Ibru 7 - Ñwed Abasi Ke Ikọ Ibibio Ayo Mfịn

Medkisedek akwa aku

¹ Medkisedek ami akedo adidem Sadem ye aku Abasi Ibom andikoñ ñkan. Anye akekịt Ebraham naña anyọñ ekọñ a-anye akekaaha akekan ye mme ndidem anyʌñ adiọñ anye.

² Ndin Ebraham amaanọ anye ubaak keed ke atu duop afịd-afịd ñkpọ. Ke akpa ifed, Medkisedek awuọ “adidem unenido” ke ado aboiyoke, ñko “adidem Sadem” awuọ “adidem emem.”

³ Ikinieeghe ete me eka, ikinieeghe ntịppe, inieeghe ntọọñọ me usen uwem me utịd, kpa nte Ayịn Abasi anye ado aku ke nsi-nsi.

⁴ Kere baña naña anye akekpon atre: Tutu adido se ete ñnyịn Ebraham anọ anye ubaak ñkpọ duop ke afịd mbịme ñkpọekọñ!

⁵ Idahami ke idak ibed ana ubon Difai e-ekappake edo mme aku ebọi eto nditọ ammọ ayọhọ ubaak duop ado, adooho nditọete ammọ akpesʌk ado ammọ ñko edooho ubon Ebraham.

⁶ Kpa ye ado, awo ami ikitooho ntịppe Difai, ado anye amaabọ Ebraham ayọhọ ubaak duop anyʌñ adiọñ anye a-akenieeghe mme enwọñọ ado.

⁷ Ñko, eyịghe ndomokeed ibaaha, awo andisịp ñkan abọ adidiọñ ato anye a-akponno akan anye.

⁸ Ke ñkañ keed, mme awo edooho eyaekpa ñkpa ebọi ayọhọ ubaak duop; ke ñkañ mfen anye e-emaekebo ke ado adu uwem awo abọi ayọhọ mbaak duop.

⁹ Awo akeme adikpibo ke Difai, a-asibọọhọ ayọhọ mbaak duop ami, amaakpekpe ayọhọ mbaak duop ato ke Ebraham,

¹⁰ sia ke ini a-Medkisedek akekịtte Ebraham, Difai ñkensʌk mmọdo ke idem etebom amọ ado asịne.

Yisọs nte Medkisedek

¹¹ Adieke ekpekekanna enie mfọnmma ato ke idak ubonoñkpọ Difai (sia aketo ke ntak ami enọ mme awo mme ibed) ntak ekekịtte ufọn aku mfen adidi-e, ake ubonoñkpọ Medkisedek, idooho ke idak ubonoñkpọ Erọn?

¹² Sia ke ini ekpəhọke ukara aku, ana enyʌñ ekpʌhọ ibed ñko.

¹³ Anye e-etañña mme ikọ ami ebaña aketo ufọk mfen, ndin akenaanam anam utom itie uwa isitooho ufọk anye ado.

¹⁴ Sia anwaña afịd ñnyịn ke ntịppe Abọọñ ñnyịn akedo ufọk Yuda a-adooho Moses ikitañña ñkpọ ndomokeed ibaña adido aku.

¹⁵ Ndin se ñnyịn itañ ami ananam iñwaña ñnyịn akan adieke aku mfen nte Medkisedek awuọọhọ ada,

¹⁶ anye a-akappake ado aku, idooho ke ntak ufọk emana, ado ke ntak adudu uwem ami miikemekekeme adibiara.

¹⁷ Sia etatañ ebo: “Afo ado aku ke nsi-nsi ukem-ukem nte Medkisedek.”

¹⁸ Emaeben akpa ubonoñkpọ esio sia anye akedooho ata mmem-mmem inyʌññọ iba ufọn

¹⁹ (sia ibed ikikanna inam ñkpọ ndomokeed afọn ama), ndin emaeben idodanyen a-afọnnọ akan edi, a-adooho ke anye, ñnyịn itʌm isaña ikpere Abasi.

²⁰ Ndin aketo ke unwọñọ! Mbon mfen ikidooho mme aku ito ke unwọñọ

²¹ ado anye akekappa ado aku a-asañake mme unwọñọ ke ini a-Abasi akeboogho anye ate: “Abọọñ anwọñọ ndin idiikpəhoke akikere: Afo ado aku ke nsi-nsi.”

²² Ato ke ntak unwọñọ ami, Yisọs amaakappa ada ubiọñ ke ufa akaaña a-afọnnọ akan.

²³ Idahami uwak utọ mme aku ado emaediba sia ñkpa ikidiyakka ammọ eka iso adinam utom ado;

²⁴ ado, sia Yisọs aduuho uwem ke nsi-nsi, unam utom aku ake amọ ada ke nsi-nsi.

²⁵ Ke ntodo anye akeme adinyaaña ukeed-ukeed mbon e-edieeghe ebịne Abasi ke anye, sia anye adodu uwem afịd ini, aka iso adinam ñkpeubọk anọ ammọ.

²⁶ Utọ akwa aku ado ke akpanikọ akeme iyọ mme mfịna ñnyịn. Anye a-adooho adisana, anana ndo, asana ama, e-emaekebakka anye ekpọñ mme anam idiọọk, edịppe anye edọọk ebọhọ mme ikpaanyọñ.

²⁷ Anye itieeghe nte mme akwa aku mfen, inieeghe adiwa uwa kwa usen kwa usen, awa akpa abaña mme ndiọiñkpọ amọ, ndin adiwa abaña ndiọiñkpọ mbon mfen. Anye akewa uwa abaña mme ndiọiñkpọ mbon awo akañ keed kpọd, ke ini anye akeyakka idem amọ anọ uwa.

²⁸ Sia ibed akemek nte mme akwa aku mme awo e-edoññoke mmem-mmem; ado unwọñọ a-akedieeghe adikịt ibed, akemek Ayịn, e-emaekenam afọn ama ke nsi-nsi.