Maak 14 - Ñwed Abasi Ke Ikọ Ibibio Ayo Mfịn

Eyet Yisọs adan ke Betani

¹ Akesʌghọ usen iba mbemiso adikem usen usọrọ Basofa ye Usọrọ Uyo a-awo mmiisisịnne defịn; ndin mme ikpọ aku ye mme andikpeeb ibed eyem ñkara-ñkara usʌñ naña eda emʌm Yisọs ndịbbe-ndịbbe enyʌñ ewot.

² Ammọ emaedioomo ke atu idem ammọ ete ke inaaha emʌm anye idaha usọrọ ado mbaak atu awo edinam ntịme.

³ Ndin naña anye abaaha ke Betani abere ke akpokoro ndidia ke ufọk Saimọn awo akpamfia, awonwaan keed amaadʌk aka adi, akama ata nsọñudua a-anemufịk adan ke ekpeme adabasta e-ekedatta naad enam. Awonwaan ado amaakʌppọ ekpeme adan ado aduọk anye ke iwuod.

⁴ Usʌk awo ke ufọk ado emaenekke eyaad esịd ke atu idem ammọ, ete, “Ebiad utọ nsọñudua adan ami ebaña so-o?

⁵ Adan ado akem se ekpenyam ebọhọ akʌkutom afiọñ ake isuakeed enyʌñ eben akʌk ado enọ mme uwueene.” Ntom ke ammọ ekesua enọ mma ado.

⁶ Ado Yisọs amaabo ammọ ate: “Ikpọñ anye. Nsido ntak efịnake anye? Anye anam eti ñkpọ ke idem mmi.

⁷ Mbon uwueene ediisʌk ibaba ye ndufo afịd ini, ndin ini ake ndufo emama emekeme adinwam ammọ. Ado ndufo idinnieeghe miin afịd ini.

⁸ Awonwaan ami akenam se anye akan. Anye ababak anyet miin anemufịk adan abeeñe ini e-edimbuuk miin.

⁹ Ke akpanikọ ke ntañ inọ ndufo, itie ake adodo e-edikwọrọ eti mbʌk ami, ke afịd ederimbod eyaetañ se awonwaan ami akenam, edat ado etoiyo anye.”

¹⁰ Akekem Yudas Iskariọd, keed ke atu mme mbed duob ye iba, emaadakka abịne mme ikpọ aku akenam edioomo nọ atap Yisọs anọ ammọ.

¹¹ Esịd amaanem ammọ eti-eti naña ekoppo, ammọ emaenyʌñ enwọñọ adinọ anye akʌk. Ndin anye atọọñọ ayem ufañ naña ada atap anye ayaak anọ ammọ.

Akpatre ndidia ndubi

¹² Ke akpa usen Usọrọ Uyo a-defịn mmiisisịneke, a-akenaaha esiwot edọñ Usọrọ Nsaña Mboyo, mme mbed Yisọs emaebịp anye ete, “Ayem ñnyịn ika itie ake-e ikinam ndutʌm ñkpọ se afo uduudia Usọrọ Nsaña Mboyo?”

¹³ Ndin anye asio mbed amọ iba ate ammọ, “Ikaa esịd abio, eeyaekịt awodeen keed nte akama abañ mmọọñ. Ikeene anye.

¹⁴ Ndin ufọk ake anye adidʌk, ebo anieufọk ado ke Andikpeeb abo, ‘Ubeed isen mmi a-ndiididia Basofa ye mme mbed mmi ado ake-e?’

¹⁵ Anye ayaiwọt ndufo ekamba ubeed ke anyọñ e-emaekebeeñe inịm. Itʌm mme ñkpọ ke ndo ibeeñe ñnyịn.”

¹⁶ Mme mbed emaeka ekedʌk abio, ekekịt ukem-ukem naña Yisọs akebo ammọ. Ndin ammọ enyʌñ etʌm Basofa ebeeñe ebet anye.

¹⁷ Ndubi ado, Yisọs amaasaña ye mbed duob ye iba adiwuọ.

¹⁸ Ke ini ammọ ekebonoke ke akpokoro edia ndidia, Yisọs ate, “Ke akpanikọ ke ntañ inọ ndufo, awo keed ke atu ndufo, a-adiaaha ñkpọ mi ye ami, ayaantap miin.”

¹⁹ Ammọ etọọñọ adifʌhọ, ndin ke adiana ke adiana, emaebịp anye ete, “Ñkọ idooho ami-o?”

²⁰ Ndin anye amaabọọrọ ammọ ate, “Ado awo keed ke atu ndufo adiideeb uyo ke usan ndidia ye ami.

²¹ Ayịn Awo ana anyọñ, ukem naña ekewet ebaña anye. Ado ayaadiọọk inọ awo ake aditap Ayịn Awo. Akpaafọn ye awo ado adieke anye mmiikpikimanake mana.”

²² Ke ammọ ekaaha iso edia ñkpọ, Yisọs amaaben uyo, ndin ke anye amaakenọ ekọọm a-ma, anye amaabuuñ anọ mme mbed amọ, ate, “Ibọ ami, ita; ami ado ikpọkidem mmi.”

²³ Akem anye aben kọọb, ke anye amaakenọ ekọọm, anye amaayaak anọ ammọ, ndin afịd ammọ enyʌñ enwọñ anye.

²⁴ Anye abo ammọ “Ami ado iyiib mmi ake ufa edioomo, e-eduọkkọ enọ uwak awo.

²⁵ Ke akpanikọ ke ntañ inọ ndufo nte, ami ndiinwọññọ mmịn atooho mfịd fain aba, tutu awuọ usen a-ndiitịmme ñnwọñ ke abio ubọọñ Abasi.”

²⁶ Ke ammọ emaekekwọ ikwọ, afịd ammọ emaewuọọñọ eka Abod Ọdif.

Yisọs ababak atañ ke Bita ayaaikañ imọ

²⁷ Do ke Yisọs aketañ ye mbed ammọ ate: “Afịd ndufo eyaefeeñe eñkpọñ miin akonayo ami, sia emaewet ebo, “ ‘Nyaakpi akpemedọñ, ndin mme edọñ eyaesuana.’

²⁸ Ado, ami mmaaset ke ñkpa, ñyaibem ndufo iso ñka ke abio Kadidi.”

²⁹ Bita amaatañ anwa-anwa ate anye, “Afịd awo ekpukpọñ fiin, ami nduukpọññọ.”

³⁰ Yisọs amaabọọrọ anye ate, “Ke akpanikọ ke ntañ unọ fiin, mfịn ami, kpa idem akonayo ami, mbemiso akikọ akpọk akañ iba, afo ayaañkañ miin akañ ita.”

³¹ Ado Bita asọọñọ ayịre atañ ate, “Akpedo ana ñkpa ye afo, ami nduukañña fiin.” Ndin afịd mmọn ñko etañ kpa ukem ado.

Ketsemeni

³² Ammọ edaaña ekaiya itie e-koodo Ketsemeni, ndin Yisọs amaabo ammọ ate, “Ibet mmi, naña ami mbọọñọ akam.”

³³ Anye amaadat Bita ye Yemsi ye Yọọn aka, idem amaatọọñọ adifịna anye eti-eti anye amaanyʌñ akop akpọsọñ mfʌhọ.

³⁴ Anye amaasio adọkkọ ammọ abo, “Ukpọñ mmi afʌhọ eti-eti akpere ñkpa. Itie mi, inyʌñ ikpeme.”

³⁵ Anye akesaña adọọk etək, anye aduọ ke isọñ abọñ akam ate adieke usʌñ abaaha, yak ini ado aboiyo ikpọñ imọ.

³⁶ Anye ate, “Abba, Ete, afo amekan adinam afịd ñkpọ. Ben kọọb ami nsio ke iso. Ado yak akeedo naña ami nnyịmme, yak ado ke uduak mfo.”

³⁷ Anye ato adi adikịt nte mbed edaiya, abịp Bita ate, “Saimọn, adadaiya? Usʌkkọ ukan utaba idab ukpeme ye ami ukpọk awa keed?

³⁸ Ikpeme inyʌñ ibọñ akam mbaak ndufo ididʌk ke idomo. Ke akpanikọ, sịbidịd anyịmme, ado ikpọkidem akop mmemidem.”

³⁹ Anye amaatịmme aka amaana akebọñ akam, atañ kpa ukem ikọ ado.

⁴⁰ Anye aketịmme adi, anye adikịt ke ammọ esʌk edaiya, sia idab akeanekeke adʌk ammọ anyen. Ammọ ikidiọọñọke se ekpebọọrọ anye.

⁴¹ Akem anye amaadi ayọhọ ñke nta, adibo ammọ ate, “Ndufo esʌk edadaiya eduọk adudu? Akem! Ini ado a-dikem. Sese, e-kappa Ayịn Awo esịn ke ubọk ndiọi awo.

⁴² Idaaña ida! Yak inyọñọ! Andibiintap miin adiwuọ.”

Emʌm Yisọs

⁴³ Kpa idaha a-anye asʌkkọ atañ do ke inua, Yudas, keed ke atu ibed duob ye iba adʌk. Anye akesaña ye atu awo e-ekekamake mme eduad ye ñkpeti, a-mme ikpọ aku, mme akpeeb ibed, ye mme ñkpisọñ ekedọññọ.

⁴⁴ Awo a-akebooho itap anye amaanọ ammọ idiọọñọ, “Anye a-mbooho ntʌminua ado awo ado; imʌm anye iben ika, inekke ikpeme.”

⁴⁵ Anye adidakka abịne Yisọs kpa ndondo ado, ate anye, “Andikpeeb,” anyʌñ atʌm anye inua.

⁴⁶ Mme awo ado emʌm Yisọs, eben edakka.

⁴⁷ Awo keed ke atu ado a-akedaaha akpere asio akañkañ akpi ayịnufọk akwa aku utọñ akpịkke.

⁴⁸ Yisọs amaabịp ammọ ate, “Ndufo ewuọ embịne edidiimʌm miin ye eduad ye akpeti nte ebo ke ndo etubom mme asịn ntịmme?

⁴⁹ Mmaaba ye ndufo kwa usen, ñkpeeb ñkpọ ke mme akwere tembịd, ado ndufo ikimmʌmmọ miin. Ado mme ñkpọ ami etịppe nọ ikọ Abasi asu.”

⁵⁰ Idahado, afịd awo ekpọñ anye efeeñe.

⁵¹ Akparawa keed a-akewañake isịn afọñ dinen ke idem, akeene Yisọs. Ammọ ekemʌm anye,

⁵² anye amaafeghe ifed, akpọñ afọñ amọ.

Yisọs ke esob Sanhidrin

⁵³ Ammọ eben Yisọs eka atʌñ akwa aku, afịd mme ikpọ aku ye mme ñkpisọñ, ye mme akpeeb ibed emaebono do.

⁵⁴ Bita amaakeene Yisọs ke edem, akedʌk esịd akwere akwa aku. Do anye akesuuk atie ye mbon ukpeeme akwa aku awue ikañ.

⁵⁵ Afịd mme ikpọ aku ye afịd mme esob Sanhidrin emaeyem ikọ ntiense se etañ edian Yisọs nọ ediikan iwot anye, ado ikikịtte.

⁵⁶ Uwak mme ntiense nsu emaewuọọñọ edido anye uyo, ado ikọ ammọ ikisañake keed.

⁵⁷ Akem usʌk awo emaedaaña eda etañ ikọ ntiense nsu ndian anye:

⁵⁸ Ñnyịn imaikop nte anye abo, “Nyaawuud tembịd ami, e-ekedatta ubọkawo ebọp ndin ke usen ita nyaabọp mfen, a-awo mmiidatta ubọk ibọp.”

⁵⁹ Ndin kpa ye ado, ikọ ntiense ammọ ikisañake keed.

⁶⁰ Do ke akwa aku akedakka ada ke ufọọd esob, abịp Yisọs ate, “Afo uyemme adibọọrọ ikọ? Nso-o ke mme awo ami etañ ami udian fiin?”

⁶¹ Ado Yisọs ikiisiooho uyo, ibọọrọke ndomo ikọ keed. Akwa aku amaamaana abịp anye ate, “Afo ado Mesaya, Ayịn Abasi Andido Adidiọñ?”

⁶² Yisọs abo anye, “Ami ke ado, ndufo eyaekịt naña Ayịn Awo atie ke ubọk udom Anie Adudu Abasi, ye naña anye adidi ke ntọñ ikpaanyọñ.”

⁶³ Akwa aku amaawai afọñidem amọ, ate atu awo, “Nso-o ntiense mfen ke iyem?

⁶⁴ Ndufo emekop atịme-atịme se anye atañ. Idahado, ndufo ekere die?” Afịd ammọ emaebiom anye ikpe, ete anye adot ñkpa.

⁶⁵ Ndin usʌk awo etọọñọ editọọñ anye etab; efʌk anye afọñ ke iso; etọ anye eta, enyʌñ ebo anye ete, “Tañ brọfesi!” Mbon ñka ukpeme emaeben anye ewuọ enyʌñ ekeemia anye.

Bita akañ Yisọs

⁶⁶ Idaha Bita asʌkkọ aba ke esịd akwere akwa aku, ayịn abọikpa keed a-akedooho ayịnufọk akwa aku amaadʌk adi.

⁶⁷ Anye akekịt Bita nte awue ikañ, awuuk anyen ase anye, ate, “Afo ñko akeba ye Yisọs, awo Nasared ado.”

⁶⁸ Ado anye akañ ate, “Ndiọọñọke, inyʌññọ i-inwaña se ikọ mfo awuọọñọ.” Ndin Bita adakka akpọñ esịd akwere awuọ esiin.

⁶⁹ Kpa abọikpa ado amaatịmme adikịt anye, adọkkọ mbon se ikida ikpere ate, “Awo ami ado keed ke atu ammọ.”

⁷⁰ Ado anye amaana akañ. Ke etək ini amaakeboiyo, mme awo se ikida ke ndo emaebo Bita ete, “Ke akpanikọ, afo ado awo keed ke atu ammọ, afo ado awo Kadidi; uyo usem mfo uyaada fiin.”

⁷¹ Bita atọọñọ adikood isuuñọ, anyʌñ anwọñọ ñkpọ ate, “Ami ndiọọñọke awo a-ndufo etañña ikọ ebaña.”

⁷² Ukem idahado, akikọ amaakpọk ayọhọ ñkemba. Ndin Bita amaatoiyo ikọ a-Yisọs akedọkkọke anye abo, “Mbemiso akikọ akpọk akañ iba, afo ayaañkañ miin akañ ita.” Ndin esịd amaabʌññọ anye, anye atua.