Ibru 8 - Ñwed Abasi Ke Ikọ Ibibio Ayo Mfịn

Akwa aku ufa edioomo

¹ Akpan ñkpọ se ñnyịn itañ ibaña ado ami: Ñnyịn iminie utọ akwa aku a-akesuuhọ atie ke ubọk udom ebekpo Andikara ke abio Abasi.

² Anye a-adooho anam utom ke adisana itie, tabanakịd akpanikọ a-Abọọñ ke idem amọ akenịmme, idooho awo.

³ Emek afịd akwa aku adinọ mme enọ ye adiwa mme uwa, ke ntak ado akena anye ami ñko anyʌñ anie ñkpọ adinọ.

⁴ Adieke anye akpekebaaha ke ederimbod, anye ikpidooho aku sia mme awo ebaba e-esinọọhọ mme enọ naña ibed aketemme.

⁵ Ammọ enam utom ke itie ukpono a-abiotto anyʌñ ado ndukpọñ mme ñkpọ se iba ke abio ubọọñ Abasi. Ami akedo ntak e-ekedʌttọ Moses utọñ idaha a-anye akebeeñeke idem adibọp tabanakịd: “Kịt bo ke amenam ukeed ñkpọ ke mbid se ekuwọt fiin ke abod.”

⁶ Ado ubiọñutom a-Yisọs akebọọhọ akpon akan ake ammọ kpa nte edioomo a-anye adooho andida nte asịn emem akoñño idaha akan akaan ado, ñko ekenyʌñ ebọp anye ke mme enwọñọ a-afọnnọ akan.

⁷ Sia adieke akpedooho akpa edioomo ado ikinieeghe ndo; awo ikpikiyemme itie inọ mfen.

⁸ Ado Abasi amaasua anọ mme awo anyʌñ abo: “Ini asʌk adi, Abọọñ atañ, a-ami ndiinam ufa akaaña ye ufọk Isred, ñko ye ufọk Yuda.

⁹ Anyem idiibaaha nte edioomo añkenamma ye mme eteete ammọ ke ini ñkemʌmmọ ammọ ke ubọk ndat ñwuọ ñkpọñ Iyịpt, sia ammọ ikisọọñọke ida ke ewʌhọ mmi, ndin ami mmaawọññọ ñkpọñ ammọ, Abọọñ atañ.

¹⁰ Ami ado edioomo a-ami ndiinam ye ufọk Isred ini ado amaaboiyo, Abọọñ atañ. Ami ñyaasịn mme ibed mmi ke akikere ammọ nyʌñ ñweewet ke esịd ammọ. Ami ñyaado Abasi ammọ ndin ammọ eyaedo mbon mmi.

¹¹ Ammọ idiikpeebe mbọhọidʌñ ammọ aba, me ayịnete ibo, ‘Diọọñọ Abọọñ,’ Sia afịd ammọ eyaendiọọñọ miin tọọñọ ke andisịp ñkan akesịm andikpon ñkan.

¹² Sia ami ñyaafeen mme ndiọiñkpọ ammọ nko ndiitoiyoke mme nnamndue ammọ aba.”

¹³ Ke anye adikood akaaña ami “ufa,” anye anam akpa ado akaan, ndin se imaikikaana inyʌñ isọñ ayaasọp adiboiyo mfep.