Maak 10 - Ñwed Abasi Ke Ikọ Ibibio Ayo Mfịn

Uwuọọñọ ndọ

¹ Adikem Yisọs amaakpọñ itie ado aka ñkanñkʌk abio Yudia, akedʌk ubom aboiyo inyañ Yọdan. Uwak mme atu awo emaemaana ekịppe ekeene anye, nko, naña ido amọ akesido, anye amaakpeeb ammọ ñkpọ.

² Mme Farisi, e-ekeyemme usʌñ naña emʌm anye ke ndudue, edibịp anye ete, “Anen awo adisio anwaan amọ ndọ?”

³ Ndin anye amaabọọrọ ammọ ye mbịme ate, “Nso-o ke Moses akitemme ndufo?”

⁴ Ammọ ete anye, “Moses amaanyịmme abo ewet ñwed uwuọndo, ndin ebe asịn anwaan amọ.”

⁵ Yisọs amaabo ammọ ate, “Moses akeawet ibed ami inọ ndufo ato isọñesịd ndufo.

⁶ Ado tọọñọ ke ntọọñọ ederimbod a-Abasi akebot ammọ ‘awodeen ye awonwaan.’

⁷ ‘Ato ntak ado, awodeen ayaakpọñ ete ye eka amọ akediana ye anwaan amọ,

⁸ ndin ammọ awo iba eyaekappa edo abʌk keed.’ Ke ntodo ammọ idooho aba awo iba, ado edo abʌk keed.

⁹ Do ndin, se Abasi amaakedian, yak awo akụụdianna.”

¹⁰ Ke ammọ emaekekewuọ ufọk, mme mbed amọ emaemaana ebịp anye ebaña ikọ ndọ ami.

¹¹ Anye amaanyʌñ abọọrọ ammọ ate, “Awo ake adodo a-adiaññake anwaan amọ ndọ anyʌñ akedọ anwaan mfen, asịn efịbe, ye anye.

¹² Ñko, awonwaan a-asịnne ebe amọ anyʌñ akedọ awodeen mfen, asịn efịbe.”

Ntək nditọ ye Yisọs

¹³ Mme awo ekeekoono ntəkayịn esʌk Yisọs ebo yak anye adot ammọ ubọk, ado mme mbed Yisọs emaebiiñe ammọ.

¹⁴ Yisọs akekịt ami, anye amaayat esịd anyʌñ adọkkọ mbed amọ ate, “Yak ntəkayịn eñkeene miin; ikiikpan ammọ, sia abio ubọọñ Abasi anie utọ ammọ.

¹⁵ Ke akpanikọ ke ntañ inọ ndufo, awo akeedodo a-mmiidiibọọhọ abio ubọọñ Abasi nte etəkayịn, idiikanna idʌk do.”

¹⁶ Ndin anye amaakoono nditọ ado akama ke ubọk, adot ammọ ubọk anyʌñ adiọñ ammọ.

Mbon inie ye abio ubọọñ Abasi

¹⁷ Daña Yisọs amaaketọọñọ isañ amọ, awodeen keed amaafeghe abịne anye anyʌñ akeduọ atọọñ edọñ ke iso amọ. Anye amaabịp Yisọs ate, “Eti andikpeeb, nso-o ke ndiinam nọ nnie nsi-nsi uwem?”

¹⁸ Yisọs amaawọññọ abịp anye ate, “Nso-o ido nọ añkood miin eti? Eti awo ibaaha, ibọhọke Abasi ikpọọñ.

¹⁹ Afo amediọọñọ mme ibed: ‘Kuuwot awo, kuusịn efịbe, kuuyịp inọ, kuutie ntiense nsu, kuutʌk awo, kpono usọ ye uka.’ ”

²⁰ Awo ado ate Yisọs, “Andikpeeb, mmenịm afịd ibed ami tọọñọ ke uyịn mmi.”

²¹ Do ke Yisọs akewuuk anyen ase anye anyʌñ ama anye, ndin abo anye, “Ñkpọ keed asʌghọ afo adinam. Kaa kenyam afịd se afo anie nyʌñ kpọñ nọ uweene, ke ntom afo ayaanie akpan inie ke abio Abasi. Ndin di, disaña ye ami.”

²² Iso amaafiakka ete ami ke akoppo se Yisọs atañ, anam anye amaanyọñ ye mfʌhọ sia anye akedo ata imọ awo.

²³ Akem Yisọs awọññọ anyen ate mme mbed ammọ, “Anekke asọñ eti-eti mbon inie adidʌk abio ubọọñ Abasi.”

²⁴ Ikọ ami amaayịk mme mbed idem. Ado Yisọs amaana atañ nọ añwaña ammọ ate, “Nditọ, anekke asọñ eti-eti adidʌk ke abio ubọọñ Abasi.

²⁵ Ado mmem-mmem ñkpọ enañ mbiomo adiboiyo ke adu abiaween akan awo inie adidʌk ke abio ubọọñ Abasi.”

²⁶ Ikọ ami amaanam idem adiọdiọñ akpa mme mbed, tutu ammọ ete anye, “Anie awo adikan ibọkkọ ndin?”

²⁷ Yisọs amaawuuk anyen ase ammọ anyʌñ abo ate, “Se awo miikanna inam, Abasi akan adinam sia Abasi akan adinam afịd ñkpọ.”

²⁸ Ndin Bita asịo uyo ate anye, “Nnyịn imikpọñ afịd ñkpọ ukeene fiin.”

²⁹ Yisọs amaabọọrọ enye: “Ntañ akpanikọ inọ ndufo, ibaaha ndomo awo keed a-akpọññọ ufọk me nditọeka ideen me nditọeka ibaan me eka me ete me nditọ me inwañ ke ntak mmi ye ukwọrọ eti etob

³⁰ a-mmiidiibọọhọ utịb akañ ikie uwak-uwak ke emana ami: mme ufọk, nditọeka ideen, nditọeka ibaan, eka, nditọ ye mme isọñ, adiana ye ukọbọ–amaana anie nsi-nsi uwem ke ini iso.

³¹ Ado uwak mme aboiyo iso eyaekappa ekpe edem, ndin mme akpe edem eyaekappa eboiyo iso.”

Yisọs amaana abemiso atañ ayọhọ akan ita abaña ñkpa amọ

³² Akem ammọ etọọñọ isañ eka Yerusedem. Yisọs aboiyo iso, mbed esaña ke edem ke ata ñkpaidem ye ndịk ekeene anye. Anye adiañña mbed duob ye iba, asanna ada, atọọñọ adineme ye ammọ mme ñkpọ mme ñkpọ se idiitịppe inọ anye, ate,

³³ “Ñnyịn ibidọọk ika Yerusedem, do eyaeyaak Ayịn Awo esịn ke ubọk mme ikpọ aku ye mme akpeeb ibed. Ammọ eyaebiom anye ikpe ete ewot anye, eyaenyʌñ eyaak anye enọ mme Yentaid,

³⁴ e-edidọọñ anye ndọk, etọọñ anye etab, emia anye enyʌñ emʌm anye ewot. Usen ita amaaboyo anye ayaaset ke ñkpa.”

Ebeeñe Yemsi ye Yọọn

³⁵ Ndin Yemsi ye Yọọn, nditọ Sebidi emaedi ebịne anye, ekebo ete, “Andikpeeb, ñnyịn iyem afo anam inọ ñnyịn se adodo a-ñnyịn ibooho ubeeñe fiin.”

³⁶ Anye amaabịp ammọ “Nso ke eyem ami nnam inọ ndufo?”

³⁷ Ammọ emaebo anye ete, “Nam nọ awo ñnyịn keed atie ke ubọk udom mfo, keed ke ubọk ufiin ke abio ubọọñ mfo.”

³⁸ Yisọs amaabọọrọ ammọ ate, “Ndufo idiọọñọke se ebeeñe ado. Me ndufo ekpaekan enwọñ kọọb ufen a-ami ndiinwọñ, me adibọ utọ uduọkmmọọñ a-ami ndiibọ?”

³⁹ Ammọ ebọọrọ ete: “Ñnyịn ikpaikan.” Ndin Yisọs amaabo ammọ, “Eyaeñwọñ kọọb a-ami ndiinwọñ, enyʌñ ebọ uduọkmmọọñ a-ami ndiibọ,

⁴⁰ ado amaado aditie ke ubọk udom mmi, me ke ufiin, ado isịneke ke adudu mmi adinam. Mme itie ami enaenọ mbon ado e-kebeeñeke mme itie ado anịm anọ.”

⁴¹ Ke mme mbed duob ako emaekeakop ado, ammọ emaeyat esịd ebaña Yemsi ye Yọọn.

⁴² Ke ntak ado Yisọs amaakood ammọ abək anyʌñ abo ammọ ate, “Akpena ndufo ediọọñọ ke mbon edooho mme andikara mme Yentaid enie ayọhọ adudu ke idem ammọ, ndin mme adaha ukara enyʌñ ebre adudu ye ammọ.

⁴³ Idooho ntodo ye ndufo. Utuu ke ado, awo ake ayem adikpon ke atu ndufo ana ado ayịnufọk ndufo.

⁴⁴ Awo ake ayem ido aboiyo iso ke atu ndufo ana adʌk afʌn anọ afịd ndufo.

⁴⁵ Sia Ayịn Awo ke idem amọ ikidiighe ibo edinam ñkpọ enọ anye, akedi ma adinam ñkpọ anọ awo, anyʌñ adiyaak uwem amọ nte nkpọufak nnọ mme awo.”

Baatimus awo nnan akịt ñkpọ

⁴⁶ Akekem ammọ emaedi Yeriko. Nte Yisọs ye mbed amọ ye uwak atu awo ekekpọññọ abio ado, Baatimus (adooho “ayịn Timus”), a-akedooho nnan, akeatie do ke mben usʌñ abeeñe ebeeñe.

⁴⁷ Ke ini anye akeakoppo ke akedo Yisọs awo Nasared, anye amatọọñọ adibọọñ ñkpo ate, “Yisọs, Ayịn Defid, ntua miin mbọm!”

⁴⁸ Uwak awo emaekpan anye, ete anye akʌp inua, ado anye anee-nekke abọọñ, “Ayịn Defid, ntua miin mbọm!”

⁴⁹ Yisọs amaasọñ ada anyʌñ abo ate, “Kood anye.” Ndin ammọ emaekood awo nnan ami enyʌñ ebo anye ete, “Sọñ idem! Dakka da! Anye asʌk ukood.”

⁵⁰ Ke aditop afọñ atueb amọ nduọk, anye atamma, ada ke ukod anyʌñ abịne Yisọs.

⁵¹ Yisọs abịp anye ate, “Nso-o ke afo ayem ami nnam unọ fiin?” Awo nnan amaabo ate, “Andikpeeb, ñyem ikịt usʌñ.”

⁵² Yisọs amaabo anye ate, “Kaa, mbuọdidem mfo ukọk fiin udọñọ.” Ke ndo-ndo ado anye amaakịt usʌñ anyʌñ akeene asañña ye Yisọs ke usʌñ.