Fidibai 2 - Ñwed Abasi Ke Ikọ Ibibio Ayo Mfịn

Edidubọiyọ nsuukidem Krais

¹ Adieke adooho ndufo emesọọñọ ukod ke adidiana ye Krais, adieke ebọọhọ idọñesịd eto ima amọ, adieke enieeghe ewana ke Sịbidịd, adieke enieeghe mmeme-mmeme esịd mme mbọm,

² inam ndin inemesịd mmi ayọhọ ke ndufo adinie esịd keed, ke adinie ima ukem-ukem, ke adido keed ke Sịbidịd ye uduak.

³ Ikiinam ñkpọ ndomokeed ke akpọsọñ ndomoidem mme ñkaña ñkokidem, ado ke nsuukidem ikere ibaña mbon mfen nte ke e-efọn ikan ndufo.

⁴ Ndufo keed-e-keed ikiiyem udʌk idem ndufo ikpọọñ, ado iyem udʌk mbon mfen ñko.

⁵ Akpena edu unam ñkpọ ndufo aba ukem-ukem nte ake Krais Yisọs:

⁶ a-Adooho ke ata emana amọ, anye ado Abasi, ado ikikereke ke adido ukem mme Abasi, ado ñkpọ se ana ñnyịn idiọọñọ;

⁷ ado anye anam idem amọ ado ñkaña ñkpọ, atịmme adat emana ayịnufọk, sia emaekenam anye ke mbied awo.

⁸ Ndin sia ekekịtte anye nte awo, anye amaasuuk idem amọ anyʌñ akop item tutu asịm ñkpa, kpa ñkpa ke krọs.

⁹ Ke ntodo Abasi amaadịppe anye akesịm ñkoñ ñkan itie anyʌñ anọ anye anyịñ a-akoñño akan afịd anyịñ.

¹⁰ Ma ato do ke anyịñ Yisọs afịd edọñ edinʌhọ, ke anyọñ mme ke isọñ,

¹¹ ñko afịd edeme esio etañ ke Yisọs Krais ado Abọọñ, ke ubọọñ Abasi Ete.

Inam afịd ñkpọ ado ikidukuunọ

¹² Ke ntodo mme ndima ufan mmi, kpa nte ndufo esikoppo item afịd ini idooho ke idaha a-ami mbaaha ikpọọñ, ado akpan-akpan ke mmembaaha ika iso inam utom adibọ adinyaaña ukpọñ ke ndịk ye ñnyekidem,

¹³ Sia ado Abasi a-anamma utom ke atu ndufo mbaak ekan enyʌñ enam asaña akekem ke uduak amọ ye se inem anye esịd.

¹⁴ Inam afịd ñkpọ ikiisịn emiom mme mfaaña,

¹⁵ ma ekappa enana ndo enyʌñ esana, nditọ Abasi a-mmiinieeghe ndudue ke ukwañ idiọọk emana ami, a-ndufo eyamake nte mme ntantaafiọñ ke ikpaanyọñ,

¹⁶ nte ndufo emʌmmọ ikọ uwem ami nọ ato do ami ñkan nnam asian ke usen Krais nte ke ñkefegheke, ñkenyʌññọ ñkpa utom ñkaña.

¹⁷ Ado ñkọm ekpeñnwaanwaañña miin esio nte unwọ-ñwọñ enọ ke uwa mme unam utom a-atooho ke mbuọdidem ndufo, ami mmenem esịd ñnyʌñ ndaara mme afịd ndufo.

¹⁸ Ke ntodo akpena ndufo ñko enemesịd enyʌñ edaara mme ami.

Timoti ye Epafrọditus

¹⁹ Ami mmenie idodanyen ke Abọọñ Yisọs adidọñ Timoti usọp-usọp inọ ndufo, nọ ami ñko ñkop idem inem ke adikop ñkpọ mbaña ndufo.

²⁰ Ami nnieeghe awo ndomokeed mfen a-abiotto anye ke adinie ata eti akikere mbaña mme ñkpọ se ifọn mme ndufo.

²¹ Sia ukeed awo esʌk eyem udʌk ake ammọ ikpọọñ, iyemme ake Yisọs Krais.

²² Ado ndufo emediọọñọ ke Timoti ibaaha ntodo, sia kpa nte a-ayịn anamma utom mme ete ke anye anam utom eti etob mme ami.

²³ Mmekere adidọñ anye usọp-usọp ke mmadọdiọọñọ naña ñkpọ abono mme ami.

²⁴ Ndin mmedot anyen ke Abọọñ mbo ke ami ke idem mmi ñyaadi ke ini miidiikpeeneke.

²⁵ Ado mmekere mbo ke a-adot ami adimaana ndọñ Epafrọditus, ayịneka mmi, inọ ndufo, anye a-adooho andikeene nnam utom ye awo ekọñ, a-anyʌññọ ado asañautom ndufo, a-ndufo ekedọññọ ebo adise ñkpọ ambaña miin.

²⁶ Sia anye anie udọñ adikpikịt afịd ndufo, ndin anye a-afʌhọ ke ndufo edikikop ke idem ammọ ikisọññọ.

²⁷ Anye amaadọñọ ke akpanikọ akpere ñkpa. Ado Abasi amaanie mbọm abaña anye, ikinieeghe inọ anye ikpọọñ, ado amaanie annọ miin mbaak ndiben mfʌhọ ndian ke mfʌhọ.

²⁸ Ke ntak ami ke nnenekke nnie udọñ adidọñ anye inọ ndufo nọ ato do ndufo emaemaana ekịt anye, ndufo ekop inemesịd, ñko ami ñnyʌññọ mbọ mfịna eti aba.

²⁹ Edaara anye ke Abọọñ ye akwa idaara, enyʌñ ekpono mme awo nte anye,

³⁰ sia anye amaakpere adikpa ke ntak utom Krais, utuanyen adisaana uwem amọ ayaak anọ ke unwam a-ndufo mmiikikana innọ miin.