Kodosi 2 - Ñwed Abasi Ke Ikọ Ibibio Ayo Mfịn

¹ Ami ñyem ndufo ediọọñọ naña ami ñnwanake akpọsọñ usʌñ ke ntak ndufo ye ake mbon Daodisia, ye ke ntak afịd mbon a-mmiiñkịtte miin ke anyen.

² Uduak mmi ado nọ ammọ enie idọñesịd enyʌñ ediana ke ima, nọ atoodo ammọ enie ayọhọ imọ a-atooho ke ayọhọ edidiọọñọ mme ndịbe-ndịbe ñkpọ Abasi, a-adooho Krais,

³ e-edịppe afịd mme ñkpọuto ifiọk mme aniọọñ.

⁴ Ami ntañ ami inọ ndufo mbaak awo ndomokeed adibiaaña ndufo ke nnem-nnem uyo eniin.

⁵ Sia ñkọm ami membaaha mme ndufo ke abʌkidem, ami mmeba mme ndufo ke sịbidịd ñnyʌñ nnem esịd edikịt naña ndufo enam ñkpọ esaña ke item mme naña mbuọdidem ndufo ke Krais asọọñọ ada.

Uyọhọ sịbidịd ke Krais

⁶ Ndin, kpa naña ndufo ekenyịmme Krais Yisọs nte Abọọñ, ekaiso edu uwem ke anye,

⁷ inyʌñ inie adʌñ mme ñkọk ke anye, esọñ adudu ke mbuọdidem naña ekikpeeb ndufo, iyọghọ iduọi mme ekọọm.

⁸ Ikịt ibo ke awo ndomokeed isịnne ndufo ke ifʌn ato uyaha-uyaha mme abiaaña ndufiọk a-atooho eduuwem awo ke esed ye mme ibed ifiọk ederimbod a-mitooho Krais.

⁹ Sia ke Krais ke ayọhọ-ayọhọ Idem adʌñ ke abʌkidem nte awo.

¹⁰ Ndin inọ ndufo uyọhọ ke Krais, a-adooho iwuod ke afịd adudu ye adudu ibed.

¹¹ Ke anye ke ekinịm ndufo mboppo, idooho unịm mboppo enamma ke ubọkawo. Afịd idem mfo a-abʌkidem akekarake emaeben eduọọk ke ini ekinịmme ndufo mboppo a-Krais anamma,

¹² sia ke uduọkmmọọñ emaebuuk ndufo mme anye ndin e-enyʌñ eset mme anye ato ke mbuọdidem ke adudu Abasi, a-akenamma anye aset ke ñkpa.

¹³ Ke ini ndufo ekekpaññake ke idiọọkñkpọ ndufo ndin ke unana adinịm mboppo ke abʌkidem ndufo, Abasi amaanam ndufo edu uwem ye Krais. Anye amaafeen afịd mme idiọọkñkpọ ñnyịn,

¹⁴ ke amaakebiad afịd ibed se ekewet ye mme ewʌghọ amọ, a-akedooho ubiọñ inọ ñnyịn ndin anyʌñ ibiọñọ ñnyịn; anye amaaben afep, akọñ anye ke krọs.

¹⁵ Ndin ke amaakebọ mme adudu ye mme ukara, anye anam ammọ ñkpọ ndise anwa-anwa, ndin akan ammọ ke krọs.

Uwuọufin ke ibed mme awo

¹⁶ Ke ntodo ikiiyak awo ndomokeed abieere ikpe inọ ndufo ato ke se edia me se enwọñ, me se ibaña usọrọ edu ukpono, usọrọ ufa afiọñ me usen Sabad.

¹⁷ Mme ammọ ami edoñño ndukpọñ ñkpọ e-ekenaaha edi, ado ata akpanikọ, naña aba, ekịt ke Krais.

¹⁸ Ikiiyak awo ndomokeed anam ndufo etre adibọ utịb e-ekpebọọhọ ato ke abiaaña-abiaaña nsuukidem ye adikpono mme enyere. Utọ awo ado awọk inua abaña se anye akịt, ndin unana sịbidịd ke esịd amọ anam anye akịt idem ke mme uyaha akikere.

¹⁹ Anye amaaduọọk adidiana mme iwuod, a-adoohodo ke afịd idem adibed edem ndin adiana keed ke asịp mme asịp, akọd naña Abasi anam anye akọd.

²⁰ Sia ndufo ekekpaññake mme Krais ke abaña mme ibed ñkpọ ederimbod ami, ntaha abaaha nte ndufo esʌk eba ke anye, ke edisuuk iwuod nnọọ mme ibed amọ.

²¹ “Kuumʌm! Kuutap use! Kuutuuk”?

²² Ana esobo afịd mme ñkpọ ami ke emaeben isịn ke adinam, sia ekọọñ ammọ ke ewʌhọ mme ifiọk awo.

²³ Utọ mme ibed ami ke akpanikọ aba nte anie idiọọñọ aniọñ, ye mme mmek ndad edu ukpono Abasi, mme abiaaña nsuuhidem me umia idem ufen, ado ammo ikanna inie mfadidem inọ udọñ ammọ.