Ibru 2 - Ñwed Abasi Ke Ikọ Ibibio Ayo Mfịn

Item abañake ñkpañutọñ

¹ Ke ntodo, ana ñnyịn itʌm ikpañ utọñ inọ se ñnyịn ikop mbaak ñnyịn idiyọọn ikpọñ usʌñ.

² Sia, adieke etob ami mme enyere eketañña akebọppọ mme awo, ndin afịd adibiad etob ami ye ntịdutọñ enyʌñ edat ufen a-akedotto esọk mme awo,

³ die ke ñnyịn idiibọkkọ adieke ñnyịn isịnne utọ ekamba adinyaaña ukpọñ ami? Adinyaaña ukpọñ ami Abọọñ ke idem amọ akebemme iso asian, ndin mbon e-ekekoppo enyʌñ esọọñọ inọ ñnyịn.

⁴ Abasi akenyʌñ anọ ikọ ntiense abañake adinọ mme idiọọñọ, mme utịbe ñkpọ, mme utom adudu ye mme enọ Adisana Sịbidịd e-ekedeemeke nte asañake akekem ke udọñ amọ.

Enam Yisọs ado ata awo

⁵ Idooho mme enyere ke ekeyak ederimbod a-adiidi enọ, a-ñnyịn itañña ibaña,

⁶ ado aba nde a-awo keed anọọhọ ikọ ntiense abaña: “Nsido awo a-afo asịnne esịd abaña, ayịn awo a-afo abọọhọ anye?

⁷ Afo akenam anye asuuhọ etək-etək akan mme enyere; amaayat anye anyanya ubọọñ ye ukpono

⁸ anyʌñ asịn afịd ñkpọ ke idak amọ.” Ke adisịn afịd ñkpọ ke idak amọ, ibaaha ñkpọ se Abasi miikiyaaha isịn ke idak amọ. Kpa ye ado idahami ñnyịn ikịtte afịd ñkpọ a-asịneke ke idak amọ.

⁹ Ado ñnyịn imikịt Yisọs, e-ekenamma asuuhọ etək-etək akan mme enyere, idahami, eyat anye anyanya ubọọñ ye ukpono sia anye amaabọ ndutʌkkọ ñkpa nọ ato do, ke mfọn Abasi anye anweem ñkpa anọ afịd awo.

¹⁰ Ke adikoono uwak nditọ ndʌk ubọọñ, amaadot Abasi, a-adooho ke anye, anyʌñ ato ke anye afịd ñkpọ aba, adinam andinọ adinyaaña ukpọñ afọn ama ato ke ndutʌkkọ.

¹¹ Ammọ, anye a-anamma awo asana ye mbon se enam esaana esịne ke ekpək keed. Ke ntodo, abuud imʌmmọ Yisọs adikood ammọ nditọete.

¹² Anye ate, “Ami ñyaayaara anyịñ mfo nnọ mme nditọete mmi; ke iso esob Abasi ñyaakwọ itooro mfo.”

¹³ Mfen ñko, “Ñyaadot anyen ke anye.” Anye ñko amaana abo: “Se ami mi, ye nditọ a-Abasi akennọọhọ miin.”

¹⁴ Sia nditọ enieehe abʌk ye iyiib, anye ñko awuana ke uduod awo, nọ ato ke ñkpa amọ anye abiad anye a-akamake adudu ñkpa, a-adooho, andidiọọk,

¹⁵ ndin anyʌñ atat mbon e-edooho afʌn ke afịd eyo uwem ammọ ekesịne ke ndịk ñkpa.

¹⁶ Sia ke akpanikọ idooho mme enyere ke anye anyaaña, ado ado ubon Ebraham.

¹⁷ Ato ke ntak ami akena enam anye nte ammọ nte awo ke afịd usʌñ, nọ ato do anye akan akappa ado akwa aku Abasi ke mbọm ye mbuọdidem ke adinam utom Abasi nọ ato do afeen idiọọkñkpọ mme awo.

¹⁸ Sia anye ke idem amọ amaabọ ndutʌkkọ ke ini ekedomoke anye, anye akeme adinwam mbon e-enyʌññọ edomo ammọ idomo.