Ibru 6 - Ñwed Abasi Ke Ikọ Ibibio Ayo Mfịn

¹ Ke ntodo yak ñnyịn ikpọñ ndin mme akpa ntọọñọ ukpeeb ñkpọ a-abañake Krais, yak isịn idem ikpon, inyʌñ idọọk ke ifiọk, yak ikiimamaana ikitọọñọ ke itiad idakisọñ adikappa esịd eto mme ñkpọ e-edatta awo eka ñkpa, ye mbuọdidem ke Abasi, ye

² ukpeebñkpọ a-abañake adinam asana, udodubọk, adiset ke ñkpa ye ubiire ikpe nsi-nsi.

³ Ndin ke Abasi anyịmmeke, iyainam ntodo.

⁴ Ado ata akpọsọñ ñkpọ anọ mbon e-edooho emaebọ ntad anyen, e-emaeketabba mme mfọn Abasi ekop, e-emaekekeene ewana ke Adisana Sịbidịd

⁵ mbon e-emaekịt ufọn a-asịneke ke ikọ Abasi ye adudu emana a-adiighe ke iso,

⁶ adieke ammọ eduọọhọ ekpọñ usʌñ, adikan mmaana ndʌt ammọ nsịn ke ukappa esịd, sia ke ntakudua ammọ, ammọ emaana ekọñ Ayịn Abasi ke eto enyʌñ enam anye abọ esuenne anwa-anwa.

⁷ Isọñ a-anwọññọ mmọọñ e-edịm adeppe ndin-ndin aduọkkọ, a-anyʌññọ anwịm mfịd a-afọnnọ ye mme andikitọ anye asibọbọ adidiọñ Abasi.

⁸ Ado isọñ anye a-anwịmme mme ñkukịm ye mbaraekpe ibaaha ufọn, ndin esisọsuuñọ anye enyʌñ efọp anye ke ikañ ke akpatre.

⁹ Nditọeka, akpesʌk ado nte ñnyịn itañña ntom, adima ufan, ñnyịn iminekke inịm Abasi ke akpanikọ ibaña mme nti ñkpọ a-asañake ye adinyaaña ukpọñ inọ ndufo.

¹⁰ Abasi inieeghe ukwañ esịd; anye ikemeke adifre mme utom ndufo ye ima a-ndufo ewọttọ anye kpa nte ndufo emaekenyaaña nditọ amọ ndin enyʌñ esʌk eka iso enyanyaaña ammọ.

¹¹ Ñnyịn iyem afịd ndufo ewọt ukem-ukem ntịñanyen ami tutu ata akpatre, nọ ato do idodanyen ndufo atʌm asọñ.

¹² Ñnyịn iyemme ndufo ekappa ifu, ado edubọiyọ mbon e-eduuho ke mbuọdidem ye ime, ammọ ebọ inie a-Abasi amaakenwọnwọñọ.

Enwọñọ Abasi asọsọọñọ ada

¹³ Ke ini Abasi akenamma enwọñọ anọ Ebraham, sia awo ndomokeed a-akekponno akan anye mmiikibaagha a-anye akpedatta anwọñọ, anye akenwọñọke idem amọ,

¹⁴ anyʌñ abo: “Ami ñyaudiọñ fiin ñnyʌñ nnam nditọ ubon mfo ewak.”

¹⁵ Ndin ke emaekebet ke ime, Ebraham amaabọ se Abasi akenwọñọ anọ anye.

¹⁶ Mme awo esinwọñọ ke anyịñ awo se ikpon ikan ammọ, ndin utọ enwọñọ ado asisọọñọ se etañ anyʌñ atre afịd-afịd mfaaña.

¹⁷ Sia Abasi akeyem adinam uduak amọ a-mmiisikpəhoke uduood anwaña mbon a-anye akenamma enwọñọ ado anọ mfọn-mfọn, anye amaasọọñọ ke enwọñọ.

¹⁸ Abasi akenam ami nọ ato do, ke mme ñkpọ iba e-emmiikemeke adikpəhọ, a-Abasi ñko mmiikemeke adisʌhọ nsu, ñnyịn i-imaiikifeeñe idimʌm idodanyen e-enyanna inọ nte añkọ adimʌm ukpọñ ñnyịn, ma anye asọọñọ ada kwak!

¹⁹ Ñnyịn iminie idodanyen nte añkọ ukpọñ a-adaaha kwak. Anye aboiyo ndin adʌk ata esịd ubeed, ke edem afọñ anyenusʌñ,

²⁰ itie a-Yisọs amaakibebem ñnyịn iso idʌk ke ntak iwuod ñnyịn. Anye amaakappa akwa aku ke nsi-nsi kpa ukem-ukem nte Medkisedek.