Ibru 3 - Ñwed Abasi Ke Ikọ Ibibio Ayo Mfịn

Yisọs akpon akan Moses

¹ Ke ntodo, ndisana nditọete e-ewanake ke ikood, iwuuk mme akikere ndufo ke Yisọs, andido abọsịd ye akwa aku a-ñnyịn itañña ase ibaña.

² Anye amaasọọñọ ada ye anye a-akemekke anye, kpa naña Moses akesọọñọke ada ke atu afịd nditọ Abasi.

³ Emaekịt Yisọs nte anye a-adotto adibọ ukpono a-akponno akan Moses, kpa nte andibọp ufọk anieeghe ukpono akpon akan ufọk ke idem amọ.

⁴ Sia ufọk ake adodo awo abọp, ado Abasi ado andibọp afịd ñkpọ.

⁵ Moses amaanam akpanikọ nte ayịnufọk ke atu afịd ufọkabasi, atañ ikọ ntiense abaña se ediitañ ke ini iso.

⁶ Ado Krais anam akpanikọ nte Ayịn ke ufọkabasi. Ndin ñnyịn ido ufọk amọ, adieke ñnyịn imʌmmọ etiido ñnyịn ikama ye idodanyen a-ñnyịn idatta itañ ase.

Ndʌdutọñ ke abaña unana adinịm ke akpanikọ

⁷ Ke ntodo, kpa naña Adisana Sịbidịd atañ: “Mfịn ami, adieke ndufo ekoppo uyo amọ,

⁸ ikiisọọñ esịd ndufo naña ekenam ke ini nsọñiwuod, ke ini idomo ke akpautatan,

⁹ itie a-mme ete ndufo ekendomoke miin ese ndin, enyʌñ ekịt se ñkenam ke isua aba.

¹⁰ Ntak ado akenam ami ñkeyat esịd ye emana ado, ndin ami ñnyʌñ mbo, ‘Esịd ammọ esʌk ewawakka ekpọñ usʌñ afịd ini, ndin ammọ idiọọñọke usʌñ mmi.’

¹¹ Ndin ami mmaabo ke unwọñọ ke iyadesịd mmi, ‘Ammọ idiidʌkkọ ke nduọkadudu mmi.’ ”

¹² Nditọete, ikịt ibo ke awo ndufo ndomokeed inieeghe idiọọk ido ye esịd a-ammiinịmme ke akpanikọ a-anyʌññọ awakka akpọñ usʌñ Abasi uwem.

¹³ Ado isọọñọ keed aken ukod ke usen ke usen, adaña nte ekoodo anye “Mfịn,” mbaak awo ndufo ndomokeed adikappa anie esịd itiad ato ke abiaaña idiọọkñkpọ.

¹⁴ Ñnyịn imidi adiwuana ke Krais adieke ñnyịn idiikan isọñ ubọk imʌm mbuọdidem a-ñnyịn ikinieeghe ke akpa ikama tutu asịm utịd.

¹⁵ Nte esʌkkọ ebo idahado: “Mfịn ami, adieke ekoppo uyo amọ, ikiisọọñ esịd naña ekenam ke ini nsọñiwuod.”

¹⁶ Mme anie ikikop inyʌñ isọñiwuod ado? Nte idooho mbon a-Moses akesañake keed awuọ ke isọñ Iyịpt?

¹⁷ Afen ñko, mme anie ke anye akeyat esịd abaña ke afịd isua aba? Nte idooho ye mbon e-ekenamma idiọọkñkpọ a-akpọ ammọ ekeduọññọke ke akpautatan?

¹⁸ Ñko mme anie ke Abasi akenwọñọ anọ abo ke ammọ idiidʌkkọ nduọkadudu imọ, mmiidooho mbon a-mmiikikoppo item?

¹⁹ Ke ntodo, ñnyịn ikịt ke ammọ ikikanna idʌk ato ke unana ammọ adinịm ke akpanikọ.