Maak 13 - Ñwed Abasi Ke Ikọ Ibibio Ayo Mfịn

Adiwuud tembịd ye mme idiọọñọ akpatre emana

¹ Ke Yisọs asañake awuọ akpọñ tembịd, mbed amọ keed ate anye, “Titia, kap se mme ikpọ itiad ami, ye utọ ikpọ mfọọn ufọk ami!”

² Yisọs amaabọọrọ anye ate, “Emekịt mme ikpọ ufọk ami? Ndomo itiad ami keed idiisọññọ idoro ke emọ-emọ; eyaetoomo ammọ keed-e-keed eduọọñọ ke isọñ.”

³ Naña Yisọs atieeghe ke Abod Ọdif mbed, ke nsak iso tembịd ado, Bita, Yemsi, Yọọn ye Andru emaebịp anye ke atu idem ammọ ete,

⁴ “Tañ inọ ñnyịn ini a-mme ñkpọ ami aditịppe. Nso-o idiido idiọọñọ ke mme ñkpọ ami atịppe?”

⁵ Mi ke Yisọs akeneme ye ammọ ate, “Itʌm ikpeme mbaak awo ndomokeed adibiaaña ndufo awakka akpọñ usʌñ.

⁶ Sia uwak awo eyaewuọ edi ke anyịñ mmi, edibo ndufo ete, ‘Ami ndo anye,’ eyaenyʌñ enam umiañ awo ewakka ekpọñ usʌñ.

⁷ Ado ke ini ndufo ediikop ibaña ekọñ ye etob ekọñ, ikiiyak nọ esịd ndufo atịmede. Mme ñkpọ ami eyaedat itie, ado idooho idiọọñọ utịd ini adodo.

⁸ Idịd eyaenwana ye idịd, abio ubọọñ keed eyaenwana ye abio ubọọñ mfen. Mme unyekisọñ eyaeba ke mme itie mme itie, ini akañ ayaaba. Mme ñkpọ ami edoñño idiọọñọ ntọọñọ ubiak uman.

⁹ “Ado ndufo itʌm ikpeme idem ndufo. Eyaikappa ndufo esịn ke ubọk mme kọnsịn abio enyʌñ imia ndufo ke mme sinakọk. Eyaidaaha ndufo ke ikpe ke iso mbọọñ ye mme adaukara edo ntiense e-enọ ammọ ke ntak mmi.

¹⁰ Ndin nte akpa ñkpọ, anaekwọrọ eti etob enọ afịd ederimbod.

¹¹ Ini ake adodo imʌmmọ ndufo iben ika ikpe, ikiikere me nso-o ke ediitañ inyaaña idem. Itañ kpa se Abasi itemme ndufo kpa idahado, sia idooho ikọ ndufo ke ediitañ; ado ikọ Adisana Sịbidịd.

¹² “Ayịneka ayaatap ayịneka anọ ñkpa, nko ete ayaanyʌñ atap ayịn amọ anọ ñkpa. Nditọ eyaedakka enwana ye mme ete ye mme eka enyʌñ enam ewot ammọ.

¹³ Afịd awo eyaisua ndufo ke ntak anyịñ mmi, ado awo a-asọñọke ada akewuọ utịd eyaenyaaña anye.

¹⁴ “Ndin naña ndufo ediikịt mbubiam ñkpọ abeene nsobo adi aba ke itie mmiikpibaaha, yak awo a-akoodo ñwed anekke adiọọñọ, idahado yak mme andiba ke Yudia efeeñe ekaiya ikpọ abod.

¹⁵ Yak awo a-adoroke ke anyọñ akọm ufọk akuusọiyọ ayem idʌk ufọk ñkeben ndomo ñkpọ keed nsio.

¹⁶ Yak awo a-abaaha ke inwañ akuuyʌñ uka ufọk adikiben afọñ amọ.

¹⁷ Ado, mbọm ibaan e-esañake ye idịb ye mbon e-esʌkkọ enọnọ nditọ eba ke utọ mme usen ado!

¹⁸ Ikap ibọñ akam ite yak ñkpọ ntịppe ami akuudo ke ini akpọsọñ atueb,

¹⁹ sia mme usen ado adido ini ukuud; utọ a-adooho kpaanam ibaaha tọọñọ ke aditọọñọ, ke ini Abasi akebotto ederimbod tutu awuọ idahami; idinyʌññọ iba aba.

²⁰ “Ndin mmiikpidooho Abọọñ Abasi amaakenam mme usen ado aməgho, ndomo awo keed ikpibọkkọke. Ado ke ntak mbon a-anye akemekke, anye amaanam mme usen ado aməgho.

²¹ Ke ini ado awo ndomokeed akpibo ndufo, ‘Se mi, Mesaya aba mi,’ me, ‘Se anye ke ñko,’ ikiinịm ke akpanikọ.

²² Uwak nsu-nsu Mesaya ye brọfed nsu eyaewuọọñọ edịghe eyaenyʌñ enam uwak idiọọñọ ye utịbe ñkpọ ma ebiaaña mme awo, ammọ ekpekan, kpa ye mme andimek Abasi.

²³ Ke ntodo, iba ke ñkpeme idem sia ami mmetañ afịd ñkpọ do inọ ndufo.

²⁴ “Ado, ke mme usen ukuud ado emaeboiyo, “ ‘utịn ayaakappa akịm, afiọñ idiinyʌññọ inọ unwana,

²⁵ mme ntantaafiọñ ñkọ eyaeto ke anyọñ eduọññọ, mme adudu ke ikpaanyọñ ñko eyaenyeeñe.’

²⁶ “Idahado, afịd uduod awo eyaekịt Ayịn Awo naña adoro ke abubịd anyọñ, adi ye ayọhọ adudu ye ubọọñ.

²⁷ Ndin anye ayaadọñ mme enyere amọ adọñ ate edikoono mme andimek ikọd amọ ke afịd iso isọñ, atọọñọ ke ata utịd tutu awuọ utịd ikpaenyọñ.

²⁸ “Ndin, ndufo ikpeeb ñkpọ ami ito eto fik: Ke ado anye amaasịññe nseghe, akem mfañ ewuọọñọ, ndin edat ado ediọọñọ ke ndaeyo akpere.

²⁹ Ukem-ukem ado, ndufo ñko, naña ediikịt mme ñkpọ ami naña atịppe, idiọọñọ ibo ke ini akpere, kpa ke anyenusʌñ.

³⁰ Ke akpanikọ ke ntañ inọ ndufo, emana ami idiiboiyoke tutu afịd ñkpọ ami awuọ asu.

³¹ Anyọñ ye isọñ eyaeboiyo efep, ado ikọ mmi idiiboiyoke ifep.

Awo idiọọñọke usen me awa

³² “Ama ado usen ado, me awa ñkanika, ndomo awo keed idiọọñọke; kpak mme enyere ke hefịn me Ayịn Awo, ke mme ibọhọke Ete ikpọọñ.

³³ Inekke iba ke mbeeñidem, inekke itịñ anyen! Sia ndufo mmiidiọọñọke ini adidi Ayịn Awo.

³⁴ Aditie nte awo akpọñ ufọk aka anyanusʌñ isañ; ayaak ufọk anọ nditọufọk abo ekpeme; adeeme utom anọ ammọ keed-keed; anyʌñ adọkkọ akpeme inuaatob ate anekke akpeme.

³⁵ “Ndufo ñko ikpeme, sia mmiidiọọñọke ini anieufọk adiinyọñ idi; me adido ndubi me ke ufọọd akoneyo; me ke akikọ akpọkkọ me ke usieere.

³⁶ Mbaak anye adiwawaad ndufo, adi adikịt nte edadaiya.

³⁷ Se ntañ inọ ndufo, ami ntañ ado nnọ afịd awo: ‘Ikpeme.’ ”