Kodosi 4 - Ñwed Abasi Ke Ikọ Ibibio Ayo Mfịn

¹ Mme eteufọk enọ nditọufọk ndufo se ifọn anyʌñ adod, sia ndufo emediọọñọ ke ndufo ñko emenie Eteufọk ke abio ubọọñ Abasi.

Mme ikọitem mfen

² Esịn idem ndufo ke akam, etịñ anyen, inyʌñ iba ke ekọọm.

³ Ndin ebọñ akam ebaña ñnyịn ñko, ete Abasi akʌkkọ usʌñ anọ etop ñnyịn nọ ato do ñnyịn idiibʌk anwa-anwa ibaña mme ndedịbe ñkpọ Krais, a-adooho ntak ami nsịneke ñkpakọb.

⁴ Ebọñ akam nọ ami ñkan nsuan eti etob anwa-anwa, naña akpena ami nnam.

⁵ Enie ifiọk ebaña naña ndufo enam ñkpọ mme mbon a-mmiisịneke ke atu ndufo; itʌm idat afịd se enie inam ñkpọ.

⁶ Eyak nneme ndufo afịd ini ayọhọ mme mfọn, asịneke inʌñ, nọ ato do ndufo ediọọñọ naña ekpebọọrọ mbiime afịd awo.

Akpatre ekọọm

⁷ Taikikọs ayaidọkkọ ndufo afịd mbʌk a-mbañake miin. Anye ado ata adima ayịnete, anam utom Abasi ke mbuọdidem ye awo nsaña ke Abọọñ.

⁸ Ami ndọñ anye inọ ndufo ke ata akpan ntak nọ ndufo ediọọñọ naña ñkpọ aba mme ñnyịn ma ato do ñko anye idọñ ndufo esịd.

⁹ Anye asʌk adi mme Onesimọs, awo mbuọdidem ye adima ayịnete ñnyịn, e-edoññoke keed ke atu ndufo. Ammọ eyaetañ enọ ndufo afịd-afịd ñkpọ se iba.

¹⁰ Aristakus, awo ñkpakọb nte ami, adọñ ekọọm anọ ndufo, kpa naña Maak, ayịn ayịneka Banabas. (Ndufo emebọ ukpeebñkpọ ebaña anye; anye akpedi ibịne ndufo, edaara anye.)

¹¹ Yisọs, ekoodo Yọstus, ñko adọñ ekọọm. Mbon ami edoñño ukweeñe mme Yuu ke atu mbon e-enamma utom mme ami enọ abio ubọọñ Abasi, ndin ammọ ñko edoñño idọñesịd ennọ miin.

¹² Epafras, a-adooho keed ke atu ndufo mme ayịnufọk Krais Yisọs, adọñ ekọọm. Anye anwana afịd ini ke akam inọ ndufo, ate ndufo ekap esọọñọ eda ke afịd uduak Abasi, ekọt mfọn-mfọn, enyʌñ enie mbuọdidem ayọhọ-ayọhọ.

¹³ Ami mmetie ubiọñ nnọ anye nte ke anye asʌk anam utom akpọsọñ-akpọsọñ inọ ndufo ye mbon e-ebaaha ke Daodisia mme Iedabodis.

¹⁴ Adima ufan ñnyịn Duk, abiaibọk, mme Demas edọñ ekọọm.

¹⁵ Enọ ekọọm mmi esọk mme nditọete ke Daodisia mme ke Nimfa mme ufọkabasi a-abaaha ke mme ufọk amọ.

¹⁶ Emaekood deta ami ima inọ ndufo, ekịd ebo ke ekood ke ufọkabasi ke Daodisia ndin ndufo ñko enyʌñ ekood deta a-atooho Daodisia.

¹⁷ Dọkkọ Akipus: “Kịt bo ke amekweeñe afịd utom a-akebọọghọ ke Abọọñ.”

¹⁸ Ami, Bọọd, ñwed ekọọm ami ke ubọk mmi. Etoiyo ñkpakọb mmi. Mfọn aba mme ndufo.