Fidimọn 1 - Ñwed Abasi Ke Ikọ Ibibio Ayo Mfịn

¹ Bọọd, awo ñkpakọb Krais Yisọs, mme Timoti ayịneka ñnyịn ewed enọ, Fidimọn, adima ufan ñnyịn ye andikeene nsaña utom,

² Ye Afia, ayịneka ñnyịn awonwaan, ye Akikpọs, nsaña awo ekọñ ñnyịn, ye ufọkabasi e-esisooboke ke ufọk mfo:

³ Mfọn ye emem ato ke ubọk Abasi Ete, ye Abọọñ ñnyịn Yisọs Krais, ikeene ndufo.

Ekọọm ye akam

⁴ Mmesikọọm Abasi ubaña fiin afịd ini mbọññọ akam.

⁵ Sia mmekop mbaña mbuọdidem a-afo a-anieeghe ke Abọọñ Yisọs, ye ima a-anieeghe anọ afịd ikọd amọ.

⁶ Mmebeeñe Abasi mbo unọ fiin ukeme edika iso ke utom ima ami, ye mfọnido; anyʌñ unọ fiin ifiọk ke utom Krais, nọ awo adiọọñọ ukeed nti ñkpọ se iba ke idem mfo ato Krais.

⁷ Ima mfo annọ mien ata idadesịd ye nsọọñọnda, sia afo, ayịnete, amedemme esịd ikọd Abasi.

Mkpeiye Bọọd anọ Onesimọs

⁸ Akpesʌk ado ami mmenie ayọhọ unen ke Krais adubo fiin anam mme ñkpọ se idot,

⁹ ado ke ntak ima, ami Bọọd, akaan adeen, awo ñkpakọb Krais Yisọs, mmekappa ukpeiye fiin;

¹⁰ Ami mmukpe fiin ubọk nte atʌm ase ayịn mmi Onesimọs, a-akannake ado ayịn mmi idaha ami nsịneke ke ñkpakọb.

¹¹ Ke ini akeboiyoke ko anye ikibaaha ufọn unọ fiin, ado idaha ami anye a-afọn ye afo, anyʌñ afọn ye ami ñko.

¹² Mmenọ anye atịmme ubịne fiin, nte adat anye nte akpedooho ataa esịd mmi.

¹³ Ñkpaakema anye aba mi ye ami ke ini nsʌkkọ ndọọñọ ñkpọnọ mi ke ukod ato ke ntak adikwọrọ Krais.

¹⁴ Ado, nkeñyemme adinam ntodo ke mmiitooho ke unyịmme mfo, mbaak mfọnido mfo aditie nte unyeenyịk.

¹⁵ Adikidiañña anye ukpọñ fiin ke etək-etək ini akeme ido akedo nọ anye amama atịmme adi adiba ye afo ke nsi-nsi,

¹⁶ idooho aba nte ayịnufọk, ado se ikpon ikan ado, nte adima ayịneka. Ami mmema anye eti-eti, ado anye ayaafọn ye afo akan, nte awo ye nte ayịneka ke Abọọñ.

¹⁷ Adieke afo ambatta miin nte awo nsaña utom mfo, nyịmme anye ukem-ukem naña añnyịmme miin.

¹⁸ Akpedo anye udue fiin ke usʌñ keed ake adodo anyʌñ ado ukama isʌñ, bat afịd nnọ miin.

¹⁹ Ami Bọọd ndat ubọk mmi ñwet nte ke mmenwọñọ edikpọñ unọ; kpa ye adooho afo ameñkama miin isʌñ akponno akan ado, kpa idem mfo.

²⁰ Ke ntom, ayịneka mmi, nam ami nnie idadesịd uto fiin, nyʌñ nam ñkpọ inemesịd nnọ miin ke Krais.

²¹ Ñwet ñwed ami ye afịd idodanyen nte ke afo ayaanam se mbeeñe ami; ke amenyʌñ akeme adinam ñkan ado.

²² Ndin ñkpọ keed mfen; beeñe ubeed isen nịm nnọ; sia ato ke akam ndufo, mmenịm ke eyaeyak ami ñnyọñ ibịne ndufo.

²³ Epafras awo ñkpakọb nte ami ke ntak Krais Yisọs, anọ ekọọm.

²⁴ Ukem ado ye Maak, Aristakus, Demas, ye Duk, mme nsaña utom mmi.

²⁵ Mfọn Abọọñ ñnyịn Yisọs Krais aba ye Sịbidịd ndufo.