Efisọs 4 - Ñwed Abasi Ke Ikọ Ibibio Ayo Mfịn

Adidiana keed ye ñkọd ke idem Krais

¹ Nte awo ñkpakọb Abọọñ, ndin, ami ikpek ndufo mbo yak edu uwem a-adotto ikood a-ndufo ekebọọhọ.

² Isuuho idem afịd-afịd, inyʌñ iba emem-emem; inie ime, iyọ keed aken ke ima.

³ Idomo afịd ukeme adinịm adidiana keed ke Sịbidịd ato ke adibọbọ keed ke emem.

⁴ Idem keed ye Sịbidịd keed aba kpa nte ekikoodo ndufo ke idodanyen keed ke ini ekikoodo ndufo;

⁵ Abọọñ keed, mbuọdidem keed, uduọkmmọọñ keed;

⁶ Abasi keed ye Ete afịd awo, a-abaaha anọ afịd awo, ato afịd anyʌñ ado afịd ñkpọ.

⁷ Ado einọ ñnyịn keed-e-keed mfọn naña Krais adeeme.

⁸ Ami ado ntak ikọ Abasi abooho: “Ke anye amaakedọọk ke anyọñ, anye amaadat mbon e-ekesịneke ke ukad usʌñ anyʌñ adeeme mme enọ anọ mme awo.”

⁹ (Nso-o ke “anye amaakedọọk” awuọọñọ, ke miibọhọke ke anye ñko amaasọiyọ adʌk mme nnenịme mme ikpeghe isọñ?

¹⁰ Anye a-akesọiyọke anyʌñ ado anye a-akedọọkkọ akoñ akan afịd mme ebekpo ikpaanyọñ, nọ anye ayọhọ afịd unadod.)

¹¹ Ado Krais ke idem amọ akenọ usʌk awo edo mme abọsịd, usʌk edo mme brọfed, usʌk edo mme bastọ ye mme atitia,

¹² adibeeñe mbon Abasi idem mbaña utom unwam, nọ ekan ebọp idem Krais

¹³ tutu afịd ñnyịn inie adidiana keed ke mbuọdidem ye ke ifiọk ke Ayịn Abasi inyʌñ ikappa isọọñ ikisịm afịd udomo ñkpọ ke uyọhọ Krais.

¹⁴ Ke ntodo ñnyịn idiidooho nsek nditọ a-adooho afịm anək aka edem anək aka iso, anyʌññọ ado afuud adi mi afuud aka ko, ke afịd afịm ukpeeb ye afịd ñkara ye ndukanna mme awo ke nsu ammọ.

¹⁵ Utu ke ado, ke aditañ akpanikọ ke ima, ñnyịn ke afịd ñkpọ iyaikpoon idʌk ke anye a-adooho iwuod, a-adooho Krais.

¹⁶ Ato ke anye afịd idem, e-emaekekama nsio-nsio ñkek ikood idian atọ keed isọọñọ, akọt anyʌñ abọp idem amọ akama ke ima, naña ñkek keed-e-keed enam utom ammọ.

Item adidu uwem nte nditọ Abasi

¹⁷ Ke ntodo, ami idọkkọ ndufo, mmaana nsọọñọ mbo ke idak Abasi, ke inaaha ndufo eka iso edu uwem aba nte mme Yentaid enamma ato ke uyaha-uyaha akikere ammọ.

¹⁸ Ifiọk ammọ ado ñkịm-ñkịm, anyʌñ asịkke akpọñ edu uwem Abasi ato ntak unana adidiọọñọ a-asịneke ammọ ke idem ato ntak isọñesịd ammọ.

¹⁹ Sia afịd eti ntụụk ke idem ammọ amaakesop, ammọ ediyak idem esịn ke mme nsio-nsio ndiọi uwem, enyʌñ esʌk ekaaka iso ke mme ndiọi nduwʌd mfen.

²⁰ Ado ndufo ikidieeghe ididiọọñọ Krais ke utọ usʌñ ado.

²¹ Ke akpanikọ ndufo emaekop ebaña anye, emaenyʌñ ikpeeb ndufo ke anye nte asañake akekem ke akpanikọ a-asịneke ke Yisọs.

²² Ekikpeeb ndufo ebaña ñkaan eduuwem ndufo, ekebo esioño ñkaan idem e-emaebiaara ato ke mme ndubio-ndubio udọñ,

²³ nọ enam ndufo edo ufa ke eduuwem ye ke akikere;

²⁴ enyʌñ esịne ufa idem, e-ekebotto nọ aba nte Abasi ke nnen-nnen ido ye adisana uwem ke akpanikọ.

²⁵ Ke ntodo ana afịd ndufo ekọññọ nsu esio enyʌñ etañ akpanikọ enọ mbọhọidʌñ ndufo sia afịd ñnyịn idoñño ñkek idem keed.

²⁶ “Ke iyadesịd ndufo ikiinam idiọọk.” Kuuyak utịn asuuhọ adusịme ye iyadesịd,

²⁷ ñko kuunyʌñ unọ andidiọọk ndomo mbeñe ufañ adiboiyo ndʌk.

²⁸ Anye a-asiyịppe inọ inaaha ayịp aba, ado anam utom, anam ñkpọ se ifọn ke ubọk amọ nọ anye anie se akeme adideeme nnọ mbon unana.

²⁹ Ikiiyak idiọọk ikọ ndomokeed iwuọ ndufo ke inua, ado sʌk se ikeme adinwam adibenne mme awo ke unana ammọ, nọ mbon e-ekpañña utọñ ebọ ufọn ñko.

³⁰ Ikiinyʌñ inọ Adisana Sịbidịd Abasi mbʌññọ esịd, anye e-ebenne isọọñọ ndufo tutu usen adifak.

³¹ Top idiọọkesịd, utọk ye ifiobesịd, añwan ye ikọ, ubiad anyịñ ye afịd-afịd udod awo uyo duọọk.

³² Fọn ido nyʌñ kop mbọm baña emọ-emọ awo, feen nọ keed aken kpa naña Abasi akefeen inọ ndufo ke Krais.