Efisọs 2 - Ñwed Abasi Ke Ikọ Ibibio Ayo Mfịn

Adimaana ndu uwem ke Krais

¹ Ndufo e-emaekpañña ke ntak ndiọiñkpọ ye ukwañ uwem,

² a-ndufo ekedụụho ke adikikeene ndʌk mme usʌñ ederimbod ami, ye ake andida ukara ubọọñ ke ikpeghe afịm, sịbidịd a-anamma utom idahami ke esịd mbon e-etreke utọñ.

³ Ukeed ñnyịn ikinyʌñ iba ke atu ammọ ini keed ko, ikidu uwem inọ adiyʌkkọ uwʌd emana idiọọk ñkpọ ñnyịn ye adikeene mme udọñ ye mme akikere ammọ. Kpa nte mbon ñko, tọọñọ ke emana ñnyịn ikidoñño ñkpọ iyadesịd.

⁴ Ado ke ntak akwa ima a-anye anieeghe ibaña ñnyịn, Abasi a-mbọm amọ akponno,

⁵ amaanam ñnyịn idu uwem ye Krais akpesʌk ado imaikikpañña ke mme ukwañ ñkpọ, ado ato ke mfọn ke ndufo ebọ adinyaaña.

⁶ Ndin Abasi amaidịppe ñnyịn ke anyọñ ye Krais anyʌñ anam ñnyịn itie ye anye ke mme ikpeghe ebekpo ubọọñ ke Krais Yisọs,

⁷ nọ ato do ke mme isua a-adiidi, anye adikan iwọt anana mbied mme inie ke uwak mfọn amọ a-anye anamma isịm ñnyịn ke mfọnido amọ ye ñnyịn ke Krais Yisọs.

⁸ Sia ke mfọn ke inyaaña ndufo, ato mbuọdidem, ndin ami idooho ke idem ndufo, ado enọ a-atooho Abasi,

⁹ idooho ke mme utom, mbaak awo ndomokeed adiduaak inua.

¹⁰ Sia ñnyịn ido mme andinam utom Abasi e-ekebotto ke Krais Yisọs ete inam nti utom, a-Abasi amaakebebem iso abeeñe anọ ñnyịn adinam.

Enam emem ke ufọọd mme Yuu ye mme Yentaid ato ke Krais

¹¹ Ke ntodo, itoiyo ibo ke ndufo ekedoñño mme Yentaid ke emana ndin mbon e-ekoodo idem ammọ “mme andinịm mboppo” (e-enamma ke ikpọkidem ke ubọkawo) ikood ndufo “mme edʌd,”

¹² itoiyo ibo ke idahako ndufo ekeda isio-isio ekpọñ Krais, ikisịneke ke atu nditọ Isred, ekenyʌñ edoñño isen ke abaña akaaña enwọñọ, enana idodanyen enyʌñ enana Abasi ke ederimbod.

¹³ Ado idahami, ke Krais Yisọs ndufo a-adooho ini keed ekeda ke anyanusʌñ, e-enam ndufo esaña ekpere ke iyiib Krais.

¹⁴ Sia anye ke idem amọ ado emem ñnyịn, a-amaakenam iba edo keed ndin amaanyʌñ abiad ñkpọ ubiọọñọ, ndibene ubakka ye ndusuaara,

¹⁵ ke adiben ibed ye mme ewʌghọ ye ndutʌm unañña ñkpọ ammọ mfep ke ikpọkidem ammọ. Uduak amọ akedo adibot ke idem amọ ufa awo keed ke atu iba ado nyʌñ nsịn emem ke adinam ntodo.

¹⁶ Ndin ke abʌkidem ami adinam emem ke atu ammọ iba ami nnọ Abasi, ato ke krọs a-anye adatta awot ndusuaara ammọ.

¹⁷ Anye amaadi adikwọrọ emem inọ ndufo e-ekebaaha ke anyanusʌñ anyʌñ akwọrọ emem anọ mbon e-ekebaaha ekpere.

¹⁸ Sia ke anye ñnyịn uduod iba iminie ufañ adikịt Abasi ke Sịbidịd keed.

¹⁹ Ke ntodo ndufo idooho aba isenawo ye mme andidʌñ, ado emekeene esịne ke atu mme andido mbon Abasi ye mbon esịd ufọk amọ,

²⁰ e-ebenne mme abọsịd ye mme brọfed nte itiad idakisọñ ebọp, ye Krais Yisọs ke idem amọ nte etubom itiad inuuk.

²¹ Ato ke anye afịd ufọk adiana keed, ndin anye ufọk akoñ akappa adisana tembịd ke Abọọñ.

²² Ndin ke anye, enyʌñ esʌk ebọp ndufo edian keed nọ enyʌñ ekappa itie idʌñ a-Abasi adʌññọ ke esịd, ke Sịbidịd amọ.