Efisọs 3 - Ñwed Abasi Ke Ikọ Ibibio Ayo Mfịn

Utịbe uduak Abasi anọ mme Yentaid

¹ Ke ntak ami, ami Bọọd, awo ñkpakọb Krais Yisọs ke ntak ndufo mme Yentaid.

² Ke akpanikọ ndufo emekop ebaña ukama mfọn Abasi e-ekennọọhọ miin inọ ndufo,

³ ami ado, ndedịbe ñkpọ e-ekenamma ndiọọñọ ke adiyaara, nte mmaakewewet, ibio-ibio.

⁴ Ke adikood ami ndin, ifiọk ake ami nnieeghe mbaña ndedịbe ñkpọ Krais ayainwaña ndufo,

⁵ e-ediikiyarake inọ mme awo ke mme emana mfen, nte ami Sịbidịd Abasi ayaarake idahami ke ndisana mme abọsịd ye mme brọfed.

⁶ Ndedịbe ñkpọ a-abaaha ado, ke ntak ikọ Abasi mme Yentaid edoñño mme adia akpa mme ubon Isred, e-ebatta edian keed ke ubon Abasi e-enyʌññọ ewuaana keed ke enwọñọ ke Krais Yisọs.

⁷ Ami mmaakappa ndo afʌn ikọabasi, ami ato ke mfọn a-Abasi annọọhọ miin ato ke mme utom adudu amọ.

⁸ Akpesʌk ado nte ami nsuuhọke ñkan andisịp ñkan ke atu nditọ Abasi, ekennọ miin mfọn ami adikwọrọ nnọ mme Yentaid mme inie ke Krais a-awo mmiikemeke adidiọọñọ,

⁹ ye adinyʌñ nnam ndedịbe enọ ami anwaña afịd awo, a-adooho ke mme ayo a-akeboiyoke ekedeedịp ke Abasi, anye a-akebotto afịd ñkpọ.

¹⁰ Udọñ amọ akedo yak idahami, ato ke ufọkabasi, mme ukara ye mme adudu ke mme ikpeghe ebekpo ubọọñ ediọọñọ ebaña akwa anana mbied ekike Abasi,

¹¹ nọ asaña akekem ke nsi-nsi uduak amọ a-anye akenamma asu ke Krais Yisọs Abọọñ ñnyịn.

¹² Ke anye, anyʌñ ato ke mbuọdidem ke anye, ñnyịn imikeme adisaña ñkpere Abasi ke ñkpọkñyak ye uko.

¹³ Ke ntodo, ami idọkkọ ndufo mbo ikiiyak idem imem ndufo ke ntak ukuud a-ami mbọọhọ ke ntak ndufo, a-adooho ubọọñ ndufo.

Adibọñ akam nnọ mbon Efisọs

¹⁴ Ke ntak ami mmetọọñọ edọñ ke iso Abasi,

¹⁵ a-afịd ubon ke abio Abasi mme ke ederimbod enieeghe anyịñ eto.

¹⁶ Ami mbọñ akam mbo ke ntak mfọn ye ubọọñ amọ, anye inọ ndufo nsọọñọnda ye adudu a-atooho ke Sịbidịd amọ ke esịd ndufo,

¹⁷ nọ Krais adʌñ ke esịd ndufo ato ke mbuọdidem. Ñnyʌñ mbọñ akam ñko mbo ndufo e-emaekesọọñọ eda ke ima,

¹⁸ ekan enie adudu, ediana ye ukeed ndisana awo, nọ se ido ubom ye uniọñ ye ukoñ ye unịme ima Krais atʌm inwaña ndufo,

¹⁹ nọ ediọọñọ ima a-akanna ifiọk ma ato do ndufo ekan eyọhọ ke udomo afịd adiyọhọ ake Abasi.

²⁰ Idahami yak anye a-akemeke adinam ñkan se ekpedodomo adibịp me adikere, nte asañake akekem ke adudu a-anamma utom ke esịd ñnyịn,

²¹ abọ ubọọñ ke ufọkabasi ye ke Krais Yisọs ke afịd mme emana, ke nsi-nsi nsi-nsi! Amen.