Maak 15 - Ñwed Abasi Ke Ikọ Ibibio Ayo Mfịn

Yisọs ke iso Baided

¹ Ata ubahausen ke ayo amaakesiere, mme ikpọ aku ye mme ñkpisọñ, ye mme andikpeeb ibed ye afịd mbon Sanhidrin emaenam edioomo ammọ. Ndin ammọ emaebọp Yisọs, eben anye esañña ekeyaak enọ Baided.

² Ndin Baided amaabịp anye ate, “Nte afo ado adidem mme Yuu?” Ndin anye amaabọọrọ Baided ate. “Ado naña afo atañ.”

³ Mme ikpọ aku ndin etañ umiañ ikọ nsu edian anye.

⁴ Baided amaatịmme abịp anye ate “Afo usʌkkọ ubọọrọ ndomo ikọ keed? Ke afịd umiañ ikọ se etañ udot fiin?”

⁵ Ado Yisọs ikisʌkkọ ibọọrọ, anam idem amaakpa Baided eti-eti.

⁶ Akedo ido Baided adisaana awo ñkpakọb keed ñyaak kwa ini usọrọ, awo ake idʌñ ebo esaana eyaak.

⁷ Ndin amaaba awo keed a-akekereke Barabas, a-akebaaha ke nkpọkọb ye mbon mfen e-ekesịnne ntịme ke abio, kpa ye mbon e-ekewooto awo ke ntịme ado.

⁸ Atu awo ami emaedi ebịne Baided edibeeñe anye ete anam naña anye asisʌk anam ke ini usọrọ ntom.

⁹ Mi ke Baided akebịp ammọ ate, “Ndufo ebo ñyaak adidem mme Yuu inọ ndufo?”

¹⁰ Anye akebịp mbịme ami sia anye amaadiọọñọ abo ke ato ke ntak ufịb akesịn mme ikpọ aku ekeyaak Yisọs inọ imọ.

¹¹ Ado mme ikpọ aku edọọñ atu awo ado ete ebo Baided asaana Barabas ayaak.

¹² Baided ndin amaatịmme abịp ammọ ate, “Ndufo ebo nnam nso-o ndin ye anye a-ndufo ekoodo adidem mme Yuu?”

¹³ Afịd ammọ emaedọñ uyo keed ebọñ ete, “Kọñ anye ke krọs!”

¹⁴ Baided ate ammọ, “Ntak-a? Nso-o ndudue ke anye anam?” Ammọ eneneke ebọñọ ñkpo ete, “Kọñ anye ke krọs!”

¹⁵ Baided, ke adiyem adinem atu awo ado esịd, amaasaana Barabas ayaak anọ ammọ. Anye amaanam emia Yisọs eti-eti, ndin asaana anye ayaak anọ ammọ ate eben ekekọñ ke krọs.

Mbon ekọñ enọ Yisọs ñnyọ

¹⁶ Mbon ekọñ emaeben Yisọs ewuọ edʌk esịd akwere, (adodo Britodium) enyʌñ ekood umiañ mbon ekọñ ediyọhọ.

¹⁷ Ammọ emaesịn anye ewra, a-akebaaha iduud-iduud, anye, edọk anyanya ñkukịm eyat anye ke iwuod.

¹⁸ Ndin ammọ emaetọọñọ iben anye ntọọñ ndọk, ete, “Imukọọm fiin, adidem mme Yuu.”

¹⁹ Ammọ emaeben esañ emia anye ke iwuod, enyʌñ ekọkkọ etab etọ anye. Etọọñọ edọñ etuak iwuod enọ anye.

²⁰ Ke ammọ emaekesuenne anye ema, ammọ emaesio anye iduod-iduod afọñ ewra ado enyʌñ eben afọñidem amọ esịn anye. Ndin ammọ amaeben anye ewuọ eka adikọñ anye ke krọs.

Adikọñ Yisọs ke krọs

²¹ Saimọn, ete Adeksanda ye Rufọs, a-akedooho awo abio Sirin, akeato esịd abio ayem adisaña mboiyo, ammọ emʌm anye eyịk ete abiom krọs ado.

²² Ammọ eben anye edika Kọọdkọta (awuọhọ itie “ñkpọkpọrọ iwuod awo”).

²³ Do ke ammọ ekeben ukọd ewaaha ye atidod enọ anye, ado anye ikibọọhọ.

²⁴ Ndin ammọ emaekọñ anye ke krọs, edeeme afọñidem amọ, ke emaekesịn ukañ adidiọọñọ mme ake afọñ ke awo keed-e-keed adidat.

²⁵ Akedo ñkanika usʌkkeed ubahausen ke ammọ ekekọñ anye ke krọs.

²⁶ Ndin ammọ emaewet ikọ ubiọmikpe edian do ke krọs, ete: “Adidem mme Yuu.”

²⁷ Ammọ emaekọñ mbon amauke iba ke eto krọs ediana anye, keed ke ubọk udom, keed ke ufiin.

²⁸ Ntom ke ikọ ñwed Abasi e-ekewette ebaña anye akesụ: “Ndin ebat anye esịn ke atu mme anam ukuañ ñkpọ.”

²⁹ Mbon se ikisaña iboiyo do emaesueñ anye, efuuñ iwuod, ete, “Afo a-anieeghe ukeme adiwuud tembịd nyʌñ mbọp ke usen ita,

³⁰ sọiyọ ke krọs dinyaaña idem mfo-o!”

³¹ Ke ukem usʌñ ado mme ikpọ aku ye mme akpeeb ibed ke atu idem ammọ ñko emaesaha anye, ete, “Anye akekan inyaaña mbon mfen, ado ikanna inyaaña idem amọ.

³² Yak Mesaya ami, Adidem Isred ami, asọiyọ do ke krọs, nọ ñnyịn ikịt inyʌñ inịm anye ke akpanikọ.” Mbon e-ekekọññọ ke krọs edian anye emaekeene esueñ anye.

Ñkpa Yisọs

³³ Akediwuọ ufọọd uweemeayo akịm amaafʌk isọñ tutu ñkanika ita uweeme.

³⁴ Ndin ke ñkanika ita uweeme Yisọs asio ñkpo ke akpọsọñ uyo, “Edoi, Edoi, lema sabaktani?” (Ikọ ami awuọ, “Abasi mmi, Abasi mmi, nso-o inam afo añkpọñọ miin?”)

³⁵ Ke ini usʌk mbon se ikida ikpere ekeekoppo, ammọ emaebo ete, “Kop naña anye abọọñ akood Edaiya.”

³⁶ Ete keed amaafeghe akedat ndọbọ, anyiin ke ukọd fineka atot ke eto anyan anọ Yisọs ate anwọñ. Akem awo ami amaabo ete, kpọñ anye, yak ise me Edaiya ayaadikọññọ anye ke krọs.

³⁷ Yisọs amaamaana abọọñ ñkpo ke akpọsọñ uyo, ndin ayaak ukpọñ amọ, anweek akpatre ibifịk.

³⁸ Idahado, ikpeghe ke esịd tembịd amaasakka mbaak iba, tọọñọ ke anyọñ tutu awuọ isọñ.

³⁹ Kini sentudiọn, etubom mbon ekọñ a-akedaaha do ke iso Yisọs akịtte naña anye akpa, anye amaabo ate: “Ke akpanikọ, awo ami akedo Ayịn Abasi.”

⁴⁰ Mme ibaan mmọdo ekeba e-ekedaaha nsan-nsan ese se ikitịppe ami. Ke atu ammọ akedo Mmeri Makdadin, ye Mmeri eka Yemsi etək-etək ayịneka ye Yosef ye Sadomi.

⁴¹ Mme ibaan ami e-ekesisañake ye Yisọs ese ñkpọ ebaña anye idaha akebaaha ke Kadidi. Uwak ibaan mfen e-ekesañake ye anye eto Yerusedem edi emaeba do nko.

Adibuuk Yisọs

⁴² Akedo ke Usen Mbeeñeidem (ami ado usen keed mbemiso asiere usen Sabad.) Ndin akediikpere ndubi,

⁴³ Yosef awo Arimatia, ekamba awo ke akwa esob mme Yuu, a-anye ke idem amọ a-aketieeghe abet ini adidi abio ubọọñ Abasi, amaabịne Baided uko-uko akebịp akpo Yisọs.

⁴⁴ Idem amaakpa Baided adikop ke Yisọs amaakpakpa. Adọñ ekood sentudiọn, anye amaabịp me Yisọs amaakpakpa

⁴⁵ Anye amaakekop ito sentudiọn ke Yisọs amaakpa, anye amaayaak akpo amọ anọ Yosef.

⁴⁶ Yosef amaakedep ufa afọñ dinen, akekọññọ akpo Yisọs awañ anye ke dinịn ado, aben akpo Yisọs akesịn ke udi, e-ekekappa itiad etịppe. Ndin anye amaakpat ubaak itiad akue inua udi.

⁴⁷ Mmeri Makdadin ye Mmeri eka Yosef emaekịt itie e-ekebuuhọ anye.