ye anye.

⁴ Ndin Yisọs amaabo ammọ ate, “Brọfed inanake ukpono ibọhọke ke abio ammọ, ye ke atu mme ayakka amọ, ye ke ufọk amọ.”

⁵ Anye ikikanna inam mme utịbe ñkpọ do, ibọhọke adidot ubọk amọ ke iwuod akpọ awo ifañ i-idem mmiikisọññọ ñnyʌñ ñkọk ammọ udọñọ.

⁶ Unana mbuọdidem ammọ amaakpa anye idem eti-eti. Ndin Yisọs amaasaaña ke idʌñ ke idʌñ akpeeb ikọ Abasi.

Yisọs asio ibed amọ duob ye iba adọñ utom

⁷ Akem anye amaasio mme mbed amọ duop ye iba ate esaaña iba-iba ekekwọrọ ikọ Abasi. Anye amaanọ ammọ adudu adibịn mme ndiọi sịbidịd nsioho.

⁸ Anye ñko amaanọ ammọ ikpan ate, “Ikiikama ñkpọ ndomokeed ke isañ ami, nte uyo, me ekpad, me akʌk ke nkịne isịn, ibọhọke esañ.

⁹ Isịne ikpaukod, ado ikiikama ukpʌghọ afọñidem.

¹⁰ Ufọk ake adodo a-ndufo edʌkkọ, itie do tutu ndufo ekpọñ abio ado.

¹¹ Itie keed akeadodo mmiidarake ndufo, mmiinyʌññọ ikpañ utọñ inọ ndufo, imaekpọñ do, ikeñ ntan ikpad ndufo ibon nte ntiense inọ ammọ.”

¹² Mme ibed amọ emaewuọọñọ ekekwọrọ ikọ Abasi, ete yak mme awo ekappa esịd.

¹³ Ammọ emaenyʌñ ebịn uwak ndiọi sịbidịd esioño mme awo ke idem enyʌñ eyet mbon udọñọ adan emaana ekọk mme udọñọ.

Ekpịkke Yọọn Aduọkmmọọñ iwuod

¹⁴ Adidem Herọd amaakop abaña se ikitịppe sia anyịñ Yisọs amaasuana. Usʌk emaetọọñọ itañ ete, “Yọọn Aduọkmmọọñ aset ke ñkpa, anye ado ntak adudu adinam utịppe ñkpọ enamma utom ke idem amọ.”

¹⁵ Mbon mfen ete, “Anye ado Edaiya.” Usʌk mbon mfen ekeekere ebo ete, “Anye ado brọfed, nte keed ke atu mme brọfed esed.”

¹⁶ Ado ke ini Herọd akeakoppo ami, anye amaabo ate, “Yọọn, awo a-ñkekpịkkeke iwuod aset ke ñkpa!”

¹⁷ Sia ado Herọd ke idem amọ akenọ uyo ate yak emʌm Yọọn esịn ke ufọk ñkpakọp, anye amaanam ebọp anye ekesịn ke ñkpakọb. Anye akenam ami ke ntak Erọdias, anwaan ayịneka amọ Fidib, a-anye Herọd akebenne adọ.

¹⁸ Sia Yọọn akedọkkọke Herọd ate, “Ibed akpan afo adidat anwaan ayịnuka ndọ.”

¹⁹ Ami akesịn Erọdias anie udu ke esịd abaña Yọọn anyʌñ ayem usʌñ naña awot anye. Ado anye ikikịtte usʌñ adinam ntodo.

²⁰ Koro Herọd amaanie ndịk abaaha Yọọn, anyʌñ akpekpeme anye ñko, sia anye amaadiọọñọ abo ke Yọọn akedo nnen-nnen ye adisana awo. Ke ini Herọd akekoppo se Yọọn aketañ, esịd amaatịmede anye, ado kpa ye ado anye akesʌk amama adikpañ utọñ nnọ Yọọn.

²¹ Ke akpatre Erọdias amaanie ufañ a-anye akeyemme. Ke usen emana Herọd, anye Herọd amaanam ekamba usọrọ anọ mme ikpọ ñkpisọñ amọ ke ukara, ye ikpọawo ke ekọñ, ye mme awuọiso awo mfen ke abio Kadidi.

²² Ini ayịn abọikpa Erọdias adinekke unek ke iso Herọd, anye amaanam esịd anem Herọd ye mme isenawo amọ. Adidem Herọd amaabo ayịn abọikpa ami ate, “Mbeeñe ñkpọ akeedodo se afo ama, ndin nyaunọ.”

²³ Herọd aketañ ami ye unwọñọ ate, “Se adodo afo abeeñeke, ñyaunọ, akpedodo ubaak abio ubọọñ mmi.”

²⁴ Ayịn abọikpa ami amaawuọ akebịp eka amọ ate, “Nso-o ke ñkpebeeñe adidem yak annọ?” Eka amaabọọrọ ate, “Iwuod Yọọn Aduọkmmọọñ.”

²⁵ Ini keed, ayịn abọikpa ado amaafeghe akedọkkọ adidem ate: “Ñyem afo annọ miin idahami iwuod Yọọn Aduọkmmọọñ ke usan.”

²⁶ Adidem amaafʌghọ eti-eti, ado sia akedooho enwọñọ amọ ye ntak mme ikpọ isenawo amọ, anye ikikanna isịn adinọ anye se anye akeyem.

²⁷ Ke ndo-ndo ado, anye amaanọ awodawo adudu ate akpikke iwuod Yọọn aben adi. Awo ami amaaka, akekpịkke Yọọn iwuod ke ufọk ñkpakọb,

²⁸ anyʌñ aben iwuod amọ adi ke usan. Erod amaaben iwuod ami anọ ayịn abọikpa ado, ndin anye aben asọk eka amọ.

²⁹ Ke ini mbed Yọọn ekekoppo, ammọ emaediben akpo Yọọn ekebuuk ke udi.

Yisọs anọ tọsịn awo ition ndidia

³⁰ Akem mme abọsịd Yisọs emaedibono ekanna Yisọs ekʌk enyʌñ etañ enọ anye afịd ñkpọ se ammọ ekenam enyʌñ ekpeeb.

³¹ Ndin sia akedooho uwak awo ededi enyʌñ enyọnyọñọ, a-akekereke ammọ ikinieeghe ini se edia kpak ñkpọ, Yisọs abo ammọ ate, “Iñkeene miin, ndufo-ndufo, nọ ika ndịbe-ndịbe itie ikibọ nduọkadudu.”

³² Do ndin ammọ edaaña ekaiya ikpọọñ-ikpọọñ itie ke idem ammọ ke ubom.

³³ Ado uwak awo e-ekediọọñọke ammọ emaekịt idaha ammọ edaañake, enyʌñ efeeñe abod-abod eto ke afịd mme abio do ebem Yisọs ye mbed amọ ekewuọ itie ammọ ekedibeheke.

³⁴ Ke ini Yisọs adisịmme, anyʌñ akịt ekamba atu awo ado, udʌk anam anye sia ammọ ekeba nte mme edọñ e-emmiinieeghe andikpeme. Ke ntodo anye amaatọọñọ adikpeeb ammọ uwak ñkpọ.

³⁵ Amaakediwuọ ndubi, mme mbed amọ ediediibo anye ete, “Itie ami anyọọñ usʌñ akpọñ abio, ñko ayo akekịm ama.

³⁶ Nam nọ mme awo ami enyọñọ ma ammọ ekedep ñkpọ edia ke mme ñkanñkʌk esịd idʌñ ami.”

³⁷ Ado anye amaabọọrọ ammọ ate, “Ndufo inọ ammọ ñkpọ edia.” Ammọ ebọọrọ anye ete, “Ado adiikpa ñkpọ nte mbakka iba akʌk afiọñ isuakeed. Nnyịn idiibiad afịd ado ke adinọ ammọ uyo eta?”

³⁸ Anye abịp ammọ ate, “Eboho uyo ifañ ke ndufo enie? Ikaa ikise.” Ammọ ekekekịt, ammọ ebọọrọ ete, “Uyo ition ye iyak iba.”

³⁹ Ndin Yisọs abo ammọ ate enam nọ afịd awo etie ke eboho ke eboho ke awawa mbid ado.

⁴⁰ Ammọ enyʌñ ebono ke eboho, usʌk awo ikie, usʌk aba mme duob.

⁴¹ Yisọs amaakeben uyo ition ye iyak iba ami, amaabene anyen ase anyọñ, anọ Abasi ekọọm, anyʌñ abuuñ mme uyo ado, ndin anye amaayaak anọ mbed ate edeeme enọ mme atu awo ado. Anye amaanyʌñ abakka iyak ado anọ afịd ammọ.

⁴² Afịd ammọ emaeta enyʌñ eyʌkkọ,

⁴³ ndin mme mbed amọ emaekoono mme mbeñe uyo ye iyak se ikisʌhọ a-akeyọhọke akpasa duop ye iba.

⁴⁴ Mme awo se ikidia ñkpọ ekedo tọsịn ition.

Yisọs asaña ke anyọñ mmọọñ

⁴⁵ Idaha-idahado Yisọs amaanam mme mbed amọ edọñọ ubom, ebem anye iso esañ ke Bedsaida ke ini anye amaakenam mme atu awo ado enyọñọ.

⁴⁶ Amaakekpọñ ammọ, anye amaaka ke anyọñ abod akebọñ akam.

⁴⁷ Ke ndubi ado, ubom a-mme mbed ekesañake amaakewuọ ufọọd ibiok, ado anye akeba ikpọọñ ke abod.

⁴⁸ Anye amaada akịt naña mbed amọ edəho ye udeñ, ke esịd ubom sia afịm amaafịna eti-eti. Ke akịm ubakusen, anye amaasaña abịne ammọ ke anyọñ mmọọñ ibiok ado. Ke ini anye akeayemme isaña iboyo ammọ,

⁴⁹ Ado ammọ ekeekịt anye naña asaña ke ibiok, ammọ ekere ke anye ado ekpo. Ndin ammọ ema ebọñọ ñkpo,

⁵⁰ sia afịd ammọ emaekịt anye ndịk anyʌñ anam ammọ. Ukem idahado anye ate ammọ, “Isọñ esịd. Ami ke ado. Ikiifeghe ndịk.”

⁵¹ Ndin anye adʌk ubom ye ammọ, afịm ñko anyʌñ atre. Idem amaanekke akpa ammọ,

⁵² sia utịbe ñkpọ uyo ado ikinwañake ammọ, koro esịd ammọ amaadoro ufiọñ.

⁵³ Ammọ emaekekaaña mmọọñ ekebeghe ke Yenesaded,

⁵⁴ Ammọ ekesʌk ewuo-wuọọñọ ke ubom, mme awo emaediọọñọ ke Yisọs adoro.

⁵⁵ Mme awo ami emaefeeñe eto afịd ñkanñkʌk do, ekoono mbon udọñọ ke aya eka itie nte ammọ ekekokop ke anye mmọ aba do.

⁵⁶ Itie nte anye akekaka, me esịd idʌñ, me abio, me inwañ, mme awo emaekokoono mbon udọñọ edibon ke mme anwa udua. Ammọ emaenyʌñ ekpeiye anye ete ayak mmimọ ituuk ñkọm mben afọñidem amọ, ndin afịd awo se ikituuk emaekop nsọñidem.