Ibru 11 - Ñwed Abasi Ke Ikọ Ibibio Ayo Mfịn

Mbuọdidem anam utom

¹ Ndin mbuọdidem ado adisọọñọ nda ke ñkpọ se ñnyịn idot anyen ibaña inyʌñ ida ke se ñnyịn imiidatta anyen ikịt.

² Ami ado se mme ikaan ekedat ebọ unyịmme Abasi.

³ Ke mbuọdidem iñwaña ñnyịn ke ekebot ederimbod ato ewʌhọ Abasi, ke ntodo ñkpọ se ekịt ami awo ikibotto ito mme ñkpọ se ekekịt ke anyen.

⁴ Ke mbuọdidem Ebeed amaanọ Abasi uwa a-akefọnnọ akan ake Keen akenọọhọ. Ke mbuọdidem emaetooro anye nte adisana awo, ke ini Abasi amaaketañ eti ikọ ibaña mme enọ amọ. Ñko, ato ke mbuọdidem anye Ebeed asʌk atatañ iko akpesʌk ado anye amaakekpa.

⁵ Ke mbuọdidem emaeben Inọk esio ekpọñ uwem ami, ke ntodo anye ikikpaaha ñkpa. “Awo ikikịtte anye, sia Abasi amaaben anye asio.” Sia mbemiso ekeben anye esio, emaetooro anye nte awo a-akeneme Abasi esịd.

⁶ Ñko, awo a-mmiinieeghe mbuọdidem ikemekekeme adinam se inem Abasi esịd, sia awo ndomokeed a-adieeghe abịne anye ana anịm ke akpanikọ ke anye mmọdo, ñko ke anye ado andinọ mbon e-eyemme anye ke afịd esịd utịb.

⁷ Ke mbuọdidem Nua, ke ini emaekewuuk anye ebaña mme ñkpọ a-anye mmiikikịtte ke anyen dion, ke adisana mbaak anye amaabọp ubom a-akenyaañake ufọk amọ. Ke mbuọdidem amọ anye amaabiom ederimbod ikpe ndin amaanyʌñ akappa ado adiaakpa nti ido asañake ye mbuọdidem.

⁸ Ke mbuọdidem Ebraham, ke ini emaekekood anye ibo aka itie a-adooho amaama anye ayaakappa abọ nte udeme akemọ, amaakop item anyʌñ aka, akpesʌk ado nte anye mmiikidiọọñọke nte aka.

⁹ Ke mbuọdidem anye amaabọp ufọk ke isọñ enwọñọ nte asenawo ke asen idịd; anye akedʌñ ke atayad nte a-Aisik mme Yekọb ekenamma, e-ekedooho mme akpa adiaakpa ye anye ke ukem enwọñọ.

¹⁰ Sia anye akesʌk abek anyen anọ abio a-anieeghe mme itiad idakisọñ a-andikidomo ñnyʌñ mbọp anye adooho Abasi.

¹¹ Ke mbuọdidem Ebraham, akpesʌk ado nte ini amaakeboiyo anye ndin Sera ke idem amọ akedooho ada, emaenam anye akan akappa ado ete sia anye amaadiọọñọ anye a-akenamma enwọñọ nte anye a-adooho anam akpanikọ.

¹² Ndin ke ntodo amaato ke awo keed ami, ñko anye a-adooho aketie nte awo ñkpa, mme nditọ-nditọ emaemana e-ekewakka nte ntantaafiọñ ke ikpaanyọñ enyʌñ edoñño anana ibad nte ntan ke mben akpa mmọọñ.

¹³ Ukeed ibon ami ekesʌk edu uwem ke mbuọdidem tutu ini a-ammọ ekekpaññake. Ammọ ikibọọhọ mme ñkpọ se ekenwọñọ; ekedaada ekịt ammọ ke anyanusʌñ enyʌñ ekọọm ammọ. Ammọ emaenyʌñ enyịmme ke mmimọ idoñño adudʌñ ye isen ke ederimbod.

¹⁴ Mbon e-etañña mme ñkpọ ntom ewọt ebo ke mmimọ isʌk iyeem idịd eke mmimọ.

¹⁵ Adieke akpedooho ke ammọ ekeyem idịd anye a-ammọ ekedakkake ekpọñ, ammọ ekpaekenie ufañ aditịmme ñka.

¹⁶ Utu-utu ke ado, ammọ ekesʌk enie udọñ ebaña idịd anye a-afọnnọ akan, ake abio ubọọñ. Ke ntodo, abuud inamma Abasi adikere Abasi ammọ, sia anam itie idʌñ anịm anọ ammọ.

¹⁷ Ke mbuọdidem Ebraham, ke ini a-Abasi akedomoke anye, amaayak Aisik anọ nte ñkpọ uwa. Anye a-amaakebọ mme enwọñọ amaabeeñe idem adiwa ikpọọñ-i-ikpọọñ ayịn amọ,

¹⁸ akpesʌk ado Abasi amaakebo anye, “Adiito ke nditọ Aisik edidiọọñọ ubon mfo.”

¹⁹ Ebraham amaakọọk iwuod adiọọñọ ke Abasi akeme adinam awo ñkpa aset, ndin ke adisịn ke ñke, anye akemaana abọ Aisik ato ke ekesiooho anye ke ñkpa.

²⁰ Ke mbuọdidem Aisik amaadiọñ Yekọb ye Isọ ke abaña ini iso ammọ.

²¹ Ke mbuọdidem Yekọb, ke ini a-anye akeboogho ikpa, amaadiọñ nditọ Yosef keed-e-keed anyʌñ abere ke iwuod esañ amọ anọ Abasi ukpono.

²² Ke mbuọdidem Yosef ke ini amọ amaakekpere, amaatañ ikọ abaña adiwuọ ke ufịn nditọ Isred ñkpọñ Iyịpt, anyʌñ anọ uyo abaña mme akpọ amọ.

²³ Ke mbuọdidem, ete ye eka Moses emaedịp anye ke afiọñ ita ke anye amaakemana, sia ammọ emaekịt ete ke anye ikidooho ñkaña nsekayịn, inyʌññọ ibaak ewuuk adidem.

²⁴ Ke mbuọdidem, Moses, ke anye amaakekpon amaasịn adikere ayịn adiaha Fero.

²⁵ Anye akemek adikeene ubon Abasi mbọ ufen utu-utu ke adika iso nnem idem esịd ke nneem idiọọkñkpọ ke etək-etək ini.

²⁶ Anye akedat adibọ esuenne ke ntak Krais nte ñkpọ a-asọññọ udua akan mme nsọñ udua inie isọñ Iyịpt, sia anye akewuuk anyen ase se idiido ñkpọ ayịnutom amọ ke ini iso.

²⁷ Ke mbuọdidem, anye amaakpọñ Iyịpt ikereke ibaña ifiobesịd adidem; anye amaasịn ifịk sia anye akese anye a-awo mmiikịtte ke anyen.

²⁸ Ke mbuọdidem anye amaanịm usọrọ Basofa ye adisiime iyiib, ke ntodo andikiwood akpa nditọ ideen ikituuhọ akpa nditọ ideen ufọk Isred.

²⁹ Ke mbuọdidem mme awo emaesaña eboiyo ke ufọọd akwa inyañ nte esaña ke nsaad isọñ, ado ke ini mbon Iyịpt ekedomoke adikeene nnam ntodo, ammọ emaedeñ.

³⁰ Ke mbuọdidem mme ndibene Yeriko emaeduọññọ, ke ubon Abasi emaekesaña ke udịm ikanna ammọ ke usen itiaba.

³¹ Ke mbuọdidem awonwaan akpara a-akekereke Rehab, sia anye amaakefọn ido ye mbon uyeb, awo ikiwotto anye idian ye mbon e-ekediikoppo item.

³² Nso mfen ke ñkan aditañ? Ufañ ibaaha ami aditañ mbaña Kidiọn, Barak, Samsịn, Yefta, Defid, Samued ye mme brọfed,

³³ e-eketooho ke mbuọdidem ammọ enwana ekan mme abio, ekpekpe unen ikpe enyʌñ ebọ se emaekenwọñọ; mbon e-ekekʌppọ mme ekpe inua,

³⁴ eniime ifiobesịd mme edeme ikañ; enyʌñ ebọkkọ ndidek eduad mbon e-ekenamma mmemidem ammọ akappa adudu: e-ekekappake edoñño mme akob adudu ke ekọñ enyʌñ etre mme udịm ekọñ mme esen idịd.

³⁵ Ibaan emaemaana ebọi mbon ammọ e-emaekekpa esịn ke uwem. Mbon mfen ekedutọtʌkkọ enyʌñ esịn aditat ammọ ñyaak, nọ ato do ammọ enie adised ke ñkpa a-afọnnọ akan.

³⁶ Usʌk ekebọ nsaha ye ikpa, ke ini ekebọppọ mbon mfen ke ñkpakọb ukwak ndin esịn ammọ ke ufọk ñkpakọb.

³⁷ Emaetop usʌk ke itiad; ekeyọọyọọk usʌk ekpịkke iba, ewood usʌk ke eduad. Usʌk ekesiine ikpaidem edọñ ye ikpaidem ebod nte afọñ, ekiid unana enyʌñ ebọ ndutʌkkọ.

³⁸ Ederimbod ikidotto adinie ammọ. Ammọ ekesaaña ke mme akpautatan ye mme abod ye ke mme ukpe ye mme adu ke isọñ.

³⁹ Emaetooro afịd mbon ami ebaña mbuọdidem ammọ, kpa ye ado awo ammọ ndomokeed ikibọọhọ se ekenwọñọ,

⁴⁰ sia Abasi amaaduak ñkpọ se ifọn ikan inọ ñnyịn nọ ato ke adidiana ye ñnyịn ikpọọñ ekpenam ammọ efọn ema.