Ibru 10 - Ñwed Abasi Ke Ikọ Ibibio Ayo Mfịn

Uwa Krais ado ini keed anọ afịd awo

¹ Mbed ado ndukpọñ kpọd anọ mme nti ñkpọ se idi ke iso, idooho ata mme ñkpọ ado ke idem ammọ. Ke ntak ami, ukem uwa e-ewaaha ke isua ke isua ikemeke adiyet mbon e-esañake ekpere adikpono Abasi nọ afọn ama.

² Akpekekanna, nte ammọ ikpikitreke adiwa? Sia mme andikpono Abasi ekpaekebọ adinam asana akañ keed ado, ubiom ikpe idiọọkñkpọ ikpikikomoke ammọ aba.

³ Ado mme uwa ado ekekappa edido ñkpọ adidat ntoiyo ukwañ ñkpọ ke isua ke isua,

⁴ sia iyiib mme enañ ye mme ebod ikemekekeme adikpiyet mme ukwañ ñkpọ mfep.

⁵ Ke ntak ami, Krais amaakedi ke ederimbod, anye abo: “Uwa ye mme enọ afo ukuyemme, ado afo amaabot idem annọ miin;

⁶ esịd ikunemme fiin ibaña ufọfọb uwa ye mme enọ uben mme ndiọiñkpọ mfep.

⁷ Ndin ami mmaabo, ‘Se ami mi, emaewet ke ikpañwed embaña miin.’ Ami mmedi adinam uduak mfo, O Abasi.”

⁸ Ke akpa ifed anye amaabo, “Mme uwa ye mme enọ ye ufọfọb uwa ye mme enọ uben ndiọiñkpọ mfep, afo ukuyemme, ammọ ikinyʌññọ unem fiin esịd” (akpesʌk ado nte ibed akeyemme enam mme ñkpọ ado).

⁹ Ndin anye amaabo, “Se ami mi, ami mmedi adinam uduak mfo.” Ndin anye abenne akpa uwa afep nọ ayọhọ iba asọọñọ ada.

¹⁰ Ato ke ntak uduak ado, enam ñnyịn isana ato ke adiwa abʌkidem Yisọs Krais akañ keed kpọd.

¹¹ Ke usen ke usen, mme aku keed-e-keed esida enam utom Abasi ammọ; enam emaana enam, ewa mme ukem uwa, a-adooho ikemekekeme adiben mme ndiọiñkpọ mfep.

¹² Ado ke ini aku mi amaakewa afịd uwa ini keed ke abaña mme ndiọiñkpọ, anye amaasuuk atie ke ubọk udom Abasi.

¹³ Tọọñọ ke ini ado anye asʌk atie abet tutu enam mme asua amọ ekappa edoñño ifịm udodukod amọ.

¹⁴ Sia ato ke uwa keed anye amaanam mbon e-esʌkkọ eyeyet esana efọn ema ke nsi-nsi.

¹⁵ Adisana Sịbidịd anyʌñ atie ntiense inọ ñnyịn abaña akpa edioomo. Ke akpa ifed anye ate:

¹⁶ “Ami ado edioomo a-ami ndiinam ye ammọ ke ini ado amaaboiyo, Abọọñ atañ ami. Ñyaasịn mme ibed mmi ke esịd ammọ, ñko ñyaanyʌñ ñwet ke akikere ammọ.”

¹⁷ Ndin anye adian do: “Mme ndiọiñkpọ ye ubiad ibed ammọ ami ndiitoiyoke aba.”

¹⁸ Ndin emaefeen afịd mme ñkpọ ami, ufọn uwa idiọọkñkpọ ibaaha aba.

Ikood adisʌk ñkaaka iso ke mbuọdidem

¹⁹ Ke ntodo nditọete, sia ñnyịn imainie nsọọñọnda adidʌk ke Nsana Mma Ata Adisana Itie ato ke iyiib Yisọs,

²⁰ ato ke ufa usʌñ uwem e-ekʌkkọke eboiyo ke afọñ anyenusʌñ inọ ñnyịn a-adooho abʌkidem amọ,

²¹ afen ñko sia ñnyịn imainie akwa aku a-akamake ufọk Abasi,

²² yak ñnyịn isaña ikpere Abasi ye esịd akpanikọ ke ayọhọ mbuọdidem, sia emaekekama nsana mmọọñ esiime ke esịd ñnyịn enam ñnyịn isana inana ubiomikpe ke akikere ñnyịn, ñko sia emaekekama nsana mmọọñ ado iyet idem ñnyịn asana.

²³ Yak ñnyịn itʌm imʌm mbuọdidem a-ñnyịn isitañña ibaña, ikiidunyeeñe, sia anye a-akenamma enwọñọ ye ñnyịn adooho anam akpanikọ.

²⁴ Mfen ñko, yak ñnyịn ikere naña ikpikan isọọñọ keed aken idem ke adiwọt ima ñnyʌñ nnam mme nti ñkpọ.

²⁵ Yak ñnyịn ikiisiooño idem ikpọñ adisiboho atọ keed, nte usʌk awo esinamma, ado yak ikpek keed aken akpan-akpan nte ndufo ekịtte ke usen asʌk akpere.

²⁶ Adieke ñnyịn ikoiyokoi ikaiso adinam idiọọkñkpọ ke ini adooho imaibọbọ ifiọk akpanikọ, uwa idiọọkñkpọ ibaaha aba,

²⁷ ibọhọke adibeeñe idem ye ndịk mbet ubiireikpe ye ikañ iyadesịd a-adiita mme asua Abasi.

²⁸ Awo ndomokeed a-akesịnne ibed Moses akena akpa, mbọm ibaaha ke emaekekop ito inua mme ntiense iba me ita.

²⁹ Die ndin ke ediitre adinie unen adinọ awo a-adooho Ayịn Abasi ke idak ukod ufen, akpan-akpan, anye a-anamma iyiib edioomo nte mbad ñkpọ, a-akenamma anye asana, ñko akenyʌññọ asọñ Sịbidịd mfọn anyen?

³⁰ Sia ñnyịn imidiọọñọ andikibo: “Usieene annie miin: Ami ñyaasio” mfen ñko, “Abọọñ ayaakpe ikpe amọ.”

³¹ Ado ata eka ñkpọ ndịk adiduọ ndʌk ke ubọk ndundu Abasi.

³² Toiyo mme akpa usen ado ke ndufo emaekebọ unwana, ke ini a-ndufo ekesọọñọke eda ke akwa anwan ke iso ukuud.

³³ Usʌk ini emaesinam ndufo ebọ usọñanyen ye ndutʌkkọ anwa-anwa; ke mme ini mfen ndufo ekeda keed ye mbon e-ekesibọọhọ mme ukuud ami.

³⁴ Ndufo emaesikop mbọm enọ mbon e-ekesịneke ke ufọk ñkpakọb, ñko ke ini ekesikoonoke mme inie ndufo, ekesibọ ke idaara sia emaediọọñọ ke ndufo ke idem ndufo emaenie mme inie, e-efọọnọ ekan e-ediinyʌñ ikpeene ke nsi-nsi.

³⁵ Ke ntodo, ikiitoomo nsọọñọnda ndufo iduọọñọ, eyaebọ umiañ-umiañ utịp.

³⁶ Ana ndufo esọọñọ eda esịn idem nọ ato do ke ini emaenam uduak Abasi, ndufo ebọ se anye akenwọñọ.

³⁷ Sia, “Ke ata etək-etək ini, anye a-anaaha adi ayaadi idiikpeeneke.”

³⁸ Ñko, “Ado adisana awo mmi ayaadu uwem ke mbuọdidem. Ndin adieke afiakka edem, esịd mmi idiinemme ibaña anye.”

³⁹ Ado ñnyịn isịneke ke atu mbon e-etịmmeke edem enyʌñ ebọ nsobo, ado isịne ke atu mbon e-enịmme enyʌñ ebọ adinyaaña.