Ibru 4 - Ñwed Abasi Ke Ikọ Ibibio Ayo Mfịn

Sabad, nduọkadudu a-anaaha anọ ubon Abasi

¹ Ke ntodo, sia enwọñọ adidʌk ke nduọkadudu amọ asʌkkọ ababa, yak ñnyịn ikpeme mbaak ndufo ndomokeed editre adidʌk ke esịd.

² Sia emaekwọrọ eti etob inọ ñnyịn ñko, kpa naña ekenam enọ ammọ; ado etob a-ammọ ekekoppo ikiwuọọñọke ñkpọ inọ ammọ, sia ammọ ye mme andikikop ikibenne anye idian ye mbuọdidem.

³ Idahami ñnyịn i-imaikinịm ke akpanikọ imidʌk ke nduọkadudu ado kpa nte Abasi amaaketatañ: “Ndin ami mmaabo ke unwọñọ ke iyadesịd mmi, ‘Ammọ idiidʌkkọ ke nduọkadudu mmi.’ ” Ado utom amọ amaakweñe tọọñọ ke ini e-ekebotto ederimbod.

⁴ Sia aba itie a-atañña abaña ayọhọ usen itiaba ke mme ikọ ami: “Ndin ke ayọhọ usen itiaba Abasi amaaduọk adudu ke afịd utom amọ.”

⁵ Afen ñko ke ufañ mme ikọ imaikikood anye abo: “Tutu amama ammọ idiidʌkkọ ke nduọkadudu mmi.”

⁶ Asʌk anaana anọ usʌk awo adidʌk ke nduọkadudu ado, ndin mbon e-eketooho ekwọrọ eti etob enọ ammọ ikidʌkkọ ke esịd, ato ke ntịdutọñ.

⁷ Ke ntak ado Abasi amaamaana asio usen anịm, akood “Mfịn,” a-adooho ke anyan ini anye amaatañ ikọ ato inua Defid, kpa naña nte ewet ke itie ñwed e-emaekekokood: “Mfịn adieke ekoppo uyo amọ, ikiisọọñ esịd ndufo.”

⁸ Sia akpedo Yosua amaanọ ammọ nduọkadudu, Abasi ikpikimaanake itañ ibaña usen mfen.

⁹ Ke ntodo, Sabad nduọkadudu asọsʌghọ anọ mbon Abasi;

¹⁰ sia awo ake adodo a-adʌkkọ ke nduọkadudu Abasi anyʌñ aduọk adudu akpọñ adinam utom ake amọ, kpa nte naña Abasi akeduọkkọ adudu ke utom amọ.

¹¹ Yak ñnyịn, ke ntodo, idomo afịd ukeme adidʌk ke nduọkadudu ado, mbaak awo ndomokeed adiduọ ke adikeene una ñkobitem ammọ.

¹² Sia ikọ Abasi adodu uwem anyʌñ anam ñkpo, asọp akan afịd anie inua iba keed ake adodo, anye aboboiyo adʌk esịd, tutu abakka ukpọñ ye sịbidịd, ñkikek idem ye ñkpadia akpọ; anye akpe ikpe akikere esịd ye edu unam ñkpọ ke esịd.

¹³ Ibaaha ñkpọ ndomokeed ke afịd-afịd unadod a-adịbeke ke anyen Abasi. Efʌkkọ afịd ñkpọ enịm inwañ ke iso anyen anye a-anaaha inam ibad inọ.

Yisọs akamba akwa aku

¹⁴ Ndin, sia ñnyịn imainie akwa aku a-amaakesaña iboiyo ke mme abio ubọọñ Abasi, Yisọs Ayịn Abasi, yak ñnyịn itʌm imʌm akpanikọ ikama ke abaña mbuọdidem a-ñnyịn isọọñọke itañ ibaña.

¹⁵ Sia ñnyịn inieeghe utọ akwa aku a-mmiikanna adinie esịd mbọm mbaña mme mmemidem ñnyịn, ado inie anye a-adooho emaedomo anye ke afịd-afịd usʌñ naña enyʌñ idoomo ñnyịn, ado anye ikinamma idiọọkñkpọ.

¹⁶ Yak ñnyịn ndin isaña ikpere ebekpo Abasi mfọn uko-uko, nọ ato do ñnyịn ibọ mbọm ye mfọn a-adiinyaaña ñnyịn ke ini nnananyen.