Ibru 5 - Ñwed Abasi Ke Ikọ Ibibio Ayo Mfịn

¹ Esio afịd akwa aku ke atu mme awo ndin enyʌñ ememek anye ebo ada ke iwuod mme awo ke mme ñkpọ a-abañake Abasi, ke adinọ mme enọ ye mme uwa ke ntak mme idiọọkñkpọ.

² Anye akan ayọ usʌk-usʌk mbon unana ifiọk e-emaekewakka ekpọñ usʌñ, sia anye ke idem amọ amaadiọọñọ naña aba adikop mmemidem.

³ Ami ado ntak a-anaaha anye awa mme uwa ke ntak mme idiọọkñkpọ amọ ye ake mme mbon mfen.

⁴ Awo ndomokeed idatta ukpono ami ke idem amọ; ana ado Abasi akood anye, kpa naña ekekood Erọn.

⁵ Ke ntodo Krais ñko ikidatta ke idem amọ ubọọñ adido akwa aku. Ado Abasi akebo anye: “Afo ado Ayịn mmi; mfịn ami mmubon fiin.”

⁶ Ndin anye abo ke itie mfen ate: “Afo ado aku ke nsi-nsi ukem-ukem nte Medkisedek.”

⁷ Ke mme usen uwem Yisọs ke ederimbod, anye amaabọñ mme akam anyʌñ abeeñe mme ebeeñe ke akpọsọñ uyo, ye mmọọñayịd anọ anye a-akemeke adinyaaña anye nsio ke ñkpa, ndin emaekop enọ anye ato ke anye adiyịre ñkpeubọk ke nsuukidem.

⁸ Akpesʌk ado nte anye akedooho Ayịn, anye amaakpeeb ñkobitem ato ke mme ukuud a-akesịmme anye

⁹ ndin ke emaekenam anye afọn ama, anye amaakappa ado usʌñ nsi-nsi adinyaaña anọ afịd mbon e-ekoppo item enọ anye

¹⁰ ndin Abasi amaamek anye nte akwa aku ke idaha Medkisedek.

Ndʌdutọñ mbaak idiwuọ ikpọñ usʌñ

¹¹ Ñnyịn iminie uwak ñkpọ se ikpitañ ibaña ñkpọ ami, ado asọsọñ adinam nọ iñwaña ndufo sia ndufo isọppọ adikpeeb ñkpọ.

¹² Akpesʌk ado ke idahami ndufo ekpedo mme andikpeeb, ke aditʌm ntañ, aka ado se awo amaana atọọñọ adikpeeb ndufo akpa ukpeebñkpọ a-abañake ikọ Abasi. Ndufo edoñño se enọ mmọọñeba, idooho nsọọñ-ñsọọñ ndidia.

¹³ Awo keed ake adodo a-anwọññọ mmọọñeba adidu uwem, sia asʌkkọ ado nsekayịn, imegheke ye ukpeebñkpọ a-abañake adinenido.

¹⁴ Ado nsọọñ-ñsọọñ ndidia ado ñkpọ adiọọñọ idem awo, a-adooho ato ke anye adidia afịd ini, akpeeb idem amọ adidiọọñọ ukpʌhọde eti ye idiọọk.