Ibru 9 - Ñwed Abasi Ke Ikọ Ibibio Ayo Mfịn

Ukpono Abasi ke tabanakịd ederimbod

¹ Idahado akpa akaaña amaanie mme ido ukpono, amaanyʌñ anie itie ukpono ake isọñ.

² Emaebọp tabanakịd. Ke esịd akpa ubeed amọ ekedaaha udodutuenikañ, akpokoro ye adisana uyo; ekekood itie ado, Adisana Itie.

³ Ke edem ayọhọ ikpeghe iba aba ubeed e-ekekoodo Nsana Mma Ata Adisana Itie,

⁴ e-ekenịmme itie uwa kood ake insensi ye akebe edioomo e-ekedatta kood efʌk. Atu kood a-mmana akedọñọke, adọọn Erọn a-aketịppeke emịne, ye mme itiad ñwed edioomo ekedọñọ ke akebe ami.

⁵ Mme Serubim Ubọọñ ekedoro ke anyọñ akebe ado enyʌñ efʌk ufʌkñkpọ usio isop, ado ñnyịn idiikanna aditañ mbaña afịd ñkpọ ado idahami.

⁶ Ke ini emaekebono afịd ñkpọ ntom, mme aku esidʌk akpa ubeed ado ke ini ke ini enam utom ammọ.

⁷ Ado akwa aku ikpọọñ akesidʌk esịd ubeed, ndin akesinam ntom akañ keed kpọd ke isua, ndin ikemeke-keme adinam ado ke mmiisañake ye iyiib, a-anye akesinọọhọ ke iwuod amọ, anyʌñ anọ ke ntak nnamndue se mme awo ekesinam ke unana adidiọọñọ.

⁸ Ke adinam ntodo, Adisana Sịbidịd akeben awọt abo ke awo ikiyaarake usʌñ adidʌk Nsana Mma Ata Adisana Itie adaña nte akpa tabanakịd asʌkkọ adada.

⁹ Ami ado uwọdñkpọ ake ini ami, a-awọttọ abo ke mme enọ ye mme uwa e-ekesinọọhọ ikikanna adiyet esịd mme andikpono Abasi.

¹⁰ Mme ñkpọ ado edoñño adidia nnyʌñ ñnwọñ ye mme nsio-nsio usọrọ adiyet nsana, mme ido e-ekesinamma e-ekenyʌññọ eyak aba tutu ini ufa ubonoñkpọ adikem.

Iyiib Krais

¹¹ Ado ke ini Krais amaakedi nte akwa aku mme nti ñkpọ e-emaekebaba mi, anye amaaboiyo ke tabanakịd a-akponno akan, anana ndo, idooho ubọkawo akenam, a-awuọọñọke abo ke idooho ñkpọ e-ekebotobot.

¹² Anye ikiboiyoke idʌk ato ke iyiib mme ebod me ake nditọ enañ; ado akekama iyiib idem amọ adʌk ke Nsana Mma Ata Adisana Itie ini keed kpọd, ato ke adinam ami anye amaabọ nsi-nsi ufak anọ ukeed awo.

¹³ Adieke iyiib mme ebod ye mme ayaara enañ ye ntọñ mme abaak enañ e-ekesidatta esiime mbon ammiisanake, enamma ammọ ekappa esana ke ikpọkidem,

¹⁴ die ndin ke iyiib Krais, a-akedooho ke ntak Sịbidịd nsi-nsi ayaak idem nte anana ndo uwa anọ Abasi, miidiiyette esịd ñnyịn isiooño mme adinam a-adatta awo aka ñkpa ifep, nọ ñnyịn ikan inam ñkpọ inọ aduuwem Abasi!

¹⁵ Ke ntak ami, Krais ado akpe emem ke ufa edioomo nọ atoodo mbon e-ekoodo ekan ebọ nsi-nsi udeme e-emaekenwọñọ, idaha a-adooho anye amaakpa nte andifak ammọ nsio ke mme ndiọiñkpọ e-ekenamma ke idak akpa ediomo.

¹⁶ Ke itie e-enịmme ñwed udiaakpa, ana ewọt idiọọñọ ke andikinam ñwed ado ibaaha aba ke uwem,

¹⁷ sia eben ñwed udiaakpa esịn ke adinam ke ini andikinam amaakekpa; awo idatta ñwed ado isịn ke adinam ke ini andikiwed asʌkkọ ababa ke uwem.

¹⁸ Ami ado ntak e-ekediisinamma ñkpọ kpa ke idak akpa edioomo ibọhọke eduọk iyiib.

¹⁹ Ke ini Moses, anye akesido amaakood ewʌhọ ndomokeed ke idak ibed inọ afịd awo, anye adat iyiib mme ñnyịn enañ ye mme ebod. Anye anyʌñ aben mmọọñ, iduod mfịd ukịm ye ñkọk isọb, asiime ke adukpọk ñwed ibed mme ukeed awo.

²⁰ Anye abo, “Ami ado iyiib edioomo a-Abasi iwuuhọ ndufo abo enịm.”

²¹ Ke ukem usʌñ ado, anye amaasiime iyiib ado ke tabanakịd ye afịd ñkpọ e-ekesikamake enam usọrọ.

²² Ke adinekke ntañ, ibed ayem naña ekpedat iyiib enam ukeed ñkpọ asana, ndin mfeen nnọ ndomokeed ibaaha ke iyiib miiduọkkọke.

²³ Awuọ akena edat mme uwa ami enam mme mbid mme ñkpọ se ibañña ke abio ubọọñ esaana, ado akena ekama uwa a-afọnnọ akan enam ata mme ñkpọ e-ebañake ke abio ubọọñ Abasi esaana.

²⁴ Sia Krais ikidʌkkọ ke itie ukpono e-ekedatta ubọkawo enam a-akedooho mbid ata itie ado; anye akedʌk abio ubọọñ Abasi ke idem amọ, nọ ato do idahami anye awuọ ada inọ ñnyịn ke iso Abasi.

²⁵ Anye ikinyʌññọ idʌk hefịn adiwa idem amọ mmaana ñwaa, naña akwa aku akesidʌk Nsana Mma Ata Adisana Itie ke isua ke isua ye iyiib a-mmiikidooho akemọ.

²⁶ Akpedooho ntodo, awuọ Krais akpaakebọ ufen uwak-uwak ini tọọñọ ke ini e-ekebotto ederimbod. Ado idahami anye amaadi ini keed kpọd anọ ukeed awo ke mme utịd ini ami adidiben idiọọkñkpọ mfep ke anye adiwa idem amọ.

²⁷ Kpa naña nte anaaha awo akpa ini keed kpọd ndin amaama ado ada ke iso ikpe;

²⁸ kpa ntodo ke ekewa Krais ini keed kpọd nọ abiom ndiọiñkpọ uwak mme awo afep; ndin anye ayaamaana adi ayọhọ ñkemba, idooho adidibiom idiọọkñkpọ, ado adidat adinyaaña nsọk mbon e-etieeghe ebet anye.