Maak 5 - Ñwed Abasi Ke Ikọ Ibibio Ayo Mfịn

Yisọs akọk awo anieeghe dimọn

¹ Akem Yisọs ye ibed amọ emaeboiyo ekesịm edem ibiok ke ñkañ Kerasin.

² Ke Yisọs amaakewuọ ke ubom, awo a-anieeghe ndedeghe sịbidịd amaawuọ ke itie itiad udi adisoobo anye.

³ Awo ami akesidʌñ ke itie mme itiad udi sia awo ndomokeed miikikanna ibọp anye ke idʌk ukwak item ke itie keed.

⁴ Ata uwak ini, emaebọp anye ubọk ye ukod etem, anye akịp idʌk anyʌñ akpək afịd ukwak ke ukod ye ubọk. Ibaaha awo ndomokeed akneaniehe adudu adikan mbọp anye aba.

⁵ Afịd akoneyo ye uweeme, ke itie mme itad udi ami ye ñkan-ñkʌk abod, awo ami ayaabọọñ ñkpo anyʌñ akama itiad akpək idem amọ.

⁶ Ke ini anye amaakeada ikịt Yisọs nsan-nsan, anye amaafeghe aketọọñọ edọñ ke iso Yisọs.

⁷ Ndin anye abọọñ ñkpo ke afịd adudu amọ. “Nso-o ke afo ayem ye ami, Yisọs Ayịn Andikoñ Ñkan Abasi Ibom? Mmuukpeiye fiin ke anyịñ Abasi mbo kuuntʌkkọ miin!”

⁸ Anye aketañ ami sia Yisọs amaakebo anye, “Wuọ kpọñ awo ami, afo ndedeghe sịbidịd!”

⁹ Akem Yisọs amaabịp anye, “Afo akere die?” Anye abọọrọ, “Ami ñkere diyọn, sia ñnyịn iwaawak.”

¹⁰ Ndin anye akpeiye amaana akpeiye Yisọs ate anye akuubịn mmimọ isio ke nkanñkʌk ado.

¹¹ Mme uwak udịm edi ekesʌk edia ñkpọ ke ñkpere ntək abod ado.

¹² Mme sịbidịd ado ebeeñe Yisọs ete, “Inọ ñnyịn ikidʌk idọñọ ke mme idem mme edi ako.”

¹³ Anye amaanọ ammọ adudu, ndin mme ndiọi sịbidịd ado ewuọọñọ ekedọñọ ke mme edi ado. Atu edi e-ekewakka ñkpọ nte tọsịn iba emaebịmme efeeñe ediad abedeñ ibiok ado enyʌñ ekekpañña ke mmọọñ.

¹⁴ Mme akpeme edi ado emaefeeñe eketañ se ikitịppe enọ mbon abio ke esịd idʌñ, ndin mme awo emaewuọọñọ edika ekese se ikitịppe.

¹⁵ Ke ini ammọ emaekedisoobo Yisọs, ammọ emaekịt awodeen akeanieeghe uwak ndiọi sịbidịd ami nte asịne afọñ atie nte adeghe awo ye Yisọs, idem amaanyeñ ammọ.

¹⁶ Mbio se ikikịt ami emaeketañ enọ mbio mfen se ikitịppe inọ awo a-mme ndiọi sịbidịd atʌkkọke ye ñko se ikitịppe inọ mme edi.

¹⁷ Mme awo ndin emaedikpeiye Yisọs ete yak anye akpọñ nkanñkʌk mmimọ.

¹⁸ Naña Yisọs abooho idʌk ubom, awo a-akenieeghe ndiọi sịbidịd ammakpeiye ate yak imọ ikeene anye.

¹⁹ Ado Yisọs ikinyịmmeke, utu ke ndo Yisọs abo anye ate, “Tịmme nyọñ ufọk bịne ikọd mfo nyʌñ ke dọkkọ ammọ se Abọọñ anam unọ ye naña anye anie mbọm unọ fiin.”

²⁰ Awo ado amaanyʌñ anyọñ atọọñọ itañ ke abio Dekapodis se Yisọs akenam anọ anye. Ndin idem akpa afịd awo.

Yisọs anam abọikpa aset ke ñkpa anyʌn akọk awonwaan a-adọñọke

²¹ Ke ini Yisọs amaakeboiyo ke ubom ikiwuọ edem ibiok uko, ekamba atu awo emaedida ekanna anye ekʌk idaha anye abaaha ke mben ibiok ado.

²² Ndin abọọñ keed a-akekereke Yairọs ke atu mme etubom ke itie sinakọk amaadi do, anye akekịt Yisọs, anye adwuọ ke edọñ.

²³ Anye anyʌñ akpeiye anye ate, “Etəkayịn awonwaan mmi akpere ñkpa. Mbọk di didot anye ubọk ke idem nam idem asọñ anye nọ anye adu uwem.”

²⁴ Yisọs amaakeene anye. Ekamba atu awo emaekeene anye enyʌñ ebed anye.

²⁵ Ndin amaaba awonwaan keed amaakedọñọ udọñọ uwuọ iyiib isua duop ye iba.

²⁶ Anye amaabọ ufen eti-eti ke ubọk uwak mbiaibọk anyʌñ abiad afịd akʌk se anye akenie, ado utu ke idem adisọñ anye, aneenekke adiọọk akan naña akedo.

²⁷ Ke anye amaakekop ñkpọ abaña Yisọs, anye amaasaña ke atu mme awo ato edem anyʌñ atuuk afọñ Yisọs,

²⁸ sia anye akekere ntom ate, “Adieke ñkpesʌkkọ ntuuk afọñ amọ, idem ayaansọñ.”

²⁹ Ukem idahado anye atuuhọ afọñ Yisọs, udọñọ uwuọ iyiib ado akweeñe anye, anye anyʌñ akop ke idem amọ ate ke mfịna imọ aikpọñ imọ.

³⁰ Kpa ke ukem idahado Yisọs adiọọñọ ke adudu iwuọ imọ ke idem. Anye akanna iso ke atu awo ado anyʌñ abịp ate, “Anie awo ikituuk afọñ mmi?”

³¹ Mme mbed amọ emaebọọrọ anye ete, “Ñkọ afo amekịt atu awo se ukana fiin ikʌk, ado afo atịmme abịp ate ‘Anie awo intuuk?’ ”

³² Ado Yisọs asʌk aka iso asuaan anyen adikịt andikituuk anye.

³³ Ndin awonwaan ado amaakediọọñọ se ikitịppe inọ imọ, awuọ adi anyʌñ aduọ ke ukod Yisọs ye ñnyekidem ye ndịk, ndin anye atañ afịd akpanikọ anọ anye.

³⁴ Ndin Yisọs amaabo anye ate: “Yịn awonwaan, mbuọdidem mfo unyaaña fiin. Ka ke emem, mfịna mfo ukpọñ fiin.”

³⁵ Ke idaha Yisọs asʌkkọ atañ ikọ do, mme awo emaeto ufọk Yairọs, adaukara ke sinakọk, ekebo anye ete, “Ayịn awonwaan mfo akpa. Ntak asʌkkọ afịna Andikpeeb aba-a?”

³⁶ Ke Yisọs amaakop, se ibon ado eketañ, anye amaabo adaukara ke sinakọk ate, “Kuuyak idem unyeñ; kap nịm ke akpanikọ.”

³⁷ Anye ikiyakka awo ndomokeed, ibọhọke Bita, Yemsi ye Yọọn, ayịneka Yemsi, akeene Anye.

³⁸ Ammọ emaekedisịm ufọk adaukara ke sinakọk, Yisọs amaakịt akpọsọñ ndutịme ye naña mme awo etuaha enyʌñ ebọọñ ñkpo.

³⁹ Anye amaadʌk ufọk anyʌñ abịp ammọ ate, “Ntak afịd ndutịme ye ñkpo ami-e? Ayịn ami ikpaaha-kpa, adadaiya.”

⁴⁰ Ado ammọ ekesaasak anye. Ke anye amaakenam afịd awo ewuọọñọ, anye adat ete ye eka ayịn ye mme mbed e-ekebaaha ye anye adʌk aka itie nte ayịn akeanaa.

⁴¹ Yisọs amaamʌm anye ubọk anyʌñ abo anye ate, “Talitha koum!” (awuọọñọke “Etək abọikpa, Ami ubo fiin, dakka da!”).

⁴² Ayịn ami amaadakka ada ini keed anyʌñ atọọñọ isaña ñkanna (anye akedo ayịn isua duop ye iba). Idem amaanekke akpa mme awo adikịt utọ ñkpọ ami.

⁴³ Ado anye amaanekke awuuk ammọ ate ammọ keenam awo ndomokeed adiọọñọ abaña ñkpọ ami, anye amaanyʌñ abo yak ammọ enọ ayịn ado ndidia adia.